Yezu acungwire bene bantu bishwekerezi erhi ahâna obuzine bwage ngombôlo. (Mateyo 20:28) Co cirhuma Ebibliya ehamagala Yezu “Muciza w’igulu.” (1 Yowane 4:14) Ecibir’iderha ntya: “Na nta wundi obucire bwakarhengakwo; bulya en’igulu erhaba lindi izino ciru n’eliguma lyahirwe abantu lyankarhuciza.”​—Ebijiro by’Entumwa 4:12.

 Yezu “afîra abantu boshi” bajira obuyemere muli ye. (Abahabraniya 2:9, Mashi Bible; Yowane 3:16) Enyuma z’aho, “Nyamuzinda amufûla omu bafu,” na Yezu agaluka empingu nka ciremwa ca kiroho. (Ebijiro by’Entumwa 3:15) Yezu “anahash’iciza lwoshi abayegêra Nyamuzinda oku burhabale bwage bulya abâ azine ensiku n’amango mpu abalagire.”​—Abahabraniya 7:25.

Bulya gurhi rhuba rhulagirireko Yezu lyo arhulagira?

 Rhweshi rhuba banya-byaha. (Abaroma 3:23) Ecaha cinarhume rhurhayegera Nnâmahanga, cinanarhume rhwafâ. (Abaroma 6:23) Cikone Yezu anakole nka “mulagizi” wa balya boshi bajira obuyemere omu ngombôlo ahânaga. (1 Yowane 2:1) Anabalagire omukuhûna Nnâmahanga ayumvirhize amasala gabo n’okumuhûna ababalire ebyaha byabo kugerera enterekêro ahânaga erhi afâ. (Mateyo 1:21; Abaroma 8:34) Nnâmahanga anakole kushimbana n’ebyo Yezu amuhûnaga bulya biba bipatine n’obulonza bwage. Nnâmahanga arhumaga Yezu okw’igulu “lyo aciza igulu.”​—Yowane 3:17.

Ka kuba n’obuyemere muli Yezu kone kwakarhuciza?

 Nanga. Ciru akaba rhushinganine rhube n’obuyemere lyo rhucira, rhushinganine rhujire binji kulusha. (Ebijiro by’Entumwa 16:30, 31) Ebibliya edesire ntya: “Nka kula omubiri gurhalimwo mûka guba gufîre, kwo n’obuyemere burhagwerhi bijiro buba cifu.” (Yakobo 2:26) Lyo rhucunguka, rhushinganine:

•   Rhube n’obumanye lugenda Yezu n’Ishe Yehova.​—Yowane 17:3.

•   Rhube n’obuyemere muli bo.​—Yowane 12:44; 14:1.

•   Rhuyerekane obuyemere bwirhu omukurhumikira amarhegeko gabo. (Luka 6:46; 1 Yowane 2:17) Yezu ayigirizize oku arhali ngasi yeshi omubwira “Yagirwa” wayish’icunguka ci ‘olya ojira oku Ishe oli omu mpingu alonza.’​—Mateyo 7:21.

•   Rhugendekere rhwayerekana obuyemere bwirhu ciru akaba rhuli omu mazibu. Yezu ahugwîre oko erhi aderha ntya: “Cikone owanazibuhe [owanalembere] kuhika oku buzinda, oyo ye wacizibwa.”​—Mateyo 24:13, Mashi Bible.