Mwana nyere muguma acifulika aha ntaye wakamubwine, amasu gage gali galola hantu halebe omu mashekesheke. Adamala buzira kucidunda erhi anagwerhe boba bunji, n’olwîshi Nile lunali lwahonôka. Akasanzi kagera, cikoki agendekera abera aho anali alola eyo munda ciru akaba hali ebiruru byakagimuhamirako. Akagisegeza obwenge bwage oku irhonga (cigapo) ly’enfinjo lirhakagiyondoberera omu mishi, na muli lyo mwali mushinja wage w’akabonjo. Agaya bwenene omu kurhanya oku mushinja wage ali omw’irhonga na ntaye wakamurhabala. Cikoki alimanyire oku oko ababusi bage bajijire kwali kwinja bwenene; omu kurhanya oku maligo gagendekeraga gajirwa, eyo yone njira yakarhabire mushinja wage alame.

 Omu kugendekera abêra aho, oyo mwana nyere ayerekana oburhwali, cikoki kasanzi kasungunu, alikwanine ayerekane oburhwali bunji kulusha. Borhere bulebe bwali kola buli bwamuja omu murhima; obuyemere. Kanga kalebe kali kahuma oku kalamo kage koshi kali kola kali hofi kajirwe. Myaka minji enyuma, erhi akola ali mugikulu, obuyemere bwage bwali bwamulongoza oku kasanzi kinja bwenene k’e istware y’olubaga lwage. Kandi, obo borhere bwamurhabala erhi ajira ecaha cizibu. Oyo mwana nyere ali ndi? Na bici obuyemere bwage bwakarhuyigiriza?

 Ebibliya erharhubwiziri izino ly’oyo mwana, cikoki rhurhakaba n’akarhinda ali ndi. Ali Miriyamu, mwana murhanzi wa Amuramu na Yokebedi, bajà Bayahudi bali omu cihugo c’e Misri. (Emibalè 26:59, Mashi Bible) Mushinja wage murho akagihamagalwa Musa. Aroni wali mukulu hitya kulusha Musa, agwerhe nka myaka isharhu ago mango. Emyaka Miriyamu agwerhe ago mango erhamanyikini, cikoki bipatine n’obukengere okurhanya oku nkaba arhaliciyeneza myaka ikumi.

 Miriyamu alamira akasanzi kazibu k’olubaga lwage. Olubaga lwage lwakagiyobohwa bwenene e Misri, n’oko kwarhuma abanya Misri babajira bajà n’okukabalibuza. Abo bajà bagendekera baburhana n’okuyushûka. Lyo bayusa oko kuyushûka kwakagibayobohya bwenene, abanya Misri barhôla omupango gw’okulibuza kulusha. Faraoni ahâna irhegeko oku ngasi murhabana Muyahudi wakaburhwa, ayirhwe. Nkaba Miriyamu ayumvirhe omwanzi lugenda obuyemere bwa Shifra na Puwa, bakazi babirhi bakagibusa balahiraga okurhumira elyo irhegeko lya mwami.​—Olubungo 1:8-22.

 Kandi acibwinîre obuyemere ababusi bage bagwerhe. Enyuma z’omwana wabo wakasharhu okuburhwa, Amuramu na Yokebedi bafulika oyo mwana myezi isharhu mirhanzi y’okuburhwa. Barhalekaga oboba bw’irhegeko lya mwami lyarhuma bayirha omwana wabo. (Abahabraniya 11:23) Cikoki kurhali kulembu okufulika oyo mwana wabo, balikwanine okurhôla omuhigo mudarhi bwenene. Yokebede alimanyire oku kwali kwa bulagirire okubona ahantu hinja h’okufulika oyo mwana ly’abonwa n’omuntu wakagendekera amulera. Orhanye oku masala manji oyo muzîre asalisire erhi aba ali aluka irhonga ly’enfinjo n’okulishiga obulembo. Birhakasomerana erhi akaba ye wabwiraga Miriyamu aje aho n’okulola ebyaba.​—Olubungo 2:1-4.

