Buzinda, abo balume bahulika. Nkaba izu liguma lyone bakagiyumva, cali cihogero c’empûsi yakag’irhenga omw’irungu ly’e Arabie. Ayubu ahulika, alikola arhamire n’ezo nganîro. Obone omu bwenge bwawe gurhi Elifazi, Bildadi, na Sofari bal’imuhenekire nk’abalonzize okugendekera baganira. Cikone abo balume barhacihashaga okumulolako bulya emihigo yabo erhahikiriraga n’ebinwa byabo “birhagwerhi nda na mugongo” birhahikiriraga. (Ayubu 16:3, NWT) Ayubu al’ihizire okuhalira obwishwekerezi bwage.

 Bibonekine nka bwishwekerezi bone Ayubu acir’isigaline. Ali amahêza obuhirhi bwage, bana bage ikumi, oburhabale n’olukengwa lw’okurhenga oku bîra bage n’abalungu bage, ciru n’amagala gage gali gamasherera. Oluhû lwage lwali lwamayirhuha enyanya z’obulwala, alikola ali arhenga kw’enjula n’emivunyu. Ciru n’omuka gw’akanwa kage gwalikola guli gwabaya. (Ayubu 7:5; 19:17; 30:30) Na kandi, ezo nderho abo balume basharhu bakag’iderha zarhuma Ayubu agaya bwenene. Al’ihizire okuyerekana oku arhali munyabyaha nkununu nk’oku abo bîra bage baderhaga. Erhi Ayubu ayusa okuderha enderho zage nzinda, abo balume barhacibonaga ebi baderha lyo bamushuza. Ezo nderho zabo ngalu-galu zahika ebuzinda. Cikone, acikag’iyumva amalumwa, analicilagirire oku burhabale muli ako kasanzi kazibu!

 Biyumvikine oku Ayubu arhagwerhe entanya z’olugero. Al’ilagirire oku mahano n’oku kukubûlwa. Na kandi al’ilagirire oku kurhulirizibwa n’oku kuhâbwa omurhima, bintu balya barhuliriza bage b’obunywesi bayabiragwa okujira. K’okola ociyumvirhe oli omu bulagirire bw’okuhâbwa amahano n’okurhulirizibwa? K’abantu wakag’irhanya oku baba bîra bawe bakola bakuvunire omurhima? Akaba ntyo kobiri, okuciyigiriza lugenda oku Yehova arhabire Ayubu na gurhi Ayubu ajijire kwanakuha obulangalire n’amahano gakakurhabala.

 Omwanzi guganirire Ayubu gulimo akantu k’okusomeza. Aha burhambi hali owundi muntu, musole muguma gwakag’ihamagalwa Elihu. Akag’iyumvirhiza kone abo balume bali bakulu kumulusha buzira kuderha kantu. Arhanashagalukiraga ciru n’ehitya ebi bakag’iderha.

 Elihu agayisibwa n’ebi Ayubu aderhaga. Akunira bwenene erhi ayumva Ayubu aderha oku “ali mushinganya emalanga ga [kulusha Nnâmahanga].” Ciru akaba ntyo, Elihu ayumviza Ayubu obwonjo, erhi abona amalumwa ga Ayubu, okurhaba kwage ndyalya, n’oku al’ilagirire oku mahano n’oku burhulirize. Kobinali Elihu arhacihashaga okulembera abo barhuliriza b’obunywesi! Ayumvirhe gurhi abo barhuliriza bali bahira akarhinda kuyerekera obuyemere bwa Ayubu, olukengwa lwage, n’obwishwekerezi bwage. N’eby’okugayisa bwenene, enderho zabo zayerekana oku Nnâmahanga ali mubi. Elihu alikola alonzize bamuhe oluhya lw’okuderha!—Ayubu 32:2-4, 18, Mashi Bible.

