ECIGABI C’OKUYIGA 23
“Izino Lyawe Licesibwe”
“Mushana Yehova, izino lyawe liba ly’ensiku zoshi.”—ENNA. 135:13, NWT.
LWIMBO NOMERO 10 Musifuni Yehova Mungu Wetu!
EBI RHWACIYIGIRIZA *
1-2. Bintu bihi bibirhi Abahamirizi ba Yehova babona bya bulagirire?
OBUKULU bwa Yehova n’okuhalira izino lyage, byo bintu by’obulagirire birhuyerekire rhweshi ene. Rhuli Bahamirizi ba Yehova, rhunashagalukire bwenene okuganiza abandi okubiyerekire eyo myanzi y’obulagirire. Rhumanye oku nta lubero luli ekarhi kw’obukulu bwa Yehova n’okucesa izino lyage.
2 Rhweshi rhwahikire aha rhwahugûkwa okw’izino lya Yehova likwanine licesibwe. Kandi rhwahikire aha rhwahugûkwa oku obukulu bwa Yehova erhi oku arhambula kwo kukwanine kubonekane oku kushinganine na kwinja. Ebi bintu bibirhi biri byabulagirire bwenene.
3. Bici izino lya Yehova lihiziremwo?
3 Neci, izino lya Yehova lihugwîre bintu binji kuli Nnamahanga wirhu, lihiziremwo oku arhambula. Erhi rhwakaderha okucesibwa kw’izino lya Yehova lir’idoso lya bulagirire bwenene, oko kwanayerekana oku rhuhugûsirwe oku, oku Yehova arhambula kwo kushinganine. Hali olushangi ekarhi k’izino lya Yehova na kunganaci ali mukulu anali Mugala Byoshi.—Olole ecisanduku “ Ebigabi b’Idoso Likulu.”
4. Bici olwandiko lwa Ennanga 135:13 ludesire okubiyerekire izino lya Nnamahanga na madoso gahi rhwashuzakwo mw’eci cigabi?
4 Izino lya Yehova liri lyago-lyago. (Osome Ennanga 135:13) Bulya gurhi izino lya Nnamahanga liri lya bulagirire? Mangaci lyarhangir’iderherwa obunywesi? Gurhi Nnamahanga ayishil’iceca na gurhi nirhu rhwakarhabala okucesa izino lyage? Rhuganirirage ago madoso.
OBULAGIRIRE BW’IZINO
5. Bici bantu baguma na baguma bakahikira aha bacidosa omu kuyumva mpu izino lya Yehova licesibwe?
5 ‘Izino lyawe licesibwe.’ (Mat. 6:9) Er’izino lyo Yezu adesire rhwakahira oku nafasi ntanzi omu isala lirhu. Bici ezo nderho za Yezu zihugwîre? Okukuza kantu kalebe, kw’okuderha kukajira katagatifu erhi kukacesa erhi kukahira enyanya. Bantu baguma na baguma banahikira aha baderha erhi; “gurhi rhwakahikira aha rhwacesa izino lya Yehova, linabaliyosire licire?” Lyo rhushuza kw’er’idoso, rhukwanine rhurhanye bwenene ebi er’izino lihugwîre.
6. Bici bijira izino libe linja?
6 Izino liba lihugwîre bintu binji kulusha oku liyandikwa erhi oku liderhwa. Ebibliya edesire ntya: ‘Aha wakaluza ebirugu, wakagwarha izino linja.’ (Mig. 22:1; Muh. 7:1) Bulya gurhi izino ligwerhe obulagirire buli nk’obo? Bulya izino ly’omuntu linarhabale abantu bamumanye, bamanye n’olugenzi lwage. Co cirhumire arhali okw’izino liyandikwa oku karadasi erhi okulihamagalwa kwo kuba kwa bulagirire, cikoki oku er’izino lihugûsirwe omu bwenge n’omu mirhima y’abandi, kwo kuba kwa bulagirire bwenene.
