ECIGABI C’OKUYIGA 1
“Abalonza Yehova Barhabula Akantu Kinja”
“Abalonza Yehova barhabula akantu kinja.”—ENNA. 34:10, NWT.
LWIMBO 4 “Yehova Ni Muchungaji Wangu”
EBI RHWAYIGA *
Ciru n’omu mango Daudi ali omu mazibu akagiciyumva oku ‘arhabulaga akantu kinja’ (Olole ecifungo ca 1-3) *
1. Kanga kahi kazibu Daudi acirhimanyiremwo?
DAUDI akag’icifulika ly’ayasa obuzine bwage. Mwami Saulu w’e Israheli, al’ihizire oku kuhika amunige. Erhi Daudi ali omu bulagirire bw’okulonza ebi alya, aja omu lugo lw’e Nobi, ahûnamo migati irhanu. (1 Sam. 21:1, 3) Enyuma z’aho, Daudi n’abantu bage bagend’icifulika omu lwala. (1 Sam. 22:1) Bulya gurhi Daudi ahikiragamw’ako kanga?
2. Gurhi Saulu acihizire yene omu mazibu? (1 Samweli 23:16, 17)
2 Saulu ayumviza Daudi obumvu bwenene bulya bantu banji bal’izigire Daudi n’abasoda bage bakag’ihima amavita. Na kandi Saulu al’imanyire oku okurharhumikira kwage kwarhumire Yehova amulahira n’oku acishozire Daudi oku ye mwami wayish’irhegeka ahali hage. (Osome 1 Samweli 23:16, 17.) Bulya Saulu ye waciri mwami w’e Israheli, al’igwerhe basoda banji, na bantu banji bakag’imulunga okuboko, co carhumaga Daudi acifulika ly’ayasa obuzine bwage. Ka Saulu akag’irhanya oku okujira ntyo kwarhuma Nnâmahanga arhahikiriza omuhigo gwage lugenda Daudi? (Iz. 55:11) Ebibliya erhadesiri ntyo, cikone hali akantu rhwakayemera n’obwalagale: Saulu acihira yene omu mazibu. Abalonza okulwisa Yehova kuhimwa bahimwa ngasi mango!
3. Gurhi Daudi akag’iciyumva ciru akaba ali omu kanga kazibu?
3 Daudi ali mwirhohye. Arhali yene wacishogaga okuba mwami w’e Israheli. Yehova wamuhâga ogo mukolo. (1 Sam. 16:1, 12, 13) Saulu ahikira aha arhondera abona Daudi nka mushombanyi wage nkununu. Cikone Daudi arhajaciraga Yehova enyanya z’ogo murhego alimo; arhanacidudumaga enyanya z’orhulyo rhusungunu agwerhe erhi kubona oku omu lwala mw’alikola akalama. Lubero n’oko, byanahashikana amango al’icifulisire mw’olo lwala go mango atunganga olwimbo lwinja lw’obukuze lulimo olwandiko lwirhu lw’omusingi: “Abalonza Yehova barhabula akantu kinja.”—Enna. 34:10, NWT.
4. Madoso gahi rhwaganirira, na bulya gurhi gali ga bulagirire?
4 Ene bakozi banji ba Yehova banahikire aha babula ebiryo erhi bindi bintu by’obulagirire omu kalamo. * Oko kwahikire bakozi banji ba Yehova muli aka kasanzi k’obu bulwala b’okuyahukira. N’enyanya z’“amalibuko” madarhi gayegerire, rhwalisa mazibu manji kulusha. (Mt. 24:21) Olekage rhushuze kw’aga madoso ani bulya rhwamahûgukwa ntyo: Omu njira nci Daudi ‘arhabulaga akantu kinja’? Bulya gurhi kuli kwa bulagirire rhuciyigirize okuba bakurhimukwa? Bulya gurhi rhwakayemera n’obwalagale oku Yehova arhushibirira? Na gurhi ene rhwakacirheganyamwo okubiyerekire amango gayisha?
“NTACO NDAGIRÎRE-KWO”
5-6. Gurhi Ennanga 23:1-6 zirhurhabire rhuhugûkwe ebi Daudi alonzagya okuhugûla erhi aderha oku abakozi ba Yehova “barhabula akantu kinja”?
