ECIGABI C’OKUYIGA 26
“Mugaluke Emunda Ndi”
“Mugaluke emunda ndi nani nagaluka emwinyu.”—MAL. 3:7.
OLWIMBO 102 “Mwasaidie Waliyo Dhaifu”
EBI RHWACIYIGIRIZA *
1. Gurhi Yehova aciyumva erhi muguma w’omu bakozi bage akamugalukira?
NK’OKU rhwanabonaga omu cigabi ciri embere z’eci, Yehova acishushanyize n’omungere oshibirira ngasi cibuzi cage. Anakalongereza gurhi akarhabala balya boshi bamuyasire bacib’imugalukira. Yehova ayinginga aba Israheli bali bamamuyaka ntya: “Mugaluke emunda ndi nani nagaluka emwinyu.” Rhumanyire oku ene nalyo ntyo kwo Yehova anali aciyumva bulya adesire oku, “arhakahinduka.” (Mal. 3:6, 7) Yezu adesire oku Yehova na bamalahika banashagaluke bwenene erhi muntu muguma w’omu bakozi bage akagalukira Yehova.—Luka 15:10, 32.
2. Bici rhwaganirira mw’eci cigabi?
2 Rhwaganirira nyiganyo isharhu Yezu aderhaga zakarhurhabala rhubone gurhi rhwakarhabala balya boshi bayasire Yehova. Rhwaganirira morhere maguma na maguma rhwakaba nago lyo rhurhabala ebyo bibuzi bigalukire Yehova. Aha buzinda bw’eci cigabi rhwayish’ibona bulya gurhi kuli kwa bulagirire okurhabala balya boshi barhacijira bushiru omu kukolera Yehova.
OKULONGEREZA IFUNDO LY’AMAGERHA
3-4. Lugenda Luka 15:8-10, gurhi oyu mukazi ajijire ly’alongereza ifundo lyage ly’amagerha lyamuheraga?
3 Rhukwanine okukola bwenene lyo rhurhabala balya boshi balonzize oku galukira Yehova. Omu enjili ya Luka, Yezu aganirire mukazi muguma wahezagya ifundo lyage ly’amagerha ly’obulagirire lyakag’ihamagalwa drakma. Olo lwiganyo lwarhurhabala rhuhugûkwe gurhi omuntu ajira nk’alonza akantu kage kw’obulagirire kamuhezire.—Osome Luka 15:8-10.
4 Yezu aganirire omwishingo oyo mukazi agwerhe erhi abona er’ifundo lyage ly’amagerha. Omu mango ga Yezu, abazire bakag’ijuha bali babo ifundo ly’amagera (drakma ikumi) olusiku lwabo lw’obuhya. Nkaba er’ifundo lyoshi lyahera oyo mukazi. Oyo mukazi arhanya mpu nkaba er’ifundo lyarhogire okw’idaho. Abona nk’itara lyage lirhali lyamoleka bwinja. Ho n’aho arhôla ecihyajiro ahyajira omu mwage moshi. Buzinda bw’aho, abona er’ifundo lyage, ahugûkwa okw’itara lirhajaga lyamoleka bwinja. Ahamagala bene wabo n’abîra bage boshi oku bayishe bashagaluke haguma bulya amabona er’ifundo lyage.
5. Bulya gurhi kwanaba kuzibu okulongereza balya barhacishibirira emikolo yʼecigamba?
5 Olu lwiganyo lwa Yezu lurhuhugûlire bwinja-bwinja oku bihunyire bushiru bunji n’okukola bwenene lyo rhulonza akantu kahezire. Kwo n’oko kwo rhwakanakola n’obushiru boshi amango rhuli rhwarhabala bene wirhu na bali birhu balesire okushibirira emikolo y’ecigamba. Nkaba bakola bagwerhe myaka minji balesire okuja omu ntimanano. Erhi kandi babe bahamîre omu cindi cihugo na bene wirhu b’eyo munda barhabamanyiri. Cikoki ciru akaba ntyo baguma ba mulibo banaba erhi bagwerhe irala ly’okugalukira Yehova n’okucib’iba baguma bw’omu mulala gwage. Cikone lyo bahikira aho, bihunyire rhubarhabale.
