1. Lugenda Abafilipi 2:3, bulya gurhi obwirhohye buli bwa bulagirire lyo rhuba n’obwîra bwinja haguma na bene wirhu?

OBWIRHOHYE bunakarhushumya rhurhumikire amarhegeko ga Nnamahanga ensiku zoshi bulya rhuba rhuhugûsirwe oku go gashinganine gaje oku nafasi ntanzi omu kalamo kirhu. (Efez. 4:22-24) Obwirhohye bunarhushumye rhuhire obulonza bwa Yehova oku nafasi ntanzi n’okubona bene wirhu oku bali ba bulagirire kurhulusha. Okuba birhohye kuli kwa bulagirire bulya kwanarhurhabala rhube n’obwîra bwinja haguma na Yehova na haguma na bene wirhu.​—Osome Abafilipi 2:3.

2. Bici entumwa Paolo yalihugûsirwe, na bici rhwaganirira mw’eci cigabi?

² Erhi rhwakabula kuba birhohye rhwanahikira aha rhwayahukirwa n’iroho ly’er’igulu ly’obucibone n’okucikaliza, ely’iroho lyo liri lyarhegeka abantu b’ene. * Bibonekine oku er’iroho lyali lyamayahukira Bakristu baguma na baguma bw’omu myaka igana mirhanzi, kwo kwarhumaga entumwa Paolo yayandikira Abakristu b’Eroma ntya: “Mbwizire ngasi muguma muli mwe nti murhakag’icirhanyiza okulushire olugero, ci mucilole okunakwanine.” (Bar. 12:3) Entumwa Paolo yal’ihugûsirwe oku omuntu anacizigira, erhi kucirhanyiza. Cikone bihunyire rhube birhohye na ba lugero lugenda okurhucizigira. Mw’eci cigabi rhwaganirira bintu bisharhu by’omu kalamo rhushinganine rhubemwo balugero na ntyo rhuyake eciburi. Ebyo bintu by’ebi: 1) omu buhya, 2) omu mukolo gwago-gwago rhwakaba nago omw’ikubuliro lya Yehova, na 3) okurhukolesa e enterneti.

3. Bulya gurhi okurhayumvikana kwanahikira omu buhya na gurhi bantu baguma na baguma bajira?

³ Yehova arhondêzagya obuhya oku bube nshôko y’obushagaluke  ekarhi kw’omulume n’omukazi. Cikoki omu buhya mwanahikira okurhayumvikana ekarhi kw’omulume n’omukazi bulya ntaye muli bo oba mwimana. Paolo ayândika oku balya boshi banaje omu buhya, bayish’iba n’amazibu. (1 Kor. 7:28) Bantu baguma na baguma banakalwa omu buhya bwabo buca buyira n’okuja kwaderha oku barhal’ishinganine okurhôlana. Erhi akaba bakola balimo entanya z’igulu, banahikira aha barhanya mpu nkaba okuzaza obuhya bwabo kwanabarhabala babe n’obushagaluke. Omu kujira ntyo, banaba erhi ngasi muguma ali arhanya oku ali wa bulagirire kulusha owabo.

4. Bici rhukwanine rhuleke okujira?

⁴ Rhurhakwanini rhukaderha mpu lero bici byarhumaga rhwaja omu buhya we. Amandiko garhuhugûlire oku obuhushi bone bwakarhuma rhwazaza obuhya. (Mat. 5:32) Kw’okuderha oku erhi rhwakaba rhuli rhwalwisa mazibu maguma na maguma gali nk’aga Paolo aderhaga, obucibone burharhumaga rhwarhondêra rhwacidosa ntya: ‘Kw’owirhu aciba anshibirire obu? Ncibonaga owundi wanshibirira wani? Kantakaba n’omurhula erhi nakabona owundi wani wanshibirira?’ Olole akandalala kawe wene olabe erhi arhali ntyo nkaba kwo nawe okola orhanya. Obwenge bw’er’igulu bwanakuhanula oku erhi akaba oyumvirhe oku okulekana n’oyu mwarhôlanaga mweshi kwo kwakakulerhera obushagaluke wanajira ntyo. Cikone Oluderho lwa Nnamahanga lurhubwizire oku rhurhakag’ilonza “ngasi muguma obunguke bwage yene, ci ngasi muntu akalonza obunguke bw’abandi.” (Flp. 2:4) Yehova aba alonzize ojire okwawe koshi ly’ozibuhya obuhya bwawe, cikone arhaba alonzize mpu obuzaze. (Mat. 19:6) Alonzize entanya zage okubiyerekire obuhya zibe zo ntanzi omu murhima gwawe, cikone arhali mpu wanajira oku onaciyumvirhe.

