“Erhi ndi nakula, omu mazibu madarhi bwenene nakag’ilwisa, hali irala ly’okujira ecijiro c’obuhya n’abirhu balume. Nakag’irhanya nti ako kasanzi kagera, cikone ezo ntanya zinacigendekere zandibuza kuhika ene.”​—David, ogwerhe myaka 23.

 David aba Mukristu olonza okushagalusa Nnâmahanga. K’anashagalusa Nnâmahanga n’obo anacifinje okujira ecijiro c’obuhya haguma n’ababo balume? Gurhi Nnâmahanga abona ecijiro c’obuhya egarhi k’omulume n’owabo mulume n’omukazi n’owabo mukazi?

•  Bici Ebibliya edesire?

•  Ka kuli kuderha oku . . . ?

•  Cikone gurhigi erhi . . . ?

 Entanya z’abantu lugenda ecijiro c’obuhya egarhi k’omulume n’owabo mulume n’omukazi n’owabo mukazi zanashanja enyanya z’enkomedu n’akasanzi balamiremwo. Cikone Abakristu barhalongozibwa n’entanya bantu banji bagwerhe ‘barhanayehûlwa eyi n’eyi na ngasi mpûsi.’ (Abefezi 4:14) Cikone, entanya zabo lugenda olugenzi lw’okujira ecijiro c’obuhya egarhi k’omulume n’owabo mulume n’omukazi n’owabo mukazi (n’ebindi bijiro biri nk’ebyo) ziba ziyimangire oku makanuni g’Ebibliya.

 Akanuni k’Ebibliya lugenda ecijiro c’obuhya egarhi k’omulume n’owabo mulume n’omukazi n’owabo mukazi kayumvikine n’obwalagale. Edesire ntya:

•  “Orhahîra okulâla n’omulume kula balâla n’omukazi.”​—Bene-Levi 18:22.

•  “Co carhumire Nyamuzinda abaleka: omu kushimba enyinfinjo z’omubiri gwabo. . . . abakabulira omu irala libi bwenene: bakâbo baleka okukolesa emibiri yabo oku kujira ebishinganine, bajira okurhakwanini obworhere bw’omukazi.”​—Abaroma 1:24, 26.

•  “Mumanye mwankacîrheba! Oli abajira eby’enshonyi, oli abaharâmya ebiremwa [ensanamu], oli abagonyi, oli ab’engeso mbi [abalume bajira ecijiro c’obuhya n’ababo balume, NWT], oli entazi, oli ebishambo, oli abasîma eby’en’igulu, oli abalalwe, oli abakâjacira ababo n’ebishungu, abo boshi barhalimwo owayime omu Bwami bwa Nyamuzinda.”​—1 Abakorinti 6:9, 10.

 Okuderha okuli, amakanuni ga Nnâmahanga gayerekire abantu boshi, babe bagwerhe enyifinjo z’okujira ecijiro c’obuhya egarhi k’omulume n’owabo mulume n’omukazi n’owabo mukazi erhi egarhi k’omulume n’omukazi. Kobinali, ngasi muntu ashinganine abe wa kucihasha erhi akaba n’irala ly’okujira ecijiro cirhasimisa Nnâmahanga.​—Abakolosi 3:5.

 Ka kuli kuderha oku Ebibliya erhubwizire oku rhukashomba omulume ojira ecijiro c’obuhya n’owabo mulume erhi mukazi n’owabo mukazi?

 Nanga. Kobinali, Ebibliya erharhubwiziri oku rhushombe omuntu ciru n’omuguma, abe anajire ecijiro c’obuhya haguma n’owabo mulume erhi wabo mukazi erhi nanga. Cikone, erhubwizire oku ‘rhulonze okuba n’omurhûla n’abantu boshi,’ ciru bakaba bagwerhe lugenzi luhi. (Abahabraniya 12:14) Co cirhumire, kuli kubi okubonerera abantu bantyo, okubajirira n’obuminya, erhi kubajirira kubi omu yindi njira yoshi-yoshi.