 Aderha ntya: “Ndi mwana wa cirhaba, na ninyu mukola muli bashosi, n’obwoba bwarhumire ntacishomya okumubwira oku mbwine.” Cikone arhacihashaga ahulika. Acib’iderha ntya: “Obûnji bw’emyaka arhali bwo burhimanya, ciru n’obushosi burhankahindula omuntu [abe] mushinganyanya.” (Ayubu 32:6, 9) Buzinda, enderho ndiri Elihu aderhaga zayerekana oku anadesire okuli. Entanya zage zali lubero bwenene n’eza Elifazi, Bildadi, na Sofari. Elihu abwira Ayubu n’obwalagale oku arhamubulire obukenge erhi kumuyushulira amalumwa. Na kandi ayerekine oku akenzire Ayubu omu kumuhamagala okw’izino lyage, n’okuyemera oku anabulirwe obukenge. * Aderha n’obukenge ntya: “Wani Ayubu, yumva ezi nderho zani.”—Ayubu 33:1, 7; 34:7.

 Elihu aha Ayubu mahano maguma maguma g’obwalagale. Amubwira ntya: “Nayumvirhe amarhwiri gani gahema, . . . ‘Niono ndi mwêru kwêru nta bulyalya, ndi mwimana, buzira izâbyo. Cikone kushobeka [Nnâmahanga] anshobesire.’” Elihu afulûla n’obwalagale aha Ayubu anagokize, amudosa ntya: “K’ocikebirwe mpu wanayâza, nisi erhi ohamagale n’obwalagale oku ‘wanaba mushinganyanya omu masu ga Nnâmahanga [erhi kulusha Nnâmahanga]’?” Elihu arhakalesire Ayubu agendekere aba n’entanya za ntyo. Ogo musole gwaderha ntya: “Kuli ebyo byoshi nkubwizire oku oyazire.” (Ayubu 33:8-12; 35:2) Elihu alimanyire oku Ayubu agayire enyanya z’okuheza ngasi kantu n’enyanya z’ebi abo bîra b’obunywesi bamujiriraga. Cikone Elihu amuhanula ntya: “Oburhê burharhumaga warhalusa olugero.”—Ayubu 36:18, Mashi Bible.

 Akantu k’obulagirire bwenene Elihu ajijire, ahalira Nnâmahanga Yehova. Omu kukolesa enderho z’emisi asegeza oku okuli kw’obulagirire. Aderha ntya: “Muyegûle, kùli na Nyamuzinda amagalugalu; Ow’enyanya aba mushinganyanya! . . . Nyamubaho arhalenganya.” (Ayubu 34:10, 12) Elihu arhabala Ayubu ahugûkwe oku Yehova aba wa bwonjo na mushinganyanya, omu kumuyereka oku arhamuhanyire enyanya z’enderho z’okubula bukenge aderhaga buzira kurhanya. (Ayubu 35:13-15) N’ahali h’okuderha oku yehe agwerhe amashuzo oku madoso goshi, Elihu aderha ntya: “Nyamuzinda ali mukulu, alushire obumanye bwirhu.”—Ayubu 36:26.

 Elihu agendekera aba wa lukogo, ciru akaba ahanwire Ayubu n’obwalagale. Aganirira obulangalire bwinja, buyerekine oku Yehova akagalulire Ayubu amagala minja. Okubiyerekire omukozi wage mwishwekerezi, Nnâmahanga akadesire: ‘Omubiri gwage gwashubibona obuzibu bw’eburho, anashubire omu mango gage g’obusole.’ Eyindi njira Elihu ayerekinemwo olukogo, arhagendekeraga aderha yenene, cikone obwira Ayubu oku naye aderhe ly’amushuza. Aderha ntya: “Oderhage, bulya nanasima nyerekane obushinganyanya bwawe.” (Ayubu 33:25, 32) Cikone Ayubu arhashuzagya kantu. Nkaba abona oku kurhali kwa bulagirire acihalire enyuma z’okuhâbwa er’ihano linja na lyakuhâna omurhima. Nkaba alaka ly’arhulirira.

