1-3. Mazibu gahi gakarhuma abakozi ba Yehova barhoza emirenge?

 MANGACI wazindig’ilaka? Hali amango rhurhoza emirenge erhi mwishingo gurhuma. Cikone kanji-kanji rhunalake enyanya z’amalumwa gali oku murhima. Kwa lwiganyo, nkaba rhunalake amango rhwamafirwa n’omuzigirwa wirhu. Mwali wirhu muguma ohamagalwa Lorilei, olama e États-Unis, ayandika ntya: “Hali amango amalumwa g’okufîrwa na mwali wani gakagiba manji kuhika nyumve nka nta kantu kakantuliriza. Muli ago mango nakacidosa erhi nanaciciyumve bwinja omu murhima.” *

² Hali ebindi bintu byakarhuma rhwarhoza emirenge. Painiya muguma ohamagalwa Hiromi, olama e Japon, adesire ntya: “Mango maguma na maguma namvunike omurhima erhi abantu mbuganana nabo omu mahubiri babula busimisibwa. Kasanzi kaguma na kaguma nantoze emirenge, n’okuhûna Yehova antabale mbone muntu mulebe oli walonza okuli.”

³ Ka nawe onaciyumve nk’oku abo bantu rhuganirire baciyumva? Banji ba muli rhwe banaciyumve ntyo. (1 Pt. 5:9) Rhulonzize ‘rhukolere Nyamuzinda n’omwishingo,’ cikone hali nkaba amango rhumukolera n’amalumwa, okuvunika omurhima erhi kuhikirwa n’akanga kazibu kahira obwishwekerezi bwirhu kuli Nnâmahanga omu marhangulo. (Enna. 6:6; 100:2, Mashi Bible) Gurhi rhwakajira lyo rhulwisa ezo ntanya amango rhwamagogomerwa nazo?

4. Bici rhwaganirira mw’eci cigabi?

⁴ Rhwanaciyigiriza kugerera olwiganyo lwa Yezu. Mango maguma na maguma, naye ayumvirhe entanya nzibu z’ekandalala  n’oko kwarhuma ‘arhondera arhoza emirenge.’ (Yn. 11:35; Lk. 19:41; 22:44; Hb. 5:7) Oleke rhuganirire ebyarhumaga alaka. Omu kujira ntyo, rhwabona amasomo rhwakaciyigiriza muli ebyo. Na kandi rhwayishiganirira enjira zakarhurhabala rhulwise amazibu garhuma rhwahikira aha rhwalaka.

5. Bici rhuciyigirizize okubiyerekire Yezu lugenda omwanzi guganirirwe omu Yowane 11:32-36?

⁵ Omu mwaka gwa 32 muli Kano Kasanzi Kirhu (K.K.K.), Lazaro mwîra wa Yezu alwala bwenene na buzinda afâ. (Yn. 11:3, 14) Lazaro agwerhe bali babo babirhi, Mariya na Marta, na Yezu al’izigire ogo mulala bwenene. Abo bakazi baciyumva kubi bwenene erhi bafîrwa na mushinja wabo. Enyuma za Lazaro okufâ, Yezu abalamira omu lugo lw’e Betaniya, emunda Mariya na Marta bal’ilamire. Erhi Mariya ayumva oku Yezu ayishire, alibirha ajimulingira omu njira. Orhanye cifufu cinganaci agwerhe erhi aderha ntya: “Ocibâga hano, mushinja wani arhankafîre.” (Yn. 11:21) Hisanzi hisungunu erhi Yezu abona Mariya n’abandi bali balaka, naye “anacirhondera arhoza emirenge.”​—Osome Yowane 11:32-36.

6. Bulya gurhi Yezu alakaga muli ako kasanzi?

⁶ Bulya gurhi Yezu alakaga muli ako kasanzi? Ecitabu Étude perspicace des Écritures cishuzize: “Olofû l’omwîra wage Lazaro n’ecifufu bali babo bakagiyumva byarhuma ‘ecifufu camugwarha anarhoza emirenge.’” * Byanahashikana Yezu akagirhanya oku malumwa omwîra wage Lazaro ayumvirhe erhi alwazire na kandi akarhanya gurhi Lazaro aciyumvirhe erhi akola ali hofi hw’okufâ. Nkaba kandi Yezu alakaga erhi abona gurhi Mariya na Marta bali burhe enyanya z’okufîrwa na mushinja wabo. Akaba wafîrirwe na mwene winyu w’omulala erhi mwîra wawe, buzira karhinda nkaba nawe waciyumvirhe ntyo. Olole masomo asharhu wakaciyigiriza kugerera ebyo byabaga.

