1. Gurhi ehotuba yajiragwa omu mwaka gwa 1935 yarhabîre musole muguma?

MUSOLE muguma gwagwerhe myaka 18 erhi gubatizibwa omu mwaka gwa 1926. Ababusi bage bali Banafunzi b’Ebibliya, izino Abahamirizi ba Yehova bakagihamagalwako mw’ago mango. Abo babusi bagwêrhe banarhabana basharhu na bananyere babirhi, babalera omu njira esimisize Nnamahanga n’omu kulonza okuyiga Yezu Kristu. Nk’oku Abanafunzi boshi b’Ebibliya bakagijira ago mango, ogo musole mwishwekerezi gwakag’ilya omugati n’okunywa idivayi ngasi mwaka olusiku lw’okujira Ishega ly’Ebijingo lya Nnawirhu. Cikoki, obulangalire bwage okubiyerekire amango gayisha bwashanja kugerera ehotuba y’obulagirire bwenene yagwerhe ecirwe cidesire ntya: “Ehitû hy’Abantu.” Eyo hotuba yajiragwa na Joseph Franklin Rutherford omu mwaka gwa 1935 oku ntimanano nkulu yajiriragwa e Washington, D.C., omu États-Unis. Bici byamanyikine bwinja kw’eyo ntimanano?

2. Okuli kuhi kwamanyikîne bwinja kugerera ehotuba ya Mwene wirhu Rutherford?

² Omu hotuba yage, Mwene wirhu Rutherford ayerekana bwinja-bwinja bandi bo bali bw’omu “amagana g’abantu” (King James Version), erhi “ehitû hy’abantu” baganirirwe omu lwandiko lwa Amafulûlo 7:9. Embere z’eyo ntimanano, eco cikundi calimanyikine nka cikundi cakabirhi c’abantu bay’ishija empingu cikone bohe barhali bishwekerezi bwenene. Mwene wirhu Rutherford akolesa Amandiko ly’ahugûla bwinja oku abantu b’ehitû hisungunu Nnamahanga arhacishogagabo mpu baj’ilama  empingu cikoki bâli bw’omu ebindi bibuzi * bya Kristu byayish’ifulumuka “amalibuko madârhi” n’okulama ensiku n’amango hanw’igulu. (Maf. 7:14) Yezu alaganyize ntya: “Ngwerhe ebindi bibuzi birhali muno lugo; nabyo kukwanine mbilerhe, byayumva izu lyani, na ntyo habe buso buguma na lungere muguma.” (Yn. 10:16) Ebyo bibuzi bali Bahamirizi ba Yehova bagwerhe obulangalire bw’okulama ensiku n’amango omu Paradizo hanw’igulu. (Mt. 25:31-33, 46) Rhulolage gurhi okumanya ntyo kwashanjire akalamo k’Abahamirizi ba Yehova banji, ciru n’olya mwene wirhu wagwerhe myaka 18 rhwaganiriraga.​—Enna. 97:11; Mig. 4:18.

3-4. Oku ntimanano nkulu yajiragwa omu mwaka gwa 1935, bici ebihumbi by’abantu bahugûsirwe lugenda obulangalire bwabo, na bulya gurhi?

³ Akasanzi k’obushagaluke bwenene kw’eyo ntimanano nkulu kahika erhi owajaga wageza ehotuba adosa abali kw’eyo ntimanano ntya: “Ka balya boshi bagwerhe obulangalire bw’okulama hanw’igulu emyaka n’emyaka banayimuka?” Mwene wirhu muguma wali aho adesire oku kulusha ecihimbi c’abantu 20 000 bali aho bayimanga. Buzinda Mwene wirhu Rutherford aderha ntya: “Mulole! Ehitu hy’abantu!” Erhi aderha ntyo abantu boshi bakoma akagasha bashagaluka bwenene. Abayimukâga bahûgukwa oku Nnamahanga arhacishogagabo oku bajilama empingu. Bâlimanyire oku barhasagishîgwa amavurha n’iroho litagatifu lya Nnamahanga. Olusiku lwakuliraga lw’eyo ntimanano, bantu 840 babatizibwa n’okuba Bahamirizi ba Yehova, banji ba mulibo bâli bw’omu ebindi bibuzi.