 Rhwanaciyigiriza binji kugerera abo balume babirhi bishwekerezi. Olwiganyo lwa Elihu lwanarhuyigiriza gurhi rhwakahanûla n’okurhuliriza abali omu bulagirire. Omwîra w’okuli arhakarhindira okuyereka owabo oku anajijire amagosa erhi oku akola agwerhe olugenzi lwakamulerera amazibu. (Emigani 27:6) Rhulonzize okuba bîra ba ntyo, omukugendekera rhwaba ba lukogo na ba kuhâna omurhima, ciru akaba oyu rhuli rhwahanûla akaderha buzira kurhanya. N’amango rhwene rhulagirire okw’ihano, olwiganyo lwa Ayubu lwanarhukengeza oku rhushinganine rhukayumvirhiza ihano n’obwirhohye ahali h’okulilahira. Rhweshi rhuba rhulagirire okw’ihano n’oku kukubûlwa. Okuyemera ihano kwanaciza obuzine bwirhu.—Emigani 4:13.

 Omu nderho za Elihu aganirire kanji-kanji, empûsi, olwikungu, emikungulo, n’emilazo. Aderha lugenda Yehova ntya: “Yumvi, yumvi, okushakânya okw’izû lyage.” Hisanzi hisungu enyuma z’aho, Elihu aganira okubiyerekire “ecihusi.” (Ayubu 37:2, 9, Mashi Bible) Bibonekine oku erhi ali aganira, empusi yayisha yanagendekera yayushuka. Buzinda, caba cihusi cinene bwenene. N’akantu kw’okusomeza bwenene kajirikana, Yehova aderha!—Ayubu 38:1.

 Amango rhuli rhwasoma ecitabu ca Ayubu, rhunashagaluke bwenene erhi rhuhika oku bigabi binja bwenene birimo enderho Yehova abwiraga Ayubu. Nka kula ecihusi cinene bwenene cihêka obucafu buzirho bwenene, ko enderho za Yehova zahêsire ebyo binwa by’obunywesi birhagwerhe nda na mugongo bya Elifazi, Bildadi, na Sofari. Buzinda bw’aho lyo Yehova ayish’iriganiza abo balume. Entanya zage azisegizeko Ayubu yene, aganiza oyo mukozi wage muzigirwa ak’omubusi ohanûla omwana wage.

 Yehova al’imanyire amalumwa ga Ayubu. Anamuyumviza obwonjo, nk’oku ayorha abuyumviza abana bage bazigirwa bali balibuka. (Izaya 63:9; Zakariya 2:8) Cikone kandi alimanyire oku Ayubu ‘ajaga aderha ebi arhamanyiri,’ n’oko kwakag’iyushula amazibu gage. Co carhumaga Yehova akubûla entanya za Ayubu omu kumudosa madoso manji. Arhang’imudosa ntya: “Ngahi wali erhi ndema igulu? Mbwiraga ho bulya ntaco oba ahabire!” Oku murhondera gw’obulemi, “enyenyezi z’omuceracera,” k’okuderha, bamalahika b’omu mulala gwa Nnâmahanga, bakoma akagasha erhi babona emikolo minja bwenene y’obulemi. (Ayubu 38:2, 4, 7, Mashi Bible) Kobinali, ntaco Ayubu ashuzize bulya arhalimanyire kantu kuli ebyo.

 Yehova agendekera aganirira emikolo yage y’obulemi. Yehova amuganirira hisungunu lugenda ebi abantu bahamagala ene siyanse. Ebyo bintu amuganirire byaliyerekire esiyanse eyigiriza eby’enyenyezi (astronomie), eyigiriza eby’ensimba (biologie), eyigiriza eby’omu budaka (géologie), n’eyigiriza ebiba birhuzungulusire (physique). Aganirira ensimba zakag’ilugilama omu eneo Ayubu al’ilamiremo: entale, hungwe, empene y’emuzirhu, endogomi y’emuzirhu, empanzi y’emuzirhu, itoni, kanga w’emuzirhu, enyunda, behemoti (nkaba y’e kiboko), na buzinda Leviatani (nkaba mamba). Orhanye olukengwa Ayubu abire nalo omu kuyumva ehotuba eyerekire obulemi yajiragwa n’Omulemi w’amalunga n’igulu! *