5. Lugenda olwandiko lwa Abefezi 5:33, gurhi omulume n’omukazi bakwanine bakakolerana?

⁵ Omulume n’omukazi bakwanine bakazigirana n’okukengana. (Osome Abefezi 5:33)  Ebibliya edesire oku haba obushagaluke bw’okuhâna kulusha okuhâbwa. (Ebijiro by’Entumwa 20:35) Borhere buhi bwakarhabala omulume n’omukazi bakakengana? Ishuzo: Buli bwirhohye. Abalume n’abakazi birhohye barhalonza obunguke bwabo bone cikoki banalonze “obw’abandi.”​—1 Kor. 10:24.

6. Bici rhwakaciyigiriza lugenda enderho Steven na Stephanie baderhâga?

⁶ Obwirhohye bwanarhabala emilala y’Abakristu okuba n’omwishingo. Kwa lwiganyo, mulume muguma ohamagalwa Steven adesire ntya: “Nka muli omu ekipe, ci bwenene omu kasanzi hali amazibu, kurhakaba kwinja rhukarhanya mpu ‘bici byakanshagalula?’ Cikone kwanaba kwinja rhukarhanya bici ‘byakarhushagalula?’” Mukage Stephanie naye ayushwire ntya: “Nta muntu wakalonza alame n’omushombanyi wage,” “erhi rhubona mazibu malebe, ho n’aho rhunalonze omurhondêro gwago guli guhi. Rhunasalire, rhujire obusagasi buzinda rhuganirire ago mazibu. Rhunaganirire amazibu na ntyo rhuyake okubwirana mpu ci we wajiraga kulebe.” Omulume n’omukazi banaba n’obushagaluke erhi ngasi muguma akahugûkwa ebintu byakashagalula owabo.

7. Ntanya zihi mwene wirhu wamahâbwa omukolo omw’ikubuliro akwanine okuba nazo?

⁷ Rhunabone oku luli lukengwa okukolera Yehova omu njira yoshi-yoshi rhwakanahasha. (Enna. 27:4; 84:10) Erhi mwene wirhu akacifinja oku anakolera Yehova omu mukolo gwago-gwago, aho erhi arhanyize bwinja. Co cirhumire Ebibliya edesire ntya: ‘Erhi omuntu akacifinja okuba mugula erhi mukolo mwinja acifinjire.’ (1 Tim. 3:1) Cikoki, erhi akahâbwa ogo mukolo, akwanine abe masu ly’ogo mukolo gurhamulerheraga obucibone, na ntyo ahikire ah’arhondêra arhanya oku ali wa bulagirire kulusha abandi. (Luka 17:7-10) Akwanine ahugûkwe oku ogo mukolo guli gwakurhabala abandi n’obwirhohye.​—2 Kor. 12:15.

8. Bici olwiganyo lwa Diotrefe, Uziya na Absalomu lurhuyigirizize?

⁸ Ebibliya eganirire nyiganyo nyinji z’abantu bakag’icirhanyiza kulusha olugero. Diotrefe arhâli mwirhohye, akag’icishoga “entebe ntanzi” omu cigamba. (3 Yowane 9) Uziya ajira omukolo Yehova arhamuhâga. (2 Nga. 26:16-21) Absalomu ashungubanya mpu azigire abantu n’obo bwami ali alonza. (2 Sam. 15:2-6) Ezo nyiganyo ziyerekine oku Yehova arhashagalukira abantu balonza okuciha irenge. (Mig. 25:27) Obuzinda bw’eciburi n’okuzigira amankulu-nkulu kuba kuja omu mazibu.​—Mig. 16:18.

9. Lwiganyo luhi Yezu arhulekire?

⁹ Lubero n’ezo nyiganyo zirhuhire burhonde bulebe, Yezu luli lwiganyo lwinja rhwakayiga. “Yehe arhali wabucibone” nk’oku abantu bal’ibayosire omu kasanzi kage. Okubiyerekire Yezu Ebibliya edesire oku amango “ali omu borhere bwa Nyamuzinda, arhaderhaga mpu acinanirize oku bukulu bwage bw’okuyumanana na Nyamuzinda.” (Flp. 2:6) Omuntu wakabirhi ogwerhe emisi hanw’igulu n’empingu, ali Yezu. Cikone âli mwirhohye, nta lusiku arhanyize oku ali wabulagirire kulusha. Abwira abanafunzi bage ntya: ‘Bulya owacirhohye nka mwana murho ye wanabe mukulu muli mwe.’ (Luka 9:48) Emigisho eri kuli bene wirhu bali bakola nka ba painiya, barhabazi ba bagula, abagula n’abangalizi b’emizunguko, nka bakagendekera bajira emikolo yabo n’obwirhohye! Abakozi ba Yehova birhohye banakahira omurhula, ecinyabuguma n’obuzigire omw’ikubuliro lyage. N’abandi banabone oku rhwê rhuli omw’idîni ly’okuli erhi rhuyereka bene wirhu obuzigire.​—Yowane 13:35.

