1. Oluderho “okuli” kw’okuderha gurhi?

“GURHI wamanyagamwo okuli?” Na “myaka inga okola oli omu okuli?” Nkaba bakola bakudosize ago madoso erhi ciru nkaba nawe okola ogadosize owundi muntu. Oluderho “okuli” kw’okuderha gurhi? Rhulug’ikolesa oluderho “okuli” lyo rhuganirira obwemere bwirhu, enterekêro yirhu kuli Nnamahanga n’akalamo kirhu k’Ecikristu. Abantu bali omu “okuli” bayishi bici Ebibliya eyigiriza, banacihangane okulama nk’oku amakanuni g’Ebibliya gadesire. Obunguke babà nabo, kuba kukulwa omu bujà bw’enyigirizo z’amadîni gw’obunywesi na ntyo akalamo kabo kaba kayunjwire mwishingo ciru akaba balamire omw’igulu lya Shetani.​—Yowane 8:32.

2. Nk’oku biyerekinwe omu lwandiko lwa Yowane 13:34, 35, borhere buci abantu bali omu okuli bashinganine babe nabo?

² Bici byarhumâga wayemera okuli? Byanahashikana erhi lugenzi lwinja lw’Abahamirizi ba Yehova lwarhumâga. (1 Pet. 2:12) Erhi buzigire bayerekana bwarhumâga. Erhi bantu banji bayisha oku ntimanano zirhu oburhanzi, banacibonere obuzigire buba egarhi kirhu n’erhi hagera nsiku banakakengera obo buzigire babonâga kulusha enyigirizo bayigirizibagwa olo lusiku. Oko kurhakarhusomera bulya Yezu adesîre oku obuzigire co cakabire cimanyiso c’Abakristu bw’okuli. (Osome Yowane 13:34, 35) Cikone akantu kw’obulagirire, kuli kumanya erhi rhugwerhe obuyemere busezire.

3. Bici byakahikira erhi akaba obuyemere bwirhu buba buyimangire oku buzigire bwa bene wirhu na bali birhu bone?

³ Obuyemere bwirhu bushinganine buyimangire oku kantu kw’obulagirire bwenene kulusha obuzigire bw’abakozi ba Nnamahanga. Bulya gurhi? Orhanye ntya: Gurhi wakajira erhi omugula erhi painiya akajira ecaha cizibu? Kandi gurhi wakajira erhi  mwene winyu erhi mwali winyu akakuvuna omurhima erhi ciru ahikire ah’aba mugoma, ka wanahikira aha waderha oku Abahamirizi ba Yehova nabo barhaciyigiriza okuli? Erhi ohikire aha waleka okukolera Yehova bulya ebyo byoshi byamakuhikira omu kalamo? Omanye oku erhi akaba bijiro bya bene wirhu erhi bali birhu byo byarhumîre waba Mukristu, obuyemere bwawe burhakazibuha. Omu bubasi bw’enyumpa yawe, kw’okuderha kuyubaka obuyemere bwawe, kuli kwa bulagirire okolese ebikolanwa bizibu kulusha okuyubakira oku bijiro bya bene winyu. Kuli kwa bulagirire wene ociyigirize Ebibliya ojire obusagasi ly’ohugûkwa erhi ebi eyigirizize binali by’okuli okubiyerekire Yehova.​—Bar. 12:2.

4. Nk’oku biyerekinwe omu lwandiko lwa Mateyo 13:3-6, 20, 21, gurhi bantu banji bajira erhi obuyemere bwabo buja omu marhangulo?

⁴ Yezu adesire oku banji bayemire okuli “n’omwishingo,” cikone obuyemere bwabo bwahikira aha bwanyiha erhi baja omu mazibu. (Osome Mateyo 13:3-6, 20, 21) Na ntyo barhacihikire aha bagendekera baba bashimbulizi ba Yezu. (Mat. 16:24) Abakristu ba ntyo, banabe bali barhanya oku okuba Mukristu kwanarhuma baba n’omwishingo gone na ntyo nta mazibu gakacibahikira omu kalamo. Cikone mw’er’igulu lisherire, amalibûko gagendekera. Hali ebintu byakarhuhikira omu kalamo na ntyo byanarhuma omwishingo gwirhu gwanyiha.​—Enna. 6:6; Muh. 9:11.

