Mikayeli, oyu madîni maguma na maguma gaderha mpu “Mutagatifu Mikayeli,” lir’izino Yezu ahâbagwa embere n’enyuma z’akalamo kage kahanw’igulu. a Mikayeli baja kadali bo na Shetani enyuma z’okufâ kwa Musa anarhabala Malahika wahekeraga Daniyeli emyanzi ya Yehova. (Daniyeli 10:13, 21; Yuda 9) Mikayeli anakalama nk’oku izino lyage liba lidesire​—“Indi oli Aka Nnâmahanga?”​—omu kuhalira oburhegesi bwa Nnâmahanga n’omukulwisa abashombanyi ba Nnâmahanga.​—Daniyeli 12:1; Amafulûlo 12:7.

 Rhubonage bulya gurhi rhuhikire okuyemera oku Yezu ye Mikaheli malahika mukulu.

•   Mikayeli ye “malahika mukulu.” (Yuda 9) Izino ly’eceyo “malahika mukulu,” k’okuderha “mukulu wa bamalahika,” libonekine muli mandiko abirhi gone g’omu Bibliya. Muli ago mandiko gombi, oluderho Malahika mukulu lurhaganiriri bantu banji, k’okuderha oku malahika muguma yene ogwerhe obo bukulu erhi ceyo. Okubiyerekire Nnawirhu Yezu wafûlagwa, lwandiko luguma mw’ago abirhi ludesire ntya: “Oku izu lya Malahika mukulu n’oku mushekera gwa Nyamuzinda, Nyakasane [Yezu] yêne anayandagale.” (1 Abatesalonika 4:16) Yezu agwerhe “izu lya malahika mukulu” bulya yene ye Mikayeli, Malahika mukulu.

•   Mikayeli ye komanda w’omurhwe gwa ba Malahika. “Mikaheli bo na Balahika bage balwisa e nkuba-joka,” Shetani. (Amafulûlo 12:7) Mikayeli agwerhe oburhambo bukulu omu burhegesi bw’ekiroho, co cirhuma ahamagalwa “muguma w’omu barhambo bakulu” na “murhambo mukulu.” (Daniyeli 10:13, 21; 12:1) Ago mazino g’eceyo gayerekine Mikayeli nka “komanda mukulu w’emirhwe ya bamalahika,” nk’oku David E. Aune, musomi w’eby’Endagano Mpyahya adesire.

   Ebibliya eyerekine izino lya muntu muguma yene ojira obukulu oku murhwe gwa bamalahika goshi. Ehugwîre amango “Nyakasane Yezu aciyerekanira emalunga haguma na bamalahika n’obuhashe bwage, omu ngulumira y’omuliro, mpu ahane.” (2 Abatesalonika 1:7, 8; Mateyo 16:27) Yezu ‘arheremire empingu anahira bamalahika n’amami n’amahashe idako ly’oburhegesi bwage.’ (1 Petro 3:21, 22) Birhakayumvikana okuderha oku Nnâmahanga ajijire Yezu na Mikayeli babe ba komanda babirhi bali kamashigwe oku murhwe gwa bamalahika batagatifu. Lubero n’oko, biyumvikine okuderha oku ago mazino gombi, Yezu na Mikayeli, gali ga muntu muguma.

•   Mikayeli “ânayimange” amango g’amalibuko garhazag’ihaba bundi, “mango ga malumwa.” (Daniyeli 12:1) Omu citabu ca Daniyeli, oluderho “kuyimanga” lunakayirukir’ikolesibwa omukuganirira omwami ocirheganyize okujira mukolo mulebe gwago-gwago. (Daniyeli 11:2-4, 21) Yezu Kristu, aba amanyikine nka “Luderho wa Nyamuzinda,” wayish’ijira mukolo mulebe gwago-gwago ye nka “Mwami w’abami” lyo ahererekeza abashombanyi boshi ba Nnâmahanga n’okulanga olubaga lwa Nnâmahanga. (Amafulûlo 19:11-​16) Ayish’ijira ntyo omu mango g’a“ malibuko garhazig’iboneka kurhenga okulemwa kw’igulu kuhika buno.”​—Mateyo 24:21, 42.