6. Gurhi rhwakacihâna rhweshi omu mukolo gw’okulonza balya barhacishibirira emikolo y’ecigamba?
6 Ndi na ndi wakaja omu mukolo gw’okulongereza abarhacishibirira emikolo y’ecigamba? Rhweshi rhwanajira ogo mukolo; abagula, bapainiya, bene wabo bw’omu mulala na ngasi mukristu yeshi anajira ogo mukolo. Ka hali mwene winyu erhi mwîra wawe muguma omanyire orhacishibirira emikolo y’ecigamba? Ka hali amango okola obire oli omu mahubiri ga nyumpa oku yindi erhi aga ah’abantu boshi, buzinda wabuganana na mwene wirhu erhi mwali wirhu orhacishibirira emikolo y’ecigamba? Akaba oyo mwene wirhu erhi mwali wirhu anashagalukira abagula bamulambagirire wanamudosa ah’alamire na kandi wanamuhûna enimero yage y’etelefone, buzinda wanayish’iyiha abagula b’ecigamba.
7. Bici rhwakaciyigiriza okubiyerekire ezi nderho za mwene wirhu Thomas?
7 Gurhi na gurhi abagula bakajira lyo barhabala oyo mwene wirhu erhi oyo mwali wirhu ly’agalukira Yehova? Banayiga olwiganyo lw’oyu mugula ohamagalwa Thomas, * w’omu cihugo c’e Espagne. Ahikire aha arhabala bene wirhu na bali birhu balushire 40, bacibishubirira emikolo y’ecigamba. Adesire ntya: “Burhangiriza, nnantang’idosa bene wirhu na bali birhu erhi hali mwene wirhu erhi mwali wirhu bamanyire orhacishibirira emikolo y’ecigamba. Erhi ndose abahubiri erhi hali mwene wirhu erhi mwali wirhu bamanyire orhacija omu ntimanano. Bene wirhu na bali birhu banji banashagalukire ago madoso, bulya banahugûkwe oku nabo bakwanine bajire ogo mukolo. Buzinda bw’aho erhi ndambagirira abo bene wirhu erhi bali birhu barhacishibirira emikolo y’ecigamba, nnambadose gurhi abana erhi ababusi babo bayosire. Bene wirhu na bali birhu baguma na baguma banahikire aha balerha abana babo omu ntimanano, hali amango erhi abo bana nabo balesire emikolo ya Yehova. Abo bana nabo rhwanabarhabala bahikire aha bagalukira Yehova.
MWE BARHABANA NA MWE BANYERE MUGALUKIRE YEHOVA
8. Bici ishe w’omwana mulalahi amujirire erhi aciyunjuza nk’oku biyerekinwe omu Luka 15:17-24?
8 Morhere gahi na gahi rhushinganine okuba nago nka rhukola rhwarhabala balya barhacishibirira emikolo y’ecigamba bagalukire Yehova? Rhulolage masomo gahi maguma na maguma rhwakaciyigiriza okubiyerekire olwiganyo lw’omwana mulalahi. (Osome Luka 15:17-24) Yezu ahugûla gurhi murhabana muguma ahikiraga ah’agalukirwa n’obwenge, buzinda ahiga okugaluka aha mwabo. Erhi ishe amulangira, alibirha ajimuhobera na ntyo amuyereka oku amuzigire bwenene. Oyo mwana mulalahi aciyunjuza bwenene, agaya bwenene lugenda olugenzi ajiremwo, buzinda abona oku arhacishinganini okuhamagalwa mugala w’ishe. Ishe ayumva obonjo bwenene erhi ayumva enderho z’omugala ziyunjwire buciyunjuze. Ishe amubwira nderho nguma na nguma n’okumujirira bijiro biguma na biguma byayemezize oyo mugala oku ishe amuzigire n’oku ashagalusire okubona amagaluka aha mwabo. Ishe arhamukoleraga nka muboyi wage cikone amubona nka mwana wage muzigirwa. Ly’ayerekana kunganaci amuzigire amujirira idinye na buzinda amuyambisa emishangi mihyahya.
