Mango maguma Eliya abwirwa oku Mwami Ahabu anafîre. Rhwanarhanya kunganaci oyo mulebi walikola mushosi ashagalusire, arhanya binji bwenene, anasegeza amasu emalunga. Akagirhanya oku myaka yoshi alibuzibwe n’oyo mwami mugalugalu. Eliya alembire mazibu manji! Mwami Ahabu na makamba Yezebeli bakagijira okwabo koshi lyo bamuniga. Nta kantu koshi-koshi mwami Ahabu ajijire ly’ahanza Yezebeli oku arhajaga arhegeka oku bayirhe abalebi ba Yehova. Enyanya z’okulonza okuba na bintu binji, Ahabu na mukage bajira okwabo koshi lyo bayirha Naboti, n’abagala n’obu ali muntu mushinganyanya anali mweru-kweru. Oko kwarhuma Yehova abwira Eliya oku ajibwira Ahabu oku anigwa n’iburha lyage lyoshi. Ebi Nnâmahanga aderhaga byahikirira. Ahabu afâ nk’oku Yehova analebaga.​—1 Abami 18:4; 21:1-26; 22:37, 38; 2 Abami 9:26.

 Ciru akaba ntyo, Eliya alimanyire oku alishinganine agendekere alembera. Yezebeli arhal’icifâ, acigendekire ashumya omulala gwage n’ishanja omu bintu bibi. Eliya acibibuganana n’agandi mazibu, acigwerhe na bintu binji byakuyigiriza omwîra wage Elisha, wali wayishirhôla enafasi yage. Rhuganirirage mikolo isharhu mizinda Eliya ajijire. Rhwabona gurhi obuyemere bwamurhabire okulembera, na kandi rhwabona gurhi rhwakazibuhya obuyemere bwirhu amango rhuli rhwalwisa amazibu.

 Ahaziya mugala wa Ahabu, ye walikola mwami w’e Israheli haguma na nnina. Lubero n’okuyiga bintu binji kugerera ebyahikiraga ababusi bage, Ahaziya akulikira eyo njira ngalugalu. (1 Abami 22:52) Ak’ababusi bage, Ahaziya naye akaharamya Baali. Okurherekera Baali kwali kunji eyo munda, kwalimo okujira obugonyi n’okuhâna abana nterekêro. Ka hali akantu kakarhumire Ahaziya ashanja olugenzi lwage n’okurhabala bacikala bage baleke ebyo bijiro by’okurhaba bishwekerezi kuli Yehova?

 Obuhanya bwahikira oyo mwami w’obucibone. Ahona okw’idirisha lyali oku cumpa cage cali okw’igorofi anavunika yeshi-yeshi. Arhanajagilonza oburhabale emwa Yehova, ciru akaba ahikirwe n’obo buhanya. Lubero n’oko, arhuma abaganda e Filistini, omu lugo lw’e Ekroni oku bamudokeze nnâmahanga wakagihamagalwa Baali-zebubi erhi byahashikana afume. Yehova agayisibwa bwenene. Arhuma malahika oku ajibona Eliya, oyo malahika abwira oyo mulebi oku ajirhimanana n’abo baganda. Omulebi ababwira oku bajibwira mwami ogu mwanzi g’oburhonde: Ahaziya anajijire ecaha cizibu, akola nka nta Nyamuzinda ociba omu Israheli. Yehova aderha oku Ahaziya arhafume.​—2 Abami 1:​2-4.

 Ahali hw’okuciyunjuza, Ahaziya adosa ntya: “Oyola muntu wamushimanaga anamubwira ebyola binwa kurhi anali ashushire?” Abo baganda bamuganirira gurhi oyo mulebi aliyambirhe, okubundi Ahaziya aderha ntya: “Ali Eliya” oyo. (2 Abami 1:7, 8) Akantu k’okushagalusa kuli kubona oku Eliya alilamire akalamo karhahunyiri binji anakagisegeza obwenge oku nterekêro ya Nnâmahanga co carhumaga akagimanyikana kugerera emishangi yage. Eliya arhalisimire okuba na bintu binji aka Ahaziya n’ababusi bage. Akalamo ka Eliya karhukengezize okulama kushimbana n’ihano Yezu ahânaga ly’okugendekera kwaba n’akalamo karhahunyiri binji, n’okusegeza amasu oku bintu by’obulagirire.​—Mateyo 6:22-24.