7. Bici rhwakaciyigiriza lugenda Yehova kugerera emirenge Yezu arhozagya enyanya z’abîra bage?

 ⁷ Yehova anahugûkwe oku ociyumva. Yezu aba “nshusho” y’Ishe. (Hb. 1:3) Erhi Yezu alaka, ayerekana entanya z’Ishe. (Yn. 14:9) Erhi akaba oli walembera amalumwa g’okufîrwa n’omuzigirwa wawe, wanayemera n’obwalagale oku Yehova arhahugûsirwe amalumwa oli wayumva gone cikone naye ali aciyumva kubi. Alonzize okubuka omurhima gwawe guvunisire.​—Enna. 34:18; 147:3.

8. Bulya gurhi rhwakayemera n’obwalagale oku Yezu anafûle abazigirwa birhu bafîre?

⁸ Yezu alonzize okufûla abazigirwa bawe bafîre. Hisanzi hisungunu embere Yezu alake, abwira Marta n’obwalagale ntya: “Mushinja wawe afûka.” Marta al’iyemire oko Yezu aderhaga. (Yn. 11:23-27) Bulya Marta ali mukozi mwishwekerezi wa Yehova, buzira karhinda aliyemire obufûke bwajiragwa n’omulebi Eliya na Elisha myaka minji embere z’aho. (1 Bam. 17:17-24; 2 Bam. 4:32-37) Na kandi ali ayumvirhe enyanya z’abantu Yezu ali amafûla. (Lk. 7:11-15; 8:41, 42, 49-56) Na nawe wanayemera n’obwalagale oku wanacibone abazigirwa bawe bafîre. Emirenge Yezu alakaga erhi ali arhuliriza abîra bage bafîrirwe, erhuyemezize n’obwalagale oku anafûle abafîre!

9. Aka Yezu, gurhi wakarhabalamwo abafîrirwe? Ohâne olwiganyo.

⁹ Wanarhabala abafîrirwe. Yezu arhalakaga haguma na Mariya na Marta kone, ci abayumvirhiza n’okubarhuliriza. Nirhu ntyo ko rhwakajirira abafîrirwe. Mugula muguma olama e Australie, ohamagalwa Dan, adesire ntya: “Enyuma z’okufîrwa na mukanie, nal’ilagirire oku burhulirize. Bene wirhu na bakabo bakayisha omushi n’obudufu lyo banyumvirhiza. Bakagindeka mbabwire gurhi ndi naciyumva barhanakagiciyumva kubi mpu bulya ndinalaka ngasi kasanzi. Bakampa oburhabale, nk’okushuka omutuga gwani, okugendigula ebi ndagirireko n’okunyendera ebiryo amango ntahashiri okujira ntyo. Banakag’ishenga haguma na nani ngasi mango. Bayerekana oku bali bîra b’okunali ‘omu mbaka.’”​—Mig. 17:17.

10. Oganirire ebyabaga biganirirwe omu Luka 19:36-40.

¹⁰ Yezu aja e Yeruzalemu omu nsiku 9 z’omwezi gwa Nizani, mwaka gwa 33 muli Kano Kasanzi Kirhu (K.K.K.). Erhi akola ahika omu lugo, ehîtu hy’abantu hyarhimanana banarhondera okubamba emishangi yabo omu njira embere za Yezu lyo bayerekana oku bamuyemire nka Mwami wabo. Ako kali kasanzi ka bushagaluke bwenene. (Osome Luka 19:36-40.) Cikone abanafunzi bage barhal’icirheganyize oku byakahikire enyuma z’aho. “Erhi [Yezu] akola ahika, alangira olugo anarhondera okululakira.” Muli ako kasanzi, erhi Yezu ali alaka aleba ebintu bibi byakahikire abantu bal’ilamire e Yeruzalemu.​—Lk. 19:41-44, NWT.

11. Bici byarhumaga Yezu alakira abantu bal’ilamire e Yeruzalemu?

¹¹ Yezu aciyumva kubi bulya alimanyire oku ciru akaba bamuyegerezize bwinja olo lusiku, cikone bantu banji bamw’olo lugo bali bamayerekana oku barhayumvirhize omwanzi g’Obwami. N’oko kwakarhumire Yeruzalemu asherezibwa na ngasi Muyahudi wakayokosire akahêsirwe bujà. (Lk. 21:20-24) N’eby’okugayisa, nk’oku Yezu ali amaleba, bantu banji bamulahira. Gurhi bantu banji b’emunda olama bayankirira omwanzi g’Obwami? Gurhi wakaciyigiriza kugerera emirenge ya Yezu, erhi akaba bantu basungunu bo bayankirira bwinja okuli oli wabayigiriza? Rhulole gandi masomo asharhu.

