1. Muli gano mango girhu, omu njira ehi rhuli rhwabona oku omu milala minji murhaciba buzigire?

EBIBLIYA yâl’ilebire oku omu nsiku za buzinda bantu banji barhayish’ibe “n’obuzigire bw’akaburhano.” (2 Tm. 3:1, 3, NWT) Ene rhuli rhwabona gurhi obo bulebi buli bwahikirira. Kwa lwiganyo, emiliyoni y’emilala yagabikinemo enyanya z’okuzaza obuhya, oko kunarhume ababusi babirhi bagayana bwenene n’okujira abana baciyumve barhazigirwi. Ciru hali na milala minji, omulume n’omukazi balamire haguma cikone banaligi nka balungu. Muntu muguma ohanula emilala aderha ntya: “Ishe, omuzire, abana nta muguma ociderheza owabo, ngasi muguma anacigonye oku ordinatere yake, oku tablete yage, oku telefone yage, erhi oku micezo y’evideo. Na ntyo, ciru akaba eyo milala elamire haguma banalame omu nyumpa nguma buzira kumanyana bwinja.”

2-3. (a) Bandi rhwakakayereka obuzigire bunji bwenene nk’oku biyerekinwe omu Abaroma 12:10? (b) Bici rhwaganirira mw’eci cigabi?

² Rhurhalonzize rhube n’iroho ly’okurhazigira abandi liyunjwire omw’igulu ene. (Rm. 12:2) Lubero n’oko, rhushinganine rhuyerekane obuzigire bunji bwenene oku bantu bw’omu mulala gwirhu ciru na kuli bene wirhu bw’omu buyemere. (Osome Abaroma 12:10.) Obuzigire bunji bwenene kw’okuderha gurhi? Olo luderho luganirire obuzigire bubà ekarhi k’abantu b’omulala. Obo buzigire bwa ntyo bo rhushinganine rhuyereke bene wirhu na bali birhu Bakristu. Erhi rhuyerekana obo buzigire bwa ntyo, omu cigamba munaje ecinyabuguma, cigabi cinene c’enterekêro y’okuli.​—Mik. 2:12.

³ Mw’eci cigabi, rhwaganirira gurhi enyiganyo ziri omu Bibliya zakarhurhabala rhuhugûkwe oku rhwakakayerekanamwo obuzigire bwa ntyo.

4. Gurhi olwandiko lwa Yakobo 5:11, lurhurhabire rhushagalukire obuzigire Yehova arhujirako?

⁴ Ebibliya erhuganirire oborhere bwa Yehova. Kwa lwiganyo, edesire oku “Nyamuzinda aba buzigire.” (1 Yn. 4:8) Okuyumva ntyo kunarhume rhwamuyegera. Cikone, kandi edesire oku Yehova “aba wa buzigire bunji bwenene.” (Osome Yakobo 5:11, NWT.) Okuyumva oku ntyo kwo Yehova ayorha kurhushagalwire bwenene bulya kuhugwîre entanya arhujirako!

5. Gurhi Yehova ayerekanamwo obonjo na gurhi rhwakamuyiga?

⁵ Okengere oku olwandiko lwa Yakobo 5:11 luyushwire obundi borhere oku buzigire burhubulula emwa Yehova: obonjo. (Lub. 34:6) Okubabalira ebyaha birhu eba njira nguma Yehova ayerekanamwo oku aba wa bonjo. (Enna. 51:1) Omu Bibliya, oluderho bonjo luhugwîre bintu binji kulusha okubabalira. Obonjo ziba ntanya z’ekandalala omuntu ayumviza olibusire na ntyo alonze okumurhabala. Yehova ayerekine oku irala ajira ly’okurhurhabala liri linji bwenene kulusha eri omuzire ajira oku kabonjo kage. (Iz. 49:15) Obonjo bunashumye Yehova arhurhabale nka rhuli omu mazibu. (Enna. 37:39; 1 Kr. 10:13) Rhwanayereka bene wirhu obonjo omu kababalira n’okuyaka okubabikira akarhinda amango bamarhuyagaza erhi kurhugayisa. (Ef. 4:32) Cikone enjira y’obulagirire rhwakayerekanamwo oku rhuyumvirhire bene wirhu obonjo, kuli kubarhabala omu kasanzi bali omu mazibu. Erhi obuzigire burhushumya rhuyumvize abandi obonjo, rhunabe rhuli rhwayiga Yehova, lwiganyo lukulu lw’okuyerekana obuzigire bunji bwenene.​—Ef. 5:1.