⁴ Enyuma z’eyo hotuba, gulya musole rhwaganiriraga omu bifungo biri embere n’ebindi bihumbi by’abantu baleka okulya omugati n’okunywa idivayi omu kasanzi kw’Ishega ly’Ebijingo lya Nnawirhu. Mwene wirhu muguma ayerekana gurhi bantu banji bakagiciyumva, aderha ntya n’obwirhohye boshi: “Omu mwaka gwa 1935 bwo bwâli buzinda nalya omugati n’okunywa idivayi. Nahugûkwa oku kugerera iroho lyage litagatifu, Yehova arhampaga obulangalire bw’okuyishija empingu. Obulangalire bwani buli bwakuyish’ilama hanw’igulu emyaka n’emyaka n’okulijira paradizo.” (Rm. 8:16, 17; 2 Kr. 1:21, 22) Kurhangira ago mango, ehitû hy’abantu higendekire hyayushuka n’okukola haguma n’Abakristu bashîge amavurha bacisigire hanw’igulu. *

5. Gurhi Yehova abona abantu balesîre okulya omugati n’okunywa idivayi oku lusiku lw’Okukengera olufû lwa Yezu?

⁵ Enyuma z’omwaka gwa 1935, gurhi Yehova abwîne abantu balekâga okulya omugati n’okunywa idivayi oku lusiku lw’Okukengera olufû lwa Yezu? Na gurhi abona Omuhamirizi wage olya omugati n’okunywa idivayi omu kasanzi kw’Ishega ly’Ebijingo lya Nnawirhu, buzinda ayishiciyumva kobinali oku arhali mushîge amavurha? (1 Kr. 11:28) Bantu baguma na baguma balîre omugati enyanya z’okurhahugûkwa obulangalire bwabo. Cikone erhi bakahugûkwa n’obwirhohye boshi oku kobinali bajijire amagosa, baleke okulya omugati n’okunywa idivayi, banagendekera bakolera Yehova n’obwishwekerezi, anayishibangajira omu bantu b’ebindi bibuzi. Ciru akaba barhalye omugati erhi kunywa idivayi, banakaja oku lusiku lw’Okukengera olufû lwa Yezu lyo bayereka  Yehova na Yezu oku bashagalukire ebi babajirirâga.

6. Bici Yezu arhegesîre bamalahika bajire?

⁶ Okubona rhuyegerire amalibuko madârhi, kuli kwa bulagirire rhucibiganirira ebindi bintu bidesirwe omu Amafulûlo cigabi ca 7 lugenda abashîge amavurha n’ehitû hy’abantu hy’ebindi bibuzi. Yezu arhegesire bamalahika bashweke empusi ini z’obushereze. Banàlike ezo mpuzi kuhika omushîge amavurha muzinda ahirwe kw’ecimanyiso erhi ayemererwe na Yehova. (Maf. 7:1-4) Enyanya z’obwishwekerezi bwabo, banabahêmbe omu kubajira bami na badâhwa haguma na Kristu omu mpingu. (Maf. 20:6) Abali omu mulala gwa Nnamahanga gw’empingu boshi, bali balindirira bwenene okuyish’ibona aha ngasi muguma w’omu 144 000 ahâbwa oluhêmbo lwage.

7. Nk’oku biyerekinwe omu lwandiko lwa Amafulûlo 7:9, 10, bandi Yowane abwîne, na bici bakag’ijira? (Olole enfoto eri oku cijalada.)

⁷ Yowane enyuma z’okuderha okubiyerekire abo bantu 144 000 bayish’iba bami na badâhwa, abona akandi kantu kw’okushagalula bwenene. Abona “ehitû hy’abantu” bacunguka ivita lya Armagedoni. Lubero n’ecigusho c’abantu ca burhangiriza, abo ba kabirhi bâli banji bwenene, mubalè gurhakaganjwa. (Osome Amafulûlo 7:9, 10.) Abona ‘bayambirhe emyambalo myeru,’ oko kwo kuyerekana oku barhacihirâgako “izabyo” lyoshi-lyoshi lya mw’er’igulu lya Shetani banabêra bishwekerezi kuli Nnamahanga na Kristu. (Yk. 1:27) Bali bayakuza oku bacungwîrwe kugerera ebi Yehova na Yezu erhi Omwana-buzi babajirire. Kandi, bali fumbîrhe amashami g’ibo omu nfune zabo, kuyerekana oku bayemire n’omwishingo goshi oku Yezu ye Mwami wacagulagwa na Yehova.​—Oshushanye na Yowane 12:12, 13.

