Busagasi buguma bwajiragwa e Amérique bwayerekine oku misole y’omushuko 80 okw’igana enakashenga, cikone nusu yay yone ejira ntyo ngasi lusiku. Baguma na baguma ba mulibo banacidose ntya: ‘K’isala eba njira yakuntabala nciyumve bwinja kone erhi liba lihiziremo bintu binji kulusha?’

•  Isala byo bici?

•  Ka Nnâmahanga anayumvirhize amasala?

•  Bici nshinganine nkahira omu masala gani?

•  Ebi eyinyu misole ederha

 Isala eba njira y’okuganiza Omulemi lugenda ngasi kantu. Orhanye hitya lugenda ebi oko kuhugwîre! Yehova yeba muntu mukulu bwenene kulusha boshi, ciru akaba ntyo “ntaye ali kuli naye muli rhwe.” (Ebijiro by’Entumwa 17:27) Co cirumire Ebibliya erhuhîre ogu mulali gw’okushagalusa: “Yegeri Nyamuzinda, naye ammuyegerera.”​—Yakobo 4:8.

 Gurhi wakayegeramwo Nnâmahanga?

•   Burhangiriza, kuli kugerera isala. Yo njira oganizamwo Nnâmahanga.

•   Bwa kabirhi, kuli kugerera ifunzo ly’Ebibliya. Yo njira Nnâmahanga “akuganizamwo.”

 Eyo njira y’okuganira; k’okuderha isala n’ifunzo ly’Ebibliya yakurhabala ocijirire obwîra busêzire haguma na Nnâmahanga.

 “Okuganiza Yehova, k’okuderha, okuganiza omuntu mukulu bwenene kulusha, luli lukengwa lunene bwenene bene bantu bahâbirwe.”​—Jeremy.

 “Okubwira Yehova kugerera isala okundinaciyumva ekandalala, kunarhume naciyumva ndi hofi naye.”​—Miranda.

 Ciru akaba oba oyemire Nnâmahanga, na ciru akaba onakamushenga, hali amango byakaba bizu okuyemera oku anakuyumvirhize. Ciru akaba ntyo, Ebibliya edesire oku Yehova ‘anakâyumvêrheza emisengero.’ (Ennanga 65:2, Mashi Bible) Enakubwizire oku ‘amalagirire gawe goshi ogahire omu maboko gage.’ Bulya gurhi? ‘Bulya kushibirira ayorha akushibirira.’​—1 Petro 5:7.

 Orhanye kuli oku: K’onacihe akasanzi k’okuganira n’abîra bawe ba hofi-hofi ngasi mango? Wanajira ntyo haguma na Nnâmahanga naye. Okamuganiza ngasi mango kugerera isala omukukolesa izino lyage Yehova. (Ennanga 86:5-7; 88:9) Ebibliya ekuhîre omurhima ‘okashenga burhahusa.’​—1 Abatesalonika 5:17.

 “Isala ziba nganiro njira haguma na Larha w’omu mpingu, oyu mbwira ebindi emurhima byoshi.”​—Moises.

“Nankabwira Yehova ebindi ekandalala nk’oku nakanabibwira nyama erhi omwîra wani wa hofi-hofi.”​—Karen.

 Ebibliya edesire ntya: “Murharhanyagya cici; ci omu ngasi bulagirire musengere Nnâmahanga, mumushenge, munamuvuge omunkwa.”​—Abafilipi 4:6.

 Ka k’okuderha oku kuli kwinja okushenga Nnâmahanga enyanya z’amazibu gawe? Neci! Ebibliya edesire ntya: “Emmanja [mizigo] zawe ozihengulire Nyakasane [Yehova, NWT], wàbona oku akurhamûla.”​—Ennanga 55:22.

 Kobinali, amango washenga Nnâmahanga oshinganine omuganirire binji ahanyuma n’okumuganirira amazibu gawe gone. Musole muguma guhamagalwa Chantelle gudesire oku “obwîra bwinyu burhakaba bwinja erhi wakakahûna Yehova oburhabale bone. Ntanyize oku akantu karhanzi nshinganine nkajira, kuli kumuvuga omunkwa, n’ebintu nakamuvugako omunkwa bishinganine bibe binji.”

 Orhanye kuli oku: Bintu bihi wakavugako Nnâmahanga omunkwa omu kalamo kawe? Ka hali bintu bisharhu orhanyize wakavugako Nnâmahanga omunkwa ene?

 “Ciru n’akantu kasungunu nk’okushagalukira iuwa linja, kwanarhushumya rhushenge Yehova lyo rhumuvuga omunkwa.”​—Anita.

 “Orhanye kuli kantu kalebe k’omu bulemi kakushagalula erhi lwandiko lulebe lw’Ebibliya lukuhuma oku murhima, buzinda ovuge Yehova omunkwa.”​—Brian.