 Muli oko Miriyamu alindirira. Erhi akasanzi kagera, abona abantu abayishire. Bakazi balebe bahika aho. Barhali ba Misri kone. Ali mwali wa Faraoni n’abaja-nyere bage bayishigiyoga omu lwishi Nile. Nkaba erhi Miriyamu ababona avunika omurhima. Okuderha okuli, birhakayumvikine oku mwali wa Faraoni ye nnanene akavunyire irhegeko lya mwami ly’alera oyo mwana Muyahudi. Bibonekine oku Miriyamu asalisire bwenene n’obushiru omu murhima gwage muli ako kasanzi.

 Mwali wa Faraoni ye wali murhanzi okubona irhonga ly’enfinjo omu mashekesheke. Muli oko, arhuma muja-nyere wage muguma alilerhe. Ogo mwanzi gudesire ntya lugenda mwali wa mwami: ‘Analifunula, abona omwana-rhabana adwirhe alaka.’ Ho n’aho ahugûkwa ebintu bwinja: Muzire muguma Muyahudi alilonze okucungula omwana wage. Mwali wa Faraoni ayumviza oyo mwana obonjo bwenene. (Olubungo 2:5, 6) Buzira karhinda, Miriyamu abona oborhere bulebe oku busu bw’oyo mukazi. Amanya oku akasanzi kage kw’okuyerekana obuyemere muli Yehova kamahika. Aciha oburhwali n’okuyegera mwali wa Faraoni n’abaja-nyere bage.

 Rhurhamanyiri ebyahikire oyo mwana nyere Muyahudi erhi ahiga okuganiza omuntu w’omu mulala gwa mwami. Ciru akaba ntyo, Miriyamu arhondera okudosa mwali wa mwami idoso: “Ka walonza njihamagala omulezi omu bakazi b’Abayahudi akazi kuyonkekeza oyu mwana?” Elyo lyali idoso lya bwenge bwenene. Mwali wa Faraoni alimanyire oku arhakahashire ayonkesa omwana. Byanahashikana abwine oku kwakabire kwinja erhi oyo mwana akalerwa n’abantu b’olubaga lwage; buzinda akamulesire omu nyumpa yabo abe mwana mulezi wage anamuyigirize yenene. Bibonekine oku Miriyamu ashagalusire bwenene erhi mwali wa Faraoni amushuza erhi: “Genda omulonze!”​—Olubungo 2:7, 8.

 Miriyamu alibirha aja emwabo ajibona ababusi bage bali n’obôba. Orhanye gurhi nnina aciyumvirhe erhi Miriyamu aba ali amuganirira ebyabire. Bibonekine oku Yokebedi ahugûsirwe oku Yehova ye wakagikola ogo mukolo, muli oko, agenda haguma na Miriyamu baja emwa mwali wa Faraoni. Byanahashikana Yokebedi afulika obushagaluke bwake erhi mwali wa mwami amubwira ntya: “Mpêkera oyu mwana, ojikamuyonsa, niene nayishikuhêmba.”​—Olubungo 2:9.

 Olo lusiku, Miriyamu aciyigiriza binji lugenda Nnâmahanga wage, Yehova. Aciyigiriza oku aba ashibirire olubaga lwage n’oku anayumvirhize amasala gabo. Na kandi aciyigiriza oku arhali abantu bakulu bone bakayerekana oburhwali n’obuyemere. Yehova anakayumvirhiza abakozi bage boshi bishwekerezi. (Ennanga 65:2) Rhweshi ene​—misole n’abashosi, abalume n’abakazi—​rhulagirire okukakengera aka kanga muli zino nsiku ndarhi.

 Yokebedi ayonsa n’okulanga oyo mwana. Rhwanarhanya oku Miriyamu akagizigirira oyo mushinja wage acungulaga. Byanahashikana erhi amuyigirizize okuganira n’okushagaluka omu kuyumva ali aderha izino lya Nnâmahanga wage, Yehova oburhangiriza. Erhi oyo mwana akula, akasanzi kahika k’okumuhêka emwa mwali wa Faraoni. (Olubungo 2:10) Byanahashikana omulala goshi gwagayire bwenene. Nkaba Miriyamu akacifinja okubona Musa, nk’oku ahamagalagwa na mwali wa Faraoni, akabire mulume wa gurhi! K’akagendekire azigira Yehova anali akulira omu nyumpa ya mwami w’e Misri?

