Neci. Nnâmahanga anashibirire abakozi bage balwazire. Muli oko, rhusomire ntya omu Bibliya: “Nyamuzinda anamulange oku ncingo alwalira.” (Ennanga 41:3, Mashi Bible) Erhi akaba okola ogwerhe myaka minji oli walwala, ebi bintu bisharhu bikulikire byanakuha oburhulirize:

1.   Oshenge Yehova akuhe emisi y’okulembera. Wanahâbwa “omurhula gwa Nnâmahanga gulushire ngasi nkengero,” ogo murhula gwanarhuma orhacikagiyoboha bwenene na kandi gwanakurhabala olembere eyo ndwala.​—Abafilipi 4:6, 7.

2.   Obe n’entanya nyinja. Ebibliya edesire ntya: “Omurhima gw’enshagali buba bufumu, cikwone omurhima gw’entanya gunalwaze.” (Emigani 17:22, Mashi Bible) Ocihangane okuba wanshagali, bulya okujira ntyo kurhakarhuma waciyumva bwinja kone ci kwanalerhera amagala gawe obunguke.

3.   Ozibuhye obulangalire bwawe omu biragane by’amango gayisha. Obulangalire bw’okunali bwanakurhabala obe n’omwishingo ciru akaba okola ogwerhe myaka minji oli walwala. (Abaroma 12:12) Ebibliya eyerekine oku hali amango “ntaye waciderhe erhi ‘ndi mulwala.’” (Izaya 33:24) Nnâmahanga anafumye ngasi bulwala n’eziyabira ba dokteri okubuka. Kwa lwiganyo, Ebibliya edesire okubiyerekire obushosi ntya: “Aho, omubiri gwage gwamashubibona obuzibu bw’eburho, anashubire omu mango gage g’obusole.”​—Ayubu 33:25.

 Omanye ntya: Ciru akaba Abahamirizi ba Yehova banalangalire oku Nnâmahanga abarhabala amango balwazire, banajire okwabo koshi lyo balonza oku bakabukwamwo. (Marko 2:17) Muli oko, barharholera muntu yeshi-yeshi omuhigo gw’oku akabukwa, rhurhanyize oku ngasi muguma agwerhe oluhûma l’okucishoga gurhi abukwamwo.