“Erhi muzala wani akanampalalira, namugwarhire emumiro kuhika nonze okumuniga.” ​—Paul.

“Omu mulala, ntasima omuntu ansholoshonze bulya nnanarukuza ciru akaba arhali kadali ali ndonzakwo, nampikire aha nashereza ngasi kantu ngwerhe omu nfune.”​—Marco.

Banji muli rhwê barhaba bakali nk’aba bantu babirhi rhuganirire, cikone kuba kuzibu okucihasha omu kasanzi kaguma na kaguma. Binabe ntyo bulya rhwayimire omu caha ca Adamu. (Bar. 5:12) Banji barhacihasha aka Paul na Marco. Abandi bashinganine bacihangane okuhasha entanya zabo. Kwa lwiganyo, banabike entanya z’akantu kabavunaga omurhima. Hali n’abandi barhahash’ilembera bulya banakakengera oku babajiriraga ecijiro cibi c’oku babaka, abandi barhahash’ilembera erhi bakengera oku bali balalwe n’abandi banayabirwe okulembera erhi bakengera akalamo kabo kamîra kw’okunywa amafumu gw’okucilalusa.

Abandi banakaleka entanya, irala n’ebijiro birhali binja bishereze akalamo kabo. Cikone rhwanahikira aha rhwashologorhwa n’ebyo bijiro bibi. Gurhi rhakahikiramwo ntyo? Omu kuba bakucihasha. Lyo rhuhikira aha rhwacihasha, rhuganirage aga madoso asharhu: 1) Okucihasha byo bici? 2) Bulya gurhi kuli kwabulagirire okucihasha? 3) Gurhi rhwakajira lyo rhuba n’obo borhere “bw’ilehe l’iroho litagatifu?” (Gal. 5:22, 23) Erhi rhwakalola ekandalala kirhu, rhwanahikira aha rhwahugûkwa kanga kahi rhulug’iyabirwamwo okucihasha.

Omuntu ocihasha arhajira ebintu omu burhe. Lubero n’oko, analabirize enderho zage n’ebijiro byage erhi bisimisize Nnamahanga.

Yezu arhuyeresire okucihasha kw’okuderhagurhi. Ebibliya edesire ntya: “Erhi ajacirwa, arhashuzagya kanwa. Erhi alibûka, nalyo arhaderahaga kanwa, cikwone acîhira omu maboko ga Nnamahanga otwa emanja n’obushinganyanya.” (1 Pet. 2:23) Yezu akag’iyerekana okucihasha erhi abashombanyi bage bakamugayaguzize erhi kumugayisa. (Mat. 27:39-44) Ayerekine okucihasha erhi abakulu b’amadîni bamudosa madoso manji mpu lya babona gurhi bamugwarha cinwa. (Mat. 22:15-22) Yezu ayerekine olwiganyo lw’okucihasha ensiku zoshi. Kwa lwiganyo, lusiku luguma Abayahudi barhologola amabuye oku bakola bamubasa, ‘cikone Yezu acîfulika arhenga omu hekalu.’​—Yowane 8:57-59.

Ka rhwanayiga olwiganyo lwa Yezu? Neci rhwanamuyiga, cikone hali ebi rhukwanine okujira lyo rhukacihasha. Entumwa Petro yayandika erhi: “Kristu alibuzibwe erhi mwe murhuma, ammusigîre olwiganyo mpu mushimbe enshando zage.” (1 Pet. 2:21) Ciru akaba rhurhaba bimana, rhwanahash’iyiga olwiganyo lwa Yezu lw’okucihasha. Bulya gurhi kuli kwa bulagirire okujira ntyo?

Kuli kwa bulagirire okucihasha lyo rhuyemerwa na Yehova. Ciru akaba hamagera myaka minji rhuli rhwakolera Yehova, rhwanaheze obwîra bwirhu haguma na Yehova erhi akaba rhurhakubwiri ebijiro n’enderho zirhu.

Rhuganirirage olwiganyo lwa Musa, muntu wâli “mutûdu bwenene, nta muntu wâli akage okw’igulu.” (Mib. 12:3) Kanji-kanji, Musa akag’iyumvirhiza n’okulembera aba Israheli. Cikone, lushiku luguma aheza oborhere bwage bw’okucihasha. Musa agaya bwenene erhi aba Israheli barhangira baciduduma erhi kubula amishi gw’okunywa kurhuma. Omu bukali n’omu burhe bunene, abwîra olubaga ntya: “Ebi bigamba! Karhumurhengeze amishi mw’er’ibuye?”​—Mib. 20:2-11.

Musa ayabirwa bwacihasha. Arhahaga Yehova obukuze okubona ye wamuhashisagya okujira eco cisomerine c’okuha aba Israheli amishi. (Enna. 106:32, 33) Yehova arhacimuyemereraga aja omu Cihugo c’Amalaganyo. (Mib. 20:12) Musa agendekera aciyunjuza okubona abulaga bucihasha, agendekera aciyunjuza akalamo kage koshi.​—Lush. 3:23-27.

