Harvey ye wâli mwana murhanzi w’omu mulala gwâlimwo barhabana bani. Omulala gwage gwamanyirâga okuli omu lugo lw’e Midland Junction, lw’omu cihugo c’e Australie, omu myaka ya 1930 amango eco cihugo calimw‘obukenyi bunji bwenene. Harvey azigira Yehova bwenene na buzinda ahikira aha abatizibwa erhi agwerhe myaka 14. Ayigirizibwa oku arhakag’ilahira omukolo ahîrhwe omw’ikubuliro lya Yehova. Amango aciri mwanarhabana murho, alahira oku arhakajira obusomi bw’Ilabiro ly’Akalalizi omu ntimanano, bulya akabona oku arhahash’ijira ntyo bwinja. Cikoki mwene wirhu muguma abwîra Harvey ntya: “Erhi omw’ikubuliro lya Yehova omuntu akakubwîra oku ojire mukolo mulebe, kw’okuderha oku erhi abwîne oku ogwerhe obuhashe bw’okugujira!”​—2 Kr. 3:5

Namanyirâga okuli e Angleterre, nyama na mukulu wani nabo bali bamaja omu okuli. Larha ayish’iyemera okuyiga okuli enyuma bwenene, cikone oku murhondêro akag’ibihagalika. Nabatizibwa erhi ngwerhe myaka mwenda ciru akaba arhal’iyemire oku njire ntyo. Nahîga oku naba painiya buzinda  nyish’iba misionere. Cikone larha alahira oku kuhika nyeneze myaka 21 lyomba painiya. Ntal’ilonzinze okulinda eyo myaka yoshi ly’omba painiya. Erhi nyeneza myaka 16, anyemerera oku nj’ilama na mukulu wani e Australie. Buzinda erhi nyeneza myaka 18 naba painiya.

Eyo munda e Australie, rhwarhondera rhwashebana na Harvey. Rhwenaye rhwagwerhe irala ly’okuba bamisionere. Rhwajira obuhya omu mwaka gwa 1951. Enyuma za myaka ibirhi rhuli rhwajira omukolo gw’obupainiya haguma, barhubwîra oku rhujire omukolo gw’obwangalizi bw’omuzunguko. Ecigabi cinene c’omuzunguko gwirhu câli omu luhande lw’ebuzikîro bw’izuba lwe Australie (Australie-Occidentale), kw’okuderha oku kanji-kanji rhwakag’igera omu maeneo garhalimo mishi ga kuli bwenene.

Omu mwaka gwa 1954, barhuhamagala oku Masomo g’e Gileadi, rhwasoma isomo lya kali 25. Ebilôrho birhu by’okuba ba misionere byahikirira! Rhwaja e New York n’ebato buzinda rhwarhondera okusoma Ebibliya bwinja bwinja. Oku programe yirhu y’Amasomo g’e Gileadi, hali ecigabi c’okuyiga Eciespanyole, olo lulimi lwali luzibu kuli Harvey bulya agwerhe amazibu gw’okuderha r.

Omu kasanzi k’amasomo, abalimu barhubwîra oku abalonzize okugend’ikolera e Japon baciyandikise lyo basoma omu lulimi lw’Ecijaponê. Rhwahiga oku rhwaleka ikubuliro lya Yehova lyone licishoge omu lulimi luhi rhwasoma. Enyuma z’aho, mwene wirhu Albert Schroeder, mwalimu muguma w’oku Masomo g’e Gileadi, amanya oku rhurhaciyandikisize. Arhubwîra ntya: “Mucibirhanya hitya.” Erhi rhurhindira okuciyandikisa Mwene wirhu Schroeder arhubwîra ntya: “Niè n’abandi balimu rhwamuyandikisize. Mulabe erhi mwanacihangana okuyiga Ecijaponê.” Harvey âli mubidu okuderha ecijaponê kulusha Eciespanyole.

