1. Gurhi obuzigire Nnamahanga akujirako burhuma waciyumva?

YOWANE ayandika oku “Nyamuzinda aba buzigire.” (1 Yn. 4:8) Ezo nderho nsungunu z’obwalagale zirhukengezize oku okuli kw’obulagirire: Nnamahanga ye nshôko y’obuzine kandi ye onaba nshôko y’obuzigire. Yehova aba arhuzigire! N’obuzigire arhujirako bunarhume rhwaba n’omurhula, obushagaluke, na kandi bunarhume rhwaciyumva rhurhimusirwe.

2. Nk’oku biyerekinwe omu Mateyo 22:37-40, amarhegeko abirhi makulu gwo gahi, na bulya gurhi hali amango rhuba n’amazibu gw’okukenga elya kabirhi?

² Abakristu barhakaderha oku banayerekana obuzigire erhi nanga. Okuyerekana obuzigire liri irhegeko. (Osome Mateyo 22:37-40.) Erhi rhumanya Yehova bwinja, rhunabone kuli kulembu okukenga irhegeko lya burhanzi. Kobinali Yehova aba mwimâna; oku arhukolera kunayerekane oku aba mutûdu n’oku aba arhushibirire. Cikone hali amango kuba kuzibu okukenga irhegeko lya kabirhi. Bulya gurhi? Bulya bene wirhu na bali birhu​—nka baguma bw’omu balungu birhu—​barhaba bimâna. Co cirhuma hali amango baderha erhi kujira ebintu rhwehe rhubwîne oku birhashinganini erhi bibî. Yehova al’imayire oku bulya rhurhali bimâna rhwanabuganana n’ago mazibu, co carhumaga alongoza bandisi baguma baguma b’Ebibliya oku bayandike amahano gago-gago gayerekine gurhi na bulya gurhi rhwakayerekana obuzigire kuli rhwene na nnene. Yowane ali muguma muli bo.​—1 Yn. 3:11, 12.

3. Bici Yowane asegîze?

³ Omu bitabu Yowane ayandikâga, asegeza oku Abakristu bw’okuli bashinganine bayerekane obuzigire. Omu nganîro ajijire lugenda akalamo ka Yezu, aganirire obuzigire kanji bwenene kulusha abandi basharhu bayandikâga ebitabu by’e Injili.  Yowane agwerhe nkaba hofi myaka igana erhi ayandika e Injili ehamagalya okw’izino lyage n’amaruba asharhu gahamagalwa okw’izino lyage. Ebyo bitabu byalongazibâgwa n’iroho litagatifu, biyerekine oku obuzigire bukwanine bushumye ngasi cijiro c’Omukristu. (1 Yn. 4:10, 11) Cikone, hagezîre kasanzi kanji lyo Yowane aciyigiriza ntyo.

4. Ka Yowane akag’iyerekana obuzigire ngasi mango?

⁴ Erhi Yowane âli musole, arhakag’iyerekana obuzigire ngasi mango. Kwa lwiganyo, mango maguma erhi Yezu n’abanafunzi bage bali omu mubalamo gw’okuja e Yeruzalemu bagerera omu Samariya. Abantu b’omu lugo luguma lw’e Samariya barhabayegerezagya. Gurhi Yowane ajijîre? Adosa Yezu nk’alonzize bashenge omuliro gumanuke emalunga gusingonole abantu ba mw’olo lugo! (Lk. 9:52-56) Kandi agandi mango, Yowane ayabirwa okuyeresa ezindi ntumwa obuzigire. Ye n’omulumuna Yakobo nkaba bashumya nnina oku ajibasengerera emunda Yezu ali ly’ayishibahira omu nafasi elengerire omu Bwami bwage. Erhi ezindi ntumwa ziyumva ntyo bakunira bwenene! (Mt. 20:20, 21, 24) Cikone Yezu agendekera arhonya Yowane ciru akaba ali gwerhe obo buzamba.​—Yn. 21:7.

