K’Obwami bwa Nnâmahanga Buba omu Murhima Gwawe?
Ishuzo ly’Ebibliya
Nanga, Obwami bwa Nnâmahanga erhaba hali eba omu mirhima y’Abakristu. a Ebibliya eyerekine ahantu h’okunali Obwami bwa Nnâmahanga buba omu kubuhamagala “Obwami bw’empingu.” (Mateyo 4:17) Olole gurhi Ebibliya eyerekinemwo oku Obwami bwa Nnâmahanga eri guvernema y’okunali eri yarhambula kurhenga empingu.
Obwami bwa Nnâmahanga bujira abarhambo, bacikala, amarhegeko n’omuhigo gw’okujira obulonza bwa Nnâmahanga bujirike omu mpingu n’okw’igulu.—Mateyo 6:10; Amafulûlo 5:10.
Oburhegesi bwa Nnâmahanga erhi Bwami bwage bwayish’irhambula “amashanja goshi, ebihugo byoshi, n’abantu b’endimi zoshi” z’omw’igulu. (Daniyeli 7:13, 14) Arhali bacikala b’obo burhegesi bo babuha obuhashe, cikone obuhashe bwabo bunarhenge emwa Nnâmahanga.—Ennanga 2:4-6; Izaya 9:7.
Yezu abwira entumwa zage nyishwekerezi oku bakacilunzire haguma naye omu Bwami bw’empingu n’oku ‘babwarhala oku ntebe’ z’Obwami.—Luka 22:28, 30.
Obo Bwami bujira abashombanyi bwayish’ishereza.—Ennanga 2:1, 2, 8, 9; 110:1, 2; 1 Abakorinti 15:25, 26.
Ebibliya erhaba eyigirizize oku Obwami bw’empingu buba omu murhima erhi bunarhambule kugerera omurhima gw’omuntu. Cikone eyerekine oku “oluderho lw’Obwami” erhi ‘omwanzi mwinja gw’Obwami’ gwanahuma oku mirhima yirhu, gunashinganine gujire ntyo.—Mateyo 13:19; 24:14.
Bici enderho “Obwami bwa Nyamuzinda buli ekarhi kinyu” zihugwîre?
Obwami bwa Nnâmahanga burhali omu mirhima migalugalu na miminya y’abashombanyi ba Yezu
Bantu baguma na baguma barhahugûkwa ngahi Obwami bwa Nnâmahanga buba erhi basoma enderho ziri omu Luka 17:21 omu mpindûlo nguma na nguma z’Ebibliya. Kwa lwiganyo, empindûlo ya King James edesire oku “Obwami bwa Nyamuzinda buli ekarhi kinyu.” Lyo rhuhugûkwa olo lwandiko bwinja, rhushinganine rhulole akanga lwayandikagwamo.
Yezu akag’iganiza Abafarizeyi, cigusho c’abakulu c’idîni bakag’imuhagalika banajira ekomplo y’okumuyirha. (Mateyo 12:14; Luka 17:20) Ka kobinali byanashikana Obwami bwa Nnâmahanga ebe yali hali y’emirhima yabo migalugalu? Yezu ababwira ntya: “Omu nda obulyalya n’obubi bwammuyunjulirîne.”—Mateyo 23:27, 28.
Ezindi mpindûlo z’Ebibliya zinahindule enderho za Yezu ziri omu Luka 17:21 omu njira eyumvikine n’obwalagale omukuderha ntya: “Obwami bwa Nnâmahanga buli hano haguma na ninyu.” (Rhwe rhuhizire luderho luguma omu Italique; Contemporary English Version) “Obwami bwa Nnâmahanga buli omu kagarhi kinyu.” (Mashi Bible) Obwami bw’empingu bwali “haguma” erhi “omu kagarhi” k’Abafarizeyi bulya Yezu wahizirweho na Nnâmahanga ly’arhegeka obo Bwami al’iyimanzire embere zabo.—Luka 1:32, 33.
a Madîni manji gacihamagala ga Cikristu ganayigirize oku Obwami bwa Nnâmahanga buba omu kandalala k’omuntu erhi omu murhima gwage. Kwa lwiganyo, omu États-Unis e Convention baptiste du Sud yadesire oku Obwami bwa Nnâmahanga buba “burhegesi bwa Nnâmahanga omu murhima n’omu kalamo k’omuntu.” Ko n’oko, omu citabu cihamagalwa Jésus de Nazareth, Papa Benoît XVI aderha oku “Obwami bwa Nnâmahanga buyisha kugerera omurhima guyumvirhiza.”
Olole n'Ebi Bikulikire
ENYIGIRIZO Z'OMUSINGI Z'EBIBLIYA
Obwami bwa Nnâmahanga Byo Bici?
Erhi Yezu aba ali omu mukolo gwage gw’amahubiri hanw’igulu, aganirîre Obwami bwa nnâmahanga kulusha eyindi myanzi. Hakola hali myaka minji abantu basalira ly’Obwami bwa Nnâmahanga buyisha.
AMAHUGÛLO G’EMILONGO Y’EBIBLIYA
Amahugûlo g’Olwandiko lwa Marko 1:15—“Obwami bwa Nyamuzinda Buli Hofi”
Ka Yezu alonzagya okuderha oku Obwami bwa Nnâmahanga bwali bwamarhondera okurhegeka?
ENYIGIRIZO Z’EBIBLIYA
Oyige Ebibliya Haguma na Nirhu
Oyige Ebibliya omukuganira buzira kulipa kantu koshi-koshi.