Rhwajaga e Japon omu mwaka gwa 1955 erhi omu cihugo coshi muli bahubiri 500. Harvey agwêrhe myaka 26 nani nagwêrhe 24. Barhurhuma omu vile y’e Kobe yâl’igwerhe amashinji, rhwajira eyo munda myaka ini. Buzinda rhwacibishagalukira okukola omu muzunguko, hofi n’e vile ye Nagoya. Rhwashagalukira ngasi kantu eyo munda barhurhumâga: bene wirhu, ebiryo n’olugo. Enyuma za kasanzi kasungunu, rhwaja omu kandi kanga kalihunyire okujira ebi Yehova arhubwîzire rhujire.

Enyuma za myaka isharhu rhuli omu muzunguko, etawi y’e Japon yarhudosa erhi rhuyemire  okuja e Taïwan lyo rhugend’ikolera haguma na bacikala b’eyo b’obûko bwa ba Amis. Obugoma bwali bwamazuka eyo munda, na ntyo balagirira oku mwene wirhu omanyire Ecijaponê bwinja ly’ahagalika obo bugoma. * Ogo gwâli muhigo muzibu bwenene bulya rhwalizigire bwenene omukolo gwirhu e Japon. Harvey ayigirizibwe oku irhondo arhahiraga okulahira omukolo Yehova amuhire na ntyo rhwayemera okuja eyo munda.

Rhwahikâga eyo munda omu Mwezi gwa 11/1962. E Taïwan yâli bahubiri 2 271 banji ba mulibo bâli ba Amis. Burhangiriza, byahûna rhuyige Ecishinwa. Rhwagwerhe citabu ciguma cone na mwalimu muguma orhâl’imanyire Cingereza, cikone ebyo birharhumaga rhurhaciyiga.

Hisanzi hisungunu enyumza z’okuhika e Taïwan, Harvey bamurhuma oku ajikola omu komite y’etawi. Etawi erhali nnene, n’oko kwarhuma Harvey akakola omu biro n’okugend’ikola migobe isharhu omu mwezi haguma na bene wirhu ba Amis. Na kandi kasanzi kaguma-kaguma akag’ikola nka mwangalizi we wilaya, akag’igeza ehotuba oku ntimanano nkulu. Harvey akahashirage okugeza ehotuba omu Cijaponê, na bene wirhu ba Amis bakayumvirhe bwinja ebi ali aderha. Cikone irhegeko ly’ecihugo lyâl’idesire oku entimanano z’idîni zishinganine zijirwe omu Cishinwa mone. Cikoki, Harvey arhal’imanyire okuderha Ecishinwa bwinja, na ntyo akag’ijira ehotuba zage zoshi omu Cijaponê na mwene wirhu muguma akagizihindula omu ci Amis.

Ago mango, ecihugo c’e Taïwan cakag’irhegekwa n’abasoda, na ntyo bene wirhu balikwanine bahûne oluhusa lw’okujira entimanano nkulu. Okuyemererwa oku rhujire entimanano nkulu kurhali kulembu, n’abapolisi bakag’icerehesa okurhuhâ ako karatasi k’oluhusa. Erhi abapolisi barhahikirâga okuhâna ako karatasi omu mugobe gw’entimanano nkulu, Harvey akag’itamala omu biro by’abapolisi kuhika bamuhêko. Abapolisi barhakag’isima omuntu w’omu cindi cihugo abêre kasanzi kanji omu biro byabo, n’okwo kwakag’irhuma barhuha ako karatasi duba-duba.

Omu migobe yoshi rhwanajiraga na bene wirhu, rhwakag’ijira hofi nsa nguma erhi kulusha rhuli rhwashona oku ntondo n’okuyikira omu nyishi. Nkengire amango nasokaga entondo oburhangiriza. Enyuma z’okulya ecijumbu c’esezi, rhwajirhôla omutuga aha nsa 11:30 z’omuceracera omu lugo lwali kuli n’aha rhwal’ilamire, rhwayikira olwishi lunene bwenene na buzinda rhwasokera oku ntondo ndi bwenene. Erhi mbona gurhi mwene wirhu nalikulikire alisoka oku ntondo, nahugûkwa oku birhali bilembu.