5. Gurhi bene wirhu na bali birhu bayerekinemwo oku bayemire oku babà omu okuli?

⁵ Bene wirhu na bali birhu banji bayerekine n’obwalagale oku bayemire oku babwine okuli. Gurhi bayerekinemwo ntyo? Bagendekera babà n’obuyemere busezire ciru akaba bahikire aha bavunwa omurhima na bene wabo erhi ciru akaba mwene wabo mulebe ahikire aha alahira okuli. (Enna. 119:165) Omu ngasi marhangulo, obuyemere bwabo bwayushuka ci burhanyihaga. (Yak. 1:2-4) Bici wakajira ly’obuyemere bwawe buba buzibu nk’obo bwa bene wirhu na bali birhu?

6. Bici obuyemere bw’Abakristu bw’omu myaka igana mirhanzi bwal’iyimangirekwo?

⁶ Abakristu b’omu myaka igana mirhanzi, bayubasire obuyemere bwabo omu kuba n’obumanye bw’okuli bw’amandiko n’enyigirizo za Yezu, ezo nyigirizo “k’okuli kw’emyanzi minja.” (Gal. 2:5) Oko okuli kuhiziremwo ebintu byoshi rhuba rhuyemire rhuli Bakristu; bihiziremwo engombôlo ya Yezu n’obufûke bwage. Entumwa Paolo yayemire n’obwalagale oku ezo nyigirizo ziri z’okunali. Bici byamurhabire ayemere ezo nyigirizo? Bulya akag’ibahugûlira amandiko lyo ‘abayereka oku Kristu al’ikwanine alibuzibwe agal’ifûka omu bafîre.’ (Ebijiro by’Entumwa 17:2, 3) Abakristu bw’omu myaka igana mirhanzi baliyemire ezo nyigirizo banakagishenga Nnamahanga iroho lyage litagatifu lyo bahashiyumva amandiko. Bakag’iyerekana bone oku ezo nyigirizo zirhenzire omu Bibliya. (Ebijiro by’Entumwa 17:11, 12; Habr. 5:14) Barhayubakiraga obuyemere bwabo oku ntanya zabo barhanakoleraga Yehova mpu bulya babwine ebijiro by’abandi banafunzi ba Yezu. Lubero n’oko, “obuyemere bwabo bwal’iyimangire oku bumanye bw’okuli okubiyerekire Nnamahanga.”​—Kol. 1:9, 10.

7. Bici obuyemere bwirhu omu okuli kw’Ebibliya burhurhabala okujira?

⁷ Okuli kw’Akanwa ka Nnamahanga kurhashanja. (Enna. 119:160) Kwa lwiganyo, okuli kw’Ebibliya kurhashanja mpu bulya rhuli omu mazibu erhi mpu bulya rhwajirire ecaha cizibu. Kurhanashanja amango rhuli rhwalwisa amazibu erhi amango abashombanyi birhu barhulibuza. Co cirhumire rhushinganine rhumanye okuli kw’Ebibliya n’okuyemera n’obwalagale oku ezo nyigirizo ziri z’okuli. Okuyubaka obuyemere bwirhu omu okuli kw’Ebibliya  kunakarhurhabala amango rhuli omu marhangulo. Gurhi wakayemera n’obwalagale oku washobwire okuli?

8. Nk’oku olwandiko lwa 2 Timoteyo 3:14, 15 luyerekine, gurhi Timoteyo ahikire aha ayemera n’obwalagale oku ashobwîre okuli?

