1-2. (a) Mangaci rhulugikengera omuzigirwa wirhu wafîre? (b) Bici Yezu arhondezagya obudufu bw’embere afê?

 CIRU akaba abazigirwa birhu bakola bagwerhe nsiku nyinji bafîre, rhunagendekere rhwabakengera. Ngasi mwaka, erhi olusiku bafâga luhika lyo rhulug’ibakengera bwenene.

² Ngasi mwaka, rhuba egarhi k’emiliyoni y’abantu y’omw’igulu lyoshi barhimanana haguma lyo bakengera olufû lwa muntu mulebe rhuba rhuzigire bwenene, k’okuderha Yezu Kristu. (1 Pt. 1:8) Rhunarhimanane haguma lyo rhukengera olufû lw’omuntu wahânaga obuzine bwage nka ngombôlo ly’arhucungula kurhenga omu caha n’omu lufû. (Mt. 20:28) Kobinali, Yezu aba alonzize abanafunzi bage bakakengera olufû lwage. Obudufu bw’embere afê, arhondeza ishega ly’ebijingo lyago-lyago anarhegeka ntya: “Mukâjira ntyo kube kukankengera.” *​—Lk. 22:19.

3. Bici rhwaganirira mw’eci cigabi?

³ Egarhi k’abantu baja aha Kukengera olufû lwa Yezu, mubalè musungunu go gujira obulangalire bw’okuyish’ilama empingu. Cikone miliyoni minji y’abantu bajira obulangalire bw’okuyish’ilama hanw’igulu nabo banakuje. Mw’eci cigabi rhwaganirira ebirhuma ebyo bikundi bibirhi biba n’irala ly’okuja aha Kukengera olufû lwa Yezu ngasi mwaka. Rhwacibiyish’ibona gurhi rhuyunguka n’okuja aha Kukengera olufû lwa Yezu. Rhurhang’ilola ebirhuma abashîge amavurha baja aha Kukengera olufû lwa Yezu.

4. Bulya gurhi abashîge amavurha balya omugati n’okunywa idivayi amango g’Okukengera olufû lwa Yezu?

⁴ Ngasi mwaka, abashîge amavurha bajira irala ly’okuja aha Kukengera olufû lwa Yezu lyo balya omugati n’okunywa idivayi. Bulya gurhi bo baba bashinganine balye omugati n’okunywa idivayi? Lyo rhushuza kw’er’idoso, rhulole ebyabire omu budufu buzinda bw’akalamo ka Yezu hanw’igulu. Enyuma z’okulya Pasaka, Yezu arhondeza akantu kahikire aha kamanyikana nk’Ishega ly’Ebijingo lya Nnawirhu. Ageza omugati n’idivayi embere z’entumwa zage 11 anababwira oku balye bananywe. Yezu abaganiza okubiyerekire ndagano ibirhi: endagano mpyahya n’endagano y’Obwami. * (Lk. 22:19, 20, 28-30) Ezo ndagano zahashize ezo ntumwa n’ogundi mubalè gw’abantu okuyish’iba bami na bakuhani omu mpingu. (Maf. 5:10; 14:1) Abashîge amavurha basigîre * bali mw’ezo ndagano zombi, bone balya omugati n’okunywa idivayi aha Kukengera olufû lwa Yezu.

5. Bici abashîge amavurha baba bahugûsirwe okubiyerekire obulangalire bahâbirwe?

⁵ Hali ecindi cirhuma abashîge amavurha bajira irala ly’okuja aha Kukengera olufû lwa Yezu: Okuja aha Kukengera olufû lwa Yezu kunabahe obulyo bw’okurhanya oku bulangalire bwabo. Yehova abahire obulangalire bwago-bwago: okuba n’obuzine bw’empingu burhakacifâ burhankanabola, okurhambula haguma na Yezu n’okuba haguma n’abandi bashîge amavurha 144 000 na kulusha byoshi, bayishiba haguma na Yehova Nnâmahanga! (1 Kr. 15:51-53; 1 Yn. 3:2) Abashîge amavurha baba bahugûsirwe oku balalisirwe lyo bayish’ishagalukira olo lukengwa empingu. Cikone bayishi oku lyo bayish’iyemererwa okuja empingu bashinganine bagendekere babêra bishwekerezi kuhika okufâ. (2 Tm. 4:7, 8) Oko kunarhume abashîge amavurha bashagaluka bwenene erhi barhanya oku bulangalire bwabo bw’empingu. (Tt. 2:13) Gurhigi lugenda “ebindi bibuzi”? (Yn. 10:16) Birhumire biguma na biguma bihi birhuma baja aha Kukengera olufû lwa Yezu?