 Ka kuli kuderha oku Abakristu bashinganine okuhagalika amarhegeko g’ecihugo gayemire obuhya egarhi k’omulume n’owabo erhi mukazi n’owabo?

 Akanuni ka Nnâmahanga lugenda obuhya kayerekinwe omu Bibliya kahûnyire obuhya gube mulungano gwa mulume muguma na mukazi muguma. (Mateyo 19:4-6) Cikone, entanya amarhegeko ga bene bantu gahâna lugenda ecijiro c’obuhya egarhi k’omulume n’owabo erhi omukazi n’owabo ziba ziyimangire oku by’epolitike cikone arhali oku lugenzi lwinja. Ebibliya erhegesire Abakristu oku barhashinganini balunge okuboko oluhande loshi-loshi omu by’epolitike. (Yowane 18:36) Co cirhumire, barhalunga okuboko amarhegeko g’ecihugo okubiyerekire ecijiro c’obuhya egarhi k’omulume n’owabo erhi omukazi n’owabo barhanagahagalika.

 Cikone gurhigi erhi akaba muntu mulebe anajire ecijiro c’obuhya haguma n’owabo mulume erhi n’owabo mukazi? K’oyo muntu anashanja?

 Neci. Hali abantu b’omu myaka igana mirhanzi bakag’ijira ntyo! Enyuma z’okuderha oku abajira ecijiro c’obuhya haguma n’ababo balume erhi n’ababo bakazi barhakaja omu Bwami bwa Nnâmahanga, Ebibliya edesire ntya: “Ntyo kwo baguma muli mwe bâli bayosire.”​—1 Abakorinti 6:11, Mashi Bible.

 Ka kuli kuderha oku abo balekaga okujira ecijiro c’obuhya haguma n’ababo balume erhi n’ababo bakazi barhakacicifinjire ciru n’eliguma okujira eco cijiro cabo cibi ca mîra? Nanga. Ebibliya edesire ntya: ‘Mucihundikire [omuntu] muhyanya, olya ocisêza okuhinduka [kugerera] obumanye bw’okunali.’ (Abakolosi 3:10) Omuntu anagendekere okujira empindulo.

 Cikone gurhi erhi akaba omuntu alonzize okurhumikira amakanuni ga Nnâmahanga cikone acigwerhe irala ly’okujira ecijiro c’obuhya haguma n’owabo mulume erhi n’owabo mukazi?

 Ak’erindi irala lyoshi-lyoshi, omuntu anacishoga okurhakuza er’irala n’okurhalihikiriza. Bici byakamurhabala? Ebibliya edesire ntya: “Mugendekere mwalambagira kugerera obulongozi bw’iroho murhanahikirize irala lyoshi-lyoshi ly’omubiri.”​—Abagalasiya 5:16, NWT.

 Obwine oku olo lwandiko lurhadesiri oku omuntu arhakaba n’irala lyoshi-lyoshi ly’omubiri. Lubero n’oko, okuba n’eprograme nyinja y’okuyiga Ebibliya n’okukasalira kwanarhabala omuntu abe n’emisi y’okuhima irala lya ntyo.

 David, rhwaganiriraga oku murhondero, abwine oku ezo ntanya ziri z’okuli, ci bwenene erhi abwira ababusi bage Bakristu lugenda amazibu akag’ilwisa. Adesire ntya: “Gwali muzigo muzirho bwenene gwantengaga oku birhugo, nakanashagalukire bwenene emyaka yani y’omushuko ncibabwirage embere z’akasanzi.”

 Kobinali, rhunabe n’omwishingo bwenene erhi rhwakalama nk’oku amakununi ga Yehova gadesire. Rhuyemire n’obwalagale oku amakanuni g’Ebibliya gaba ‘gashinganine, ganashagaluse omurhima,’ n’oku ‘okugakenga kuli mw’obunguke.’​—Ennanga 19:8, 11, Mashi Bible.