7. Gurhi abantu bahikira aha baderha kubi izino lya Yehova?
7 Erhi abantu baderha obunywesi kuli Yehova, banabe bali bamuhegeza irenge. Erhi abantu bakahikirwa n’obuhanya, banatumuze Nnamahanga, ciru n’abandi banamujacire, bahikire n’aha baderha izino lyage kubi. Omw’ishwa ly’e Edeni mw’obunywesi burhanzi kuli Nnamahanga n’izino lyage bwarhonderêraga. Rhulolage bici rhwakaciyigiriza lugenda obo bushobesi.
GURHI IZINO LYA YEHOVA LYAHAGALISIRWEMWO AHA MURHONDÊRO?
8. Bici Adamu na Eva bal’imanyire bwinja-bwinja na madoso gahi rhwakacidosa?
8 Adamu na Eva bal’imanyire bwinja okw’izino lya Nnamahanga ye Yehova banal’imanyire bwinja obulagirire bw’er’izino. Bal’imanyire oku ye Lulema wabo, oku ye wabahâga obuzîne n’oku ye wabahâga ahantu hinja hw’okulama, n’oku ye wabahâga akalamo kimana. (Murh. 1:26-28; 2:18) Cikoki, ka bagendekire barhanya bwenene kw’ebyo byoshi Yehova abajirirâga? Ka bagendekire barhanya oku bulagirire bw’izino lya Yehova? Ebi bajijire bihanyire amashuzo kw’ago madoso, ahali babone Yehova nk’Ishe, bamubona nka mushombanyi wabo.
9. Lugenda olwandiko lwa Omurhondêro 2:16, 17 na 3:1-5, bici Yehova ahanzagyakwo omulume n’omukazi murhanzi na gurhi Shetani asherezize okuli kw’elyo irhegeko?
9 Osome Omurhondêro 2:16, 17 na 3:1-5. Rhulolage gurhi wanjoka ali ayigiriza Eva omu kumodosa erhi: “Ka kwobinali Nnamahanga ababwizîre oku murhakanalya oku ngasi malehe ganali omu busani?” Shetani adosa Eva idoso ly’obwengehushu lyo amuhiramwo entanya mbi lugenda Nnamahanga. Irhegeko liguma lyone Yehova al’ibahîre, ababwira oku barhalyaga okw’ilehe ly’okumanya aminja n’amabi. Adamu na Eva bakalîre agandi malehe g’eyindi mirhi bulya gali manji omu bustani. (Murh. 2:9) Neci, Yehova ayerekîne kunganaci aba muhanyi. Cikoki, Nnamahanga abahanza okulya ilehe lya murhi muguma gone. Idoso lya Shetani lya rhuma okuli kw’elyo irhegeko kwaba kurhacimanyikini. Shetani ayerekana oku entanya zage zo z’okuli n’oku Nnamahanga ali mujinisi. Nkabaga Eva acidosa ntya: ‘K’arhakaba aka kantu Nnamahanga arhuhanzâgya kali ka bulagirire kuli rhwê wani?’
10. Gurhi Shetani ahikiremwo aha aderhêra izino lya Yehova obunywesi, na bici okwo kwalesire?
10 Eva acikag’irhumikira Yehova erhi Shetani amudosa er’idoso. Ashuza Shetani bwinja na buzira karhinda oku Nnamahanga aba bwirâga. Ayushûla ciru omu kuderha oku cirhu barhajkahumire kw’ogo murhi. Al’imanyire bwinja irhegeko lya Nnamahanga n’oku okuligokeza kwakabahesire ebwa lufû. Cikoki Shetani ashuza erhi: “Murhafê!” (Murh. 3:2-4) Shetani arhacifulikaga, ahikira aha azinza izino lya Nnamahanga omu kumuderhera obunywesi. Omu kubwira Eva ntyo, ayerekana oku Yehova ali munywesi. Na ntyo kwo Shetani ahikiremwo aha aba Ibilisi erhi kakoza. Eva arhebwa yeshi-yeshi, ahikira aha ayemera obunywesi bwa Shetani. (1 Tim. 2:14) Eva alangalira Shetani ahali hw’okulangalira Yehova. Okwo kwarhuma Eva ahiga kubi. Acishoga okurhacirhumikira Yehova. Arhangira alya ilehe Yehova al’ibahanzize oku barhahira bakalya. Adamu naye amulunga okuboko.—Murh. 3:6.