6. Bulya gurhi abantu b’ebindi bibuzi baja aha Kukengera olufû lwa Yezu ngasi mwaka?

⁶ Abantu b’ebindi bibuzi banaje aha Kukengera olufû lwa Yezu arhali mpu lyo balya omugati n’okunywa idivayi, cikone nka bakulola kone. Omu mwaka gwa 1938, bo bwali burhanzi abagwerhe obulangalire bw’okulama hanw’igulu balalikwa oku baje aha Kukengera olufû lwa Yezu. Ilabiro ly’Akalalizi ly’omu lusiku 1/3/1938, lidesire ntya: “Kuli kwinja kunashinganine [abantu b’ebindi bibuzi] bakaja muli eyo ntimanano n’okubona ebijirwako. . . . Ako kasanzi kanaba kakubashagalula nabo.” Nka kula abantu baja oku buhya lyo balola ebyajirikanako, abantu b’ebindi bibuzi banashagalukire okuja aha Kukengera olufû lwa Yezu lyo balola ebyajirwa.

7. Bulya gurhi abantu b’ebindi bibuzi bajira irala ly’okuyumvirhiza ehotuba egera amango g’Okukengera olufû lwa Yezu?

⁷ Abantu b’ebindi bibuzi nabo banarhanye oku bulangalire bwabo. Bajira irala ly’okuyumvirhiza ehotuba egera amango g’Okukengera olufû lwa Yezu, bulya ecigabi cinji cayo cinasegeze ebi Kristu na balya 144 000 bayish’irhambula haguma naye bayishijirira bene bantu bishwekerezi omu kasanzi k’Oburhegesi bw’Emyaka Cihumbi. Idako ly’obulongozi  bw’Omwami wabo Yezu Kristu, abo bami b’empingu bayishirhabala okuhindula igulu libe paradizo n’okurhabala bene bantu babe bimana. Emiliyoni y’abantu eja aha Kukengera olufû lwa Yezu lyo balola kone ebyajirwa enashagaluke bwenene omu kulola n’okurhanya lugenda amango gayisha gurhi obulebi bw’Ebibliya bwanahikirire, kwa lwiganyo, obulebi buli omu Izaya 35:5, 6; 65:21-23; n’Amafulûlo 21:3, 4. Erhi barhanya gurhi akalamo kabo n’ak’abazigirwa babo kayishiyorha omw’igulu lihyahya, banazibuhye obulangalire bwabo bw’amango gayisha n’okuzibuhya omuhigo gwabo gw’okugendekera kwakolera Yehova.​—Mt. 24:13; Gl. 6:9.

8. Cindi cirhumire cihi cirhuma abantu b’ebindi bibuzi baja aha Kukengera olufû lwa Yezu?

⁸ Olole ecindi cirhuma abantu b’ebindi bibuzi baja aha Kukengera olufû lwa Yezu. Banalonze okuyerekana oku bazigire abashîge amavurha banabalunzire okuboko. Akanwa ka Nnâmahanga kali erhi kalebire oku hakabire olushangi lwa hofi-hofi egarhi k’abashîge amavurha n’abagwerhe obulangalire bw’okulama hanw’igulu. Omu njira nci? Rhuganirire nyiganyo nsungunu.

9. Bici obulebi buli omu Zakariya 8:23 buyerekine lugenda oku abantu b’ebindi bibuzi barhanya okubiyerekire abashîge amavurha?

