1. Aka Mwami Daudi, bici baguma ba muli rhwe bakahikira aha badosa?

RWESHI rhunacifinje okulama omu murhula rhunadekereri. Ntaye ozigira alame akalamo k’entanya za ngasi lusiku. Hali akasanzi ciru entanya zirhulugira bwenene. Ciru hali amango bakozi baguma baguma ba Yehova bamudosa nk’oku Daudi amudosagya: “Kuhika mangaci nahika narhanya, n’amaganya ga buca buyira?”​—Enna. 13:2, Mashi Bible.

2. Bici rhwaganirira mw’eci cigabi?

² Ciru akaba rhurhakahash’ilama akalamo kw’okurhaba n’entanya zoshi zoshi, rhwanajira okwirhu koshi lyo rhuhima ezo ntanya. Mw’eci cigabi rhwarhangiganirira bintu biguma na biguma birhuma rhwaba n’entanya. Buzinda, rhwaganirira bintu ndarhu byakarhurhabala rhudekerere amango rhuli omu mazibu.

3. Bintu bihi byakarhuma rhwaba n’entanya, na kandi ka rhwanabihanza oku birharhuhikiraga?

³ Bintu binji byanarhuma rhwaba n’entanya na kandi rhwanaba rhurhagwerhi buhashe bw’okubihanza oku birharhuhikiraga. Kwa lwiganyo, rhurhakahash’inyihya ibeyi ly’ebiryo omu cibuye, ibeyi ly’emishangi erhi ly’enyumpa y’okupanga ngasi mwaka. Kandi rhurhakahash’ihugûkwa mangaci abirhu banyakazi erhi abirhu banafunzi balonzize okurhuhira omu murhego gw’okulonza rhurhabaga bikubagirwa erhi kulonza rhuje omu lugenzi lubî. Na kandi rhurhakahash’iyusa ebijiro bibi biri byajirwa omu lugo lwirhu. Mw’er’igulu rhulamire rhuli rhwalwisa mazibu maguma na maguma bulya entanya za bantu banji zirhalongozibwi n’amakanuni g’Ebibliya. Shetani, nnamahanga w’er’igulu, ayishi oku “okukârhanya eby’akalamo ka muli gano mango” kunarhume bantu banji baleka okukolera Yehova.  (Mt. 13:22, Mashi Bible; 1 Yn. 5:19) Rhurhakasomerwa okubona omw’igulu muyunjwire mazibu manji gakarhuma abantu babà n’entanya nyinji!

4. Bici byakarhuhikira erhi rhwakakarhanya okurhalusire olugero oku amazibu girhu?

⁴ Okukarhanya okurhalusire olugero oku amazibu girhu kwanarhuma rhurhacirhanye oku kandi kantu koshi koshi. Kwa lwiganyo, rhwanahikira aha rhwaja rhwarhanya oku rhurhabone ensaranga nyinji lyo rhuhikiriza amalagirire girhu erhi kandi rhukarhanya mpu rhwanacilwale kandi mpu rhwanabule akazi erhi kukaheza. Na kandi rhwakahikira okurhanya oku nkaba amango rhwanaje omu marhangulo rhurhakaba bishwekerezi oku marhegeko ga Nnamahanga. Hano hofi-hofi Shetani ashumika abantu bage barhulibuze, na ntyo rhwanaja rhwarhanya gurhi rhwayish’ijira hanw’ajira ntyo. Rhwanacidosa ntya: ‘Ka kuli kubî erhi nakaja narhanya oku bintu bya mwene ntyo?’

5. Erhi Yezu aderha ntya: “Murhakag’iyorha mwarhanya” bici alonzagya okuhugûla?

⁵ Rhumanyire oku Yezu abwîzire abanafunzi bange ntya: “Murhakag’iyorha mwarhanya.” (Mt. 6:25, Bible Mashi) Kw’oko kuli kuderha oku rhurhakwanini rhurhanye oku kantu koshi koshi? Nanga! Buzira karhinda, bakozi ba Nnamahanga baguma baguma b’amango ga mîra bahikire aha barhanya bwenene lugenda bintu bilebe n’oko kurharhumaga Yehova abalahira. * (1 Bam. 19:4; Enna. 6:3) Yezu alonzagya okurhurhonda. Arhalonzagya mpu rhukarhanya bwenene oku biri byagera mw’aka kalamo bulya oko kwanahûma oku mukolo rhujirira Nnamahanga. Bici byakarhurhabala rhuhime okurhanya okurhalusire olugero?​—Olole ecisanduku cidesire “ Ebyakakurhabala.”