Mw’eryo sezi Harvey aja omu mahubiri na bene wirhu b’eyo munda, nani najira amahubiri niene omu lugo luguma lusungunu lwalimw’abantu bakagiderha Ecijaponê. Erhi ziba nsa 7 z’omushi, nayumva ishali bwenene bulya namajira nsa nyinji buzira kulya. Harvey arhaciri boshi na bene wirhu erhi rhurhiganana naye. Harvey aligwerhe maji asharhu mabishi ahânaga oku magazeti. Anyeresa gurhi nakarhula iji liguma lyo nja nalinunusa. Ciru akaba lirhali linunu, cikone najira ntyo. Cikone indi wakalire iji lyakasharhu? Nalirya, bulya Harvey aderha oku arhashihash’inyandagaze oku ntondo erhi nakahôzire enyanya z’ishali.

Erhi rhuja oku ntimanano y’omuzunguko, hali bintu biguma byampugaga bwenene. Rhwali omu nyumpa ya mwene wirhu yâli aha burhambi bw’aha Nyumpa y’Entimanano. Bulya ba Amis basima bwenene okuyoga, muka mwangalizi arhurheganyiza aha rhwayishikayogera. Bulya hali ebi Harvey akag’ijira, ambwîra oku ngendi yoga embere zage. Omo dushe mwali bikolanwa bisharhu: mbegeti nguma yâlimw’amishi maholo, eyindi yâlimw’amishi madurhu, n’ebase erhalimwo bici. Nasomerwa bwenene okubona muka oyo mwangalizi ali hizire ebyo bikolanwa embuga z’enyumpa n’abali barheganya entimanano y’omuzunguko bali balangira aho. Namuhûna erido nabwikiramw’aho. Anderhera akahucu kali kalangala! Nacifulika enyuma z’ecimbohololo c’enyumpa, cikone aho babata bakagishesheza amarhwe gabo omu cogo, n’okulonza okutontomola ngasi obayegire. Narhanya ntya: ‘Bene wirhu bali omu byabo barhalangire oku ndi nayoga. N’erhi nakabula buyoga, nanabagayisa. Leka nyoge ntyo!’

Harvey ahikira aha ahugûkwa oku ba Amis banji barhajira majambere g’ekiroho bulya banji ba mulibo barhayishi okubasoma barhanagwerhe bitabu omu lulimi lwabo. Bulya olulimi lwa ba Amis lwali lwamarhondera okuyandikwa omu kukolesa olufabe lw’e Ciroma, kwaba nka kuli kwinja okuyigiriza bene wirhu bamanyisoma olulimi lwabo. Okujira ntyo gwâli mukolo muzibu, cikone buzinda bene wirhu bahikira aha bayiga lugenda Yehova omu lulimi lwabo. Ebicapo omu lulimi lwa ba Amis byarhondera byacapwa oku buzinda bw’omwaka gwa 1960, n’omu mwaka gwa 1968, barhondera bacapira ba Amis Ilabiro ly’Akalalizi.

Cikone, abakulu b’ecihugo balahira oku barhalonzizi ebitabu birhalibiyandike omu Cishinwa bije omu cihugo cabo. Lyo rhuyaka akadali, Ilabiro lw’Akalalizi lyâli omu lulimi lwa ba Amis lyahânwa omu njira nyinji. Kwa lwiganyo, omu kasanzi kaguma rhwakakolesa egazeti ncape omu Mandarin-Amis. Erhi hakabire olonzize oku manya binji, rhunamuyigirize omu Cishinwa. Kurhondera ago mango, ikubuliro lya Yehova lyarhondera lyakolesa ebitabu bicape omu lulimi lwa ba Amis lyo rhurhabala abantu bamanye enyigirizo z’e Bibliya.​—Ebj. 10:34, 35.