 Kasazi kalebe enyuma, ishuzo lyabonekana. Bibonekine oku Miriyamu acivunire okubona mushinja wage acishozire okukolera Nnâmahanga wage ahali w’okuyunguka na byoshi akahabirwe omu mulala gwa mwami Faraoni! Erhi Musa ayeneza myaka 40, arhondera ahalira olubaga lwage. Aniga Omunyamisri wakoleraga Omuyahudi kubi. Okubona Musa alimanyire oku oko anajijire kwakarhumire anigwa, alibirha, arhenga e Misri.​—Olubungo 2:11-15; Ebijiro by’Entumwa 7:23-29; Abahabraniya 11:24-26.

 Nkaba Miriyamu arhayumvagya mwanzi goshi-goshi gwa mushinja wage myaka 40 yakulikiraga erhi aba alamire e Midiyani, emunda akagiyabula ebibuzi. (Olubungo 3:1; Ebijiro by’Entumwa 7:29, 30) Akasanzi kagera na Miriyamu agendekera agilula n’okubona gurhi olubaga lwage lugendekire lwalibuka bwenene.

 Byanahashikana Miriyamu agwerhe myaka 80 erhi Musa agaluka arhumirwe na Nnâmahanga mpu agombole olubaga Lwage. Aroni ye wakagiderha aha Musa, na bandi bene wabo Miriyamu babirhi bajibona Faraoni lyo bajimubwira aleke abantu ba Nnâmamanga bagende. Buzira karhinda, Miriyamu ajijire okwage koshi ly’abalunga okuboko, ngasi mango erhi Faraoni akalahire oku arhabayumvirhiza erhi na Yehova agendekire ahâna amapigo g’okurhonda abanya Misrhi. Buzinda, enyuma z’ipigo lizinda​—okunigwa kw’enfula z’abanya Misri—​akasanzi kahika k’aba Israheli okurhenga e Misri! Murhanye ko Miriyamu erhi aba ali arhabala olubaga lwage okurhenga e Misri na Musa ali abalongoza.​—Olubungo 4:14-16, 27-31; 7:1–12:51.

 Enyuma z’aho, erhi bibonekana oku abasoda b’abanya Misri bashimbulire aba Israheli n’enyanja ndukula ebali embere, Miriyamu abona oku mushinja wage Musa ayimanzire embere z’enyanja ndukulu anayinamwire agarhi kage. Enyanja ndukula yagabanikamo! Erhi aba ali alola oku mushinja wage ali abayikiza oku mucanga mûmu, byanahashikana obuyemere bwa Miriyamu basezire bwenene kulusha agandi mango goshi. Ali yemire n’obwalagale oku Nnâmahanga ajira ngasi kantu koshi n’okuhikiriza ngasi ciragane!​—Olubungo 14:1-31.

 Enyuma z’akuyikira enyanja ndukula buzira mazibu, enyanja yashubira nk’oku yanali n’okuzisa Faraoni n’engabo yage, Miriyamu abona oku Yehova agwerhe misi minji bwenene kulusha omurhwe mudarhi gwa bene bene bantu omw’igulu lyoshi. Abantu bashumibwa okuyimbira Yehova olwimbo. Miriyamu alongoza abakazi okuyimba ezi nderho: “Muyimbire Nyamuzinda [Yehova, NWT] bulya ajîre irenge erhi kuhimana kurhuma, Aloha enfarasii omu nyanja n’abâziriko.”​—Olubungo 15:20, 21; Ennanga 136:15.

 Ako kali kasanzi kaguma kinja omu kalamo ka Miriyamu, kasanzi arhakayibagira ciru n’ehitya. Aho ho Ebibliya ehamagire Miriyamu mulêbi-kazi. Miriyamu ye mukazi murhanzi wahamagalagwa mulêbi-kazi. Ali muguma omu bakazi basungunu bakolire Yehova muli eyo njira yago-yago.​—Abaciranuzi 4:4; 2 Abami 22:14; Izaya 8:3; Luka 2:36.

