AMADOSO EMISOLE ECIDOSA
Gurhi Abandi Bambona?
Bulya gurhi kuli kwa bulagirire okashibirira emyambalo yawe? Bulya emyambalo enaderhe bintu bilebe kuli rhwe. Bici emyambalo yawe ederha kuli we?
Mirhego isharu lugenda emyambalo n’oku rhwakayiyakamwo
Omurhego gwa 1: Okuleka ebyombo by’okuhâna emyanzi bikakuyigiriza oku wayambala.
Munyere muguma w’omushuko ohamagalwa Theresa adesire ntya: “Hali amango nsima mwambalo mulebe bulya nabwine ebyombo by’okuhâna emyanzi byaganirira bwenene lugenga ogo mwambalo. Erhi obwenge bwawe bwakayunjulamwo enfoto z’abantu bayambirhe mushangi mulebe, kwanaba kulembu kuli we okuyiga olwiganyo lwabo.”
Arhali abanyere bone bashumibwa n’eby’e plublicité. Citabu ciguma cihamagalwa The Everything Guide to Raising Adolescent Boys, cidesire oku “abana-rhabana nabo banashumibwe n’ebiri alamode. Ciru n’omu mango baciri barho bwenene, banashumibwa n’eby’e pulicité.”
Omuhigo mwinja: Ebibliya edesire ntya: “Embula bwenge enayemereze ngasi kanwa, cikwone okengukwa kulola ololêreza aha agera.” (Emigani 14:15, Mashi Bible) Kushimbana n’ako kanuni, ociyigirize okukalaba bwinja-bwinja ebi oli wabona omu ma publicité. Kwa lwiganyo, erhi wakabona e publicité y’emishangi bayandisireko “ya gano mango,” “mihyahya bwenene,” erhi “yahamagala basheri,” ocidose ntya:
‘Ndi wayunguka erhi nakayambala eyo myambalo?’
‘Gurhi abantu bantanyiza enyanya z’emyambalo yantyo?’
‘K’oku eyo myambalo yanyerekana ko mba?’
Ihano linja: Omu mugobe muguma, olabirize bwinja-bwinja emyambalo eri alamode n’emyanzi y’ebyombo by’okuhâna emyanzi eyerekine ebiri alamode. Njira nci y’akalamo ebyo byoshi biri byasegeza? Ka hali emyanzi erhayerekinwi n’obwalagale yakarhuma waciyumva nka kuli kwa bulagirire oshimbe njira ndebe y’okuyambala? Munyere muguma w’omushuko ohamagalwa Karen adesire ntya: “Haba binji bwenene bishumya abantu mpu babonekane oku bali binja bwenene, bayambirhe bwinja bwenene, n’omubiri gwabo guli ‘mwinja bwenene.’ Abayaliza eby’e publicité banabone oku kuba kulembu bwenene okushumya emisole.”
Omurhego gwa 2: Okulonza ebiri alamode ly’oshushana n’abandi.
Murhabana muguma w’omushuko ohamagalwa Manuel adesire ntya: “Erhi akaba myambalo milebe eri alamode, ngasi muntu analonze ayiyambale. Erhi akaba orhayiyambirhi, abantu banabona nk’oli wa kusomeza.” Munyere muguma w’omushuko ohamagalwa Anna naye ayemire ntyo. Adesire ntya: “Arhali okuba alamode ko abantu balonza bwenene, cikone banalonze okubonekana ak’abandi.”
Omuhigo mwinja: Ebibliya edesire ntya: “Murhayigaga engeso mbi za mwo lino igulu.” (Abaroma 12:2, Mashi Bible) Kushimbana n’er’ihano, ololereze aha obikira emishangi na buzinda ocidose ntya:
‘Bici binshumya bwenene omu kucishoga emishangi?’
‘Ka kuba kwa bulagirire kuli nie okuba n’emishangi eriko cimanyiso cilebe?’
‘Ka nsima okuyambala ebyarhuma abantu bansegezako obwenge?’
Ihano okubiyerekire emyambalo: Ahali h’okurhanya lugenda bintu bibirhi byone, k’okuderha; ebiri alamode (ebi bantu banji basimire) n’ebirhali alamode (ebi bantu banji barhacisimiri), okarhanya lugenda akantu ka kasharhu: okucilangalira n’obulanzi bwawe. Okagendekera wacilangalira, orhakahangayikira bwenene okushushana n’abandi.
Omurhego gwa 3: Okurhanya mpu ‘ebihamagala basheri, byo binja bwenene.’
Munyere muguma ohamagalwa Jennifer adesire ntya: “Okuderha okuli, hali amango nshumibwa okuyambala omushangi mofi bwenene erhi gusezize omubiri bwenene erhi gurhashinganini.”
Omuhigo mwinja: Ebibliya edesire ntya: “Okulimba kwinyu kurhabâga kw’embuga . . . Cikwone okulimba kwinyu kube kw’omuntu winyu w’omu ndalâla.” (1 Petro 3:3, 4, Mashi Bible) Kushimbana n’er’ihano, bici abantu bakashagalukira bwenene kuli we: ka bwinja bw’embuga erhi bwinja bw’ekandalala?
Ihano okubiyerekire emyambalo: Okuyambala n’olugero ko kuyambala kwinja bwenene. Arhali okuyambala ntyo ko bantu banji basimire mw’er’igulu. Cikone, orhanye k’oku:
K’okola aganire n’omuntu oshambala bwenene, ci kanji-kanji ebimuyerekire yenene? Eby’okugayisa, nkaba oyo muntu arhamanyiri oku obo borhere bwage buli bwarhuma orhamuyegera!
Emyambalo yirhu eba nka nshambalo, yanayerekana oku oli ‘wa kucirhanyiza wenene’ yananarhuma abandi barhakuyegera
Erhi oyambala buzira lugero, onabe ak’oyo muntu. Emyambalo yawe yanaba nk’eri yabwira abandi erhi ‘mundoleko,’ n’oko kwanarhuma babona nk’orhacilangalira erhi oku onakacirhanyiza wenene, kandi erhi byombi. Kandi, oko kwanarhuma abantu barhanya oku wanajira ngasi kantu lyo bakusegezako obwenge, ciru n’omu njira mbi.
Ahali h’okujirira akantu e publicité orhanali wakaguza, ocihangane okuba wa lugero. Munyere muguma w’omushuko ohamagalwa Monica adesire ntya: “Okuba wa lugero kurhali kuderha oku okayambala aka nyakakulu. Cikone kuli kuderha oku okacikenga n’okukenga abandi.”
Olole n'Ebi Bikulikire
EBI ABINYU BADESIRE
Bulya gurhi mba nshibirire bwenene oku mbonekana ?
Olole gurhi wakagendekera waba n’entanya z’olugero.