12. Bici rhwakaciyigiriza lugenda Yehova kugerera emirenge Yezu arhozagya enyanya z’abalungu bage?

 ¹² Yehova anashibirire abantu. Emirenge ya Yezu erhukengezize kunganaci Yehova ashibirira abantu. “Arhalonza hajire owahera, ci alonza boshi baciyunjuze.” (2 Pt. 3:9) Ene rhunayerekane oku rhuzigire abalungu birhu omu kugendekera rhwacihâna ly’omwanzi mwinja guhuma oku murhima gwabo.​—Mt. 22:39. *

13-14. Gurhi Yezu akagiyerekamwo abantu obwonjo, na gurhi rhwakayigamwo obo borhere bwage?

¹³ Yezu akagikola bwenene omu mukolo gw’amahubiri. Akagiyerekana oku azigire abantu omu kugendekera abayigiriza omu ngasi bulyo. (Lk. 19:47, 48) Bici byakagimushumya ajire ntyo? Yezu akagibayumviza obwonjo. Hali amango abantu balonzagya okuyumvirhiza Yezu n’abanafunzi bage kuhika “babula amango g’okulya.” (Mk. 3:20, Mashi Bible) Na kandi Yezu akagiba mubidu okujiyigiriza abantu budufu, mango galishinganine kuli muntu muguma w’omu bumvirhiza bage. (Yn. 3:1, 2) Bantu banji b’omu bayumvirhizagya Yezu embere barhabaga banafunzi bage. Cikone ngasi boshi bayumvirhe ebi ali ayigiriza bahâbirwe obuhamirizi. Ene nalyo rhulonzize okuha ngasi muntu obulyo bw’okuyumvirhiza omwanzi mwinja. (Ebj. 10:42) Lyo rhuhikira aho, rhushinganine rhujire empindûlo lugenda omukolo gwirhu gw’amahubiri.

¹⁴ Obe mubidu okujira empindûlo zishinganine. Erhi akaba rhurhashanja akasanzi rhuja omu mahubiri, nkaba rhurhakabona abantu bayumvirhiza bwinja omwanzi mwinja. Painiya muguma ohamagalwa Matilda, adesire ntya: “Nie n’ibanie rhunalonze okurhimanana n’abantu omu kasanzi kali lubero. Sezi rhunalambagirire abantu aha bajirira eby’oburhimbuzi. Aha midi erhi bantu banji bakaba bakola bali bagera, rhunahubiri kugerera eprezantware. Bijingo, rhunabone oku kuli kwinja okubuganana n’abantu ahamwababwe.” Ahali h’okuhubiri kushimbana n’eprograme erhushinganine, rhwanaba babidu okujira empindûlo omu programe yirhu y’okuhubiri amango kwakaba kulembu okurhimanana n’abantu. Erhi rhwakajira ntyo, rhwanayemera n’obwalagale oku rhwanashagalula Yehova.

15. Nk’oku biyerekinwe omu Luka 22:39-44, bici byabire obudufu buzinda bw’akalamo ka Yezu ka hanw’igulu?

¹⁵ Bijingo bwenene omu nsiku 14 z’omwezi gwa Nizani mwaka gwa 33 muli Kano Kasanzi Kirhu (K.K.K.), Yezu aja omw’ishwa ly’e Getsemane. Eyo munda abwira Yehova ebyamuli oku murhima byoshi. (Osome Luka 22:39-44.) Muli ako kasanzi kazibu Yezu “àrhûla ensengero . . . omu kuyama bwenene n’omu kurhoza emirenge.” (Hb. 5:7) Bici byarhumaga Yezu ashenga muli obo budufu embere afê? Akagishenga ly’ahûna Yehova emisi y’okumurhabala abêre mwishwekerezi n’okujira obulonza Bwage. Yehova ayumva ensengero z’okurhenga oku murhima Omugala ashengaga anarhuma malahika ly’amuha emisi.