6. Gurhi Yonatani na Daudi bayerekinemw’obuzigire bunji bwenene?

⁶ Ebibliya eganirire bantu banji barhâli bimâna cikone bayerekana obuzigire bunji bwenene. Rhuganirire olwiganyo lwa Yonatani na Daudi. Ebibliya edesire ntya: “Omurhima gwa  Yonatani gwalungana n’ogwa Daudi, Yonatani amuzigira nk’oku acizigira yene.” (1 Sam. 18:1) Yehova acishoga Daudi oku ye waba mwami enyuma za Saulu. Enyuma z’aho, Saulu ayumviza Daudi obumvu analonza okumuyirha. Cikone omugala Yonatani arhalungaga okuboko ogo muhigo gwage gw’okulonza okuyirha Daudi. Yonatani na Daudi balaganana oku babêra bîra bananagendekera okurhabalana.​—1 Sam. 20:42.

7. Bici byakahanzize Yonatani na Daudi okurhaba bîra?

⁷ Obuzigire bwali egarhi ka Daudi na Yonatani buli bwago-bwago, bulya hali bintu binji byakarhumire Daudi na Yonatani barhaba bîra. Kwa lwiganyo, Yonatani al’ilushire Daudi hofi myaka 30. Yonatani akadesire oku nta bwîra akajira n’omusole gurhamanyiri cici. Cikone, Yonatani agendekera akenga Daudi, arhamubonaga nk’âli w’idako bwenene.

8. Bulya gurhi orhanyize oku Yonatani âli mwîra w’okunali wa Daudi?

⁸ Yonatani akayumvirhire Daudi obumvu, bulya ye wâli nfula ya Mwami Saulu, akadesire oku ye oshinganine ayime oku ntebe y’ishe. (1 Sam. 20:31) Cikone Yonatani âli mwirhohye, anali mwishwekerezi kuli Yehova. Co carhumaga alunga Daudi okuboko mwami muhyahya Yehova acishogâga. Na kandi abêra mwishwekerezi kuli Daudi, ciru akaba oko kwagayisize ishe bwenene.​—1 Sam. 20:32-34.

9. Ka Yonatani akag’iba Daudi luhali erhi kumuyumviza obumvu? Ohugûle.

⁹ Yonatani âl’izigire Daudi bwenene arhanamuyumvizâgya oluhali erhi bumvu. Yonatani âl’imanyire fola omuherho anali ntwali omu kulwa ivita. Yonatani n’ishe Saulu balimanyikine oku bali “babidu nka makozi” erhi aigle na “ntwali kulusha entale.” (2 Sam. 1:22, 23) Co cirhumire Yonatani akacihire irenge bwenene kugerera ebi amakahikiriza. Cikone Yonatani arhacibonaga oku ye ntwali kulusha Daudi arhanamuyumvizagya obumvu. Lubero n’oko Yonatani agendekera abona oku Daudi agwerhe oburhwali ananakag’ilangalira Yehova. Enyuma za Daudi okuyirha Goliati, Yonatani arhondera amuzigira nk’oku acizigira yene. Gurhi rhwakayerekamwo bene wirhu na bali birhu obo buzigire bwa mwene obo?

