Bulya Gurhi Yezu Ahamagalwa Mwene Nyamuzinda?

YEREKANA

Ishuzo ly’Ebibliya

Kanji-kanji Ebibliya enahamagale Yezu “mwene Nyamuzinda.” (Yowane 1:49) Oluderho “Mwene Nyamuzinda” lurhumanyisize oku Nnâmahanga ye mulemi, erhi nshôko, ya ngasi buzine, kuhiramo obwa Yezu. (Ennanga 36:9; Amafulûlo 4:11) Ebibliya erhayigirizizi oku Nnâmahanga abusire omwana nka kula bene bantu baburha abana.

Kandi Ebibliya ehamagire ba malahika “bene Nyamuzinda.” (Ayubu 1:6) Enadesire oku omuntu murhanzi, Adamu, ali “mwene-Nyamuzinda.” (Luka 3:38) Cikone, bulya Yezu co cali ciremwa cirhanzi ca Nnâmahanga na ciremwa calemagwa honaho na Nnâmahanga ye nnene, Ebibliya eyerekine Yezu nka Mugala cûsha wa Nnâmahanga.

Ka Yezu alamire empingu embere aburhwe hanw’igulu?

Neci. Yezu cali ciremwa c’ekiroho empingu embere aburhwe nka muntu hanw’igulu. Yezu yene adesire ntya: “nayandagalaga enyanya kurhenga empingu.”—Yowane 6:38; Mashi Bible 8:23.

Nnâmahanga alemire yezu embere aleme ngasi kandi kantu koshi koshi. Ebibliya edesire ntya, lugenda Yezu:

“Ye . . . nfula omu biremwa byoshi.”—Abakolosi 1:15.
Ye “cisiki c’ebi Nnâmahanga alemaga byoshi.”—Amafulûlo 3:14, Mashi Bible.

Yezu ahikirizize obulebi lugenda olya “ecisiki cage ciri ca kurhenga mîra, kurhenga omu mango ga mîra bwenene.”—Mikeyo 5:2; NWT, Mateyo 2:4-6.

Bici Yezu akag’ijira embere ayishe hanw’igulu?

Al’igwerhe obukulu bwago-bwago empingu. Yezu akag’iganirira obo bukulu erhi asalira ntya: “Larha, nawe onkuzage . . . Onampe lirya irenge nayorhaga njira emwawe embere igulu liremwe.”—Yowane 17:5.

Arhabire Ishe omu kulema ebindi bintu byoshi. Yezu akozire haguma na Nnâmahanga “nka mulenga w’omukolo.” (Emigani 8:30, NWT) Ebibliya edesire ntya, lugenda Yezu: “Bulya byoshi muli ye [kugerera ye] byalemagwa, emalunga n’en’igulu.”—Abakolosi 1:16.

Nnâmahanga akolesize Yezu omukulema ebindi biremwa byoshi. Ebyo biremwa bihiziremo eby’ekiroho, n’amalunga rhubona. (Amafulûlo 5:11) Omu njira nguma na nguma, oko kukola kwa Nnâmahanga haguma na Yezu kuli nka kula omuntu ocapa e plan y’eyumpa akola haguma n’omuntu oyubaka enyumpa. Omuntu ocapa e plan anayijire kushimbana n’oku enyumpa yayish’iyorha; n’oyubaka enyumpa naye ajire ebonekane.

Akozire nka Luderho. Erhi Ebibliya eganirira akalamo ka Yezu embere aburhwe hanw’igulu enamuhamagale “Luderho.” (Yowane 1:1) Kobinali, oko kuhugwîre oku Nnâmahanga akolesize Omugala omukukahekera ebindi biremwa by’ekiroho obulongozi n’eyindi myanzi.

Bibonekine oku Yezu akozire haguma na Nnâmahanga omukuhêkera bene bantu emyanzi n’obulongozi bwa Nnâmahanga. Bibonekine oku Yezu ye Nnâmahanga akolesize ly’ahekera Adamu na Eva obulongozi bwage omw’ishwa ly’e Edeni. (Omurhondêro 2:16, 17) Bihashikine oku Yezu ye olya malaika Nnâmahanga akolesagya lyo alongoza ishanja lya mîra lya bene Israeli na ciru ye bal’ishinganine barhumikire.—Olubungo 23:20-23. a

a Arhali Luderho yene malahika Nnâmahanga akolesize omu kuhêkera bene bantu emyanzi n’obulongozi. Kwa lwiganyo, ahanyuma n’okukolesa Omugala cûsha yene, akolesize abandi ba malahika lyo bahêkera Abaisraeli bamîra amarhegeko gage.—Ebijiro by’Entumwa 7:53; Abagalasiya 3:19; Abahabraniya 2:2, 3.