 Bulya Ahaziya ali wakucihola, arhuma omurhambo w’abantu 50 haguma n’abantu bage oku bajigwarha Eliya. Erhi babona Eliya “atamire oku ntondo,” * abo bantu bamubwira oku mwami adesire oku “oyandagale”​—oko kwali kuderha oku agende emunda bajimunigira. Orhanye kuli oko, ciru akaba balimanyire oku Eliya ali “muntu wa Nyamuzinda,” abo basoda baciyumva oku bashinganine bamuheke. Oko kwali kubi bwenene! Eliya abwira oyo murhambo ntya: “Akaba ndi muntu wa Nyamuzinda, omuliro gurhangibunguluka emalunga gukumalîre n’omurhwe gwawe gwa bantu makumi arhanu.” Nnâmahanga ajira ecijiro! “Omuliro gwanacibunguluka e malunga gwanacimalîra balya bantu, omurhambo n’engabo yage.” (2 Abami 1:9, 10) Okusherezibwa kw’abo basoda kuyerekine oku Yehova anagayisibwe bwenene erhi abakozi bage babulirwa obukenge erhi kugayaguzibwa.​—1 Enganîro 16:21, 22.

 Ahaziya acibirhuma owundi murhambo wa bantu 50. Oyo wundi murhambo naye ali muhwinja nk’omurhanzi. Bibonekine oku ntakantu aciyigirizize kugerera ebyahikiraga olya murhambo n’abantu bage 50, n’obu oluvu lwabo lwaliciriyunjwire nkaba oku ntondo aha gulya muliro gwabayokeraga. Omu yindi njira, arhayerekanaga oku agayaguzize Eliya omu kuderha naye ntya kone “oyandagale” cikone acibiyushula “duba” kuli ezo nderho! Obo bwali buhwinja bwenene! Oyo murhambo n’abantu bage nabo bafâ nk’oku omurhambo murhanzi naye anafâga. Cikone ntaco oko kwayigirizize mwami Ahaziya. Ahaziya arhacigwerhe misi, cikone acibirhuma omurhambo wa kasharhu. Eby’okushagalusa kuli kubona oku oyo wakasharhu yehe ali mwenge. Ayinginga Eliya n’obwirhohye oku ye kasinga arhamunigaga. Ishuzo Eliya amuhaga, lyayerekana obwonjo bwa Yehova. Buzinda Yehova arhuma malahika abwira Eliya oku akulikire oyo murhambo wacirhohyagya. Eliya akenga er’irhegeko anagenda ajibwira Ahaziya ebi Yehova adesire. Enyuma z’aho, oyo mwami afâ enyuma za myaka ibirhi y’okurhambula kwage nk’oku Nnâmahanga anaderhaga.​—2 Abami 1:11-17.

 Gurhi Eliya ajijire ly’alembera obugoma bw’abantu bal’imuzungulusire? Rhuli rhwarhimanana n’ago mazibu, k’arhali ntyo? Ka muntu mulebe akola akuvunyire omurhima enyanya z’okurhayumva cirhumire cilebe cinja n’okulahira oku arhaleka enjira ngalugalu? Gurhi rhwakalemberamwo ebyo bintu? Aha abasoda barhimanaga Eliya hanarhuha ishuzo, alitamire oku “ntondo.” Rhurhamanyiri bwinja bulya gurhi Eliya alitamire aho. Cikone rhwanayemera n’obwalagale oku oyo mulume walisimire okushenga, okuja aho hantu hali akahwenyenye kwakamuhashisize ayegere Nnâmahanga wage alisimire bwenene. (Yakobo 5:16-18) Ko n’oko, nirhu rhwanakaciha akasanzi ngasi mango lyo rhuba haguma na Nnâmahanga, rhumushenge omu kukolesa izino lyage, rhumubwire amazibu girhu n’ebiri byarhurhindibuza. Muli oko, rhwanahashilembera amango abarhuzungulusire bamajira ebintu bigalugalu.