6. Nk’oku biyerekinwe omu olwandiko lwa Abafilipi 4:6, 7, bici byakarhurhabala rhube n’entanya zidekerire?

⁶ (1) Okashenga burhahusa. Abakristu bali omu mazibu banaciyumve bamadekerera amango bamashenga Yehova oburhabale. (1 Pt. 5:7) Yehova anashuza oku nsengero zawe omu kukuhâ “omurhûla gwa Nyamuzinda gulushire ngasi nkengero [za mwene muntu].” (Osome Abafilipi 4:6, 7.) Yehova anakuha emisi yage, kw’okuderha iroho litagatifu ly’oba n’entanya zidekerire.​—Gl. 5:22.

7. Bici rhushinganine rhukakengera amango rhuli rhwashenga Nnamahanga?

⁷ Amango oli washenga Yehova kugerera isala, okamubwira ebiri oku murhima gwawe byoshi. Omubwire amazibu gali gahi na gurhi oli waciyumva enyanya zago. Akaba hali oku wakayusa mw’ago mazibu, wanamuhûna akuhe obwenge n’emisi y’okuhugûkwa ebi wakajira. Akaba ntako wakajira ly’orhenga mw’ago mazibu, wanahûna Yehova akurhabale orhajaga wagarhanyako okurhalusire olugero. Wanahikira aha wabona gurhi Yehova ashuzize oku nsengero zawe erhi wakamubwîra amazibu gawe n’obwalagale. Akaba nt’ishuzo wahâbirwe ho n’aho, oko kurharhumaga waleka okushenga. Yehova alonzize omubwîre amazibu gawe n’obwalagale na kandi aba alonzize omushenge burhahusa.​—Lk. 11:8-10.

8. Bici rhwakahira omu masala girhu?

⁸ Amango oli warhula Yehova entanya zawe kugerera isala, okacihangana ohiremwo enderho z’okumuvuga omunkwa. Kuba kwinja okurhanya oku migisho Nnamahanga arhuhire, ciru akaba rhuli omu kanga kazibu. Erhi wakayumva orhagwerhi enderho wabwîra Yehova ly’omuhugûlira oku oli waciyumva,  okakengera oku anashuze ciru n’amasala gatwirwe bofofi, kwa lwiganyo: ‘Waliha ontabale!’​—2 Nga. 18:31; Rm. 8:26.

9. Gurhi rhwakabamwo n’omurhula gw’okunali?

⁹ (2) Olangalire obwenge bwarhenga emwa Yehova ci arhali bwenge bwawe we nnene. Omu myaka magana munani Embere za Kano Kasanzi Kirhu (E.K.K.K.), abantu b’e Yuda bayoboha bwenene enyanya z’okuyish’irherwa n’aba Ashuru. Omu kubula oku bacijira lyo barhag’irhegekwa n’aba Ashuru, babwîra aba Misiri oku babalwireko. (Iz. 30:1, 2) Yehova abarhonda oku obo burhabale bajir’ishenga aba Misri buli bwa burhebanyi erhi buli bwakubalerhera obuhanya. (Iz. 30:7, 12, 13) Yehova akolesa omulebi Izaya ly’ababwîra ebi bakajira lyo babà n’omurhula gw’okunali. Ababwîra ntya: “Omu kudekerera n’omu kundangalira mwo mwarhenza oburhwali bwinyu.”​—Iz. 30:15b.

10. Kanga kahi kaguma kaguma rhwakayerekanamwo oku rhulangalire Yehova?

¹⁰ Mangaci rhwakayerekana oku rhulangalire Yehova? Rhuganirire nyiganyo nguma nguma. Kwa lwiganyo, bakuhe akazi wakakamarhako nsaranga nyinji bwenene, cikone wakakola kasanzi kanji bwenene na ntyo orhabe n’akasanzi kw’okujira ebintu by’ekiroho. Erhi owinyu munyakazi arhondere akubwîra oku akusimire, cikone arhali Muhamirizi wa Yehova. Erhi kandi gurhi wakajira erhi mwene winyu w’omu mulala akakubwîra erhi: “Okagendekera wakolera Yehova nankukage.” Kurhakaba kulembu okuhiga ebi wajira mw’oko kanga koshi, cikone muli ngasi kanga Yehova anakuha obulongozi olagirireko. (Mt. 6:33; 10:37; 1 Kr. 7:39) Idoso lirigi ly’eri: Ka wanalangalira n’okukolesa obulongozi Yehova akuha?