10. Gurhi wakajira erhi wakarhanya oku abagula barhashibiriri mazibu malebe gajirikanaga omu cigamba nk’oku bishinganine?

¹⁰ Hali amango amazibu gakaja omu cigamba,  buzinda obone nk’abagula barhahugûsirwi ebintu bwinja. Ahali hw’okuja kwaciduduma, kwanaba kwinja oyerekane obwirhohye omu kulunga okuboko abashibiriraga ako kanga. (Habr. 13:17) Ebyakakurhabala, wanarhang’icidosa aga madoso: ‘Kw’oku ndi nabona ebintu kwo binayosire? Ka kobinali aka kwo kasanzi kinja kw’okukubûla ebintu? Ka niè ngwerhe omukolo gw’okukubûla ebyo bintu? Ka mba mwikubagirwa na wakulonza okuhira omurhula omu cigamba erhi nankacirhanyiza niène kulusha olugero?’

11. Nk’oku olwandiko lwa Abefezi 4:2, 3 luyerekine, gurhi byakaba erhi rhwakakolera Yehova n’obwirhohye?

¹¹ Yehova anakashagalukira obwirhohye n’ecinyabuguma kulusha okuba n’obumanye erhi buhashe bw’okujira kantu kalebe. Co cirhumire akantu kaburhangiriza kuli kumukolera n’obwirhohye. Ngasi kantu koshi rhwakajira kakalerhera Yehova irenge n’ecinyabuguma omu cigamba. (Osome Abefezi 4:2, 3) Obe n’obushiru omu mukolo gw’amahubiri. Olongereze omu njira nci wakarhabalamwo abandi omu kubajirira aminja. Okayegereza ngasi mwene wirhu, ciru na bene wirhu barhagwerhi emikolo yago-yago omu cigamba. (Mat. 6:1-4; Luka 14:12-14) Erhi wakakahikiriza emikolo yawe y’omu cigamba n’obwirhohye, abandi banabona oku ojira obuhashe, cikone akantu balololereza bwenene buba borhere bwawe bw’obwirhohye.

12. Bulya gurhi Ebibliya erhubwizire oku kuli kwinja okucijirira abîra? Hugûla.

¹² Yehova aba alonzize rhushagaluke haguma na bene wirhu bw’omu mulala n’abîra birhu. (Enna. 133:1) Yezu al’igwerhe abîra ba hofi-hofi. (Yowane 15:15) Ebibliya edesire oku haba obunguke bw’okuba n’abîra bw’okuli.  (Mig. 17:17; 18:24) Kandi edesire oku kurhaba kwinja okukaciyegûla n’abandi. (Mig. 18:1) Bantu banji barhanya mpu enganîro z’oku enterneti zanarhuma omuntu aba n’abîra banji na ntyo barhanye mpu barhaciciyegwiri oku bandi. Cikone rhushinganine rhube masu okubiyerekire okukolesa eyo njira y’okuganîra.

13. Bulya gurhi abantu bakolesa e enterneti banahikire aha bavunika omurhima?

¹³ Obusagasi bwayerekine oku abantu bageza kasanzi kanji bali barhumirana emyanzi, (mesaje) banahikire aha baciyumva oku bone banali. Bulya gurhi? Ecirhumire cikulu kuli kubona oku abantu banakahira oku enterneti enfoto zabo ziyerekine akalamo kabo. Banarhuma ciru enfoto zabo bone erhi z’abîra babo z’ahantu hinja bal’ilambagirire erhi ebi balire n’ebi banywire. Omuntu wakalola ezo nfoto anahikira ah’arhanya oku arhakacishushanya n’abo bantu bulya yehe ali wabusha. Mwali wirhu muguma wa myaka 19 adesire ntya: “Erhi mbona gurhi abandi bashagalukiraga akalamo oku buzinda bw’omugobe, n’obo nièhe nali aha mwirhu ndungumarhire kwone, nanciyumve wabusha bwenene.”