 Akasanzi ka Eliya kw’okuleka omukolo akagijira kahika. Oyumve gurhi ajijire. Erhi Eliya na Elisha barhenga e Gilgali, Eliya abwira Elisha oku abere eyo munda kuhika agende yene e Beteli, oku bilometre 11. Elisha ashuza ntya: “Nk’oku Yehova aba alamire na nk’oku nawe olamire, ntakuleke.” Erhi bahika e Beteli, Eliya abwira Elisha oku agendekera yene aje e Yeriko oku bilometre 22. Elisha acibishuza nk’oku ashuzagye embere. Erhi bahika e Yeriko, Eliya acibibwira Elisha ntyo bwakasharhu erhi bakola bali oku bilometre 8 n’Olwishi lw’e Yoradani. Elisha acibilahira, arhalilonzize aleke Eliya!​—2 Abami 2:1-6.

 Elisha ayerekana oborhere bwago-bwago, k’okuderha: obuzigire bwishwekerezi. Obuzigire bwa ntyo bo Ruti ayerekaga Noemi, buzigire bushumya omuntu abêre mwishwekerezi oku muntu azigire n’okulahira oku arhamuleke. (Ruti 1:15, 16) Kulusha agandi mango goshi, ene lyo ngasi mukozi wa Nnâmahanga ashinganine ayerekane oborhere bwa ntyo. Aka Elisha, ka rhubwine obulagirire by’okuba n’obo borhere?

 Kobinali obuzigire bwishwekerezi bwa Elisha, bwahumire oku murhima gwa Eliya. N’oko kwarhumire aba n’olukengwa lw’okubona ecisomerine cizinda Eliya ajiraga. Erhi Eliya ali aha burhambi bw’Olwishi Yordani, lwishi lunene, arhimba ecishûli cage kw’ogo mishi, ganacicigabamwo bihimbi bibirhi, idako n’enyanya! Na “bantu 50 egarhi k’abana b’abalebi,” bakalola oku eco cisomerine cajirikana. Bali egarhi k’abalume bakag’ikomerezibwa lyo bahikiriza mikolo miguma na miguma eyerekire enterekêro ecîre. (2 Abami 2:7, 8, NWT) Byanahashikana erhi Eliya ye wakag’ikomereza abo balume. Myaka minji embere z’aho, akag’irhanya oku yene muntu mwishwekerezi waciri omu cihugo. Cikone kurhondera ago mango, Yehova amuhashisa okubona amajambere abakozi bage bakag’ijira, na muli oko amuhemba enyanya z’okulembera.​—1 Abami 19:10.

 Enyuma z’okuyikira Olwishi lw’e Yordani, Eliya abwira Elisha ntya: “Hûna ngasi ecikukwanine okujira kuli we, oku ntacikunyagwa.” Eliya alimanyire oku okugenda kwage kuli hofi. Cikone arhayumvagya obumvu lugenda emikolo n’eceyo cali cahâbwa omwîra wage waciri musole. Lubero n’oko, alonza okujira okwage koshi ly’amurhabala. Elisha ashagalukira okuhûna ntya: ‘Mbone ecihimbi ca kabirhi c‘iroho lyage!’ (2 Abami 2:9) Arhalilonzize okuderha mpu alonzize ahâbwe iroho lya Eliya kabirhi. Lubero n’oko, ahûnaga omwimo gushushine n’ogw’enfula, irhegeko lyalidesire oku ye oshinganine ahâbwe omwimo munene, erhi kuhabwa kabirhi, ly’ahash’ihikiriza emikolo mihyahya ya nnawabo w’omulala. (Olushika 21:17) Okubona ye wali nfula y’ekiroho ya Eliya, Elisha alimanyire oku alagirire oku kuba n’iroho ly’oburhwali liri ak’elya Eliya ly’ahikiriza omukolo gwage.

 Eliya n’obwirhohye, aleka Yehova ahâne ishuzo. Erhi Yehova akalesire Elisha abone oku Eliya agenda, k’okuderha oku ali aba erhi ashuzize kuli ebyo ahûnaga. Embere z’aho, abo bîra babirhi b’ensiku nyinji banacija “balambagira banashambala,” buzinda hajirikana akantu k’ecisomerine!​—2 Abami 2:10, 11.

 Obulangashane bwaba emalunga bwayisha bwabayegera. Rhwanarhanya oku nkaba habire emikungulo, olubi lw’ecihusi, lwajiragwa na kalemera, babona akantu kali nka muliro kaja kuli abo balume babirhi kanababerula, ciru nkaba kwanarhuma bagaluka cinyuma-nyuma erhi banayobohire. Babona omutuga, ngâle, eri nk’ejijirwe n’omuliro. Eliya alimanyire oku akasanzi kamahika. K’ashonire muli eyo ngâle? Ebibliya erhadesiri kantu kuli oko. Abe alimanyire erhi arhalimanyire, Eliya ahekwa enyanya, empingu, ahekwa omu cihusi ca kalemera!