10. Enderho “muzigirane n’omurhima gucire na burharhama” kw’okuderha gurhi?

¹⁰ Ebibliya erhubwîzire erhi “muzigirane n’omurhima gucire na burharhama.” (1 Pt. 1:22) Yehova arhulekire olwiganyo lw’okuyiga. Obuzigire arhujirako buba bunji bwenene, erhi rhwakagendekera rhwabêra bishwekerezi kuli ye, ntaco cakarhunanûla kuli ye. (Rm. 8:38, 39) Oluderho lw’Ecigiriki luhindwîrwe “burharhama” erhi bwenene luganirire entanya z’okucihangana bwenene ly’omuntu ayerekana obuzigire. Hali amango kurhaba kulembu okuyereka bene wirhu na bali birhu obuzigire. Erhi bene wirhu bakarhugayisa, kuli kwabulagirire rhukolese olu lwandiko ludesire erhi “mulemberane omu buzigire, munacisêze okulanga obuguma bw’iroho litagatifu omu murhula gw’ecinyabuguma.” (Ef. 4:1-3, NWT) Erhi ankaba rhulonzize okulama omu murhula haguma na bene wirhu, rhurhakakaganja amagosa barhujirire. Rhwanajira okwirhu koshi lyo rhukabona bene wirhu nk’oku Yehova ababona.​—1 Sam. 16:7; Enna. 130:3.

11. Bulya gurhi hali amango kuba kuzibu okuyerekana obuzigire bunji bwenene?

¹¹ Ensiku zoshi kurhaba kulembu okuyereka bene wirhu na bali birhu obuzigire bunji bwenene, bwenene amango rhumanyire obuzamba bwabo. Ciru n’oko kwahikire Bakristu baguma baguma bw’omu myaka igana  mirhanzi. Kwa lwiganyo, Evodiya na Sintiki bakag’ishagalukira okurhabala Paolo “okulumiza Emyanzi y’Akalembe.” Cikone kasanzi kaguma bahikira aha barhaciyumvikana. Paolo abahanula oku “bakaz’iyumvanya muli Nyakasane [‘Nnawirhu’, NWT].”​—Fl. 4:2, 3.

12. Gurhi rhwakayereka bene wirhu na bali birhu obuzigire bunji bwenene?

¹² Gurhi muli kano kasanzi rhwakayereka bene wirhu na bali birhu obuzigire bunji bwenene? Erhi rhwakacihâ akasanzi kw’okulonza okumanya abirhu bemezi bwinja, oko kwanarhurhabala rhukabahugûkwa n’okubayeresa obuzigire bunji bwenene. Okulushana emyaka erhi okurhakulira hantu haguma arhali kwo kwakarhuma rhurhajira obwîra na bene wirhu na bali birhu. Okengere oku Yonatani âl’ilushire Daudi hofi myaka 30; cikone bagalijira obwîra busêzire bwenene. Ka hali mwene wirhu erhi mwali wirhu ociri musole erhi okola mushosi wakajira naye obwîra omu cigamba cinyu? Erhi wakajira ntyo wanayerekana oku ‘ozigire bene winyu’ boshi.​—1 Pt. 2:17.

13. Bulya gurhi rhurhaciyumva rhuli babidu okujira obwîra bwa kidole na lupeta na ngasi muntu oli omu cigamba?

¹³ K’okuba n’obuzigire bunji bwenene kuli bene wirhu na bali birhu kuli kuderha oku kuli bo boshi rhwanaciyumva rhuli babidu okujira obwîra bwa kidole na lupeta? Okuderha okuli, oko kurhakahashikana. Rhurhakaderha oku kuli kubi okujira obwîra bwa kidole na lupeta haguma na bene wirhu erhi bali birhu baguma bulya banasime ebintu nirhu rhusima. Yezu akag’ihamagala abaganda bage boshi oku bali “bîra” bage, cikone âl’irhonyize Yowane kulusha abandi. (Yn. 13:23; 15:15; 20:2) Cikoki okuderha ntyo, kurhayerekine oku Yezu agwerhe enzigirizi kuli Yowane. Kwa lwiganyo, erhi Yowane na Yakobo bayish’imuhûna oku ayish’itamaza muguma ekulyo n’owundi ekumosho (ekulembe) kwage omu Bwami bwa Nnamahanga, Yezu ababwîra ntya: “Okubwarhala ekulyo kwani erhi ekumosho kwani, arhali nie nammuhêko, ci kuli kwa balya bakurheganyizibwe.” (Mk. 10:35-40) Aka Yezu rhurhashinganini rhukayerekana enzigirizi kuyerekera abîra birhu n’okubolola abandi.  (Yk. 2:3, 4) Okujira ntyo kwanalerha okuciberulamwo omu cigamba, n’obu okuciberula kurhajira nafasi omu cigamba c’Ecikristu.​—Yd. 17-19.

