Nk’oku biyerekinwe omu raporo nguma yahânagwa na cigusho ciguma c’e Amérique cishibirira endwala (Centers for Disease Control and Prevention) hofi misole makumi arhanu oku igana egwerhe egarhi ka myaka 15 na 19 yadosibagwa amadoso yayemire oku yamakajirira ecijiro c’obuhya ekanwa. Sharlene Azam, mwandisi w’ecitabu cihamagalwa Oral Sex Is the New Goodnight Kiss adesire ntya: “Erhi wakaganiza abana b’omushûko lugenda okujirira ecijiro c’obuhya ekanwa banaderhe oku kurhali kubi. Kobinali barhabona oku kuli kujira ecijiro c’obuhya.”

•  Gurhi orhanyize?

•  Okuli kuli kuhi?

•  Bulya gurhi kuli kwa bulagirire okurhanya kuli oko?

 Oshuze neci erhi nanga oku madoso gakulikire.

1.   K’omunyere anahêka izimi erhi akajirira ecijiro c’obuhya ekanwa?

   1.   Neci

   2.   Nanga

2.   Ka hali amazibu g’amagala okujirira ecijiro c’obuhya ekanwa kwakalerha?

   1.   Neci

   2.   Nanga

3.   Ka Kobinali okujirira Ecijiro c’Obuhya Ekanwa, Nako Kunaba Kujira Ecijiro c’Obuhya?

   1.   Neci

   2.   Nanga

 Oshushanye amashuzo gawe n’amashuzo gakulikire.

1.   K’omunyere anahêka izimi erhi akajirira ecijiro c’obuhya ekanwa?

    Ishuzo: Nanga. Oko ko kurhuma bantu banji bacirheba omukurhanya oku okujirira ecijiro c’obuhya ekanwa kurhagwerhi mazibu goshi-goshi.

2.   Ka hali amazibu g’amagala okujirira ecijiro c’obuhya ekanwa kwakalerha?

    Ishuzo: Neci. Erhi omuntu akakajirira ecijiro c’obuhya ekanwa analwala endwala nka hépatite A erhi B, amaherhe oku birumbu by’obuhya, e blénoragie, ebihulu oku birumbu by’obuhya, e SIDA, n’e syphilis.

3.   Ka Kobinali okujirira Ecijiro c’Obuhya Ekanwa, Nako Kunaba Kujira Ecijiro c’Obuhya?

    Ishuzo: Neci. Ngasi cijiro cihiziremo okukolesa ebirumbu by’obuhya by’owundi muntu; nk’ecijiro c’obuhya egarhi k’omulume n’omukazi, okujiriria ecijiro c’obuhya ekanwa, okujirira ecijiro c’obuhya omu nio, n’okuhuma-huma oku birhumbu by’obuhya by’owundi muntu ly’oyusa irala lyawe lugenda ecijoro c’obuhya, ebyo byoshi kuba kujira ecijiro c’obuhya.

 Rhuganirire mandiko maguma na maguma gayerekire ogu mwanzi lugenda okujirira ecijiro c’obuhya ekanwa.

 Ebibliya edesire ntya: “Obulonza bwa Nnâmahanga b’obu . . . muleke eby’enshonyi.”​—1 Abatesalonika 4:3.

 Oluderho lurhangiriza lwahindwirwe “eby’enshonyi” luyerekire ngasi lugenzi lw’eby’enshonyi haguma n’omuntu orhali balo erhi mukawe. Luhiziremo ecijiro c’obuhya egarhi k’omulume n’omukazi, okujirira ecijiro c’obuhya ekanwa, okujirira ecijiro c’obuhya omu nio, n’okuhuma-huma oku birhumbu by’obuhya by’owundi muntu ly’oyusa irala lyawe lugenda ecijoro c’obuhya. Omuntu wacihira omuby’okukajira eby’enshonyi, anahikirwa na mazibu manji, n’akantu kadarhi bwenene, anashereza obwîra bwage haguma na Nnâmahanga.​​—1 Petro 3:12.

 Ebibliya edesire ntya: “Ci ojira eby’enshonyi, yehe mubiri gwage ahemukira.”​—1 Abakorinti 6:18.

 Okujirira ecijiro c’obuhya ekanwa kwanalerhera omuntu amazibu g’omubiri n’ag’ekiroho. Kwananarhulerhera amalumwa g’ekandalala. Citabu ciguma cihamagalwa Talking Sex With Your Kids, cidesire ntya: “Arhali okujira ecijiro c’obuhya omukukolesa ebirumbu by’obuhya kone kurhuma omuntu aciyumva oku bamukolesize, aciyumva kubi erhi kuciyumva oku arhagwerhi wakumulanga. Oku omuntu aciyumva kubi erhi ajira ecijiro c’obuhya haguma n’omulume erhi mukazi omu kanga karhashinganini, kw’anaciyumva kubi erhi akajira ecijiro c’obuhya muli ezo zindi njira zoshi zirhashinganini. Ecijiro c’obuhya cinali cijiro c’obuhya.”

 Ebibliya edesire ntya: “Nie Nyakasane Nyamuzinda wawe, nie nkuyigirizize ebikukwanine.”​—Izaya 48:17.

 K’Oyemire oku amarhegeko ga Yehova lugenda ecijiro c’obuhya ganakulerhera obunguke? Erhi orhanyize oku gakuhanzize okujira ebi olonzize? Lyo rhukurhabala okushuza kw’ago madoso, orhanye oku ibarabara lirimo mituga minji linalimo bimanyiso binji lugenda amarhegeko g’okutembeza. K’orhanyize oku ebyo bimanyiso byanaba biri byakukuyima oluhuma erhi byakukulanga? Gurhi byakaba erhi we n’abandi bashofere mwakaba murhakenziri ago mahano?

 Ntyo ko biri lugenda amakanuni g’olugenzi ga Nnâmahanga. Erhi wakabula bugakolesa, wanasarula ebi warhwezire. (Abagalasiya 6:7) Ecitabu Sex Smart cidesire ntya: “Erhi wakaleka ebintu oba oyemire okanarhondera okujira ebintu omanyire oku biba bibi, orhakacikacikenga.’’ Lubero n’oko erhi wakalama kushimbana n’amakanuni g’olugenzi ga Nnâmahanga, wanaba n’oborhere bwinja. Na kandi wanagendekera waba n’ezamiri ecîre.​​—1 Petro 3:16.