Nanga, Ebibliya erhayigirizizi oku Mariya ye nina wa Nnâmahanga, na ntaho eyerekine oku Abakristu bashinganine baharamye erhi kuha Mariya olukengwa lurhalusize olugero. a Orhanye kw’ebi:

•   Nta lusiku Mariya aciyalagazize oku ye nina wa Nnâmahanga. Ebibliya edesire oku Mariya abusire “Mwene Nyamuzinda” ci arhali Nyamuzinda.​—Marko 1:1; Luka 1:32.

•   Yezu arhaderhaga oku Mariya ali nina wa Nnâmahanga arhanaderaga oku ashinganine okuhâbwa olukengwa lwago-lwago. Yezu akalihira mukazi muguma wahâga Mariya olukengwa lurhalusize olugero okubona ye wamuburhaga, amubwira erhi: “Abw’obushagaluke bo balya bayumvirhiza akanwa ka Nnâmahanga n’okukalama!”​—Luka 11:27, 28, NWT.

•   Enderho “Nina wa Nnâmahanga” na “Theotokos” ntaho ziba omu Bibliya.

•   Oluderho “Mwamikazi w’Emalunga” luli omu Bibliya, lurhayerekire Mariya ciru n’ehitya, cikoki luyerekire hinnâmahanga hy’omukazi hy’obunywesi aba Israheli bagoma bakagiharamya. (Yeremiya 44:15-19) Byanahashikana oyo “Mwamikazi w’Emalunga” ali Ishtari (Astarte), nnâmahanga mukazi w’e Babiloni.

•   Abakristu b’omu myaka igana mirhanzi barhakagiharamya Mariya, na kandi barhanamuhaga olukengwa lwago-lwago ciru n’ehitya. Mwandisi muguma w’endibi adesire oku Abakristu barhangiriza “bakagilahira okuha rhunnâmahanga enterekêro, na kandi bali hugûsirwe oku okuhâ Mariya olukengwa lurhamushinganini kwakayerekine oku bali baharamya nnâmahanga mukazi.”​—In Quest of the Jewish Mary.

•   Ebibliya edesire oku ho Nnâmahanga aba ensiku zoshi. (Ennanga 90:1, 2; Izaya 40:28) Bulya arhajira murhondero, oko kuyerekine oku arhanajira nina. Rhuyushûle ntya, Mariya arhakahesire nnâmahanga omu nda yage; Ebibliya eyerekine n’obwalagale oku igulu lirhakabona aha lyahira Nyamuzinda.​—1 Abami 8:27.

Mariya​—Ali Nina wa Yezu ci Arhali “Nina wa Nnâmahanga”

 Mariya aburhagwa omu mulala gw’Abayahudi, anali w’omw’iburha lya Mwami Daudi. (Luka 3:23-31) Nnâmahanga amuzigira bwenene bulya aligwerhe obuyemere muli ye anali wakucihâna emwage. (Luka 1:28) Nnâmahanga acishoga ye mpu abe nina wa Yezu. (Luka 1:31, 35) Mariya abusire abandi bana haguma n’iba Yozefu.​—Marko 6:3.

 Ciru akaba Ebibliya eyerekine oku Mariya abîre mwanafunzi wa Yezu, erhahanyiri myanzi minji kuli ye.​—Ebijiro by’Entumwa 1:14.