Kabirhi omu mugobe, Abahamirizi ba Yehova banakaja aha bajirira entimanano zabo hahamagalwa Nyumpa y’Entimanano. Bici bijirwa aha Nyumpa y’Entimanano, na bunguke buhi wakaba nabo erhi wakajayo?

•  Bici bijirwa aha Nyumpa y’Entimanano?

•  Bulya gurhi kuli kwabulagirire oyishe oku ntimanano zirhu?

•  Ebi eyinyu misole ederha

 Enyumpa y’Entimanano haba hantu abantu barhimanana lyo bayiga gurhi babakakakolesa enyigirizo z’Ebibliya omu kalamo kabo. Entimanano zijirwa aha Nyumpa y’Entimanano zanakurhabala:

•   oyige okuli lugenda Nnâmahanga.

•   ohugûkwe bwinja ebintu biri byajirikana omw’igulu ene.

•   obe muntu mwinja.

•    obe n’abîra binja.

 K’Omanyire? Abahamirizi ba Yehova banahamagale aha bajirira entimanano zabo Nyumpa y’Entimanano bulya ho bajirira entimanano zabo ho banaganirira emyanzi eyerekire Obwami bwa Nnâmahanga.​—Mateyo 6:9, 10; 24:14; Luka 4:43.

 Enyigirizo wahâbwa eyo munda zakurhabala. Amakanuni g’Ebibliya gaganirirwa oku ntimanano z’Abahamirizi ba Yehova ganakurhabala “obe n’obwenge.” (Emigani 4:5, Mashi Bible) K’okuderha oku Ebibliya yanakurhabala okarhôla emihigo minja omu kalamo. Na kandi yanakurhabala obone amashuzo oku madoso g’obulagirire abantu bacidosa omu kalamo. Kwa lwiganyo, amadoso gali nk’aga:

•   Omuhigo gw’akalamo guba guhi?

•   K’amalibuko rhuli rhwalwisa buba buhane kurhenga emwa Nnâmahanga?

•   WGurhi biba erhi omuntu afâ?

 Olole ebirhwe bya hotuba nguma na nguma zijirwa oku ntimano zirhu oku buzinda bw’omugobe:

•   Bulya Gurhi Rhushinganine Rhulongozibwe n’Ebibliya?

•   Ngahi Wakakûla Oburhabale omu Kasanzi k’Amazibu?

•   Ebi Obwami bwa Nnâmahanga Buli Bwarhujirira Ene.

 “Owirhu rhusoma naye ayishire oku ntimanano zirhu. Atamala haguma n’omulala gwirhu rhwanamurhabala okukulikira entimanano omukukolesa ebitabu birhu. Enyuma z’entimanano, ambwira oku anashagalukire amashuzo bene wirhu na bali birhu bakag’ihâna oku bigabi by’amadoso n’amashuzo. Na kandi ambwira oku omu kanisa kabo, barhajira ebitabu by’okuciyigirigizamo nk’ebi rhujira.”​—Brenda.

 K’Omanyire? Ntaco rhulipa lyo rhuja omu Nyumpa y’Entimanano, rhurhanahûna ntûlo.

 Abandi bakuha omurhima. Ebibliya edesire oku kantu kaguma egarhi k’ebintu birhuma Abakristu barhimanana haguma, kuba ‘kuhânana omurhima.’ (Abahabraniya 10:24, 25) Okugeza akasanzi haguma n’abantu baba bazigire Nnâmahanga banashibirira abandi kunahâne omurhima bulya rhulamire omw’igulu lirimo abantu bacizigira bonene.

 “Enyuma z’omulegerege, nanyumve ntamire bwenene ntanagwerhi mwishingo. Cikone abantu ntimanana nabo aha Nyumpa y’Entimanano, banakarhuma naciyumva bwinja. Erhi ngaluka emwirhu kurhenga oku ntimanano, nambe ngwerhe omwishingo n’emisi y’okulwisa amazibu g’olusiku lukulikire.”​—Elisa.

 K’omanyire? Omw’igulu lyoshi, muba bigamba 12 000 na kulusha by’Abahamirizi ba Yehova, banarhimanane omu Nyumpa z’Entimanano zilushire 60 000. Bulya omubale gw’abantu baja oku ntimanano gugendekire gwayushuka, ngasi mwaka banayubake Nyumpa z’Entimanano hofi 1 500. a