5. Bici rhwaganirira mw’eci cigabi?

⁵ Mw’eci cigabi, rhwaganirira olwiganyo lwa Yowane n’ebi ayandisîre lugenda obuzigire. Okujira ntyo, kwarhurhabala rhuhugûkwe gurhi rhwakakayerekamwo bene wirhu na bali birhu obuzigire. Na kandi rhwayiga njira nguma y’obulagirire ishe w’omulala akayerekanamwo oku azigire omulala gwage.

6. Gurhi Yehova ayerekînemwo oku aba arhuzigire?

⁶ Rhunakarhanya mpu okuyerekana obuzigire kuli kubwîra omuntu enderho nyinja z’okumusimisa. Cikone ebijiro birhu nabyo byanayerekana oku kobinali rhumuzigire. (Oshushanye na Yakobo 2:17, 26.) Kwa lwiganyo, Yehova aba arhuzigire. (1 Yn. 4:19) Anakolese enderho nyinja ziba omu Bibliya ly’arhuyereka oku aba arhuzigire. (Enna. 25:10; Rm. 8:38, 39) Co cirhumire, rhuba rhuyemire oku Nnamahanga aba arhuzigire arhali kugerera enderho zone ci na kugerera ebijiro byage. Yowane ayandika ntya: “Obuzigire bwa Nyamuzinda kuli rhwe bwamanyikine erhi Nyamuzinda arhuma Omugala cusha en’igulu mpu arhuhe akalamo.” (1 Yn. 4:9) Yehova ayemera Omugala alibuzibwe na buzinda afê erhi rhwe rhurhuma. (Yn. 3:16) Ka kobinali rhwanaba n’akarhinda oku Yehova arhaba arhuzigire?

7. Gurhi Yezu ajijire kwayerekine oku aba arhuzigire?

⁷ Yezu akag’ibwîra abanafunzi bage n’obwalagale oku aba abazigire. (Yn. 13:1; 15:15)  Ayerekana kunganaci aba abazigire arhali kugerera oku nderho zone cikone n’okubijiro. Aderha ntya: “Ntaye wankajira abuzigire bulushire okuhâna obuzine abira bage barhumire.” (Yn. 15:13) Gurhi okurhanya kw’ebi Yehova na Yezu barhujirîre, kwakarhushumya okujira?

8. Bici olwandiko lwa 1 Yowane 3:18 ludesire rhushinganine okujira?

⁸ Rhunayerekane oku rhuzigire Yehova na Yezu omu kubarhumikira. (Yn. 14:15; 1 Yn. 5:3) Na Yezu arhurhegesire oku rhukazigirana rhwene na nnene. (Yn. 13:34, 35) Rhurhashinganini rhukabwîra bene wirhu na bali birhu oku rhubazigire kone, cikone rhushinganine rhubayereke oku rhubazigire kugerera ebijiro birhu. (Osome 1 Yowane 3:18.) Bintu bici rhwakajira lyo rhuyerekana oku rhuzigire bene wirhu na bali birhu?

9. Bici obuzigire bwashumize Yowane ajire?

⁹ Yowane akadesire oku acibêrera omu mukolo gwage gw’okuduba ensamaki ishe akag’ijira. Cikone lubero n’okujira ntyo, ageza akalamo kage koshi omu kurhabala abandi bamanye okuli lugenda Yehova na Yezu. Akalamo Yowane acishogâga karhabaga kalembu. Bamulibuza, n’oku buzinda bw’emyaka igana mirhanzi bamubungisa erhi anakola mushosi. (Ebj. 3:1; 4:1-3; 5:18; Maf. 1:9) Yowane arhalekâga okuzigira bene wabo, ciru n’amango bamushwekâga mpu bulya ali ahâna obuhamirizi lugenda Yezu. Kwa lwiganyo, erhi alimushwekere oku cirhwa c’e Patimosi, ayandikira ebigamba amafulûlo bamuhâga lyo bamanya “ebiri hofi bibê.” (Maf. 1:1) Nkaba erhi bamushwekula, gwo mango ayandikâga e Injili yage eganirire akalamo n’omukolo gwa Yezu. Na kandi ayandika maruba asharhu ly’azibuhya n’okuhâ bene wabo na bali babo omurhima. Gurhi rhwakayiga olo lwiganyo lwa Yowane lw’okucihâna?