 Muli oko, Ebibliya erhukengezize oku Yehova anakarhulola n’oku agwerhe irala ly’okurhugishira obwihangane bwirhu bw’obwirhohye n’okulembera, n’irala lirhu ly’okumukuza. Emisole n’abashosi, abalume n’abakazi, ensiku zoshi rhugendekere rhwaba n’obuyemere muli Yehova. Obuyemere bwa ntyo bunasimise Yehova; arhakayibagira obuyemere bwa ntyo, ananali mubidu okurhuhemba enyanya y’okuyerekana obuyemere bwa ntyo. (Abahabraniya 6:10; 11:6) Oko kurhuhire ecirhumire cinja c’okuyiga obuyemere bwa Miriyamu!

 Okuba n’emikolo yago-yago kunalerhe emigisho n’omurhego. Erhi aba Israheli bakulwa omu buja, byanahashikana Miriyamu ye mukazi walimanyikine bwenene omu lubaga loshi. K’akabire waciburi n’okulonza amanyikane bwenene kulusha? (Emigani 16:18) Kugayisize bwenene okubona oku hali amango ajijire ntyo.

 Myezi misungunu enyuma z’okurhenga e Misri, Musa alambagirirwa n’ecikundi c’abantu barhengaga kuli bwenene—Yetro, ishâzala wage, alerhire Musa mukage, wakagihamagalwa Sipora n’abana bage babirhi. Erhi Musa aba ali e Midiyani myaka 40, acijîra omu buhya. Embere bwenene Sipora agaluka eyo Midiyani, nkaba ajagilambagira, n’aha ishe akola ayishire amugalwire omu kambi k’aba Israheli. (Olubugo 18:1-5) Orhanye gurhi aba Israheli baciyumvirhe erhi Sipora ahika! Nkaba bantu banji bagwerhe irala ly’okubona muk’omulume Nnâmahanga acishozire ly’abakula omu bujà e Misri.

 Ka Miriyamu ashagalusire okubona Sipora? Nkaba oku murhondero ashagalusire. Cikoki bibonekine oku enyuma z’ensiku, aleka eciburi cimujemo. Nkaba abona oku Sipora akola amanyikana omu lubaga bwenene kumulusha. Muli oko, Miriyamu na Aroni barhondera okuderhera Musa ebintu bibi. Na nk’oku byanakagiyorha biba, ezo nderho zaba mbi bwenene kuhika zalerha enshombo. Oku murhondero baderha binji bwenene lugenda Sipora; baderha oku yehe arhali mu Israheli ci Mukûshi. * Cikoki obo budesidesi bwagendekera kuhika barhondera okuderha Musa naye kubi. Miriyamu na Aroni baderha ntya: “Ka Nyamubâho [Yehova, NWT] kuli Musa yenene aderhera? K’arhaderhaga kuli rhwe rhweki?”​—Emibalè 12:1, 2.

 Ezo nderho zirhuyeresire oku sumu mudarhi alikola ali atembera muli Miriyamu na Aroni. Okubona barharhimukagwa n’oku Yehova akagikolesa Musa, balonza okuba bakulu na bakumanyikana bwenene. Ka bajijire ntyo bulya Musa akolesize obukulu bwage kubi n’okulonza obulu kulsha? Okuderha okuli arhali mwimana, cikone Musa arhacilongezagya binji erhi kuba waciburi. Amandiko galongozibagwa n’iroho litagafu gadesire ntya: “Musa acîbêraga muntu mutudu bwenene, kulusha abandi bantu boshi ba hanola igulu.” Muli oko, Miriyamu na Aroni bagosa bwenene erhi baderhaderha Musa kubi, na muli oko ali omu murhego. Ogo mwanzi gudesire: “Nyamubâho [Yehova, NWT] anaciyumva okwola.”​—Emibalè 12:2, 3.