⁸ Timoteyo ayemire n’obwalagale oku ashobwîre okuli. Bici byamurhabalaga ayemere ntyo? (Osome 2 Timoteyo 3:14, 15) Nnina na nakulu bamuyigirizize enyigirizo “z’amandiko matagatifu.” Cikone naye yene acilongeza buzira karhinda akasanzi n’obushiru bw’okuciyigiriza ago mandiko. Obunguke abire nabo kuli kubona oku “acishwekerire oku buyemere bwage.” Erhi hagera nsiku Timoteyo, nnina na nakulu bacilunga haguma n’ecigamba c’Ecikristu. Timoteyo arhagwerhe karhinda okubiyerekire obuzigire abanafunzi ba Yezu bakagiyerekana, kwo kwanarhumaga acilunga haguma n’ecigamba c’Ecikristu, na ntyo aba n’irala ly’okurhabala bene wabo bw’omu cigamba bazibuhye obuyemere bwabo. (Flp. 2:19, 20) Omu ntyo, ayubasire obuyemere bwage, arhali oku ntanya zage erhi oku buzigire bw’abantu, ci oku nyigirizo z’okuli z’Ebibliya n’oku bwîra bwage haguma na Yehova. Nawe oshinganine oyige Ebibliya n’okucidosa bici ebi wayizire bikuyigirizize okubiyerekire Yehova.

9. Bintu bihi bisharhu oshinganine oyemere ly’oyerekana oku washobwîre okuli?

⁹ Hali bintu bisharhu wakajira ly’oyerekana oku washobwîre okuli. Ehirhanzi, oshinganine oyemere oku Yehova ye walemaga ebintu byoshi. (Lu. 3:14, 15; Habr. 3:4; Maf. 4:11) Ehyakabirhi, oshinganine obe n’ebintu bikuyemeza oku Ebibliya kaba Kanwa ka Nnamahanga kalongozibagwa n’iroho lyage. (2 Tim. 3:16, 17) N’ehyakasharhu, oshinganine oyemere oku Yehova agwerhe ikubuliro ly’abantu bali bamuharamya idako ly’obulongozi bwa Yezu, n’oku Abahamirizi ba Yehova bwo bali mw’er’ikubuliro. (Iza. 43:10-12; Yowane 14:6; Ebijiro by’Entumwa 15:14) Okuyemera ezo nyigirizo z’okuli, kurhali kuderha oku bihunyire omanye amandiko goshi g’Ebibliya. Oshinganine ohige okukolesa ‘obuhashe bwawe bw’okurhanya ly’ozibuhya obuyemere bwawe.’​—Bar. 12:1.

10. Aha nyuma n’okumanya okuli kw’Ebibliya, bici bindi okwanine ojire?

¹⁰ Erhi wakayemera ezo nyigirizo isharhu, kw’okuderha omanye binji lugenda Nnamahanga, Ebibliya, n’ikubuliro lyage, oshinganinage obe mubidu okurhabala abandi nabo babihugûkwe. Bulya gurhi kuli kwa bulagirire? Rhuli banafunzi ba Yezu, rhugwerhe omukolo gw’okuyigiriza abandi ebi rhwayizire okubiyerekire Kristu. * (1 Tim. 4:16) N’erhi rhwakarhabala abandi bayemere ezo nyigirizo z’okuli z’Ebibliya, rhunabe rhuli rhwazibuhya obuyemere bwirhu omu okuli.

11. Lwiganyo luhi entumwa Paolo erhulekire amango rhuli rhwayigiriza?

¹¹ Amango Paolo akag’iyigiriza, akag’iyereka abantu Yezu “ye ndi nk’oku biyandisirwe omu citabu c’Amarhegeko ga Musa n’omu Balebi.” (Ebijiro by’Entumwa 28:23) Gurhi rhwakayigamwo Paolo amango rhuli rhwayigiriza abandi okuli kw’Ebibliya? Rhushinganine rhurhabale abanafunzi birhu b’Ebibliya bakarhanya oku mandiko lyo gabarhabala bayegere Yehova. Rhulonzize bayemere okuli, arhali bulya barhuzigire ci bulya bacibonire oku ebi bali baciyigiriza biri by’okuli.

12-13. Gurhi ababusi bakarhabalamwo abana babo lyo basêra omu okuli?