9. Morhere gahi rhushinganine okuba nago lyo rhurhabala balya barhacishibirira emikolo y’ecigamba bagalukire Yehova? (Olole ecisanduku “ Gurhi rhwakarhabala Balya Balonzize Okugalukira Yehova?”)
9 Mw’olu lwiganyo, Yehova ashushanyizibwe n’ishe w’oyu mwana. Aba azigire bene wirhu na bali birhu barhacishibirira emikolo y’ecigamba, analonzize bamugalukire. Erhi rhwakayiga olwiganyo lwa Yehova, rhwanabarhabala bamugalukire. Lyo rhubarhabala kuli kwa bulagirire rhube ba kulembera, ba lukogo, ba bonjo na ba buzigire. Bulya gurhi kuli kwa bulagirire okuyerekana ago morhere na gurhi rhwakahikira aha rhwagayerekana?
10. Bulya gurhi bihunyire rhube bakulembera nka rhuli rhwarhabala mwene wirhu erhi mwali wirhu agalukire Yehova?
10 Kuli kwa bulagirire rhube bakulembera, bulya bihunyire kasanzi kanji ly’omuntu agalukira Yehova n’okucib’iba n’amagala minja g’ekiroho. Bene wirhu na bali birhu banji bagalukire Yehova banaderhe oku bahikire aha bamugalukira bulya bene wabo na bali babo babalambagirire kanji-kanji. Mwali wirhu muguma w’e Asie ohamagalwa Nancy ayandika ntya: “Mwali wirhu muguma w’omucigamba antabire kasanzi kanji, akankengeza akasanzi kinja rhwakag’igeza haguma amango gageraga. Akalembera obuzamba bwani n’okuyumvirhiza entanya zani arhanakag’irhindira okumpa amahano. Anyereka oku ali mwîra w’okuli olya orhabala akasanzi koshi.”
11. Bulya gurhi kuli kwa bulagirire okuba n’obonjo lyo rhurhuliriza mwene wirhu erhi mwali wirhu ovunisire omurhima?
11 Obonjo buba bufumu bwenene, bwanarhabala omu kubuka entanya ziyunjwire malumwa. Bene wirhu na bali birhu banji balesire oku kolera Yehova erhi ntanya mbi okubiyerekire mwene wirhu mulebe w’omu cigamba zirhumire. N’ezo ntanya zabo mbi zarhuma baheza irala lyabo ly’okukolera Yehova. Ciru nkaba banabe bali barhanya oku bababonerire. Omu ntyo banabe balagirire oku muntu wabayumverheza n’okuhugûkwa entanya zabo. (Yak. 1:19) Mwali wirhu Maria wajiraga kasanzi kanji alesire okukola adesire ntya: “Nalilagirire oku muntu wakanyumvirhiza, antulirize, antabale ampe n’amahano gashinganine.”
12. Ohâne olwiganyo luyerekine oku obuzigire bwa Yehova ko buyorha nka mugozi gubulula abarhacishibirira emikolo y’ecigamba?