 Buzira kulalira Yehova abahira boshi oku banali basharhu omw’ihema ly’embuganano. Enkingi y’ecitu yaliyerekine okubaho kwa Yehova yayandagala yabera aha luso lw’ihema. Buzinda Yehova aderha. Akalihira Miriyamu na Aroni. Abakengeza obwîra bwa hofi-hofi ajira haguma na Musa n’okucikubagira acikubagira Musa. Abadosa ntya: “Carhumirage murharhimanya okuja mwaderhaderha kubi mwambali wani Musa?” Bibonekine oku muli ako kasanzi Miriyamu na Aroni bakajuguma n’oboba. Yehova abona oku oko kubulira Musa obukenge anali ye babubulire.​—Emibalè 12:4-8.

 Buzira karhinda Miriyamu ye warhondezagya obo bugoma, ye wanashumikaga mushinja wage bashambulire demayi wabo. Oko kuhugwire bulya gurhi ye wahabirwe obuhane. Muli oko, Yehova amushurha olushomyo. Obo bulwala bwahindula oluhu lw’omubiri gwage kuhika aba “mweru nka lubula.” Ho n’aho Aroni acirhohya embere za Musa n’okumusemberera abahunîre Yehova obwonjo oku caha “rhwajiraga omu kuhalanjika.” Musa wayorhereraga aba mutudu alakira Yehova erhi: “Mâshi Nyamuzinda nkusengire, omufumye!” (Emibalè 12:9-13) Musa na Aroni baciyumva kubi okubona mwali wabo barhonyagya bwenene akola ayosire ntyo ciru akaba obuzamba bwage.

 Yehova akolesa olukogo. Afumya Miriyamu erhi ahûna obwonjo. Ciru akaba ntyo, Yehova aderha oku Miriyamu ayegûlwe n’olubaga nsiku nda embuga y’ikambi ly’aba Israheli. Byanahashikana Miriyamu aciyumvirhe kubi lyarhumikira elyo irhegeko bulya oko kwakarhumire abantu boshi omw’ikambi bamanya oku anahabirwe obuhane. Cikoki obuyemere bwage bwamucungula. Omu murhima gwage, alimanyire okw’Ishe Yehova Mushinganya n’oku akagimuhana bulya amuzigire. Muli oko, ajira nk’oku anabwiragwa. Nsiku nda zagera Abayahudi bali omw’ikambi bali balindi. Kandi Miriyamu ayerekine obuyemere​—erhi ayemera ‘okushubira omw’ikambi.”​—Emibalè 12:14, 15.

 Yehova anakahana ab’azigire. (Abahabraniya 12:5, 6) Alizigire Miriyamu bwenene, arhakanasimire abone oku agwerhe eciburi. Miriyamu aciyumvirhe kubi erhi ahâbwa abuhane, cikoki okujira ntyo kwamucungula. Okubona ayemire obuhane n’obuyemere, ashubiyemerwa na Nnâmahanga. Agendekera alama kuhika hofi n’obuzinda bw’omubalamo gw’aba Israheli omw’irungu. Nkaba akabire na hofi myaka 130 erhi ali e Kadeshi, omw’irungu ly’e Zini. * (Emibalè 20:1) Karne nyinji enyuma, kugerera obuzigire, Yehova akuza Miriyamu oku mukolo gwage mwishwekerezi. Kugerera omulêbi wage Mikeyo, akengeza alubaga lwage ntya: “Nakucungwire kurhenga omu nyumpa y’obuja, embere zinyu narhumayo Musa, na Aroni, na Miriyamu.”​—Mikeyo 6:4.

 Akalamo ka Miriyamu kanarhugiriza binji. Nk’oku anajiraga erhi aciri murho, rhukwanine rhulange balya barhagwerhi obuhashe bw’okucilanga, rhunanacihe oburhwali bw’okuhalira aminja. (Yakobo 1:27) Akâge, rhukwanine rhukayigiriza abandi omwanzi kurhenga emwa Yehova n’omwishingo. (Abaroma 10:15) Akâke, rhukwanine rhuyake sumu w’okuyumviza abandi obumvu n’akarhinda. (Emigani 14:30) N’akâge, rhukwanine okuyemera obuhane bwa Yehova n’obwirhohye. (Abahabraniya 12:5) Erhi rhwakajira ntyo, rhwanayiga obuyemere bwa Miriyamu.