¹² Ababusi babà balonzize abana babo basêre omu okuli. Erhi akaba nawe oli mubusi, onalonzize abana bawe basêre omu okuli, wanabarhabala bacijirire abîra bw’omu cigamba bakabarhabala bakule omu kiroho. Cikone erhi wakalonza abana bawe bayemere n’obwalagale oku bashobwîre okuli, barhalagirire oku bîra binja bone, cikone kandi kuli kwa bulagirire babe n’obwîra buzibu haguma na Nnamahanga, n’okuyemera oku enyigirizo z’Ebibliya ziba z’okuli.

¹³ Ly’omubusi ayigiriza omwana wage okuli okubiyerekire Nnamahanga, yene ashinganine abe lwiganyo lwinja lw’ociyigiriza Ebibliya. Omubusi ashinganine akarhanya lugenda ebi ali aciyigiriza. Na ntyo anaba n’obuhashe b’okuyigiriza abana bage. Ashinganine arhabale abana bage bakakolesa ebikolanwa birhu nka bali bayigiriza. Erhi ababusi bakajira ntyo, banarhabala abana babo bazigire Yehova n’okuyemera enjira ali akolesa ene ly’arhuha ebiryo by’ekiroho, kw’okuderha bahugûkwe “mushizi mwirhonzi na mwikubagirwa.” (Mat. 24:45-47) Mwe babusi, arhali nyigirizo ntangiriza zone mushinganine mukayigiriza abana binyu. Mushinganine mubarhabale baseze obuyemere bwabo omu kubarhabala bakahumbirira ‘ebintu bizibu bya Nnamahanga’ erhi akaba banahash’ibihugûkwa.​—1 Kor. 2:10.

14. Bulya gurhi rhushinganine rhuyige obulebi bw’Ebibliya? (Olole ecisanduku “ Ka Wanahugûla Obu Bulebi?”)

¹⁴ Obulebi bw’Ebibliya buba bwa bulagirire bulya bunarhurhabale rhuseze obuyemere  bwirhu muli Yehova. Bulebi buhi bwazibuhize obuyemere bwawe? Hali amango erhi washagalukire obulebi buganirire “ensiku za buzinda.” (2 Tim. 3:1-5; Mat. 24:3, 7) Bundi bulebi buhi bw’Ebibliya bwarhumire wayemera enyigirizo z’Ebibliya? Kwa lwiganyo, ka wanahugûla gurhi obulebi buli omu Daniyeli cigabi ca 2 erhi Daniyeli cigabi ca 11 bwahikirire omu mango gagerâga na gurhi bugendekire bwahikirira ene? * Erhi obuyemere bwawe bwakaba buyimangire oku Kanwa ka Nnamahanga Bibliya, bwanasera bwenene. Rhulolage olwiganyo lwa bene wirhu balibuzibagwa omu cihugo c’e Germanie amango g’ivita lya kabirhi ly’igulu. Okubona bal’imanyire obulebi buganirire ensiku za buzinda, oko kwarhuma bazibuhya obuyemere bwabo omu Kanwa ka Nnamahanga.

15-17. Gurhi okuciyigiriza Ebibliya kwazibuhize obuyemere bwa bene wirhu na bali birhu bâli omu mpamikwa omu mango gw’oburhegesi bw’Abanazi?

¹⁵ Amango Abanazi bakag’irhambula ecihugo c’e Germanie, bene wirhu na bali birhu banji bahirwa omu mpamikwa. Hitler n’omukulu w’abasoda bage wakag’ihamagalwa Heinrich Himmler bal’ishombire bwenene Abahamirizi ba Yehova. Mwali wirhu muguma adesire oku lusiku luguma Himmler abwira ecigusho ca bali birhu bali omu mpamikwa ntya: “Yehova winyu omu mpingu mone akarhambula cikone hanw’igulu rhwe rhuli rhwarhambula! Rhukolaga rhwammuyeresa bandi balama emyaka n’emyaka egarhi kirhu na ninyu!” Bici byarhabire abo bakozi ba Yehova babere bishwekerezi?