12 Ebibliya edesire oku obuzigire Yehova ajira oku bantu bage ko buba nka mugozi. Bulya gurhi rhwakaderha oku kwo buba nka mugozi? Rhurhanye kw’olu lwiganyo: Obe oli wagera omu lubanda n’enkuba nnene yanire, edindike olubanda loshi kuhika idaho libwikire ngasi hantu, buzinda oyishe walambagira orhanamanyiri luhi na luhi, olabarhe hantu haguma ntya buzinda oshaye, ho n’aho muntu muguma ayishe akukwebe omugozi, akubulule, kw’orhakashagalukira obo burhabale? Neci, wanashagaluka bwenene bulya omanyire oku okaseza ogo mugozi akukulula kuhika oje ebulambo na ntyo oyokole akalamo kawe. Yehova abwîra aba Israheli bali bamamuleka ntya: “Nakâbashîshiriza,” nakababulula n’olukoba “lw’obuzigire.” (Hoz. 11:4) Ntyo ko Nnamahanga arhanya lugenda balya boshi bamulesire, bayosire nk’abashayire omu bijondo. Alonzize bahugûkwe oku abazigire analonzize ababulule n’omugozi gw’obuzigire bayishe emwage. Kandi ohugûkwe oku Yehova anakukolesa, obulule aba bene wirhu na bali birhu bacib’iyisha bashagalukire obuzigire bwage.
13. Bici Pablo acibwinire lugenda okuyeresa bene wirhu erhi bali birhu barhacikola emikolo y’ecigamba obuzigire?
13 Kuli kwa bulagirire rhuyemeze mwene wirhu erhi mwali wirhu walesire okukolera Yehova, oku Yehova na nirhu rhumuzigire bwenene. Mwene wirhu Pablo w’e Amérique du sud ajijire myaka 30 arhaliashibirira emikolo y’ecigamba. Adesire ntya: “Sezi liguma erhi nkola narhenga aha mwani, nabona mwali wirhu muguma mugikulu ayisha akanganiza n’obutûdu n’obuzigire. Ho n’aho narhangira nadubula emirenge, nalaka nka mwana. Namubwira oku nkaba Yehova anamurhumire oku ayish’inganiza. Mw’ako kasanzi nahiga oku nkola nagalukira Yehova.”
OBUZIGIRE BWANARHUSHUMYA LYO RHUBARHABALA
14. Nk’oku biyerekinwe omu lwandiko lwa Luka 15:4, 5, gurhi omungere ajijire erhi abona ecibuzi cali hezire?
14 Abarhacishibirira emikolo y’ecigamba balagirire oku burhabale bwirhu. Olwiganyo lw’omwana mulalahi Yezu aganiriraga luyerekine oku abao bene wirhu erhi bali birhu banaba bali baciyunjuza bwenene okubona barhacir’ibakolera Yehova. Okuja omw’igulu lya Shetani kwa rhumire bazambanya omu hali y’ekiroho. Rhushinganine rhubarhabale bashub’izibuhya obuzigire bwabo n’obwemere bwabo muli Yehova. Olwiganyo lw’ecibuzi c’al’ihezire Yezu aganiriraga luyerekine gurhi omungere ajijire erhi acibona: Acibarhula oku birhugo kuhika acihisa omu buso. Oyu mungere ajijire kasanzi kanji na bushiru bunji ali alongereza eco cibuzi. Ahugûkwa oku eco cibuzi cirhagwerhi misi minji n’oko kwa rhuma acihira aha lurhugo.—Osome Luka 15:4, 5.
15. Gurhi rhwakarhabalamwo bene wirhu erhi bali birhu barhacishibira emikolo y’ecigamba bashub’igalukira Yehova? (Olole ecisanduku “ Ecikolanwa c’Obulagirire.”)
15 Rhushinganine rhube n’akasanzi kanji na bushiru bunji lyo rhurhabala ebibuzi bizamba lyo bigalukira Yehova. Kugerera iroho litagatifu, oluderho lwa Nnamahanga, Ebibliya n’ebitabu rhuhabwa na mushizi mwirhonzi rhwanabarhabala bashub’izibuhya obwîra bwabo haguma na Yehova. (Bar. 15:1) Gurhi rhwakahash’ijira ntyo? Ebi oyula mugula acibwinire byanarhurhabala. Adesire ntya: “Bene wirhu na bali birhu banji barhacishibirira emikolo ya Yehova, banabe balagirire okw’ifunzo ly’Ebibliya erhi bahiga oku bakola bagalukira Yehova.” * Co cirhumire erhi bakakubwira oku oyige Ebibliya haguma na mwene wirhu erhi mwali wirhu wa mwenere oyo, orharhindiraga okuyiga naye bulya ogo guli mukolo mwinja. Oyu wundi mugula ashubir’iderha ntya: “Omuhubiri oli walongoza ifunzo lya ntyo, ashinganine abe mwîra w’okunali na wakubika ihwe.”