8. Bici olwandiko lwa Amafulûlo 7:11, 12 ludesire lugenda abali omu mpingu?

⁸ Osome Amafulûlo 7:11, 12. Gurhi abali omu mpingu nabo baciyumvirhe erhi babona ehitû hy’abantu? Yowane adesire oku abali omu mpingu boshi bacishinga bwenene banaha Nnamahanga obukûze erhi ehyo hitû hy’abantu hibonekana. Abali omu mpingu boshi bayish’icishinga bwenene hano eco cibonekerezi cihikirira amango ehyo hitû hy’abantu hyacunguka amalibuko madârhi.

9. Nk’oku biyerekinwe omu olwandiko lwa Amafulûlo 7:13-15, bici ehitû hy’abantu baganirirwe omo bali bajira ene?

⁹ Osome Amafulûlo 7:13-15. Yowane adesire oku ehyo hitû hy’abantu barhakaganjwa “bashusire emyambalo yabo banayiyeruhiza omu muko gw’Omwana-buzi.” Oko kw’okuderha oku bagwerhe ezamiri nyinja na Yehova abashagalukire. (Iz. 1:18) Bali Bakristu bacihânyire emwa Yehova banabatizibwe, bagwerhe obuyemere busêzire omu ngombôlo Yezu ahânaga na kandi bagwerhe n’obwîra bwinja haguma na Yehova. (Yn. 3:36; 1 Pt. 3:21) Na ntyo bayerekana oku bashinganine okuyimanga embere z’entebe ya Nyamuzinda lyo “bamukolera mûshi na budufu” omu hekalu yage y’ekiroho. Ene, bali bayerekane obushirhu bunji n’okuhikiriza omukolo munji omu kuhubiri Obwami n’okujira abanafunzi bulya bali bahira Obwami bwa Nnamahanga oku nafasi ntanzi omu kalamo kabo.​—Mt. 6:33; 24:14; 28:19, 20.

10. Bici ehitû hy’abantu bayemire n’obwalagale na ciragane cihi babona oku cahikirira?

¹⁰ Ehyo hitû hy’abantu bacunguka amalibuko madârhi bayemire n’obwalagale oku Nnamahanga agendekera abashibirira bulya “Otamire oku ntebe akola ayish’iyubaka ecihando cage ekarhi kabo.” Eci ciragane abantu b’ebindi bibuzi bali balindirira cahikirira: “[Nnamahanga] ahôrhola ngasi mulenge gubali omu masu: olufû ntalwo lwacihabê; emishîbo n’endûlù n’amababale birhakacihabâ bundi.”​—Maf. 21:3, 4.

11-12. (a) Migisho ehi olwandiko lwa Amafulûlo 7:16, 17 ludesire ehitû hy’abantu bayish’ihâbwa? (b) Bici abantu b’ebindi bibuzi bakajira olusiku lw’Okukengera olufû lwa Yezu, na bulya gurhi?

 ¹¹ Osome Amafulûlo 7:16, 17. Ene, bakozi banji ba Yehova bali balibuka bwenene n’ishali enyanya z’okubona nta nsaranga bagwerhe erhi enyanya z’ivita. Abandi bali bashwekwa enyanya z’obuyemere bwabo. Cikone, ab’omu hitû hy’abantu bashagalusire bwenene okubona oku hano er’igulu lisherezibwa babà na biryo binji by’omubiri n’eby’ekiroho. Hano igulu lya Shetani lisherezibwa, ehitû hy’abantu hyayish’iyegulwa n’e “hidûrhu” hy’oburhe Yehova ayishibulagira oku mashanja. Hano amalibuko madârhi gahwa, Yezu abâ lungere wabo abalongoze kuhika “ebw’iriba ly’amishi g’obuzîne [bw’ensiku n’amango].” Orhanye kw’obo bulangalire bwinja bwenene abo bantu bagwerhe. Omu miliyoni n’emiliyoni y’abantu balamîre hanw’igulu, bohe nkaba barhakacifâ!​—Yn. 11:26.