11. Bici ababusi birhu barhanzi bakajijire cikoki bayabirwa bubijira?
11 Orhanye hisungunu okw’ishuzo Eva akahire Shetani. Gurhi orhanyize byakabire erhi Eva akashuzize Shetani ntya: “Wendi nawe, ci ntakumanyiri? Manyire Larha Yehova yene, muzigire bwenene na mulangalire nienaye. Ye warhuhaga ngasi byoshi rhujira. Gurhi wakantebeka ntyo omukumbwira ebishala kabwa biri nk’ebyo? Galuka emunda warhenga!” Gurhi orhanyize Yehova akaciyumvirhe omu kuyumva enderho z’obuzigire n’obwishwekerezi ziri nk’ezo zirhenge omu kanwa kw’omwali! (Emigani 27:11) Eva ayerekana oku arhazigiri arhanali mwishwekerezi kuli Ishe, Adamu ye hahe. Omu kubula obuzigire kuli Ishe, Adamu na Eva barhacihikirâga aha bahalira izino lya Yehova lugenda obunywesi bwaderhâgwa kuli lyo.
12. Gurhi Shetani ahikire aha ahira akarhinda omu ntanya za Eva na bici Adamu na Eva barhajirâga?
12 Shetani ahikira aha arheba Eva omu kuhira akarhinda omu ntanya zage. Shetani arhuma Eva abula bucilangalira Omuntu w’obulagirire ohamagalwa okw’izino lya Yehova. Adamu na Eva barharhahaliraga izino n’irenge lya Yehova. Bayumvirhiza n’okuyemera enganîro za Shetani na ntyo barhangiza obugoma kuli Ishe. Ene nalyo Shetani agendekire akolesa obo bwengehushu bwage akolesâgya omu mango ga Adamu. Agendekire azinza izino lya Yehova omu kumuderhera obunywesi. Abantu bamuyemera banahikire aha balahira oburhegesi bushinganyanya bwa Yehova.
YEHOVA ACESA IZINO LYAGE
13. Gurhu olwandiko lwa Ezekiyeli 36:23 luyerekine bwinja omwanzi murhangingiriza gw’Ebibliya?
13 Ka Yehova aleka bagEnnadekere bazinza izino lyage emyaka n’emyaka? Nanga! Ebibliya eyerekine gurhi Yehova ayish’ijira ly’akula er’izinga okw’izino lyage. (Murh. 3:15) Co cirhumire omwanzi mukulu guba omu Bibliya guba ntya: Yehova acesa izino lyage kugerera Obwami bwage bwarhambulwa n’Omugala, ayish’igalula obushinganyanya n’omurhula hanw’igulu. Ebibliya erimwo emyanzi yakarhurhabala rhuhugûkwe gurhi Yehova ayish’ijira ly’acesa izino lyage.—Osome Ezekiyeli 36:23.
14. Gurhi oku Yehova ashuzâgya abagoma omu Edeni kwayish’icesa izino lyage?
14 Shetani ajijire okwage koshi lyo Yehova arhahikirizagya omuhigo gwage. Cikoki, Shetani ayabirwe loshi. Ebibliya eyerekine gurhi ebi Yehova ali ajira. Ebibliya eshubir’iyerekana oku nta wundi Muntu oli aka Yehova. Kobinali obugoma bwa Shetani bwagayasize Yehova bwenene. (Enna. 78:40) Cikoki, Yehova akolesa obwenge, obushinganyanya n’okulembera. Ahikire ciru aha ayerekana oku aba wa misi minji. Obuzigire bwa Yehova buli bwabonekana kugerera emikolo yage. (1 Yowane 4:8) Yehova agendekîre akola buzira kurhama lyo acesa izino lyage.