10. Gurhi wakayerekanamwo oku oba ozigire abantu?

¹⁰ Emihigo orhôla omu kalamo yanayerekana oku oba ozigire abantu. Igulu lya Shetani lyanalonza mpu akasanzi kawe koshi n’emisi yawe yoshi oshinganine oyikolese omu kulonza ensaranga n’okumanyikana. Lubero n’oko abahubiri bw’Obwami omw’igulu lyoshi banayerekane iroho ly’okucihâna; banakajira oku bakanahasha lyo bageza akasanzi kabo omu kuyaliza omwanzi mwinja n’okurhabala abandi bayegere Yehova. Ciru na baguma baguma banacihâne omu mukolo gw’okuyaliza n’okuyigiriza akasanzi koshi.

11. Gurhi bahubiri banji bishwekerezi bayerekanamwo oku bazigire Yehova na bene wirhu na bali birhu?

¹¹ Bakristu banji bishwekerezi bahikira aha bakola bwenene lyo bahikiriza amalagirire gabo n’ag’omulala gwabo. Cikone ciru akaba ntyo, abo bene wirhu bishwekerezi banalunge ikubuliro lya Yehova okuboko omu njira bakanahasha. Kwa lwiganyo, baguma ba mulibo banahâne oburhabale omu kasanzi k’obuhanya, abandi banacihâne omu mukolo gw’obubasi, na ngasi muntu anahâna ensaranga zage ly’alunga okuboko omukolo gw’omw’igulu lyoshi. Banajire ebyo byoshi bulya bazigire Nnamahanga n’omulungu wabo. Rhunayerekane oku rhuzigire bene wirhu na bali birhu omu kuja oku ntimanano y’ecigamba ngasi mugobe n’okuhâna amashuzo. Co cirhuma, ciru rhwakaba rhwarhamire n’emikolo yirhu rhunaciseze okuja oku ntimanano. Na kandi ciru akaba rhugwerhe ebintu birhubulisize omurhula, rhunacihangane rhuhâne amashuzo omu ntimanano. Rhunacihangane rhuhânane omurhima embere n’enyuma z’entimanano, ciru akaba hali amango bihikira aha ngasi muguma wirhu agwerhe amazibu gamulibuzize.  (Hb. 10:24, 25) Rhunashagalukire bwenene emikolo bene wirhu na bali birhu bahikiriza!

12. Yindi njira ehi Yowane ayerekinemwo oku azigire bene wabo na bali babo?

¹² Arhali omu kubavuga omunkwa mwone Yowane ayerekine oku azigire bene wabo na bali babo, cikone akabahâ n’amahano. Kwa lwiganyo, omu maruba ayandikâga, avuga bene wabo na bali babo omunkwa oku buyemere n’ebijiro binja bakag’ijira, cikone abahâ n’amahano gw’obwalagale lugenda ecaha. (1 Yn. 1:8–2:1, 13, 14) Ko n’oko, nirhu rhushinganine rhukavuga bene wirhu na bali birhu omunkwa oku bintu bali bahikiriza. Cikone, erhi rhwakabona mwene wirhu erhi mwali wirhu akola agwerhe olugenzi lubî erhi ntanya mbî, rhwanamuyereka oku rhumuzigire omu kumuhâ amahano alagirirekwo. Biba bihûnyire oburhwali ly’omuntu ahanula omwîra wage, cikone Ebibliya edesire oku abîra binja kurhyaza barhyazanya, erhi kuhânana amahano bone na nnene.​—Mig. 27:17.