¹² Abantu b’omu bindi bibuzi bagwerhe obulangalire bwinja bwenene bwakarhuma bakavuga Yehova na Yezu omunkwa! Barhagwerhi obulangalire bw’okuyish’ilama empingu, cikone kurhali kuderha oku barhali babulagirire omu masu ga Yehova. Abashîge amavurha n’abantu b’omu bindi bibuzi boshi banavuga Nnamahanga na Kristu omunkwa. Enjira nguma bajiramwo ntyo kuba kuja okw’Ishega ly’Ebijingo lya Nnawirhu.

13-14. Bulya gurhi Abakristu boshi bakwanine okuja oku lusiku lw’Okukengera olufû lwa Yezu?

¹³ Omu myaka egezire, oku mubalè gwa bantu 1 000 bali oku lusiku lw’Okukengera olufû lwa Yezu, hofi muntu muguma yene olya omugati n’okunywa idivayi. Omu bigamba binji murhali omuntu olya omugati n’okunywa idivayi. Abantu banji baja oku lusiku lw’Okukengera olufû lwa Yezu bajira obulangalire bw’okulama hanw’igulu. Bulya gurhigi bacija okw’Ishega ly’Ebijingo lya Nnawirhu? Banakuje nka kula abantu baja oku buhya bw’omwîra wabo. Abantu banaje oku buhya lyo bayereka abajaga omu buhya oku babazigire banabalunzire okuboko. N’oko kwo kurhuma abantu bw’omu ebindi bibuzi baja oku lusiku lw’Okukengera olufû lwa Yezu lyo bayerekana oku bazigire Yezu banamulunzire okuboko n’oku balunzire okuboko abashîge amavurha. Abantu b’ebindi bibuzi banaje aho lyo bayerekana oku  bavuzire omunkwa kw’ebi Yezu abajirire, bulya eyo nterekêro ahânaga yo yash’ibahashisa okulama emyaka n’emyaka hanw’igulu.

¹⁴ Ecindi cirhuma abantu b’ebindi bibuzi baja oku lusiku lw’Okukengera olufû lwa Yezu kuba bulya balonzize okukenga irhegeko lya Yezu. Erhi Yezu arhondeza er’ishega lyago-lyago haguma n’entumwa zage, ababwîra ntya: “Mukâjira ntyo nka mwankengêra.” (1 Kr. 11:23-26, Mashi Bible) Co cirhumire, Abakristu b’ebindi bibuzi bagendekera bajira Ishega ly’Ebijingo lya Nnawirhu haguma n’abashîge amavurha baciri hanw’igulu. Abantu b’ebindi bibuzi banalalike ngasi muntu aje oku lusiku lw’Okukengera olufû lwa Yezu.

15. Gurhi ngasi muguma wirhu akakuza Nnamahanga na Yezu olusiku lw’Okukengera olufû lwa Yezu?

¹⁵ Olusiku lw’Okukengera olufû lwa Yezu, rhunabe n’obulyo bw’okuvuga Nnamahanga na Kristu omunkwa kugerera olwimbo n’isala. Ehotuba yajirwa olusiku lw’Okukengera olufû lwa Yezu mw’ogu mwaka edesire: “Shagalukira ebi Nnamahanga na Kristu Bakujirire!” Yayish’irhurhabala rhuyushule omunkwa gwirhu kuli ebi Yehova na Yezu barhujirire. Akasanzi kw’okugeza omugati n’idivayi, ngasi muguma wirhu anakengera ebi omugati n’idivayi bishushanyize​—omubiri n’omuko gwa Yezu. Na ntyo rhwanakengera oku Yehova ahânaga Omugala oku afê lyo rhuba n’obuzîne. (Mt. 20:28) Ngasi muntu ozigire Larha wirhu w’omu mpingu n’Omugala anaja oku lusiku lw’Okukengera olufû lwa Yezu.