Shetani arhebire Eva lugenda Yehova, Ene nalyo acigendekire anywerhera Nnamahanga (Olole ecifungo ca 9-10, 15) *
15. Gurhi Shetani ali anywerhera izino lya Nnamahanga ene, na gurhi oko kukola kukarhuma bantu banji barhanya?
15 Ene nalyo Shetani acigendekire anywerhera izino lya Yehova. Anakahira abantu mw’akarhinda omu kubajira barhanye mpu Nnamahanga arhaba mushinganyanya erhi wabuzigire erhi Mugala Byoshi. Kwa lwiganyo, ali ajira abantu barhanye oku Nnamahanga arhali ye walemâga ebintu. N’erhi omuntu akayemera oku ho Nnamahanga aba, Shetani analonze ku muyemeza oku amarhegeko ga Nnamahanga gaba mazirho. Anakayigiriza abantu oku Yehova arhajira bonjo, oku aba munizi n’oku anakayokera abantu omu muliro gw’ecihenama. Erhi bayemera obo bunywesi, kurhaba kulembu bacirhumikire amarhegeko ga Nnamahanga. Shetani agendekeza obunywesi bwage kuhika aha kusherezibwa kwage, ciru nawe analonza mpu akurhebe. K’ahasha akurheba?
OMUKOLO GWAWE OMW’IDOSO LIKULU
16. Bici wakajira byayabirâga Adamu na Eva okujira?
16 Yehova abwizire bene bantu barhali bimana oku nabo bagwerhe obulyo bw’okucesa izino lyage. Omu ntyo wanajira ebi Adamu na Eva bayabirâgwa okujira. Wanarhabala abandi bamanye n’okucesa izino lya Yehova na ntyo bahugûkwe oku Yehova aba mutagatifu, mushinganyanya, wabuzigire na wabonjo. (Iza. 29:23) Wanahash’irhumikira amarhegeko gage. Wanarhabala abantu bamanye oku amarhegeko ga Yehova gone gaba g’okuli, n’oku ye wayish’ilerhera ebiremwa byage byoshi omurhula n’omwishingo.—Enna. 37:9, 37; 146:5, 6, 10.
17. Gurhi Yezu amanyisizemwo izino l’Ishe?
17 Erhi rhuhalira n’okuganirira abandi lugEnnada izino lya Nnamahanga, rhunakaba rhuli rhwayiga olwiganyo lwa Yezu Kristu. (Yowane 17:26) Yezu arhal’imanyiri kone izino lya Yehova, cikone akag’ilikolesa n’okulimanyisa abandi, n’okuyigiriza abantu obulonza bwage. Kwa lwiganyo, apinga Abafarisayo bakolesagya njira nyinji lyo baheza izino lya Yehova omu kuderha oku aba mukali, wa kuhûna abantu binji, oku aba kuli n’abantu n’oku arhaba wakuvuga omunkwa. Yezu arhabîre abantu bamanye oku Ishe aba wa kulembera, wa buzigire na wa kubabalira. Enderho za Yezu n’ebijiro byage byarhabire abantu bahugûkwe oborhere bwa Yehova.—Yowane 14:9.
