RHUYEMIRE n’obwalagale oku Yehova ali arhabala n’okulongoza abantu bage mw’ezi “nsiku nzinda,” lyo bagendekera bakula omu kiroho. (2 Tim. 3:1) Cikone ngasi muguma wirhu yene oshinganine ayerekane oku ashagalukire okulongozibwa na Yehova. Rhwanashushanya akanga rhulamiremo n’aka aba Israheli bal’ilamiremo erhi bali omw’irungu. Erhi bakayumvirhe izu ly’omushekera, hali ebintu bal’ishinganine bajire.

Yehova abwira Musa oku atule mishekera ibirhi y’ecuma, “akayikolesa amango g’okushubûza olubaga n’amango g’okuhandûla nka bakola barhenga omu cihando.” (Mib. 10:2) Abadahwa bakag’ibuha omushekera omw’izu liri lubero lyo babwira abantu ebi bajira. (Mib. 10:3-8) Ene nalyo, abakozi ba Yehova bali balongozibwe omu njira nyinji. Mw’ogu mwanzi rhwaganirira njira isharhu rhulongozibwamwo zishushanyizibwe n’omushekera gwakag’ibuhwa omu mango g’olubaga lw’aba Israheli. Ene nalyo , olubaga lwa Nnamahanga lunahamagalwe oku ntimanano, abagula bahizirweho banahâbwe enyigirizo z’okubakomereza, n’enyigirizo z’eciteokrasi zinakubûlwe lyo zirhurhabala rhugendekere rhwakula omu kiroho.

Erhi Yehova akalonzize mpu “olubaga lwage loshi” lubuganane olunda lw’idako lw’ihema ly’entimano, abadahwa bakag’ibuha erya mishekera ibirhi yoshi oku liguma. (Mib. 10:3) Ngasi boshi bal’iyubasire eburhambi bw’ihema, bakag’iyumva eryo izu ly’eyo mishekera yombi. Abali yubasire hofi n’aho, bakag’iyisha duba-duba. Abal’iyubasire kuli bakag’igenda kasanzi kanji lyo bahika aho. Yehova al’ilonzize abantu “boshi” bayunguke n’ezo ntimanano, babe bali hofi erhi bali kuli bal’ishinganine bayishe.

Ene rhurhacibuganana omw’ihema, cikoki rhuhunyirwe rhukarhimanana haguma rhweshi nka lubaga lwa Nnamahanga. Muli ezo ntimanano muli entimanano z’eneyo n’ezindi, kw’ezo ntimanano rhunalongozibwe n’okuhabwa emyanzi mihyahya. Omw’igulu lyoshi ngasi cihugo, abakozi ba Yehova banakashagalukira ezo programe. Abayisha kw’ezo ntimannano banabe bashagalusire bwenene ciru akaba barhengaga kuli erhi hofi.

Gurhi rhwakaderha kwa balya bali kuli n’emunda bajirira ezo ntimanano zago-zago? Kugerera obulenga bw’ebyuma, abo bene wirhu banayunguka n’okushagalukira ezo ntimanano. Kwa lwiganyo, amango mwene wirhu muguma w’Embaraza eri yalongoza alambagirirage etawi y’e Benin, bene wirhu balama oku tawi barhumira bene wirhu bw’omu cihugo c’e Niger enyigirizo zajiragwa n’oyo mwene wirhu. Bene wirhu 21 bayunguka n’ezo nyigirizo ciru akaba bal’ilamire kuli n’etawi. Abo bene wirhu barhimanana bakulikira ezo nyigirizo  nabo baciyumva nka banali haguma na balya bantu 44131 bali aha mwene wirhu w’Embaraza eri yalongoza ajiraga eyo ntimanano. Mwene wirhu muguma ayandika ntya: “Mbavuzire omunkwa bwenene okubona mwarhurhumire ezi nyigirizo. Oko kuyerekine kunganaci muba murhuzigire.”

Erhi abadahwa bakabuhire mushekera muguma gone “abarhambo b’ebihumbi” banayisha baje omu ihema ly’entimanano. (Mib. 10:4) Omo bakag’iyumvirhiza emyanzi mihyahya n’okukomerezibwa na Musa. Oko kwakabarhabire bahikirize emikolo yabo bwinja. Erhi akaba wali muguma wa mw’abo “barhambo,” k’orhakajijire okwawe koshi lyo nawe oba aho?

