Bandi Bayish’ija Empingu?
Ishuzo ly’Ebibliya
Nnâmahanga acishozire Bakristu basungunu bishwekerezi, enyuma z’okufa kwabo, bayish’ifûka bajilama empingu. (1 Petro 1:3, 4) Erhi bacishogwa, bashinganine bagendekere babêra bishwekerezi omu buyemere n’omu lugenzi lwinja lyo barhayishig’ibula bwahâbwa ishungwe erhi luhembo lwabo l’okulama empingu.—Abefezi 5:5; Abafilipi 3:12-14.
Bici abaja empingu bayish’ijira?
Bayish’ikola haguma na Yezu nka bami na bakuhani omu myaka 1 000. (Amafulûlo 5:9, 10; 20:6) Bobayish’ijira “amalunga mahyahya,” erhi burhegesi bw’empingu, burhegesi bwayish’irhegeka “igulu lihyahya,” erhi lubaga lw’omw’igulu. Abo barhegesi b’empingu bayish’irhabala bene bantu bacib’iba bashinganyanya nk’oku Nnâmahanga al’ilonzize aha murhondero.—Izaya 65:17; 2 Petro 3:13.
Bantu banga bayish’ifûka lyo bagend’ilama empingu?
Ebibliya eyerekine oku bantu 144 000 bayish’ifûka lyo balama empingu. (Amafulûlo 7:4) Omu cibonekerezi ciganirirwe omu citabu c’Amafululo 14:1-3, entumwa Yowane yabwine “Omwana-buzi ayimanzire oku ntondo ya Siyoni erhi ali haguma na barhôle bihumbi igana na makumi ani na bini.” Mw’eci cibonekerezi, “Omwana-buzi” ashushanyize Yezu wali wamafûlwa. (Yowane 1:29; 1 Petro 1:19) “Entondo ya Siyoni” eshushanyize ecikono c’olukengwa ca Yezu haguma na balya bishogwa 144 000 bayish’irhegeka haguma naye omu mpingu.—Ennanga 2:6; Abahabraniya 12:22.
Balya “bahamagirwe bo bîshogwa” lyo barhegeka haguma na Kristu omu bwami bo bali nka “buso busungunu.” (Amafulûlo 17:14; Luka 12:32) Oko kuyerekine oku bakabire basungunu omu kubagerera oku mubale gw’ebibuzi byoshi bya Yezu.—Yowane 10:16.
Entanya z’obunywesi okubiyerekire abaja empingu
Entanya z’obunywesi: Abantu binja boshi banaje empingu.
Okuli: Nnâmahanga alanganyize bantu banji binja oku bayish’ihâbwa akalamo k’ensiku n’amango hanw’igulu.—Ennanga 37:11, 29, 34.
Yezu adesire ntya: “Ntaye wayinamukire empingu.” (Yowane 3:13) Ayerekine n’obwalagale oku abantu binja bafîre embere zage, kwa lwiganyo Abrahamu, Musa, Ayubu, na Daudi, barhajaga empingu. (Ebijiro by’Entumwa 2:29, 34) Lubero n’oko, bal’igwerhe obulangalire bw’okuyish’ifûlwa lyo balama hanw’igulu.—Ayubu 14:13-15.
Obufûke bw’akalamo k’empingu buhamagirwe “bufûke burhanzi.” (Amafulûlo 20:6) Oko kuyerekine oku ahanyuma n’obo bufûke hay’ishiba obundi bufûke. Bwayishiba bufûke bwa hanw’igulu.
Ebibliya eyigirizize oku idako z’oburhegesi bw’Obwami bwa Nnâmahanga, “olufû ntalwo lwacihabê.” (Amafulûlo 21:3, 4) Eci ciragane cahikirizibwa okw’igulu, bulya olufû lurhazigiba empingu.
Entanya z’obunywesi: Ngasi muntu yeshi-yeshi mwishoge abe mukazi erhi mulume ayishiba n’akalamo empingu erhi hanw’igulu.