5 Bici Daudi alonzagya okuhugûla erhi aderha oku abakozi ba Yehova “barhabula akantu kinja”? Rhwanabona ntanya nguma omu kulola enderho zishushine n’ezo ziri omu Ennanga 23. (Osome Ennanga 23:1-6.) Daudi arhondire olo lulanga n’enderho zidesire ntya: “Nyakasane [Yehova, NWT] ye lungere onyabula. Ntaco ndagirîre-kwo.” Omu cindi cigabi c’olo lulanga, Daudi aganirire ebintu biba bya bulagirire ensiku zoshi, k’okuderha emigisho minji y’ekiroho abire nayo omu kuyemera Yehova nka Lungere wage omuyabula. Yehova amuheka “omu njira nnungêdu [y’obushinganyanya, NWT],” Anarhabala Daudi n’obwishwekerezi omu kasanzi kinja n’omu kasanzi kabi. Daudi alimanyire oku obuzine bwage omu “bulambo bw’akahasi kinja” ka Yehova burhakabire buzira mazibu. Hali amango akahikire aha avunika omurhima, ak’oli walambagira “omu kabanda k’omwizimya,” akanabire n’abashombanyi banji. Cikone okubona oku Yehova ye wali Lungere wa Daudi omuyabula ‘nta mabi ayobohire.’
6 Rhwamabonaga ishuzo okw’idoso lirhu lyalidosize ntya: Omu njira nci Daudi ‘arhabulaga akantu kinja’? Agwerhe ebintu byoshi al’ilagirireko ly’abêra hofi na Yehova. Omwishingo gwage gurhal’iyimangire oku bintu by’omubiri. Daudi akag’irhimukwa n’ebi Yehova akag’imuha. Ebyali bya bulagirire omu kalamo kage kwali kugishwa n’okulangwa na Nnâmahanga.
7. Nk’oku biyerekinwe omu Luka 21:20-24, kanga kahi kazibu Abakristu b’e Yudeya b’omu myaka igana mirhanzi barhimanine nako?
7 Kugerera enderho za Daudi rhwanabona kunganaci kuba kwa bulagirire okuba n’entanya nyinja okubiyerekire ebintu by’omubiri. Kobinali rhwanashagalukira ebintu by’omubiri rhugwerhe, cikone rhurhashinganini rhukabibona oku byo biri bya bulagirire omu kalamo kirhu. Ako ko kali kantu k’obulagirire Abakristu b’e Yudeya b’omu myaka igana mirhanzi bahikire aha bahugûkwa. (Osome Luka 21:20-24.) Yezu ali amabarhonda oku akasanzi kakayishire amango Yeruzalemu ‘akazungulusirwe n’engabo.’ Erhi oko kwakahisire, bal’ishinganine “bayakire oku ntondo.” Okuyaka kwabo ko kwakarhumire bayokoka, cikone okujira ntyo kwali kwahûna baleke bintu binji. Omu myaka egezire, Ilabiro ly’Akalalizi lyaderha ntya: “Baleka amashwa gabo n’enyumpa zabo, barharhôlaga kantu koshi-koshi omu mwababwe. Bayerekana oku balangalire oburhabale n’obulanzi bwa Yehova, bahira enterekêro yage oku nafasi ntanzi kulusha ebindi bintu byoshi byakabonekine nka biri bya bulagirire.”
8. Isomo lihi lya bulagirire rhwakaciyigiriza kugerera ebyahikire Abakristu b’e Yudeya b’omu myaka igana mirhanzi?
8 Isomo lihi lya bulagirire rhwakaciyigiriza kugerera ebyahikire Abakristu b’e Yudeya b’omu myaka igana mirhanzi? Ilabiro ly’Akalalizi rhwaganiriraga embere lidesire ntya: “Nkaba rhwanaje omu marhangulo lugenda oku rhubona ebintu by’omubiri; ka byo biba bya bulagirire kuli rhwê, erhi obucunguke Nnâmahanga aha bala bali eluhande lwage? Kobinali, nkaba okuyaka kwirhu kwayish’ihiramo mazibu malebe n’okubulirwa na bintu bilebe. Byanahûne rhujire okwirhu koshi nk’oku Abakristu b’omu myaka igana mirhanzi b’e Yudeya bayakaga.” *
