Mariya Magdalena ye Wali Ndi?
Ishuzo ly’Ebibliya
Mariya Magdalena ali mwanafunzi mwishwekerezi wa Yezu Kristu. Izino lyage lirhenzire omw’izino lya vile nguma yakagihamagalwa Magdala (ciru nkaba kandi yakagihamagalwa Magadân), yali hofi n’enyanja y’e Galilaya. Byanahashikana Mariya alilamire eyo munda.
Mariya Magdalena ali muguma w’omu bakazi bakagilusa Yezu omu mibalamo yage haguma n’abanafunzi bage ananakagibarhabala n’ebirugu balagirireko. (Luka 8:1-3) Abwîne oku Yezu anigwa ananali muguma w’omu bakazi barhanzi babonaga Yezu enyuma z’okufûka.—Marko 15:40; Yowane 20:11-18.
Ka Mariya Magdalena ali ndumba?
Ebibliya erhadesiri oku Mariya Magdalena ali ndumba. Okubiyerekire akalamo kage k’embere, Ebibliya edesire oku Yezu amurhenzagyamwo bazimu nda.—Luka 8:2.
Cikoki, bulya gurhi bantu baguma baguma bakarhanya oku Mariya Magdalena ali ndumba? Magana manji ga myaka enyuma z’okufâ kwage, bantu baguma na baguma barhondera baderha oku ali ndumba n’oku y’olya mukazi (wali nka ndumba) wavugumuliraga emirenge oku magulu ga Yezu anayihôrhola n’emviri z’oku irhwe lyage. (Luka 7:36-38) Cikoki, ntaho Ebibliya eyigirizize ntyo.
Ka Mariya Magdalena ali “ntumwa y’entumwa za Yezu”?
Nanga. Akanisa Katoliki kanakayigiriza oku “Mariya Magdalena ali Mutagatifu” erhi “ntumwa y’entumwa za Yezu”, mpu bulya ali omu bakazi barhanzi bali bamanyisa oku Yezu anafûsire. (Yowane 20:18) Cikoki, oko kurhali kuderha oku anahamagalwa ntumwa. N’omu Bibliya, ntaho bamuhamagire oku ali ntuma.—Luka 6:12-16.
Ebibliya yoshi yahwaga okuyandikwa hofi oku buzinda bw’emyaka igana mirhanzi muli kano kasanzi kirhu (K.K.K) Cikoki myaka magana ndarhu (Karne ka 6) enyuma z’aho lyo abakulu b’akanisa barhondire bamuganjira omu batagatifu. Bitabu biguma na biguma birhalongozibagwa n’iroho lya Nnâmahanga byayandikagwa omu myaka magana abirhi n’omu myaka magana asharhu muli kano kasanzi kirhu (K.K.K), bidesire mpu abaganda bakayumviza Mariya obumvu. Cikone eyo myanzi y’obwihambi erhali omu Bibliya.
Ka Mariya Magdalena ali muka Yezu Kristu?
Naga. Ebibliya eyerekine n’obwalagale oku Yezu arhajaga omu buhya. a
a Olole ecigabi ciri omu Cifaransa cidesire ntya: “Jésus était-il marié? Avait-il des frères et soeurs?”
Olole n'Ebi Bikulikire
MUYIGE OBUYEMERE BWABO
Mariya Magadalena—“Nabwine Nnawirhu!”
Oyo mukazi w’obuyemere ahâbirwe olukengwa lwago-lwago lw’okuganirira abandi omwanzi mwinja.
ENYIGIRIZO Z’EBIBLIYA
Oyige Ebibliya Haguma na Nirhu
Oyige Ebibliya omukuganira buzira kulipa kantu koshi-koshi.