 Omuhigo gw’ebyo byoshi gwali guhi? Ayubu ali omu bulagirire bw’okuba mwirhohye kulusha. Omu kuderha oku Yehova ye wamujirire ago mabi, Ayubu akalonza okucikula kuli Ishe w’obuzigire, n’oko kwakagirhuma amalumwa gage gayushûka. Co carhumaga Yehova adosa Ayubu kanji-kanji ngahi ali erhi alema amalunga n’igulu na kandi amudosa erhi akahashire okulisa, n’okurhegeka ebiremwa Nnâmahanga alemaga. Erhi akaba Ayubu arhakahashire okurhegeka ebintu bisungunu Nnâmahanga alemaga, gurhi akahashire okutwira Omulemi olubanja? Enjira ya Yehova y’okubona ebintu n’entanya zage yal’ilushire oku Ayubu akagibibona?

 Ebi Yehova akag’ibwira Ayubu, byoshi byakag’iyerekana obuzigire omugwerheko. Yehova ali nk’oli wabwira Ayubu ntya: ‘Mwana wani, erhi akaba ngwerhe obuhashe bw’okulema ebi byoshi, ka nanayabirwa okukushibirira? Ka kobinali nanakulekerera, nkurhôle abana bawe, ntume orhaba n’amango minja gayisha, nshereze n’amagala gawe? K’arhali niene nie nakakugalulira ebi wahezize n’okukufumya?’

 Kabirhi kone Ayubu adesire ly’ashuza kw’ago madoso ga Yehova. Ayubu arhajisagya Yehova kadali, arhanacihaliraga. Ayemera n’obwirhohye oku arhalimanyire binji, anaciyunjuza ebinwa aderhaga buzira kurhanya. (Ayubu 40:4,?5; 42:1-6) Aha rhubwine olwiganyo lwinja lw’obuyemere bwa Ayubu. Ciru akaba alembîre ebyo byoshi, agendekera aba n’obuyemere busêzire muli Yehova. Ayemera ago mahano ga Yehova anakubûla oku akag’ibona ebintu. Olwiganyo lwage lwanarhushumya rhucilabirize omukucidosa ntya: ‘K’obwirhohye bunanshumye nyemere ihano erhi kukubûlwa?’ Rhweshi rhuba rhulagirire oku burhabale bwa ntyo. Erhi rhubuyemera rhunabe erhi rhuyizire olwiganyo lwa Ayubu.

 Yehova akola ajira kantu kalebe ly’arhuliriza Ayubu. Omukuganiza Elifazi, nkaba wali mukulu kulusha ababo barhuliriza b’obunywesi, Yehova aderha ntya: “Oburhê bwawe bungwerhe mwene abîra bawe bombi, bulya arhali by’okuli mwakag’inderhera, nk’oku mwambali wani Yobu [Ayubu] akag’ijira.” (Ayubu 42:7, Mashi Bible) Orhanye okubiyerekire ezo nderho. Ka Yehova alonzagya okuderha oku ngasi kantu abo balume basharhu baderhaga kali ka bunywesi n’oku ngasi kantu Ayubu aderhaga kali k’okuli? Nanga ciru n’ehitya. * Cikone, hali lubero lunji agarhi ka Ayubu n’abo bakakoza. Ayubu akag’iciyumva kubi bwenene enyanya z’amalumwa gage, anal’ivunisire omurhima bwenene enyanya z’ebyo bamushobekaga. Biyumvikine bulya gurhi mango maguma adesire buzira kurhanya. Cikone Elifazi n’abîra bage babirhi barhali omu kanga kali nk’aka Ayubu alimo. Bulya barhal’igwerhe obuyemere busêzire muli Nnâmahanga, baderha n’obucibone enderho z’okutwa nka mugushu. Arhali kurhera kone barhezire oyo muntu mwêru kwêru, ci n’akantu kabi bwenene, bayerekana oku Yehova ali Nnâmahanga mubi orhajira bwonjo!