13. Bici rhushinganine rhuyake okujira?

¹³ Hali amango rhuhikira aha rhwayereka bene wirhu na bali birhu obuzigire kugerera kw’ebi rhurhakwanini okujira. Kwa lwiganyo, rhurhashinganini okugaya duba-duba enyanya z’ebi badesire. Rhurhanye oku bintu byajirikanâga oku buzinda bw’akalamo ka Yezu hanw’igulu. Abwîra abanafunzi bage oku lyo babà n’obuzine bashinganine balye omubiri gwage n’okunywa omuko gwage. (Yn. 6:53-57) Banji omu banafunzi bage erhi bayumva ntyo bagaya bwenene banagenda, cikone Yowane n’abandi bîra bage b’okunali bohe barhagendaga, babêra bishwekerezi kuli ye. Nabo basomerwa n’oko, barhahugûkagwa ho n’aho ebyo Yezu ababwîzire. Cikone bulya bâli bîra bishwekerezi ba Yezu bohe barhacidudumaga mpu byo bici ebyo amaderha. Ahali rh’okujira ntyo bagendekera bamulangalira, bulya balimanyire oku adesire okuli. (Yn. 6:60, 66-69) Kuli kwa bulagirire okurhakagaya duba-duba n’ebi abîra birhu badesîre! Ahali hw’okujira ntyo, rhwanalonza obulyo bw’okuganira nabo lyo rhumanya bici balonzagya okuderha.​—Mig. 18:13; Muh. 7:9.

14. Bulya gurhi rhurhashinganini rhuleke enshombo emere omu mirhima yirhu?

¹⁴ Kandi Yowane arhuyinginga oku rhurhakag’ishomba bene wirhu na bali birhu. Erhi rhwakabula bukenga er’ihano, rhwanahikira aha rhwaja mw’entanya z’ecishetani. (1 Yn. 2:11; 3:15) Oko kwahikire bantu baguma na  baguma bw’omu myaka igana mirhanzi muli Kano Kasanzi Kirhu (K.K.K.). Shetani ajira okwage koshi ly’ahira enshombo n’okuberûluka omu bakozi ba Nnamahanga. Omu kasanzi Yowane ayandikâga amaruba gage, abantu balikola bagwerhe ezo ntanya z’ecishetani baja bunyi-bunyi omu cigamba c’Ecikristu. Kwa lwiganyo, Diyotrefi akalonza okulerha omulyagane omu cigamba ciguma câli mw’ako kasanzi. (3 Yn. 9, 10) Arhakag’ikenga abakag’irhumwa n’embaraza eri yalongaza ya mw’ako kasanzi. Akalonza ciru n’okutenga abakag’ilonza okubayegereza. Obwo bwali bucibone bwenene! Na kandi mwakano kasanzi kirhu, Shetani anakalonza okuberula erhi kuhira omulyagane omu bakozi ba Nnamahanga. Irhondo rhurhahira rhukaleka enshombo yarhulerha mw’omulyagane erhi kurhulerhera emberûluka.

15. Bici ishe w’omulala ashinganine akengere?

¹⁵ Enjira nguma y’obulagirire ishe w’omulala ayerekanamwo oku azigire omulala gwage kuba kushibirira amalagirire gabo gw’omubiri. (1 Tm. 5:8) Cikone ashinganine akengere oku ebintu by’omubiri birhakarhimusa amalagirire g’ekiroho g’abantu bw’omu mulala gwage. (Mt. 5:3) Okengere olwiganyo lwinja Yezu ahirireho b’ishe w’omulala. Nk’oku biyerekinwe omu Injili ya Yowane, Yezu agendekire arhanya oku malagirire g’abantu bw’omulala gwage erhi anali oku murhi gw’amalumwa. Yowane na Mariya nnina wa Yezu, bâliyimanzire aha Yezu anigiragwa. Ciru akaba Yezu ali omu malumwa manji, ajira okwage koshi lyo Yowane ashibirira Mariya. (Yn. 19:26, 27) Kobinali Yezu agwerhe abalumuna bakashibirire amalagirire gw’omubiri ga nnina, cikone bibonekine oku mw’ako kasanzi nta muguma mulibo wâliciba mwanafunzi wage. Co carhumaga Yezu alonza owakashibirira amalagirire ga nnina g’omubiri n’ag’ekiroho.