Isomo lici rhwakakula muli ebyo byahikiraga Musa? Ciru akaba rhugwerhe myaka minji omw’ikubuliro lya Yehova, rhurhakwanini rhukaderha buzira inyohola mpu bulya muntu mulebe anarhushuzize kubi. (Efez. 4:32; Kol. 3:12) Erhi omuntu akula, binakaba bizibu okulembera kanga kaguma na kaguma. Cikone kuli kwinja okukengera olwiganyo lwa Musa. Rhurhalonzizi rhuheze obwîra bwirhu haguma na Yehova erhi kurhaba bakucihasha kurhuma. Gurhi rhwakajira lyo rhuba n’obo borhere bwinja bw’okucihasha?

Oshenge Yehova aguhe iroho litagatifu. Bulya gurhi gurhi kuli kwa bulagirire? Bulya okucihasha ciba cigabi c’ilehe l’iroho litagatifu lya Nnamahanga. Yehova anahe abakozi bage bamuhunyire iroho litagatifu. (Luka 11:13) Kugerera iroho lyage litagatifu, Yehova anarhurhabala rhube ilehe ly’okucihasha. (Flp. 4:13) Anahikira ciru aha arhurhabala rhube n’ebindi bigabi b’ilehe l’iroho litagatifu. Kwa lwiganyo: Obuzigire, bwanarhurhabala rhukaba bakucihasha.​—1 Kor. 13:5.

Oyake ngasi kantu kakarhuma waheza oborhere bw’okucihasha. Kwa lwiganyo oyake esite zoshi z’e Enternete n’okucishagalulu kwakarhuma waba n’olugenzi lubi. (Efez. 5:3, 4) Kw’okuderha oku rhushinganine rhuyake ngasi kantu kakarhuma rhwajira ebintu bibi. (Mig. 22:3;  1 Kor. 6:12) Kwa lwiganyo, omuntu wâl’igwerhe enkomedu y’okujira eby’enshonyi anahikira aha ahiga oku arhakacisoma ebitabu erhi kulola efilime ziganirire eby’enshonyi.

Hali amango rhwakarhanya mpu kuli kuzibu okukolesa er’ihano. Cikone erhi rhwakacihangana, Yehova anarhuha emisi rhulagirirekwo lyo rhukacihasha. (2 Pet. 1:5-8) Arhurhabala rhukahasha entanya zirhu, enderho zirhu n’ebijiro birhu. Aka Paul na Marco, rhushinganine rhuciyigirize okurhajira kantu koshi-koshi rhunali omu burhe. Rhurhanye oku lwiganyo lwa mwene wirhu ojira akazi kw’obushoferi wal’igwerhe amazibu gw’okurhacihasha omu kuba wahidali haguma n’abandi bashoferi. Gurhi ajijire ly’ahima ako kanga? “Nakag’isalira bwenene ngasi lusiku n’okusoma omu bitabu birhu ebigabi baiganirire oborhere bw’okucihasha, n’okubika omw’irhwe amandiko gakantabala. Nancikengeze ngasi lusiku oku hali akanga nshinganine mpulikemwo. Nancihangane ncirheganye embere z’akasanzi lyo ndek’icerwa akazi, bulya oko kwananderhera amazibu gw’obula bucihasha.”

Hali akanga kakarhuma rhwayabirwa n’okuba n’ilehe ly’okucihasha. Mw’ako kanga rhwanayumva enshonyi z’okushenga Yehova kugerera isala. Cikone, ciru byakaba ntyo, rhwanashenga Yehova duba-duba arhurhabale. Omuhûne obonjo, olonze oburhabale bwage onahige okurhacijira ako kantu karhumaga waheza oborhere bwawe bw’okucihasha. (Enna. 51:9-11) Yehova arhabule kuyumvirhiza isala lyawe ly’okuhûna obonjo. (Enna. 102:17) Entumwa Yowane erhukengezize oku omuko gwa Yezu ‘gwanarhucesa, gushuke ebyaha birhu.’ (1 Yowane 1:7; 2:1; Enna. 86:5) Okengere oku Yehova abwizire abakozi bage oku bakababalirana ngasi mango. Rhwanalangalira oku ntyo kwo Yehova naye anarhujirira.​—Mat. 18:21, 22; Kol. 3:13.

Yehova agayire erhi Musa abula bucihasha, cikone amubabalire. Ciru akanwa ka Nnamahanga kadesire oku Musa al’imwishwekerezi kuli Yehova n’oku rhushinganine rhumuyige. (Lush. 34:10; Habr. 11:24-28) Yehova arhayemereraga Musa aja omu Cihugo c’Amalaganyo, cikone ayish’iyemera aje omw’igulu lihyahya n’okumuha obulyo bw’okulama ensiku n’amango omu Paradizo. Rhwayish’ishagalukira ako kalamo haguma naye erhi rhwacihangana rhukaba n’oborhere bw’okucihasha.​—1 Kor. 9:25.