⁹ Osome Zakariya 8:23. Obo bulebi buyerekine entanya nyinja abantu b’ebindi bibuzi bajira lugenda bene wabo na bali babo bashîge amavurha. Enderho “Omuyahudi” na “ninyu” ziganirire cikundi ciguma, k’okuderha, abashîge amavurha basigîre. (Rm. 2:28, 29) “Bantu ikumi b’amashanja ga ngasi lulimi” bashushanyize ebindi bibuzi. “Bagwarhira Omuyahudi oku,” k’okuderha, banabêre bishwekerezi oku bashîge amavurha, omu kucilunga haguma nabo omu nterekêro ecîre. Co cirhuma omu budufu bw’Okukengera olufû lwa Yezu, abantu b’ebindi bibuzi banayerekane oku bali bishwekerezi oku bashîge amavurha omu kuba haguma nabo kuli olo lusiku.

10. Bici Yehova ajijire omu kuhikirizibwa kw’obulebi buli omu Ezekiyeli 37:15-19, 24, 25?

¹⁰ Osome Ezekiyeli 37:15-19, 24, 25. Omu kuhikirizibwa k’obo bulebi, Yehova alunzire abashîge amavurha n’abantu b’ebindi bibuzi omu cinyabuguma cirhankahwa. Obo bulebi buganirire rhurhi rhubirhi. Abagwerhe obulangalire bw’okuja empingu bali nka karhi “ka Yuda” (bûko abami b’e Israheli bakagirhengamwo), n’abagwerhe obulangalire bw’okulama hanw’igulu bali nka karhi “ka Efrayimu.” * Yehova akalunzire ebyo bikundi bibirhi na buzinda byanaba “karhi kaguma.” Oko kuli kuderha oku bakakozire omu cinyabuguma idako ly’obulongozi bw’Omwami wabo muguma, Yezu Kristu. Ngasi mwaka, abashîge amavurha n’ebindi bibuzi banaje aha Kukengera olufû lwa Yezu, arhali mpu nka bikundi bibirhi biberulukine, cikone nka “buso buguma” buli bwayabulwa na “lungere muguma.”​—Yn. 10:16.

11. Njira ehi nkulu “ebibuzi” biganirirwe omu Mateyo 25:31-36, 40 bilungamw’okuboko bene wabo Kristu?

¹¹ Osome Mateyo 25:31-36, 40, Mashi Bible. “Ebibuzi” bya mw’olu lwiganyo bishushanyizibwe n’abashinganyanya b’omu mango mazinda bagwerhe obulangalire bw’okulama hanw’igulu, k’okuderha, ebindi bibuzi. Enjira nkulu ebindi bibuzi bagendekeramwo baba bishwekerezi oku bashîge amavurha ba Kristu kuba kubalunga okuboko omu kuhikiriza omukolo munene gw’omw’igulu lyoshi, k’okuderha, okuhubiri n’okujira abanafunzi.​—Mt. 24:14; 28:19, 20.

12-13. Omu zindi njira zihi abantu b’ebindi bibuzi bayerekanamwo oku balunzire okuboko bene wabo Yezu?

¹² Ngasi mwaka omu migobe eri embere z’amango rhwajira Okukengera olufû lwa Yezu,  abantu b’ebindi bibuzi banayerekane oku balunzire okuboko bene wabo Kristu omu kujira n’obushiru akampanye k’omw’igulu lyoshi k’okulalika abasimisibwe lyo bayisha aha Kukengera olufû lwa Yezu. (Olole ecisanduku cidesire “ K’Ocirheganyize Embere z’Akasanzi Okubiyerekire Okukengera Olufû lwa Yezu?”) Banarhabale okurhôla emihigo eshinganine ly’Okukengera olufû lwa Yezu kujirwa omu ngasi cigamba c’omw’igulu lyoshi, ciru akaba nta muntu walya omugati erhi kunywa idivayi olimo. Abantu b’ebindi bibuzi baba bashagalukire okulunga okuboko bene wabo Yezu muli eyo njira. Abantu b’ebindi bibuzi baba bahugûsirwe oku Yezu anabone oku ebi bajirire bene wabo bashîge amavurha ko banali nka ye banabijirire.​—Mt. 25:37-40.

