“Nanjire okwani koshi lyo nsoma Ebibliya, cikone nanvunike omurhima bulya ciba citabu cinenene bwenene!”​—Briana, 15.

 Ka ntyo ko nawe ociyumva? Akaba neci, eci cigabi canakurhabala!

•  Bulya gurhi kuli kwa bulagirire okusoma Ebibliya?

•  Gurhi wakakasomamwo Ebibliya?

•  Ebi eyinyu misole ederha

 K’onabone oku okusoma Ebibliya kaba kantu kakurhamya? Akaba neci, biyumvikine, arhali wene ociyumva ntyo. Nkaba wanarhanya oku Ebibliya ciba citabu cinenene cijira ebihumbi by’obukurasa n’emyandiko yayo eba misungunu-ngunu erhanabamo nfoto. Ciru wanahikira aha wabona oku ahali h’okusoma Ebibliya, k’okukulu okulaba eteleviziyo erhi evideo!

 Cikone orhanye kuli aka kantu: Erhi wakabona isanduku ly’okubîkiramo ebintu by’obulagirire bwenene, k’orhakalonza okumanya bici bimuli?

 Ebibliya kw’eri nk’er’isanduku. Erimo mahano manji minja gakakurhabala;

•   Okarhôla emihigo minja

•   Okayumvikana n’ababusi bawe

•   Obe n’abîra binja

•   Okamanya ebi wakajira amango wamahikirwa n’amazibu

 Bulya gurhi eco citabu ca mîra, cakarhurhabala ene? Bulya “Amandiko goshi galongozibagwa n’iroho lya Nnâmahanga.” (2 Timoteyo 3:16, NWT) K’okuderha oku amahano gaba omu Bibliya, gaba garhenzire emw’omuntu ojira bwenge bunji bwenene.

 Enjira ntanzi wakajiramwo ntyo kuli kuyisoma kurhangira oku murhondero kuhika oku buzinda. Okujira ntyo, kwanakurhabala omanye ebi Ebibliya eba eganirire. Hali njira nyinji wakasomamwo Ebibliya. Rhuganirire njira ibirhi za mulizo:

•    Wanasoma ebitabu 66 by’Ebibliya nk’oku biba bikulikirine omu Bibliya, kurhangire oku Omurhondêro kuhika oku Amafulûlo.

•    Wanasoma Ebibliya kushimbana n’oku bintu bilebe byajirikanaga.

 Ihano: E Nyongeza A7 y’omu Tafsiri ya Ulimwengu Mupya eyerekine gurhi bintu bilebe byajirikanaga omu kalamo ka Yezu hanw’igulu, byal’ikulikirine.

 Enjira ya kabirhi wakasomamwo Ebibliya kuli kucishoga mwanzi mulebe guganirire mazibu malebe oli wahikirwa nago. Kwa lwiganyo:

•   K’oba olonzize okuba n’abîra b’okulangalirwa? Osome omwanzi guganirire Yonatani na Daudi. (1 Samweli, cigabi ca 18-20) Buzinda wanalonza amorhere Daudi agwerhe garhumaga Yanatani amuzigira bwenene.

•   K’olonzize okumanya gurhi wakahagalikamwo amashumi? Osome omwanzi guganirire Yozefu, buzinda olabe gurhi ahimiremwo amashumi. (Omurhondêro, cigabi ca 39) Olole gurhi Yozefu abiremwo n’emisi y’okuhagalika amashumi.

•   K’olonzize okumanya gurhi isala lyakakurhabalamwo? Osome omwanzi guganirire Nehemiya. (Nehemiya, cigabi ca 2) Buzinda olonze ebintu biyerekine oku Nnâmahanga ashuzize oku masala gage.

 Ihano: Amango oli wasoma Ebibliya, oje ahantu hali akahwenyenye ly’osegeza obwenge bwawe kw’ebi oli wasoma.

 Enjira ya kasharhu wakasomamwo Ebibliya, kuli kucishoga mwanzi mulebe erhi lulanga lulebe, okugusoma na buzinda wanalaba gurhi wakagukolesamwo. Enyuma z’okusoma, wanacidosa amadoso gali nk’aga:

•    Carhumaga Yehova ayandikisa ogu mwanzi omu Bibliya?

•    Bici gunyigirizize lugenda amorhere gage erhi enjira yage y’okujira ebintu?

•    Gurhi nakakolesa ogu mwanzi omu kalamo kani?

 Ihano: Ocihirireho omuhigo gw’okusoma Ebibliya. Oyandike olusiku olonzize orhondere okusoma Ebibliya. Na kandi okolese Eprograme y’okusoma Ebibliya eri oku jw.org.