9. Gurhi ihano Paolo ahâga Abahabraniya likuhiremwo omurhima?
9 Ka wanarhanya kunganaci byal’ibizibu kuli abo Bakristu okuleka ngasi byoshi bagwerhe n’okucib’irhondera akalamo buhyahya? Bal’ilagirire okuba n’obuyemere muli Yehova n’okulangalira oku abahikirigiza amalagirire gabo g’omusingi. Cikone hali ebyakabarhabire. Myaka irhanu embere Abaroma bazunguluke olugo lw’e Yeruzalemu, entumwa Paolo yaha Abahabraniya aga mahano g’obulagirire: “Mumanye okusîma ensaranga kwankamurhambula omu kalamo kinyu, murhimukwe n’ebi mugwerhe. Bulya adesire ntya: ‘Ntakakuleka, ntakanakulikirira.’ Co cirhumire rhwanahash’iderha n’oburhwali nti: ‘Yehova ye murhabazi wani; ntaco nankayoboha. Gurhi omuntu akanjira?’” (Hb. 13:5, 6, NWT) Buzira karhinda abarhumikire ihano Paolo ahânaga embere Abaroma barhere Yeruzalemu babwine oku biri bilembu okulama akalamo karhahûnyiri binji omu nyumpa zabo mpyahya. Bal’iyemire oku Nnâmahanga abahikirigiza amalagirire gabo g’omusingi. Enderho za Paolo zirhurhabire rhuyemere oku Yehova arhuha ebi rhulagirireko.
“RHURHIMUKWE N’EBYO BINTU”
10. “Ihwe” lihi Paolo arhuganirire?
10 Paolo ahîre Timoteyo ihano liri nk’eryo, na nirhu lirhuyerekire. Ayandika ntya: “Muli ntyo, akaba rhugwerhe eci rhwalya n’eci rhwayambala, rhurhimukwe n’ebyo bintu.” (1 Tm. 6:8, NWT) K’oko kuli kuderha oku rhurhakashagalukira ebiryo binunu, okuba n’ahantu hinja h’okulama, erhi kugula emishangi mango malebe? Arhali ntyo ko Paolo adesire. Paolo adesire oku rhurhimukwe n’ebintu by’omubiri rhwakanaba rhugwerhe. (Fl. 4:12) Elyo lyali “ihwe” lya Paolo. Akantu kirhu k’obulagirire buli bwîra bwirhu haguma na Nnâmahanga, ci arhali ebirugu by’omubiri byonene.—Hab. 3:17, 18.
Aba Israheli ‘barhabulaga akantu’ omu myaka 40 bajiraga omw’irungu. Gurhi rhwakabamwo bakurhimukwa n’ebi rhugwerhe ene? (Olole ecifungo ca 11) *
11. Bici enderho Musa abwiraga aba Israheli zakarhuyigiriza lugenda okurhimukwa?
11 Hanaba olubero egarhi k’oku Yehova abona amalagirire girhu n’oku rhugabona. Olole ebi Musa abwiraga aba Israheli erhi bayusa myaka 40 omw’irungu: “Nyamubaho, Nyamuzinda wawe, akugishire omu mikolo yawe yoshi; ashimbulira olugendo lwawe muli olya nnakagali w’irungu. Laba oku ekola myaka makumi ani erhi na Nyamubaho, Nyamuzinda wawe anali haguma nawe: nta kantu wabuzire.” (Lush. 2:7) Muli eyo myaka 40, Yehova akaha aba Israheli amana balya. Emishangi yabo, k’okuderha erya mishangi barhenganaga e Misri, erhakoyaga ciru n’ehitya. (Lush. 8:3, 4) Musa abakengeza oku bal’igwerhe ngasi kantu bal’ilagirireko, ciru akaba baguma na baguma bakabwine nk’ogo mupango gwali gwa lugero. Yehova anashagaluka erhi rhwakaciyigiriza okukarhimukwa, k’okuderha okukashagalukira ebintu by’olugero arhuhire, n’okukabibona nka migisho n’okuvuga omunkwa kuli byo.
