Emyanzi y’okuyobohya elugihirwa omu video z’okuyerekana emyanzi—egendekire yaja oku ma televizyo, omu ma telefone, omu ma tablete n’omu ma ordinatere.

 N’abana birhu banayilabe.

 Bici wakajira ly’abana bawe balekiciyumva kubi okurhalusize olugero erhi ezo raporo z’okuyobohya zirhuma?

•  Gurhi abana bahumwako n’emyanzi?

•  Gurhi wakarhabala abana bawe ly’emyanzi bali bayumva erhi kubona erhabayobohyagya bwenene?

•  Gurhigi byakaba erhi omwana wawe akacibonera emyanzi y’okuyobohya?

•   Bana banji bashalama erhi babona ebintu by’okuyobohya bigera omu myanzi ehânwa. Ciru akaba bana baguma baguma barhaderha oku bali baciyumva, eraporo y’emyanzi y’okuyobohya yanabahumako bwenene. a Oboba bwabo bunagendekere bwayushûka erhi babona ababusi babo nabo bayobohire.

•   Abana banakayumva kubi emyanzi ehânwa. Kwa lwiganyo, banji ba mulibo babona nk’ebi babonaga omu myanzi byahikira omulala gwabo. N’abana balola eyo myanzi y’okuyobohya kanji-kanji, banabone nk’ebyo babonaga byagendekera byaba.

•   Byanahashikana abana babone eyo myanzi omu njira erhakwanini. Hali amango erhi barhamanyiri oku abantu bageza eyo myanzi bali barhimbûzi, bulya abo barhimbûzi bayishi oku erhi hakaba bantu banji bayilola, oko kwanabayingiriza enfaranga. Muli oko, hali eraporo yakajirwa omu njira y’okushumya, lyo bantu banji bayilola.

•   Onyihye oku myanzi balola y’okuyobohya. Oko kurhali kuderha mpu abana bawe barhakacimanya ebigendekire omw’igulu. Cikoki barhakapata bunguke boshi-boshi omu kulola erhi omu kuyumvirhiza emyanzi egendekire yagalukirwa-galukirwa oku ma radiyo erhi oku ma televizyo.

   “Agandi mango, nie na mukanie rhunaganirire mwanzi mulebe buzibu-zibu, cikone rhurhamanya kunganaci ogo mwanzi guhuma oku bana birhu.”—Maria.

   Akanuni k’Ebibliya: “Omutula omu murhima gw’omuntu njîngo guvuna.”—Emigani 12:25, Verbum Bible.

•   Obe wa kulembera, oshuze omu kucikira oku nafasi yabo. Erhi akaba biri bizibu okuganira n’omwana wawe lugenda bintu bilebe, omubwire acape nfoto ndebe lugenda ako kantu. Oganire haguma naye ebimuhangayisize omu kukolesa enderho akahugûkwa, cikoki oyâke okuganirira emyanzi erhali ya bulagirire y’ebyo anabwine.

   “Mwali wirhu anaciyumve bwinja enyuma z’okudamala n’okumuyumvirhiza. Cikone arhaciyumva bwinja erhi rhumubwira, ‘ntyo kw’igulu liyosire, bihunyire okubikomêra.’”—Sarahi.

   Akanuni k’Ebibliya: “Ngasi muntu abe mubidu w’okuyumva, cikwone abe mwirhonzi w’okuderha.”—Yakobo 1:19, Mashi Bible..

•   Orhabale omwana wawe ahugûkwe emyanzi bwinja. Kwa lwiganyo, eraporo lugenda emyanzi y’okugwarhwa mpira yanarhuma omwana arhanya oku oko kunajirwe ngasi mango. Ohugûlire omwana wawe emipango warhozire y’okumurhabala abe omu bulanzi. Kandi, okengere oku erhi emyanzi mibi ederhwa oku radiyo n’oku televizyo eba erya yo n’eyo—arhali mpu bulya enalugihikira.

   “Orhabale abana bawe bayemere oku oli waciyumva. Kanji-kanji, oku omuntu aciyumva kunashumibwe n’entanya, muli oko erhi rhwakarhabala abana birhu okusegeza kantu kalebe kashinganine, banaciyumva bwinja bwenene kulusha.”—Lourdes.

   Akanuni k’Ebibliya: “Omurhima gw’omuntu mwenge gunahe akanwa kage obumanye n’okujira enderho zage zibe zakuyemêza kulusha.”—Emigani 16:23.