¹⁶ Abo banafunzi boshi b’Ebibliya bal’imanyire oku Obwami bwa Nnamahanga bwarhonderaga bwarhambula omu mpingu omu mwaka gwa 1914. Barhasomeragwa n’oko abanazi bali banshombire. Lubero n’oko, abo bakozi ba Yehova bal’imanyire oku nta burhegesi bwa bene bantu bwakahanza obulonza bwa Nnamahanga okuhikirira. Hitler arhayusagya enterekêro y’okuli arhanayusagya abakag’iderha okubiyerekirea Obwami bwa Nnamahanga. Bene wirhu bal’imanyire oku oburhegesi bwa Hitler bugwerhe obuzinda.

¹⁷ Obuyemere bw’abo bene wirhu na bali birhu burhali bwa bulyalya. Erhi hagera nsiku  oburhegesi bw’Abanzi bwahimwa na Heinrich Himmler olya mulume waderhaga mpu “hanw’igulu rhwe rhuli rhwarhambula” alibirha ly’ayasa akalamo kage. Erhi alibirha abuganana na mwene wirhu wakag’ihamagalwa Lübke akagilibuza n’oko kwamurhabala amanye bwinja Abahamirizi ba Yehova. Erhi Abanazi bayabirwa okuyusa Abahamirizi ba Yehova, Himmler adosa mwene wirhu Lübke ntya: “We ohugûsirwe Ebibliya, ombwirage gurhi bikolaga byaba obu?” Mwene wirhu Lübke amuhugûlira oku Abahamirizi ba Yehova bamanyire oku oburhegesi bw’Abanazi bwakahimirwe na buzinda Abahamirizi ba Yehova bagendekere baharamya Nnamahanga wabo n’oluhûma. Himmler adesîre bintu binji bibi okubiyerekire Abahamirizi ba Yehova, cikone mw’ako kasanzi akanwa kage kabumba mishi. Buzinda ahikira aha acimanika. Isomo lihi rhwakaciyigiriza okubiyerekire abo bene wirhu na bali birhu babezire bishwekerezi? Okuyiga Ebibliya kuhiziremwo okuyiga obulebi bw’Ebibliya, n’erhi rhwakajira ntyo, rhwanaseza obuyemere bwirhu muli Nnamahanga n’oko kwanarhuha emisi y’okulembera amazibu.​—2 Pet. 1:19-21.

18. Lugenda olwandiko lwa Yowane 6:67, 68, bulya gurhi kuli kwa bulagirire okuba “n’obumanye n’oburhimanya” Paolo ayandikaga?

¹⁸ Rhushinganine rhukazigirana bwenene, lyo rhuyerekana oku rhuli banafunzi b’okuli ba Kristu. Cikone, rhushinganine rhube “n’obumanye n’oburhimanya” bw’ebi rhuli rhwaciyigiriza. (Flp. 1:9) Kandi rhurhashinganini rhuhekwe eyi n’eyi na “ngasi mpûsi y’enyigirizo zarhenga omu bunywesi bw’abantu n’omu bulyalya bwabo bw’okurhebana.” Muli ezo nyigirizo muli ez’abagoma. (Efez. 4:14) Bantu baguma na baguma bahugûkwa enyigirizo za Yezu kubi, baleka okumukulikira. Cikone entumwa Petro yohe yaba n’obuyemere omu “binwa by’obuzine bw’ensiku n’amango.” (Osome Yowane 6:67, 68) Petro arhahugûkagwa ho n’aho enyigirizo za Yezu zoshi, cikone abêra mwishwekerezi bulya akag’irhanya okubiyerekire enyigirizo z’okuli lugenda Kristu. Nawe, wanazibuhya obuyemere bwawe omu nyigirizo z’Ebibliya. Erhi wakajira ntyo, obuyemere bwawe bwanazibuha, na ciru wanahikira aha wazibuhya obuyemere bw’abandi.​—2 Yowane 1, 2.