Ene, abagula b’ebigamba barhaba “barhambo” barhanacijira nka bo bakulu bw’olubaga lwa Nnamahanga. (1 Pet. 5:1-3) Cikone banajire okwabo koshi lyo balongoza olubaga lwa Nnamahanga. Co cirhuma bajira okwabo koshi lyo bagend’iyunguka n’amasomo gabo gabakomereza, kwa lwiganyo, amasomo gw’omukolo gw’Obwami. (EMR omu cifaransa) Ago masomo ganabakomereze lyo bamanya gurhi bakashibirira olubaga lwa Nnamahanga n’emikolo eyerekire ecigamba n’oko kunabarhabale bakule omu kiroho. Akaba orhazagija kw’ago masomo orhavunikaga omurhima, bulya wanayunguka n’enyigirizo za balya bajire kw’ago masomo omu kasanzi bali bayigiriza ecigamba.

Erhi abadahwa bakabuhire omushekera omw’izu lyagolyago, oko kwali kubwira abantu boshi oku Yehova alonzize bayishe. (Mib. 10:5, 6) Okurhenga omw’ikambi n’okuja emunda bahamagirwe kwali kuzibu. Cikone kwali kwa bulagirire bwenene, bulya oko kwa barhabire balame omu cinyabuguma, ciru akaba hali bantu baguma na baguma bakabire barhashagalukire oko kuhamagalwa. Bulya gurhi?

Bantu banji banarhanye oku aba Israheli bakag’ihama ciru n’olusiku n’akasanzi barhacirheganyizi. Kanji-kanji olwikungu lwakag’ibonekana sezi kuhika bijingo. Akandi kasanzi olo lwikungu lwakag’ijira “nsiku ibirhi, mwezi erhi kugendekera,” omu ntyo barhakahamire, bakabezire bali oku cihando. (Mib. 9:21, 22) Kanga bajire bahama cihando oku cindi? Ecitabu c’e Emibale 33 ciyerekine oku aba Israheli bajire cihando oku cindi kali 40.

Kanji-kanji bantu banji bakag’izigira ahali ecimbohololo. Bantu banji bakag’izigira bahame mw’ako kasanzi bulya bakag’iyoboha “omw’irungu.” (Lush. 1:19) Oboba bwakag’irhuma abantu barhashagalukira emunda baja.

Erhi bûko buguma bwakagenzire, abandi banabe bakola bali bacirheganya. Boshi bakag’iba bali bayumvirhiza izu ly’omushekera, cikone boshi barhakagenzire caligumiza. Izu ly’omushekera murhangiriza lyakag’ikengeza abali ebushoshokero bw’izuba oku bagendage, kw’okuderha obûko bwa Yuda, Isakari na Zabuloni. (Mib. 2:3-7; 10:5, 6) Erhi abo bakabire bamagenda, abadahwa banacib’ibuha omushekera. Na ntyo izu lyanakengula obûko bulamire emukondwe oku nabo banagendaga. Abadahwa banagendekera babuha omushekera kuhika abali omw’ikambi boshi bagende.

Nkaba hali amango ociyumva kubi erhi omw’ikubuliro mwakaba empindûlo mpyahya. Erhi kandi onabone nk’ezo mpindûlo zikola nyinji, orhacimanyiri zihi washimba. Erhi kandi agandi mango ezo mpindûlo zinakushagalule ociyumve nka ziciberage ntyo ensiku zoshi. Omu njira nguma erhi yindi onaciyumve nk’orhahash’ilame nk’oku ezo mpindûlo zidesire. Erhi kandi onaciyumve nka bihunyire kasanzi kanji ly’ohash’ilama ebyo bihunyirwe. Cikoki erhi rhwakacihangana okulama nk’oku izu ly’omushekera lihunyire rhwanagishwa na Nnamahanga na kandi rhwanamushagalula.

Omu mango ga Musa, Yehova alongozize abalume, abakazi n’abana bagera buzira kadundo omw’irungu, abayemîre okulongozibwa omu njira yantyo, balama omu murhula. Ene nalyo rhulamire omu murhula gw’ekiroho bulya rhuli rhwayemera okulongozibwa na Yehova. Na ntyo rhugendekire rhwayololoka n’okuba n’amagala minja g’ekiroho mw’ezi nsiku nzinda! Akantu kw’obulagirire kuli kucihangana rhube n’obwemere buli nka obw’aba Israheli bishwekerezi. Na ntyo rhube babidu okuyumvirhiza izu ly’omushekera n’okukola nk’oku rhwabwizirwe!