 Elisha ahwerwa. Eco cisomerine cago-cago camurhabala ahugûkwa oku Yehova amuha “ecihimbi ca kabirhi” c’iroho ly’oburhwali lya Eliya. Cikone Elisha agaya erhi arhanya kuli oko. Arhalimanyire ngahi omwîra wage ajire arhanalilangalire oku anacimubone. Arhondera ayama ntya: “Larha! Larha! Ngalè y’Israheli n’abasirika bayo!” Abona oyo mwîra wage muzigirwa wakagimukomereza azimêra kuli bwenene, buzinda asharagula emishangi yage omu kuyerekana kunganaci agayire.​—2 Abami 2:12.

 Ka Eliya erhi ahêkwa empingu, k’agendekire ayumva izu ly’endûlu ly’omwîra wage Elisha. Ka naye ajire abanda endûlu? Kobinali, biyumvikine oku, okuba n’omwîra wa ntyo kwamurhabire alembere omu kasanzi kazibu. Bici rhwakaciyigiriza kugerera olwiganyo lwa Eliya? Nirhu rhukacijirira obwîra haguma n’abantu bazigire Nnâmahanga banalonza okujira obulonza bwage!

 Ngahi Eliya ajire enyuma z’aho? Madîni maguma na maguma ganayigirize oku ahesirwe empingu ly’ajilama haguma na Nnâmahanga. Cikone birhakahashikine ntyo. Amagana g’emyaka enyuma z’aho, Yezu Kristu aderha oku nta muntu osagija empingu. (Yowane 3:13) Cikone erhi rhusoma oku “Eliya ahesirwe empingu omu karhi k’empusi ya kalemera munene,” nkaba rhwanacidosa ntya; mpingu ehi eyo ajiremo? (2 Abami 2:11, NWT) Omu Bibliya oluderha “mpingu” lurhaganirira emunda Yehova aba alamire yone, cikone kandi lwanaganirira amalunga, ebitu n’era munda orhunyunyi rhukabalala. (Ennanga 147:8) Muli eyo mpingu, k’okuderha, emalunga yo Eliya ajaga. Na gurhi byabire buzinda bw’aho?

 Yehova ahamikisa oyo mulebi wage muzigirwa omu bundi bwami bw’e Yuda ly’amuha omukolo muhyahya. Ebibliya edesire oku Eliya acigendekire akola omukolo gwage muli obo bwami nkaba myaka nda na kulusha enyuma z’aho. Muli ako kasanzi Mwami mugalugalu Yorami ye wakagirhambula e Yuda. Oyo mwami arhôla mwali wa Ahabu, oku Ahabu na Yezebeli bakagishumya abantu bajira amabi kwagendekera. Yehova abwira Eliya oku ayandike amaruba galimo olubanja lugenda Yorami. Nk’oku byanalebagwa, Yorami afâ kubi. N’akantu k’okugayisa kuli kubona oku ogo mwanzi gumuganirire guyerekine oku: “Ntaye wamulakîre.”​—2 Enganîro 21:12-20.

 Habire olubero egarhi ka Eliya n’oyo mulume! Rhurhamanyiri bwinja-bwinja gurhi Eliya afîre. Cikone arhafâga olufu luli nka lwa mwami Yorami, yehe abantu bamulakira. Bakadula Eliya nk’oku banakagidula abandi balebi bishwekerezi. Na myaka cihumbi enyuma z’aho, Yehova ayerekana oku alizigire oyo mulebi wage erhi aboneka omu cibonekerezi c’okulangashana nk’izuba cahikiraga Yezu. (Mateyo 17:1-9) K’olonzize okuyiga olwiganyo lwa Eliya n’okuba n’obuyemere bw’okulembera amazibu? Akaba neci, ogendekere wajira obwîra haguma n’abantu bazigira Nnâmahanga, ogendekere wasegeza obwenge oku bintu by’ekiroho, onakashenga ngasi mango n’omurhima goshi. Na ntyo wanacilongeza enafasi omu murhima gwa Nnâmahanga wirhu w’obuzigire, Yehova!