OYEMERE N’OBWALAGALE OKU YEHOVA AKUSHIBIRIRA
12. Bici biyerekine oku obulangalire bwa Daudi bwali muli Yehova ci arhali muli ye yene?
12 Daudi alimanyire oku Yehova aba mwishwekerezi na bwenene ashibirira balya bamuzigira. Ciru akaba akalamo ka Daudi kali omu mazibu erhi atunga Olulanga lwa 34, kugerera amasu g’obuyemere Daudi abona “malahika wa Yehova” agwisire ecirâlo “aha burhambi” bwage. (Enna. 34:7, NWT) Nkabaga Daudi ashushanyize malahika wa Yehova n’omusoda ogwisire ecirâlo, na ngasi mango anakalola aha omushombanyi ayisha. Ciru akaba Daudi ali ntwali ya musoda, na Yehova ali amamulaganya obwami, Daudi arhalangaliraga obuhashe bwage bw’okubanda ibuye erhi kumanyifola engorho ly’ayirha abashombanyi. (1 Sam. 16:13; 24:12) Daudi ahira obulangalire bwage muli Nnâmahanga, anayemera n’obwalagale oku malahika wa Yehova ‘analikûze abamuyoboha.’ Kobinali, ene rhurhakacilangalira oku rhwalangwa kugerera ecisomerine. Cikone rhumanyire oku bala boshi balangalira Yehova ciru bakafâ buno, bayishilama ensiku n’amango omu mango gayisha.
Omu kasanzi k’amalibuko madârhi, Gogi w’omu cihugo ca Magogi analonze okurhurhera rhunali ahamwabirhwe. Cikone rhwanaba n’oburhulirize okumanya oku Yezu na bamalahika banarhuhalire (Olole ecifungo ca 13)
13. Amango Gogi w’omu cihugo ca Magogi arhurhera, bulya gurhi rhwanabonekane nka kuli kulembu okurhuhima, cikone bici birhumire rhwanabe n’obulangalire? (Olole enfoto eri oku cijalada c’eyi gazeti.)
13 Hano hofi-hofi, obulangalire bwirhu omu buhashe bwa Yehova bw’okurhulanga bwahirwa omu marhangulo. Hano Gogi w’omu cihugo ca Magogi, k’okuderha omulungano gw’amashanja, arhera abakozi ba Nnâmahanga, akalamo kirhu kayishibonekana nka kali omu mazibu. Rhwanalagirire oku kuba n’obulangalire muli Yehova oku anarhuyokole. Omu masu g’amashanja, rhwanabonekane nka bibuzi birhagwerhi lungere na ntaye wakarhulanga. (Eze. 38:10-12) Rhwanabe rhurhagwerhi bikolanwa b’ivita, rhurhanakomerezibagwa okulwa ivita. Amashanja ganabone oku kuli kulembu okurhuhima. Barhakabona ebi rhuli rhwabona n’amasu girhu g’obuyemere k’okuderha, omurhwe gwa bamalahika gugwisire ecirâlo gunali eburhambi bw’abakozi ba Nnâmahanga, gucirheganyize okurhulwira. Bulya gurhi amashanja garhakababona? Bulya barhagwerhi masu g’obuyemere. Banasomerwe bwenene amango omurhwe gw’empingu gwanayishe guli rhurhabala!—Maf. 19:11, 14, 15.
OCIRHEGANYE OKUBIYEREKIRE AMANGO GAYISHA
14. Bici rhwakajira ene lyo rhucirheganya okubiyerekire amango gayisha?
14 Bici rhwakajira ene lyo rhucirheganya okubiyerekire amango gayisha? Burhangiriza, rhushinganine rhube n’entanya nyinja lugenda ebintu by’omubiri n’okuhugûkwa oku hali amango rhwanacibileke. Na kandi kuli kwa bulagirire rhukarhimukwa n’ebi rhugwerhe n’okuba n’omwishingo munene omu bwîra bwirhu rhugwerhe haguma na Yehova. Oku rhwakagendekera rhwamanya Nnâmahanga, ko rhwanagendekera rhwaba n’obulangalire omu buhashe bwage bw’okurhulanga amango Gogi w’omu cihugo ca Magogi anarhurhere.