16. Mukolo guhi munene Yowane agwerhe?

¹⁶ Yowane agwerhe mukolo munene bwenene. Bulya ali muguma w’omu ntumwa za Yezu, alishinganine ajire omukolo gw’amahubiri n’obushiru. Byanahashikana nkaba aligwerhe omulala, byalihûnyire abe n’olugero lyahikiriza amalagirire gw’omubiri n’ag’ekiroho gw’omulala gwage. (1 Kr. 9:5) Ene isomo lihi b’ishe w’omulala bakakula aho?

17. Bulya gurhi kuli kwa bulagirire ishe w’omulala ashibirire amalagirire g’ekiroho gw’omulala gwage?

¹⁷ Mwene wirhu oli ishe w’omulala anaba agwerhe eyindi mikolo minji mizibu. Kwa lwiganyo,  akwanine abe wakukola omukolo gwage n’obushiru ly’olugenzi lwage luyerekana oku ali muhamirizi wa Yehova. (Ef. 6:5, 6; Tt. 2:9, 10) Na kandi anaba na mukolo mulebe omu cigamba, nk’okuba mugula n’okulongoza abandi omu mukolo gw’amahubiri. Na ciru akaba agwerhe eyo mikolo, kuli kwa bulagirire akayiga Ebibliya haguma na mukage n’abana bage. Abantu bw’omulala gwage banashagalukira obushiru ali ajira omu kushibirira amalagirire gabo gw’omubiri, ag’ekiroho n’ag’ekandalala.​—Ef. 5:28, 29; 6:4.

18. Bici Yowane aliyemire n’obwalagale?

¹⁸ Yowane alamîre nsiku nyinji, na mw’ezo nsiku z’akalamo kage abwîne bintu binji. Alwisa bintu binji byakarhumire obuyemere bwage bwarha. Cikone ajira okwage koshi ly’agendekera ashimba amarhegeko ga Yezu, kwa lwiganyo irhegeko ly’okuzigira bene wabo na bali babo. Co carhumîre, Yowane al’imanyire oku Yehova na Yezu bamuzigire na ntyo bagendekera bamuhâ emisi y’okulembera ngasi mazibu. (Yn. 14:15-17; 15:9, 10; 1 Yn. 4:16) Ntabyo Shetani n’igulu lyage bakajijire byakahanzize Yowane okurharhanya oku buzigire n’okubuyerekana.

19. Bici olwandiko lwa 1 Yowane 4:7 lurhuhire omurhima rhujire, na bulya gurhi?

¹⁹ Aka Yowane, nirhu rhulamire omw’igulu lirhegesirwe na Shetani, nnamahanga orhazigira muntu yeshi-yeshi. (1 Yn. 3:1, 10) Ciru ankaba aba alonzize mpu rhushombe bene wirhu na bali birhu, arhankahash’irhuhanza nka rhurhalonzizi okujira ntyo. Rhushinganine rhuhige okugendekera kwazigira bene wirhu na bali birhu kugerera enderho zirhu n’ebijiro birhu. Na ntyo rhwanagendekera rhwaba n’omwishingo gw’okuba muguma w’omu mulala gwa Yehova na kandi rhwanaba n’omwishingo omu kalamo.​—Osome 1 Yowane 4:7.