16. Amu njira zihi Abakristu bashîge amavurha n’Abakristu b’omu bindi bibuzi babà bashushine?

¹⁶ Omu masu ga Nnamahanga harhaba olubero egarhi k’Abakristu bashîge amavurha n’ab’ebindi bibuzi, boshi babà bashushine, arhazigira aba bwenene kulusha abandi. Boshi babà babulagirire omu masu ga Yehova. Boshi abahânagako ngulo nguma, ahâna akalamo kw’Omugala muzigirwa Yezu ly’agula abashîge amavurha n’ab’ebindi bibuzi. Olubero luhaba lone kuli kubona oku ebyo bigusho bibirhi bijira obulangalire buli lubero. Cikone, boshi bashinganine babêre bishwekerezi kuli Nnamahanga na Kristu. (Enna. 31:23) Kandi, okengere oku iroho lya Nnamahanga lyanarhukolako rhweshi kuguma. Oko kuli kuderha oku Yehova anahê omuntu iroho lyage litagatifu nk’oku oyo muntu analilagirireko, abe w’omu bashîge amavurha erhi w’omu ebindi bibuzi.

17. Bici abashîge amavurha bacisigire hanw’igulu bali balindirira n’irala linene?

¹⁷ Abakristu bashîge amavurha barhaburhwa n’obulangalire bw’okuyish’ija empingu. Nnamahanga y’ehira obo bulangalire omu murhima gwabo. Banakarhanya oku bulangalire bwabo, banakasalira lugenda obo bulangalire, na kandi bananakalindirira okuhâbwa oluhêmbo lwabo empingu. Ciru barhanayishi gurhi omubiri gwabo gwayish’iyorha hano baja empingu. (Fl. 3:20, 21; 1 Yn. 3:2) Ciru ankaba ntyo, bali balindirira n’irala linene okuyish’ibona Yehova,  Yezu, bamalahika n’abandi bashîge amavurha. Bali balindirira n’irala linene okuja oku nafasi barheganyizibwe omu Bwami bwa Nnamahanga.

18. Bici Abakristu b’ebindi bibuzi bali balindirira?

¹⁸ Abakristu b’ebindi bibuzi babà bashagalukire obulangalire bw’okulama hanw’igulu emyaka n’emyaka, abantu boshi bajira eryo irala. (Muh. 3:11) Banakalindirira n’irala linene bwenene okuhika kw’amango gw’okuhindula igulu libe paradizo. Banacifinje olo lusiku luhike bayubake enyumpa zabo, bahinge amashwa n’okuburha abana bagwerhe amagala nkana. (Iz. 65:21-23) Bali balinda n’irala linene okuyish’ikalambagirira enafasi z’omw’igulu barhamanyiri nk’okulambagirira entondo, emizirhu, enyanja n’okuyiga binji oku bulemi bunji Yehova alemire. Kulusha ebyo byoshi, balangalire oku ako kasanzi obwîra bwabo haguma na Yehova bway’ishi kasêra bwenene ngasi lusiku.

19. Okukengera olufû lwa Yezu kunarhuhê obulyo bw’okujira bici, na mangaci rhwalukengera mw’ogu mwaka?

¹⁹ Yehova ahîre ngasi mukozi wage wacihânyire emwage obulangalire bwinja bw’akasanzi kayisha. (Yer. 29:11) Olusiku lw’Okukengera olufû lwa Kristu lunahê ngasi muguma wirhu obulyo bw’okuvuga Nnamahanga na Kristu omunkwa oku byoshi barhujirire lyo rhuyish’ilama ensiku n’amango. Okukengera olufû lwa Yezu yo ntimanano y’obulagirire bwene Abakristu bajira ngasi mwaka. Lwanajirwè lwa Kali Ndarhi nsiku 27/3/2021 bijingo enyuma ly’izuba okuzika. Banji bayish’ikengera olo lusiku lw’obulagirire erhi banagwerhe oluhûma lw’okujira entimanano omu cihugo cabo. Abandi bayish’ilukengera ciru ankaba bali bahagalikwa. Baguma baguma bayish’ilukengera erhi banali omu mpamikwa. Yehova, Yezu n’omulala gw’omu mpingu bayish’ilola oku ngasi cigamba, cigusho na ngasi muntu muguma-muguma bajira olo lusiku lwinja bwenene lw’Okukengera olufû lwa Yezu!