15. Amango Daudi aciri musole, bici acibwinire byamuyigirizize oku Yehova arhakamulekerera ciru n’ehitya?
15 Rhucibiganirira akantu karhabire Daudi na nirhu kanarhurhabala rhucirheganye lugenda amarhangulo. Daudi aderha ntya: “Olabule n’okubona oku Yehova aba mwinja, ow’obushagaluke ali muntu omuyakira ho.” (Enna. 34:8, NWT) Ezo nderho zihugwîre bulya gurhi Daudi alimanyire oku alishinganine alangalire oburhabale bwa Yehova. Ngasi mango Daudi akagilangalira Yehova, na Nnâmahanga wage arhamulekereraga. Erhi Daudi aciri musole, ajilwisa nnakagali w’omufilistini wakagihamagalwa Goliyati, anamubwira ntya: “Nyamubaho [Yehova, NWT] ene akuhânyire omu maboko gani.” (1 Sam. 17:46) Buzinda bw’aho, Daudi akagikolera mwami Saulu, walonzagya okumuniga cikone “Nyamubaho ali” haguma na Daudi. (1 Sam. 18:12) Bulya Daudi acibwinire oburhabale bwa Yehova omu mango gageraga, alimanyire oku ashinganine amulangalire muli ago marhangulo ga mw’ako kasanzi.
16. Omu njira zihi ‘rhwakalabula’ lyo rhubona obwinja bwa Yehova?
16 Oku rhwakagendekera rhwalonza obulongozi bwa Yehova ene, ko rhwakanagendekera rhwaba n’obulangalire omu buhashe bwage bw’okurhuyokola omu mango gayisha. Biba bihûnyire obuyemere n’okuba mubidu okulangalira Yehova lyo rhuhûna bose wirhu ekonjé lyo rhuja oku ntimanano zirhu nkulu erhi oku ntimanano z’ecigamba erhi kumuhûna ashanje ensa zirhu z’okukola lyo rhukaja oku ntimanano zoshi n’okugeza kasanzi kanji omu mahubiri. Orhanyagye gurhi byakaba erhi bose wirhu akalahira ebyo byoshi na buzinda rhuheze akazi kirhu. Ka rhugwerhe obuyemere oku Yehova arhakarhuleka arhakanarhulikirira n’oku ngasi mango agendekera arhuhikirigiza amalagirire girhu g’omusingi? (Hb. 13:5) Bantu banji bali omu mukolo gw’akasanzi koshi banaganirire ebi bacibwinire biyerekine kunganaci Yehova abarhabire amango balimulagirireko. Yehova aba mwishwekerezi.
17. Olwandiko lwirhu lw’omwaka gwa 2022 luli luhi, na bulya gurhi lushinganine?
17 Bulya Yehova arhuli aha burhambi, rhurhagwerhi ecirhumire coshi c’okuyoboha amango gayisha. Nnâmahanga wirhu arhakarhulekerera erhi rhwakakahira Obwami bwage oku nafasi ntanzi omu kalamo kirhu. Ly’erhukengeza obulagirire bw’okucirheganya ene oku mazibu g’omu nsiku zayisha n’okulangalira oku Yehova arhakarhulekerera, Embaraza Eri Yalongoza yacishozire olwandiko lw’Ennanga 34:10 oku lwo lwaba lwandiko lwirhu lw’omwaka gwa 2022. Ludesire ntya: “Abalonza Yehova barhabula akantu kinja.”
LWIMBO 38 Atakupatia Nguvu
^ Olwandiko lwirhu lw’omwaka gwa 2022 lurhenzire omu Ennanga 34:10, ludesire ntya: “Abalonza Yehova barhabula akantu kinja.” Bakozi banji bishwekerezi ba Yehova barhajira bintu binji bya mubiri. Gurhigi rhwakaderha oku “barhabula akantu kinja”? Na gurhi okuhugûkwa ebi ogo mulongo guhugwîre kwakarhurhabala lyo rhucirheganya oku mazibu g’amango gayisha?
^ Olole “Amadoso g’Abantu Basoma Ebitabu Birhu” gali omu Ilabiro ly’Akalalizi ly’omu nsiku 15/9/2014 (omu Ciswahiri c’e Congo).
^ Olole Ilabiro ly’Akalalizi ly’omu lusiku 1/5/1999, buk. 19 (omu Ciswahiri c’e Kenya).