14. Gurhi ihano liri omu 1 Petro 3:8, lyakarhurhabala rhukolese e enterneti n’obwenge?

¹⁴ Hali amango rhuhikira aha rhwakolesa e enterneti n’etelefone bwinja. Kwa lwiganyo hali amango rhuyikolesa omu kuganiza abîra birhu erhi bene wirhu. Ka nawe wabwine oku enfoto, enganîro, evideyo, abantu balug’ihira oku enterneti ziba zakuciyerekana bwo bandi? Banakaba nka abadesire ntya: “Mumbonage we.” Ciru n’abandi banahire enfoto z’eby’enshonyi erhi nderho z’ebijaci, zanaba zakuciderha kubi bonene erhi kuderha abandi kubi. Abakristu babwizirwe oku babe birhohye na balugero. Omukristu arhakwanini akolese e enterneti omu njira ya ntyo.​—Osome 1 Petro 3:8.

15. Gurhi Ebibliya erhuhanwîre okubiyerekire iroho ly’okuciyerekana?

¹⁵ Erhi akaba onakolese e enterneti wanacidosa ntya: ‘Ezi nfoto, ezi videyo erhi ezi nderho, ka zirhayereke abandi oku ndi naciyerekana? Ka zirhakarhuma abandi banyumviza obumvu?’ Ebibliya edesire ntya: “Ngasi byoshi biba en’igulu​—irala ly’omubiri, irala ly’amasu, n’obucibone bw’obuhirhi—​birhahubuka emwa Larha Nyamuzinda, ci omw’igulu bihubuka.” (1 Yowane 2:16) Bibliya nguma ehugwîre ezi nderho  ntya: “Okuyerekana ebi omuntu agwerhe omu kalamo” kuli nka “kuyeresa abandi oku oli wabulagirire.” Abakristu barhashinganini okuba n’entanya z’okuciyerekana lyo bayerekana oku ntaco bohe babuzire. Ebibliya erhuhanizize oku “rhurhakag’icilongeza obukuze burhali bwo, rhuleke n’okuyagalwa n’abirhu.” (Gal. 5:26) Obwirhohye bwanarhurhabala rhuyake iroho ly’obucibone ly’er’igulu ly’okulonza okuyereka abandi oku rhwe bikola bishundwako.

16. Bulya gurhi rhukwanine rhuyake eciburi?

¹⁶ Rhushinganine rhube birhohye bulya abantu bw’obucibone barhajira “ntanya zicîre.” (Bar. 12:3) Abantu bw’obucibone babà mulindye nkulume na nkubuhe na bamujina. Entanya zabo nkaba ciru n’ebijiro byabo biba byakulumisa abandi omurhima na ciru bone banahikire aha balwala amatansiyo. Nkabaga bamahindula entanya zabo, oko kwanabarhabala, cikone erhi bakabula bwajira ntyo, Shetani anabahusa entanya. (2 Kor. 4:4; 11:3) Omuntu mwirhohye ajira entanya zicîre, anahugûkwe bwinja-bwinja oku ashinganine abe walugero omu bijiro n’omu nderho zage. Na kandi aba ahugûsirwe oku abandi bali bakulu kumulusha. (Flp. 2:3) Na kandi aba ahugusirwe oku “abacibonyi Nyamuzinda kucîka abacîka, ci abirhohye bo ashoboza engalo yage.” (1 Pet. 5:5) Abajira entanya zicîre banajire okwabo koshi lyo bashagalula Yehova.

17. Bici rhushinganine okujira lyo rhuba birhohye?

¹⁷ Lyo rhuba bantu birhohye, kuli kwa bulagirire rhukolese er’ihano liri omu Abakolosi, lidesire oku rhwahogwîre “omuntu wa mîra haguma n’engeso zage, rhwacihundikira omuhyahya.” (Kol. 3:9, 10; 1 Pet. 2:21) Lyo rhuhikira aho, bihunyire bushiru bunji bwenene. Cikone erhi rhwakaba birhohye omu mulala, ngasi muntu oli omo, anaba n’omwishingo. Erhi rhwakaba birhohye omu cigamba, mwanaba ecinyabuguma. Na kandi obwirhohye bwanarhurhabala rhukolese e enterneti omu njira nyinja ci arhali mpu kulonza barhubone erhi kulumisa abandi omurhima. N’akantu kw’obulagirire bwenene, kuli kubona oku Yehova anarhugisha, rhwananaba bîra bage.