Kurhondera omu mwaka gwa 1961 kuhika omu mwaka gwa 1981, bene wirhu banji bw’omu ba Amis barhakag’ilama kushimbana n’amakanuni  ga Nnamahanga. Okubona barhakag’ihugûkwa bwinja amakanuni g’Ebibliya, banji mulibo balilamire omu lugenzi lubî, bakalaluka, bakanywa irhabi n’ebindi byasi by’okucilalusa. Harvey alambagirira bigamba binji ly’abarhabala bahugûkwe entanya za Yehova lugenda ebyo bijiro. Omu kasanzi k’ogo mubalamo, lyo kalya kanga naderheraga oku murhondero karhuhikiraga.

Bene wirhu bâli birhohye bayemera okujira empindûlo, cikone ebyokugayisa kuli kubona oku banji balahira okujira ezo mpindûlo, na ntyo omu myaka 20, abahubiri bapunguka barhenga oku 2 450 baja oku 900. Oko kwavuna omurhima bwenene. Cikoki, rhwahugûkwa oku Yehova arhakagisha ikubuliro lirimw’izinga. (2 Kr. 7:1) Buzinda, ezo nkomêdu mbî zoshi zacesibwa, na buno rhwaderha kugerera oburhabale bwa Yehova omu Taïwan mukola muli bahubiri 11 000.

Kurhondera omu mwaka gwa 1981 rhwabona ehali y’ekiroho y’omu bigamba bya ba Amis yarhonderha yayololoka bunyi-bunyi, na Harvey arhondera okugeza akasanzi kanji haguma na ba Shinwa. Ashagaluka bwenene okurhabala balume banji ba bali wirhu okuba Bahamirizi ba Yehova. Nkengire oku aderhâga oku amango mulume muguma wa mwabo balume ashengaga Yehova oburhangiriza ashagaluka bwenene. Nani nashagaluka bwenene okubona rhwahikire aha rhwarhabala abantu birhohye bayegerere Yehova. Ciru nshagalusire bwenene okukola oku tawi y’e Taïwan haguma n’omurhabana n’omunyere ba mwene wirhu muguma rhwacifunzâgya naye Ebibliya.

Buno naderha nahezize owirhu rhwakag’ikola rhweshi. Enyuma z’okujira hofi myaka 59 y’obuhya, omulume wani Harvey afâ omu lusiku 1/1/2010, enyuma z’okulibuzibwa n’obulwala bw’akansere. Ajijire hofi myaka 60 omu mukolo gw’akasanzi koshi! Kuhika buno nancimukengere bwenene. Cikone nshagalusire bwenene okubona namulunzire okuboko omu omukolo rhwajijire omu bihugo bibirhi byarhushagalulaga bwenene! Rhwayiga okuderha ndimi ibirhi z’omu Asie ziba nzibu bwenene, na Harvey ayiga okuyandika ezo ndimi.

Enyuma za myaka misungunu, Embaraza Eri Yalongoza yahiga oku kwanaba kwija ngaluke e Australie enyanya z’okubona oku nkola mugikula. Ho n’aho narhanya ntya: ‘Ntalonzizi ntenge e Taïwan.’ Cikone nakengera oku Harvey anyigirizize oku irhondo ntahiraga nkalahira okujira ebi ikubuliro lya Yehova lirhubwîzire oku rhujire. Buzinda, nahikîre aha nabona oku kwali kwinja mpame.

Ene, nankole oku beteli y’e Australasie nsiku irhanu omu mugobe n’oku buzinda bw’omugobe nnanjikola haguma na cigamba ciguma. Oku Beteli nanshagaluke okulambagiza abaderha Ecishinwa n’Ecijaponê amango batemberire oku Beteli. Neci, ndinalindirira okuhikirira kw’eciragane c’obufûke Yehova arhulaganyize. Manyire bwinja oku abisire omu nkengero zage Harvey wakagiderha oku arhakamulahirira okujira ebi anadesire.​—Yn. 5:28, 29.