Okuli: Nnâmahanga yene ohiga Bakristu bahi bishwekerezi bayish’ihâbwa ‘oluhembo Nyamuzinda abahamagaliraga,” k’okuderha, bulangalire bw’akalamo k’empingu. (Abafilipi 3:14) Arhali irala ly’omuntu erhi ebi azigira byo byakarhuma Nnâmahanga acishoga ye ly’ayish’ilama empingu.—Mateyo 20:20-23.
Entanya z’obunywesi: Obulangalire bw’akalamo k’ensiku n’amango hanw’igulu buli bwa bantu bagayaguze, kalamo kahânyirwe kuli balya barhagwerhi olukengwa lw’okuja empingu.
Okuli: Nnâmahanga ahamagire balya bayish’ihâbwa akalamo k’ensiku n’amango hanw’igulu ‘lubaga lwani,’ ‘bishogwa bani,’ “abagishwa ba Nyakasane [Yehova, NWT].” (Izaya 65:21-23) Bayish’iyunguka n’olukengwa lw’okuhikiriza omuhigo Nnâmahanga agwerhe kuli bene bantu kurhenga emurhondero; k’okuderha akalamo k’imana k’ensiku n’amango okw’igulu paradizo.—Omurhondêro 1:28; Ennanga 115:16; Izaya 45:18.
Entanya z’obunywesi: Omubale gw’abantu 144 000 bayerekinwe omu Amafulûlo eri nshushanyo, ci gurhali mubale gw’onakuli.
Okuli: Ciru akaba omu Amafulûlo muba emibale y’enshushanyo, mibale miguma na miguma ekolesibwe omu njira y’okuli. Kwa lwiganyo, eco citabu ciganirire “amazîno ikumi n’abirhi g’entumwa ikumi n’ibirhi z’Omwana-buzi.” (Amafulûlo 21:14) Olole ebintu by’okunali byakarhuma rhwayemera oku omubale 144 000 nago guli gw’okunali.
Amafulûlo 7:4 gaganirire “banga bahebirwekwo ecimanyiso [erhi aba Nnâmahanga acishozire lyo bayish’ilama empingu] bihumbi igana na makumi ani na bani.” Omu binwa bikulikire by’olu lwandiko, e cigusho ca kabirhi ciri lubero naco: “ehitû hy’abantu barhankaganjwa.” Abo b’omu ‘hitû hy’abantu’ nabo banayokolwe na Nnâmahanga. (Amafulûlo 7:9, 10) Acibage omubale 144 000 gunakolesibwe omu njira y’olwiganyo kone, omu kuderha oku ciri cigusho cirhakaganjwa, harhakacibire olubero egarhi k’ebyo bigusho byombi. a
Omukuyushula, bantu 144 000 bayerekinwe oku bo balya “bashomôlwirwe omu karhî k’abandi bantu bacîshogwa mpu babe mwaka muhyahya [malehe marhanzi, NWT].” (Amafulûlo 14:4) Oluderho “malehe marhanzi” luganirire bwinjinja balya boshi bayish’irhegeka haguma na Kristu omu kasanzi karhali kanyi hanw’igulu.—Amafulûlo 5:10.
a Entanya zishushine n’ezo ziri za Profesere Robert L. Thomas , wayandikaga lugenda omubale 144 000 guyandisirwe omu Amafulûlo 7:4: “Guli mubale gumanyikine guhugwîre omubale gurhamanyikini gw’ecigabi ca 7:9. Erhi akaba ogo mubale gwanabonwa nka lwiganyo kone, nta gundi mubale omu citabu gwakarhôlwa oku guli mubale gw’okunali.”—Revelation 1-7: An Exegetical Commentary, Bukurasa bwa 474.
Olole n'Ebi Bikulikire
ENYIGIRIZO Z'OMUSINGI Z'EBIBLIYA
Obwami bwa Nnâmahanga Byo Bici?
Erhi Yezu aba ali omu mukolo gwage gw’amahubiri hanw’igulu, aganirîre Obwami bwa nnâmahanga kulusha eyindi myanzi. Hakola hali myaka minji abantu basalira ly’Obwami bwa Nnâmahanga buyisha.
ENYIGIRIZO Z’EBIBLIYA
Oyige Ebibliya Haguma na Nirhu
Oyige Ebibliya omukuganira buzira kulipa kantu koshi-koshi.