Obubatizo k’Okuderha gurhi?
Ishuzo ly’Ebibliya
Obubatizo kuli kuyuza erhi kudubika omuntu omu mishi n’okumuyubulula. a Co carhumaga Yezu abatizibwa omu lwishi lunene. (Mateyo 3:13, 16) Ko n’oko, olya mulume Muetiopiya ahûnaga oku abatizibwa erhi bahika aha “amishi [manji] gâli.”—Ebijiro by’Entumwa 8:36-40.
Obubatizo k’oku derha Gurhi?
Ebibliya eshushanyize obubatizo n’okubisha. (Abaroma 6:4; Abakolosi 2:12) Erhi omuntu abatizibwa omu mishi manji anabe nka kula omuntu afâ omu kuleka olugenzi lwage lwa mîra n’okurhondera okulama akalamo kahyahya k’okucihâna emwa Nnâmahanga. Obubatizo n’enjira erhulongoza rhuhikire okubatizibwa, eba mipango ya Nnâmahanga erhabala omuntu abe n’ezamiri ecîre eyimangire oku bwemere omu ngombôlo ya Yezu Kristu. (1 Petro 3:21) Co carhumaga Yezu ayigiriza oku abanafunzi bage bashinganine babatizibwe.—Mateyo 28:19, 20.
K’okubatizibwa omu mishi kunakûle ecaha?
Nanga. Ebibliya eyigirizize oku ebyaha birhu byanacesibwa kugerera oku muko gwa Yezu gwabulagagwa. (Abaroma 5:8, 9; 1 Yowane 1:7) Ly’omuntu ayunguka n’eyo ngombôlo ya Yezu, ashinganine abe n’obuyemere muli Yezu, ahindule akalamo kage omukulama kushimbana n’enyigirizo za Yezu anabatizibwe.—Ebijiro by’Entumwa 2:38; 3:19.
Okuhâbwa izino lihyahya amango g’obubatizo
Enderho “okubatizibwa omw’izino lihyahya” erhi “okuhâbwa izino lihyahya amango g’obubatizo” zirhaba omu Bibliya. Ezo nderho zinakakolesibwa na madîni maguma na maguma amango gajira idinye oku “bubatizo” bw’omwana (omu kumushahiza kw’amishi erhi kumubulagirago okw’irhwe) n’okumuha izino.
K’Ebibliya eba eyigirizize obubatizo bw’orhubonjo?
Nanga, erhayigirizizi ntyo. Obubatizo bw’Ecikristu buli bwa bantu bakuzire bakahugûkwa n’okuba n’obuyemere omu “myanzi y’akalembe k’Obwami bwa Nnâmahanga.” (Ebijiro by’Entumwa 8:12) Bobakahasha okuyumva Akanwa ka Nnâmahanga Bibliya, okukayemera, n’okuciyunjuza amango bajijire ecaha—bintu akabonjo karhahasha okujira.—Ebijiro by’Entumwa 2:22, 38, 41.
Omu kuyushula, Ebibliya eyerekine oku Nnâmahanga anabone abana barho b’Abakristu nka batagatifu, erhi bacîre omu lugenzi, kugerera oku bwishwekerezi bw’ababusi babo. (1 Abakorinti 7:14) Erhi akaba obubatizo b’orhubonjo bwal’iyemirwe, abana barho barhakacibire balagirire oku wundi muntu wakabarhabala lyo bayemerwa na Nnâmahanga. b
Entanya z’obunywesi okubiyerekire obubatizo bw’Ecikristu
Entanya z’obunywesi: Okushahiza erhi okubulagira amishi oku muntu konakumudubika erhi kumuyubiza omu mishi yeshi-yeshi.
Okuli: Obubatizo boshi-boshi buli omu Bibliya buganirire okuyubizibwa omu mishi. Kwa lwiganyo, amango omwanafunzi Filipo abatizagya olya mulume Muetiopiya, “bayandagalira omu mishi” ly’oyo Muetiopiya abatizibwa. Enyuma z’aho, ‘barhenga omu mishi.’—Ebijiro by’Entumwa 8:36-39. c
Entanya z’obunywesi: Mpu Ebibliya eyerekine oku erhi omulala goshi gwakabatizibwa n’orhubonjo rhuli m’ogo mulala rhoshi narho erhi rhunabatizibwe. Kwa lwiganyo, edesire lugenda omuntu wali omu prizo e Filipi: “Abatizibwa n’ab’ahamwage boshi.”—Ebijiro by’Entumwa 16:31-34, Mashi Bible.
Okuli: Ehistware y’oyo muntu wali omu prizo e Filipi eyerekine oku ngasi boshi babatizibwe bayumvirhe “akanwa ka Nyakasane [Yehova]” n’oku “anacisima n’enyumpa yage yoshi.” (Ebijiro by’Entumwa 16:32, 34) Oko kuhugwîre oku nta kabonjo ka mw’ogo mulala gw’oyo mulume wali omu prizo kabatizibwe, bulya karhakayumvirhe Akanwa ka Yehova.
Entanya z’obunywesi: Yezu ayigirizize oku Obwami bw’empingu buli bw’abana borho.—Mateyo 19:13-15; Marko 10:13-16.
Okuli: Yezu arhakag’iganirira obubatizo erhi aderha ezo nderho. Lubero n’oko, ayerekana oku abalonzize okuja omu Bwami bwa Nnâmahanga bashinganine babe nka bana barho—batûdu na bakuyemera bayigirizibwe.—Mateyo 18:4; Luka 18:16, 17.
a Oluderho lw’Ecigiriki luhindwire “bubatizo” lurhenzire omu luderho luhugwîre “kuyubiza.” Olole e Theological Dictionary of the New Testament, Ibugu lya I, bukurasa bwa 529.
b Nk’oku e International Standard Bible Encyclopedia edesire, “nta hantu hoshi-hoshi hayerekinwe omu ndagano mpyahya okubiyerekire obubatizo bw’orhubonjo.” Eco citabu cicibiri derha oku enkomedu y’okubatiza orhubonjo yayenire enyanya “z’entanya mbi zirhalusire olugero lugenda obubatizo,” mpu, obubatizo bunakûle erhi kushuka ebyaha.—Ibugu lya 1, bukurasa bwa 416-417.
c Idako ly’ecirhwe cidesire “obubatizo (omu bibliya),” the New Catholic Encyclopedia edesire : “Biyumvikine n’obwalagale oku obubatizo bwa madîni g’amango ga mîra bwa kag’ijirwa omu kudubika omuntu omu mishi manji.”—Ibugu lya 2, bukurasa bwa 59.
Olole n'Ebi Bikulikire
AMASHUZO G’EBIBLIYA
K’Amadîni Goshi go Ganaba Maguma? Ka Goshi Ganahêke emwa Nnâmahanga?
Bintu bibirhi biganirirwe omu Bibliya bihanyîre ishuzo.
ENYIGIRIZO Z'OMUSINGI Z'EBIBLIYA
Ka Nnamahanga Aba Ayemire Amadîni Goshi?
Bantu banji babà bayemire oku amadîni goshi go na maguma oku omuntu anacishoga er’alonzize.
ENYIGIRIZO Z’EBIBLIYA
Oyige Ebibliya Haguma na Nirhu
Oyige Ebibliya omukuganira buzira kulipa kantu koshi-koshi.