Ka Nnâmahanga Aba Ngasi Hoshi?
Ishuzo ly’Ebibliya
Nnâmahanga anabone ngasi kantu, na kandi, anakola kantu kalebe ngasi hantu alonzize. (Emigani 15:3; Abahabraniya 4:13) Ebibliya erhadesiri oku Nnâmahanga aba hoshi hoshi, omu bintu byoshi. Cikone, eyerekine oku aba muntu anajira aha alama.
Oku Nnâmahanga ayorha: Nnâmahanga aba muntu wa kiroho. (Yowane 4:24) Bene bantu barhakamubona. (Yowane 1:18) Ebibonekerezi biri omu Bibliya okubiyerekire Nnâmahanga biyerekine kanji kanji oku ajira aha alama. Ntaho bayerekine oku aba ngasi hoshi.—Izaya 6:1,2; Amafulûlo 4:2, 3, 8.
Aha Nnâmahanga alama: Nnâmahanga analame ahantu h’ekiroho hali lubero bwenene n’aha ebiremwa byage bilama. Analame “omu mpingu.” (1 Abami 8:30) Ebibliya eganirire mango maguma ebiremwa by’ekiroho “bayishaga baja embere za Yehova,” a n’oko kuyerekine oku kobinali Nnâmahanga ajira hantu halebe alama.—Ayubu 1:6.
Akaba arhaba ngasi hantu, k’ananshibirira?
Neci. Nnâmahanga anashibirire abantu bwenene. Ciru akaba analame ahantu h’ekiroho, anabone abantu boshi b’okw’igulu bacihangana okumusimisa, ananabarhabale. (1 Abami 8:39; 2 Enganîro 16:9) Rhulole gurhi Yehova ayerekana oku anashibirire abantu bamuharamya n’omurhima goshi:
Erhi osalira: Yehova anayumve isala lyawe omu mango ociri waliderha.—2 Enganîro 18:31.
Amango ovunisire omurhima: “Yehova aba hofi n’emirhima egayire; anacungule abavunisire omurhima.”—Ennanga 34:18.
Amango olagirire oku bulongozi: Yehova ‘akuyigiriza anakulangule enjira’ kugerera Ebibliya, Kanwa kage.—Ennanga 32:8.
Entanya z’obunywesi okubiyerekire okubaho kwa Nnâmahanga
Obunywesi: Nnâmahanga aba hoshi hoshi omu biremwa.
Okuli: Nnâmahanga arhalama hanw’igulu arhanalama omu malunga gabonekana n’amasu. (1 Abami 8:27) Kobinali, enyenyezi n’ebindi biremwa ‘binaganire irenge lya Nyamuzinda.’ (Ennanga 19:1) Cikone, arhalama omu biremwa byage nka kula omutuzi w’ebintu “(artiste) arhalama omu kantu atulaga. Ciru akaba ntyo, akantu kalebe katulagwa kanarhuyigiriza binji okubiyerekire owakatulaga. Ko n’oko, ebiremwa bibonekana hanw’igulu binarhuyigirize binji okubiyerekire “amorhere [g’Omulemi] garhabonekana,” nk’emisi yage, obwenge bwage, n’obuzigire bwage.—Abaroma 1:20, Mashi Bible.
Obunywesi: Nnâmahanga ashinganine abe ngasi hoshi ly’akamanya ebintu byoshi na kandi ly’aba ogala-byoshi.
Okuli: Iroho litagatifu lya Nnâmahanga yo misi yage ajiramwo emikolo. Kugerera iroho lyage litagatifu, Nnâmahanga anabona n’okujira ngasi kantu, ngasi hoshi, n’akasanzi koshi, buzira kubaho ye nnene.—Ennanga 139:7.
Obunywesi: Olwandiko lwa Ennanga 139:8 luyigirizize oku Nnâmahanga aba hoshi hoshi omu kuderha ntya: “Erhi nankarheremera emalunga nanakubugana yo, erhi nankaja omu kuzimu erhi mwo onali.”
Okuli: Olo lwandiko lurhaganiriri aha Nnâmahanga alama. Cikone, lurhuyigirizize oku nta hantu emisi ya Nnâmahanga erhakahika ly’arhurhabala.
a Yehova lyo izino lya Nnâmahanga liyerekinwe omu Bibliya.
Olole n'Ebi Bikulikire
AMASHUZO G’EBIBLIYA
Iroho Litagatifu Byo Bici?
Kugerera ecirhumire cinja, Ebibliya ekolesize izîno iroho litagatifu nka “kuboko” kwa Nnâmahanga.”
AMAHUGÛLO G’EMILONGO Y’EBIBLIYA
Amahugûlo g’Olwandiko lwa Izaya 41:10—“Orhayobohaga, Bulya Ndi Haguma Nawe”
Yehova akolesize nderho isharhu ly’ayemeza n’obwalagale abakozi bage bishwekerezi oku abarhabala.
OKUBIRHUYEREKIRE
Obwire Abahamirizi ba Yehova Bakuyigirize Ebibliya
Obwire Abahamirizi ba Yehova bakulambagirire lyo muyiga emyanzi y’Ebibliya haguma, erhi okolese njira isharhu z’okuciyigiriza Ebibliya.