 Birhakasomerana okubona Yehova ahûnaga abo balume oku bahâne enterekêro y’engulo ndarhi. Balikwanine bahâne mpânzi nda na nganda buzi nda, ebyo birhali binyi, bulya buzinda bw’aho Irhegeko lya Musa lyayishir’ihûna oku omukahani mukulu akahâna enterekêro ya ntyo amango olubaga loshi lwatumwire ecaha cage. (Bene-Levi 4:3) Ezo zo nsimba z’engulo ndarhi bwenene Irhegeko lya Musa lyal’ihûnyire okuhâna enterekêro. Na kulusha oko, Yehova abwira abo barhuliriza b’obunywesi oku akayemire enterekerêro yabo erhi Ayubu akabasengerire. * (Job 42:8) Oko kwarhulirizize Ayubu okubona Yehova amuhalire n’obushinganyanya bwage bwahima!

 Yehova al’iyemire n’obwalagale oku Ayubu akajijire oko amuhûnaga, na ntyo ayerekane oku ababalire abo balume bamujiriraga kubi bwenene. Na Ayubu ajira nk’oku Ishe amubwiraga. (Ayubu 42:9) Kulusha ebi adesire byoshi, ebijiro byage by’okurhumikira byayerekine oku ali mwishwekerezi. N’oko kurhumikira kwamulerhire migisho minji omu kalamo kage.

 Yehova ayeresire Ayubu “buzigire bunji bwenene n’obwonjo.” (Yakobo 5:11, NWT) Gurhi ayerekinemwo ntyo? Yehova agalulira Ayubu amagala minja. Orhanye gurhi Ayubu aciyumvirhe erhi abona “omubiri gwage gwamashubibona obuzibu bw’eburho” nk’oku Elihu alebaga! Abantu b’omulala gwage n’abîra bage bakamurhuliriza n’okumulerhera engalo. Yehova agalulira Ayubu obuhirhi bwage, amugalulira kabirhi ebi aligwerhe. Gurhigi Yehova ajijire okubiyerekire omungo Ayubu agwerhe gw’okuheza abana bage? Ayubu na mukage barhulirizibwa omu njira ndebe omu kucib’iburha bandi bana ikumi! Na Yehova ayushula kwa cisomerine emyaka y’akalamo ka Ayubu. Ayubu acib’ilama yindi myaka 140, abona abana b’abana bage kuhika okw’iburha lya kani. Ebibliya edesire ntya: “Okubundi, Ayubu anacifâ mushosi erhi amayigurha ensiku.” (Ayubu 42:10-17) N’omu Paradizo, Ayubu na mukage banac’ibilama haguma n’abantu b’omulala gwabo, kuhiramo balya bana ikumi Shetani anigaga.—Yowane 5:28, 29.

 Bici byarhumire Yehova ahemba Ayubu bwenene? Ebibliya eshuzize ntya: “Mwayumvirhe baderha okubiyerekire obulembêdu bwa Ayubu.” (Yakobo 5:11, NWT) Ayubu alembire amazibu madârhi bwenene, galya banji muli rhwe barhakahash’ihugûkwa. Oluderha “bulembêdu” lurhuyeresire oku ajijire bintu binji bwenene ahanyuma n’okuhima ago marhangulo kone. Alembire ago marhangulo cikone obuyemere bwage n’obuzigire bwage kuli Yehova burhahuliganaga. Ahali h’okuba mukali na wa kubikira abandi akarhinda, aba mubidu okubabalira ciru abo bamujiriraga kubi n’obulonza. Arhanahezagya obulangalire bwinja agwerhe n’akandi kantu k’engulo ndârhi agwerhe, k’okuderha, obwishwekerezi bwage.—Ayubu 27:5.

 Ngasi muguma wirhu alagirire oku kulembera. Rhwanayemera n’obwalagale oku Shetani ajira okwage koshi ly’arhuvuna omurhima nk’oku ajiraga okubiyerekire Ayubu. Cikone erhi rhwakalembera n’obuyemere, rhugendekere rhwaba birhohye, n’okuhiga okulanga obwishwekerezi bwirhu, nirhu rhurhakaheza obulangalire bwirhu. (Abahabraniya 10:36) Okuyiga obuyemere bwa Ayubu ko kantu kakashagalusa Yehova bwenene n’okugayisa Shetani bwenene!