11. Nyiganyo zihi ziri omu Bibliya rhwakayiga lyo rhudekerera amango abandi bali barhuhagalika?

¹¹ (3) Ociyigirize kugerera enyiganyo nyinja n’embî. Ebibliya erimw’enyiganyo nyinji ziyerekine bulya gurhi kuli kwa bulagirire okudekerera n’okulangalira Yehova. Amango oli warhanyakw’ezo nyiganyo, ohugûkwe bici byarhabîre abo bakozi ba Nnamahanga badekerere amango abandi babahagalikaga. Kwa lwiganyo, erhi e Sanhendrini y’Abayahudi erhegeka entumwa oku baleke okuhubiri, barhadirhimanaga. Lubero n’oko, boshi bashuza ntya n’oburhwali: “Kukwanine okuyumva Nyamuzinda kulusha abantu.” (Ebj. 5:29) Ciru n’enyuma z’okubashura, barhadirhimanaga. Bulya gurhi? Bulya balilangalire oku Yehova abarhabala, bamushagalusa bwenene muli ako kanga. Na ntyo bagendekera bayaliza omwanzi mwinja. (Ebj. 5:40-42) Ko n’oko, erhi bakola baniga Stefano, abêra arhulwire, n’oko kwarhûma abantu babona obusu bwage buyosire “nka bwa malahika.” (Ebj. 6:12-15) Bulya gurhi? Bulya ahugûkwa bwinja oku ayemerirwe na Yehova.

12. Nk’oku olwandiko lwa 1 Petro 3:14 na 4:14 luyerekine, bulya gurhi rhwakacishinga amango rhuli rhwalibuzibwa?

¹² Entumwa zâliyemire n’obwalagale oku Yehova âli haguma nabo. Alibahîre obuhashe bw’okujira ebisomerine. (Ebj. 5:12-16; 6:8) Muli gano mango girhu, Yehova arhacib’arhuhire obuhashe bw’okujira ebisomerine. Cikone ciru akaba ntyo, Akanwa kage, karhubwizire oku erhi rhwakalibuzibwa erhi bushinganyanya burhuma, rhwanamushagalusa ananarhuha n’iroho lyage litagatifu. (Osome 1 Petro 3:14; 4:14.) Co cirhumire ahali rhusegeze obwenge bwirhu kuli ebi rhwakajira omu mango gayisha nka rhwamalibuzibwa, rhushinganine rhubusegeze kw’ebi rhwakajira buno lyo rhuzibuhya obulangalire bwirhu muli Yehova n’okuyemera oku agwerhe obuhashe bw’okurhurhabala n’okurhucungula. Nk’oku abanafunzi ba Yezu bw’omu myaka igana mirhanzi bajirâga, rhushinganine rhuyemere  n’obwalagale ezi nderho Yezu alaganyagya: “Niene nammuhe akanwa n’obumanye abashombanyi binyu barhankahash’ilahira erhi okuhima.” Buzinda acibirhulaganya ntya: “Bulêmbezi bwinyu mwacizemwo obuzine bwinyu.” (Lk. 21:12-19) Na kandi orhayibagiraga oku Nnamahanga ayish’ifûla abakozi bage bishwekerezi bulya anakengere ngasi kantu oku bibayerekire.

13. Gurhi rhwakayunguka omu kuyiga enyiganyo z’abantu barhahikirâga aha badekerera n’okulangalira Yehova?

¹³ Na kandi rhwanaciyigiriza bintu binji kugerera enyiganyo z’abantu barhadekereraga n’okulangalira Yehova amango bali omu kanga kazibu. Okuyiga enyiganyo mbî z’abantu barhalangalirâga Yehova kwanarhurhabala rhuyake okujira amagosa gali nk’ago bajirâga. Kwa lwiganyo, Asa Mwami w’e Yuda erhi arhondera arhambula alangalira oku Yehova amurhabala alwise omurhwe gw’abasoda bâli balwisa, na Yehova amurhabala abahima. (2 Nga. 14:9-12) Enyuma z’aho, erhi omurhwe musungunu gw’abasoda ba Mwami Basha guyishirhera aba Israheli, Asa ajihûna Mwami w’e Siriya abasoda mpu bamurhabale ahali hw’okulangalira Yehova nk’oku ajirâga embere z’aho. (2 Nga. 16:1-3) Na kandi arhahûnaga Yehova oburhabale oku buzinda bw’akalamo kage, erhi ahikira aha alwala bwenene.​—2 Nga. 16:12.

14. Bici amagosa Asa ajirâga gakarhuyigiriza?

¹⁴ Oku murhondêro gw’okurhambula kwage, Asa alangalira Yehova erhi arhinda oku mazibu. Cikone enyuma z’aho aderha oku ntaco omulume ahûna owaba, arhacihûnaga Nnamahanga oburhabale. Nkaba kwakabonekîne nka Asa ajijire bwinja erhi ajihûna aba Siriya oburhabale. Cikone aba Israheli barhalamaga omu murhula kasanzi kanji. Yehova amubwîra ntya kugerera omulebi: “Bulya okolaga ocîshwekire kwo mwami w’e Siriya ahâli h’okucîshwekera kwo Nyamuzinda Nnâmahanga wawe, ene onajira ntyo, wabona oku engabo ya mwami w’e Siriya yakurhenga omw’ikumi ly’eminwe.” (2 Nga. 16:7, Mashi Bible) Irhondo rhurhahiraga rhwalangalira obwenge bwirhu rhwene ahali h’okulangalira Yehova n’okulonza amahano omu Kanwa kage amango rhugwerhe amazibu. Erhi rhwakalangalira Yehova rhunadekerire ciru akaba rhuli omu kanga kahûnyire okurhôla omuhigo ho n’aho, anarhurhabala rhurhôle omuhigo mwinja.