16. Bulya gurhi Yezu aciyumvagya kubi erhi ali ashenga omu ishwa ly’e Getsemane?

¹⁶ Buzira karhinda erhi Yezu ali omw’ishwa ly’e Getsemane ashenga anali alaka bulya al’igayire okubona abantu bamubona nk’ofîre nka muntu ojacire Nyamuzinda. Na kandi akagirhanya oku mukolo munene al’igwerhe gw’okuhalira izino l’Ishe. Bici wakaciyigiriza kugerera emirenge ya Yezu, erhi akaba oli walwisa akanga kazibu kahizire obwishwekerezi bwawe kuli Yehova omu marhangulo? Rhucib’ilola gandi masomo asharhu.

17. Bici rhwakaciyigiriza lugenda Yehova kugerera ishuzo ly’ensengero za Yezu zirhenzire oku murhima?

¹⁷ Yehova anayumve ensengero zawe. Yehova ayumvirhizize ensengero za Yezu zirhenzire oku murhima. Bulya gurhi? Bulya akantu kakulu Yezu akagishenga kwali kubêra mwishwekerezi kuli Ishe n’okuhalira izino lyage. Yehova anayumva ensengero zirhu z’okumuhûna oburhabale, erhi akaba akantu kakulu karhuma rhwashenga kuba kulonza rhubêre bishwekerezi kuli ye n’okuhalira izino lyage.​—Enna. 145:18, 19.

18. Omu njira nci Yezu ali nka mwîra orhuyumviza obwonjo?

¹⁸ Yezu anakuyumvize obwonjo. Erhi rhwakaba rhuli rhwaciyumva kubi, rhunashagaluke bwenene erhi rhurhulirizibwa n’omwîra oli warhuyumviza obwonjo, ci bwenene omwîra wagezire omu mazibu gashushine n’agirhu. Yezu ali nk’oyo mwîra. Amanyire gurhi biba erhi omuntu ayumva obuzamba na nkalagirire oku burhabale. Anahugûkwe obuzamba bwirhu,  ananalabirize gurhi rhwahâbwa oburhabale omu “mango gashinganine.” (Hb. 4:15, 16, NWT) Nka kula Yezu ayemeraga oburhabale bwa malahika amango ali omw’ishwa ly’e Getsemane, rhwanaba babidu okuyemera oburhabale Yehova arhuha, bube bw’omu bitabu, mavideo, hotuba, erhi kuhâbwa omurhima n’omugula orhulambagirire erhi mwîra okuzire kiroho.

19. Gurhi wakacibibamwo n’emisi amango oli walwisa irhangulo ly’obwishwekerezi bwawe kuli Nnâmahanga? Ohâne olwiganyo.

¹⁹ Yehova anakuha “omurhûla gwa Nyamuzinda.” Gurhi Yehova akarhuzibuhyamwo? Erhi rhushenga, rhunahâbwe “omurhûla gwa Nyamuzinda gulushire ngasi nkengero.” (Fl. 4:6, 7) Omurhula Yehova arhuha gunarhume omurhima gwirhu gwadekerera n’okujira entanya zirhu zirhuze. Olole gurhi mwali wirhu ohamagalwa Luz acibwinire oku oko kuli kw’okuli. Adesire ntya: “Nankaciyumva kubi enyanya z’entanya z’okuba kahumba. Hali amango ezo ntanya zirhuma narhanya oku Yehova arhansima. Cikone erhi oko kumpikira ho n’aho nambwire Yehova gurhi ndi naciyumva. Isala linantabale nciyumve bwinja.” Nk’oku oyo mwali wirhu acibwinire, isala lyanarhurhabala rhube n’omurhula.

20. Masomo gahi rhwaciyigirizize kugerera emirenge Yezu arhozagya?

²⁰ Emirenge ya Yezu erhuhire burhulirize bunji na masomo manji gakuciyigiriza! Rhwakengezibwe oku rhukarhabala abîra birhu bafîrirwe n’okuyemera oku Yehova na Yezu banarhurhabala amango rhwamafîrwa n’omuzigirwa wirhu. Obwonjo bunarhushumye rhuhubiri n’okuyigiriza bulya Yehova na Yezu bajira obo borhere bwinja. Na kandi rhurhulirizibwe n’okumanya oku Yehova n’Omugala muzigirwa baba bahugûsirwe gurhi rhuciyumva, banarhuyumvize obwonjo enyanya z’obuzamba bwirhu, bananalonze okurhurhabala lyo rhulembera. Rhugendekerage rhwakolesa ebi rhwaciyigirizagya kuhika olusiku Yehova ahikiriza eci ciragane cinja cidesire oku “ahôrhola ngasi mulenge [gurhuli] omu masu”!​—Maf. 21:4.