14. Nk’oku biyerekinwe omu Abafilipi 2:3, bici byakarhurhabala rhuyake iroho ly’akamashigwe omu cigamba?

¹⁴ Erhi rhuyeresa bene wirhu boshi obuzigire bunji bwenene, rhunalange ecigamba cirhajagamo iroho ly’akamashigwe. Okengere oku Yonatani arhajaga kamashigwe haguma na Daudi erhi kulwa oluhali naye. Rhweshi rhwanahash’iyiga olwiganyo lwa Yonatani. Rhurhakag’ilwa oluhali na bene mpu bulya bamanyire bintu bilebe kurhurhaluka, “cingasi muguma akagerereza n’obwirhohye oku ababo bamulushire.” (Osome Abafilipi 2:3.) Rhukengere oku ngasi muguma wirhu anajira kantu kalebe kakarhabala ecigamba ciyololoke. Erhi rhwakaba birhohye, rhwanakabona oborhere bwinja bene wirhu bajira, na ntyo rhwanayunguka n’olwiganyo lwabo lw’obwishwekerezi.​—1 Kr. 12:21-25.

15. Bici ociyigirizize kugerera ebi Tanya n’omulala gwage bacibwinîre?

¹⁵ Nka rhuli omu mazibu, Yehova anarhurhulirize kugerera obuzigire bunji bwenene bene wirhu na bali birhu barhuyereka n’oburhabale barhuhâ. Rhuganirire ebyahikirâga mulala muguma lwa Kali Ndarhu enyuma z’okurhenga oku Ntimanano Nkulu ya Bihugo Binji y’omu mwaka gwa 2019 yajiriragwa e États-Unis. Eyo ntimanano nkulu yâl’idesire: “Upendo Haushindwi Kamwe!” Tanya, muzire wa bana basharhu, adesire ntya: “Erhi rhukola rhwagaluka oku lwitera rhwalipanzire, shofere muguma ahêza ebintesi, alonza okugerera omu kuboko kwirhu buzinda arhuhukula erhi kurhugonga. Ntaye muli  rhwe wavunisire, cikone rhwarhengamw’ogo mutuga, rhwayimanga oku burhambi bw’ibarabara, rhwanayoboha bwenene. Muntu muguma oku lundi luhande lw’ibarabara akarhuhamagala oku rhuyishe omu mutuga gwage. Naye âli mwene wirhu warhengaga oku ntimanano. Cikone arhali yene waliyimanzire aho. Bandi barhumwa b’etawi barhanu barhengaga e Suède nabo balinyimanzire oho. Abo bali birhu bayisha bakarhuhobera, n’oko kwarhurhuliriza! Na babwîra n’obwalagale oku ebintu byaba binja bagende, cikone balahira oku barharhuleka aho. Babêra aho kuhika abanganga bahika, barhenga aho erhi bamarhuhâ oburhabale boshi rhwalilagirireko. Muli ako kanga koshi, rhwayumva oku Yehova arhuzigire bwenene. Ebyo rhwacibwînire byasêza obuzigire bwirhu kuli bene wirhu na kuli Yehova.” Kw’okengire amango wâli omu bulagirire n’owinyu mwemezi akuyeresa obuzigire bunji bwenene?

16. Bici byakarhushumya rhuyerekane obuzigire bunji bwenene?

¹⁶ Rhurhanye oku bintu binja rhuhikiriza erhi rhwakagendekera rhwayerekana obuzigire bunji bwenene. Rhunarhulirize bene wirhu na bali birhu omu kasanzi bali omu mazibu. Rhunayushule ecinyabuguma omu cigamba. Rhunayerekane oku rhuli banafunzi bw’okunali ba Yezu, n’oko kunashumye abantu birhohye baje omu idîni ly’okuli. Na kulusha ebyo byoshi, rhunakuze Yehova, “Larha w’obwonjo na Nyamuzinda wa ngasi burhulirize.” (2 Kr. 1:3) Rhweshi rhugendekere rhwayerekana obuzigire bunji bwenene!