15. Bici rhwakajira amango rhuli rhwasoma Ebibliya?

¹⁵ (4) Obike omu bwenge bwawe milongo miguma miguma y’omu Bibliya. Nk’oli wasoma Ebibliya erhi wakarhinda oku milongo eyerekine oku Yehova anahâne emisi y’okudekerera n’okumulangalira amango g’amazibu, wanaciseza oyibike omu bwenge. Nkaba ciru kwanaba kwabulagirire okuyisoma n’izu linene erhi kuyiyandika omw’ikaye ly’okayisoma ngasi mango. Yehova abwîra Yozwe erhi Yoshua oku akasoma ecitabu c’Irhegeko n’izu lisungunu ngasi mango na muli ntyo akakola ngasi kantu n’obwenge. Ebyo bamukengezagya byakamurhabire arhayobohaga cikone abe n’oburhwali bw’okulongoza abantu ba Nnamahanga. (Yoz. 1:8, 9) Nderho nyinji ziri omu Bibliya zanarhuma waba n’omurhula gw’ekandalala ciru akaba oli omu kanga kakarhuma warhanya bwenene erhi kuyoboha.​—Enna. 27:1-3; Mig. 3:25, 26.

16. Gurhi Yehova akolesa ecigamba c’Ecikristu ly’arhurhabala rhugendekere rhwamulangalira n’okudekerera?

¹⁶ (5) Okageza akasanzi haguma n’abakozi ba Nnamahanga. Yehova anakolese bene wirhu na bali birhu lyo barhurhabala rhugendekere rhwamulangalira n’okudekerera. Omu kasanzi k’entimanano zirhu rhunayunguke n’enyigirizo rhuhâbwa kugerera ehotuba y’abantu boshi, amashuzo bene wirhu na bali birhu bahâna, n’enshambalo z’okuyubakana rhujira  haguma nabo. (Hb. 10:24, 25) Na kandi rhunahîrwe mw’omurhima erhi rhubwîra abîra birhu bw’omu cigamba gurhi rhuli rhwaciyumva. “Akanwa kinja” kanarhurhabala rhuciyumve bwinja amango rhuli rhwaciyumva kubî.​—Mig. 12:25.

17. Nk’oku biyerekinwe omu olwandiko lwa Abahabraniya 6:19, gurhi obulangalire bwirhu bw’Obwami bwakarhurhabala rhurhulirire omu mango rhuli omu kanga kazibu?

¹⁷ (6) Ogendekere wazibuhya obulangalire bwawe. Obulangalire bwirhu bw’Obwami buba nka “mutungo gutunga omurhima [obugumaguma, NWT],” gurhurhabala rhurhulirire amango rhuli omu kanga kazibu erhi amango rhuli rhwarhanya okurhalusire olugero. (Osome Abahabraniya 6:19.) Okarhanya oku biragane bya Yehova by’amango gayisha; mw’ago mango rhurhay’ishikarhanye okulushire olugero. (Iz. 65:17) K’okola orhanyize oli omw’igulu lihyahya murhakaba ngasi kanga koshi kabî? (Mik. 4:4) Kandi wanazibuhya obulangalire bwawe omu kukaganirira abandi ebi olangalire. Ojire okwawe koshi ly’ocihâna omu mukolo gw’okuhubiri n’okujira abanafunzi. Erhi wakajira ntyo, wanaba n’ ‘obulangalire buyunjwire kuhika okubona ebi olangalire.’​—Hb. 6:11.

18. Mazibu gahi rhwacirheganyako omu mango gayisha, na gurhi rhwakajira lyo rhuyish’igahima?

¹⁸ Oku er’igulu ligendekire lyahika ebuzinda, kwo rhwanagendekera rhwalwisa amazibu ga ngasi lubero na gakurhulerhera entanya. Olwandiko lwirhu lw’omwaka gwa 2021 lwarhurhabala rhugendekere rhwalwisa amazibu n’okubêra rhudekerire kugerera obulangalire rhugwerhe muli Yehova, ci arhali oku burhwali bwirhu rhwene. Mw’ogu mwaka goshi, rhuyerekane kugerera ebijiro birhu oku rhugwerhe obuyemere muli eci ciragane Yehova arhuhire: “Omu kudekerera n’omu kundangalira mwo mwarhenza oburhwali bwinyu.”​—Iz. 30:15.