18. Gurhi rhwakajira lyo rhubeshula obunywesi bwa Shetani?
18 Rhwanayiga olwiganyo lwa Yezu omu kukabwira abandi ebi rhumanyire lugenda Yehova. Erhi rhwakajira ntyo, rhwanaba rhuli rhwabeshuza Shetani. Rhwanacesa izino lya Yehova omu kumanyisa abandi oku liri litagatifu. Nirhu rhwanahash’iyiga olwiganyo lwa Yehova. Oko kwanahashikana ciru akaba rhurhaba bimana. (Efez. 5:1, 2) Enderho zirhu n’ebijiro birhu byanayerekana erhi kobinali rhuba rhuzigire Yehova. Olungenzi lwirhu lwanarhabala okucesa izino lya Yehova. Rhunahalire izino lya Yehova omu kurhabala abandi bamanye okuli lugenda Nnamahanga. * Ciru rhunayerekane oku abantu barhali bimana banabêra bishwekerezi kuli Nnamahanga.—Ayubu 27:5.
Rhulonzize rhurhabale abanafunzi birhu b’Ebibliya bamanye Yehova bwinja banamuzigire (Olole ecifungo ca 18-19) *
19. Gurhi olwandiko lwa Izaya 63:7 lurhurhabire rhubone obulagirire bw’omukolo gwirhu gw’okuyigiriza?
19 Hali ebindi bintu rhwakajira lyo rhucesa izino lya Yehova. Erhi rhuyigiriza abandi okuli kw’Ebibliya, rhunacihangane okubayereka oku Yehova ye gwerhe obuhashe bw’okurhambula, n’oku amarhegeko gage gaba malembu okurhumikira. Co cirhumire kuli kwa bulagirire rhucihangane okubayigiriza amarhegeko ga Nnamahanga, obulonza bwirhu kuli kubarhabala bazigire Larha wirhu Yehova n’okucihangana babe bantu bashinganine okuhamagalwa oku izino lya Yehova. (Osome Izaya 63:7) Erhi rhwakabayigiriza mw’eyo njira, rhwanabarhabala bazigire Yehova n’okumurhumikira bulya balonzize babere bishwekerezi kuli ye.
20. Bici ecigabi cikulikire caganirira?
20 Cikone, bici byakarhurhabala rhuhugûkwe erhi enjira rhuli rhwakolesa lyo rhuyigiriza abandi yabarhabala bamanye n’okucesa izino lya Yehova? Ecigabi cikulikire cashuza kw’eryo idoso.
LWIMBO NOMERO 2 Jina Lako Ni Yehova
^ kip. 5 Idoso lihi liri lya bulagirire kuli bene bantu na bamalahika? Bici birhumire er’idoso lihumire oku kalamo kirhu na kunganaci er’idoso lirhuyerekire? Okuhugûkwa ishuzo kw’er’idoso ly’obulagirire n’agandi madoso kwanarhurhabala rhuzibuhye obwîra bwirhu haguma na Yehova.
^ kip. 18 Hakola hali kasanzi kanji ebitabu birhu birhubwizire oku rhurhakag’iderha oku “izino lya Yehova licebwe.” Bulya gurghi? Mpu bulya nta muntu osag’iderha oku Nnamahanga arhashinganini eryo izino lya Yehova. Cikone, Entimanano ya ngasi mwaka y’omu mwaka gwa 2017 yarhuhugûla bwinja olo luderho. Omwimangizi w’eyo ntimanano aderha ntya: “Kwa bofofi, kurhali kubi okukasalira oku izino lya Yehova licesibwe bulya irenge lyalyo liri lya bulagirire bwenene.”—Olole eprograme y’omwezi gwa Burhanzi 2018 oku jw.org®. Olole aha bayandisire LIBRARY > JW BROADCASTING®.
^ kip. 62 AMAHUGULO G’ENFOTO: Ibilisi ali anywerhera Nnamahanga, omu kubwira Eva oku Nnamahanga aba munywesi. Hakola hali amagana g’emyaka Shetani arhangizize Ennayigirizo z’obunywesi, nk’okuyigiriza oku Nnamahanga aba munizi, n’oku arhali ye walemâga abantu.
^ kip. 64 AMAHUGULO G’ENFOTO: Oyu mwene wirhu ali ahugûlira oyu mwanafunzi w’Ebibliya amorhere ga Nnamahanga.