OMWISHINGO OMU MPINGU N’AH’IGULU
16. Bici birhuyemezize n’obwalagale oku rhukwanine rhulangalire oburhabale bwarhenga empingu?
16 Bintu binji byabwinwe birhuyemezize oku bamalahika banarhurhabale oku mukolo gw’okurhabala bene wirhu erhi bali birhu balonzize okugalukira Yehova. (Maf. 14:6) Kwa lwiganyo mwene wirhu muguma olama e Equateur adesire oku akag’ishenga Yehova amurhumire mwene wirhu erhi mwali wirhu wakamurhabala amugalukire. Lero lusiku luguma ayusa asalira,ayumva abantu bakomomba oku mulango, abona bagula babirhi bamulambagirire. Mw’ako kasanzi ayumva obushagaluke bwenene bulya bakola bamurhabala ashub’igalukira Yehova.
17. Gurhi rhuciyumva erhi rhwakarhabala mwene wirhu erhi mwali wirhu mulebe agalukire Yehova?
17 Rhwanaba n’omwishingo munji erhi rhwakarhabala bene wirhu erhi bali birhu balesire emikolo y’ecigamba bacib’igalukira Yehova. Orhanye kw’ebi mwene wirhu Salvador, painiya okarhabala abandi, adesire ntya: “Hali amango ndaka erhi bushagaluke burhumire. Nanshagaluke bwenene erhi mbona Yehova arhabala ecibuzi cage cizigirwa cirhenge omw’igulu lya Shetani. Oko kunanyemeze n’obwalagale oku luli lukengwa lunene okukola haguma na Yehova mw’ogo mukolo.”—Ebijiro by’Entumwa 20:35.
18. Erhi akaba orhacikola haguma n’ecigamba, bici wakayemera n’obwalagale?
18 Wekasinga, erhi akaba walesire okukolera Yehova, rhukuhunyire omugalukire, adesire n’obwalagale oku akuzigire. Yehova alonzize omugalukire. Wanarhôla mihigo miguma na miguma ly’omugalukira. Nka lulya lwiganyo lwa Yezu lw’omubusi w’omwana mulalahi, Yehova, Sho wawe alonzize ogaluke aha mwinyu. Ashagaluka bwenene erhi wakarhôla omuhigo gw’okugaluka aha mwinyu.
LWIMBO NOMERO 103 Wachungaji—Zawadi Katika Wanadamu
^ kip. 5 Yehova aba alonzize balya boshi barhacishibirira emikolo y’ecigamba bamugalukire. Rhwanaha omurhima balya boshi balonzize okuyemera omulali gwa Yehova gudesire ntya: “Mugaluke emunda ndi.” Mw’eci cigabi, rhwabona gurhi rhwakajira lyo rhubarhabala bagalukire Yehova.
^ kip. 7 Mazino maguma na maguma gashanjirwe.
^ kip. 15 Baguma na baguma muli abo bene wirhu erhi bali birhu banaciyigiriza bigabi biguma na biguma by’omu citabu Osêre omu Buzigire bwa Nnamahanga, erhi kandi abandi banasoma bigabi biguma na biguma by’omu citabu Mukaribie Yehova. Ekomite y’ekwanine okucishoga ndi oshinganine okulongoza er’ifunzo.
^ kip. 68 AMAHUGÛLO G’ENFOTO: Bene wirhu basharhu bali barhabala oyu mwene wirhu olonzize okugalukira Yehova. Bali bamuhûna e nomero yage y’etelefone, omu kujira ntyo, bali bamuyereka oku bamuzigire banali bamuyumvirhiza.