¹³ Bindi birhumire bihi birhuma rhwaja aha Kukengera olufû lwa Yezu ciru akaba obulangalire bwirhu buli bwakulama empingu erhi hanw’igulu?

14. Gurhi Yehova na Yezu barhuyeresiremwo obuzigire bunji?

¹⁴ Rhunavuge Yehova na Yezu omunkwa oku buzigire barhuyeresire. Yehova ayerekine oku arhuzigira omu njira nyinji, cikone haba njira nguma eba nkulu y’ezindi zoshi. Nnâmahanga wirhu ayerekine obuzigire bw’okurhacikaliza omu kurhuma Omugala muzigirwa alibuke anafê erhi rhwe rhurhuma. (Yn. 3:16) Kandi rhuhugûsirwe oku Yezu naye ayerekine obuzigire bwa ntyo erhi aba mubidu okuhâna obuzine bwage erhi rhwe rhurhuma. (Yn. 15:13) Rhurhakahash’ilipa Yehova na Yezu kuli obo buzigire barhuyeresire. Cikone rhwanayerekana kugerera akalamo kirhu ka ngasi lusiku oku rhuvuzire omunkwa. (Kl. 3:15) Na kandi rhunaje aha Kukengera olufû lwa Yezu lyo rhukengera obuzigire barhujirako na lyo nirhu rhubayereka oku rhubazigire.

15. Bulya gurhi abashîge amavurha n’abantu b’ebindi bibuzi bashagalukira bwenene engalo y’engombôlo?

¹⁵ Rhuba rhushagalukire bwenene engalo y’engombôlo. (Mt. 20:28) Abashîge amavurha basima engombôlo bwenene, bulya yoyanahashise okuhikirira kw’obulangalire bwabo. Kugerera obuyemere bwabo omu nterekêro Yezu ahânaga, Yehova adesire oku bali bashinganyanya anabayemera nka bana bage balere. (Rm. 5:1; 8:15-17, 23) Abantu b’ebindi bibuzi nabo banavuge omunkwa okubiyerekire engombôlo. Bulya bajira obuyemere omu nterekêro Yezu ahânaga, baba bacîre omu masu ga Nnâmahanga, banamuha enterekêro ecîre, banagwerhe obulangalire bw’okuyish’irhenga “omu malibuko madârhi.” (Maf. 7:13-15) Enjira nguma abashîge amavurha n’abantu b’ebindi bibuzi bayerekanamwo oku bavuzire omunkwa okubiyerekire engombôlo, kuba kukaja aha Kukengera olufû lwa Yezu ngasi mwaka.

16. Cindi cirhumire cihi cirhuma rhwaja aha Kukengera olufû lwa Yezu?

¹⁶ Ecindi cirhuma rhwaja aha Kukengera olufû lwa Yezu kuli kubona oku rhuba rhulonzize rhurhumikire Yezu. Rhube rhugwerhe obulangalire bw’okuyishilama empingu erhi bw’okuyishilama omu paradizo hanw’igulu, rhunarhumikire irhegeko Yezu ahânaga omu budufu arhondezagya Okukengera olufû lwage, erhi aderha ntya: “Mukâjira ntyo lyo munkengêra.”​—1 Kr. 11:23, 24.

17. Gurhi Okukengera olufû lwa Yezu kurhurhabalamwo rhuyegere Yehova?

¹⁷ Rhunayegere Yehova. (Yk. 4:8) Nk’oku rhwayizire, Okukengera olufû lwa Yezu kunarhuhe obulyo bw’okurhanya okubiyerekire  obulangalire Yehova arhuhîre n’obuzigire bunji arhuyeresire. (Yer. 29:11; 1 Yn. 4:8-10) Erhi rhurhanya okubiyerekire obulangalire bwirhu bw’amango gayisha n’obuzigire Nnâmahanga arhujirako, na nirhu rhunazibuhye obuzigire rhumujirako n’obwîra bwirhu haguma naye.​—Rm. 8:38, 39.

18. Bici okurhanya oku lwiganyo lwa Yezu kurhushumya rhujire?

¹⁸ Rhunashumibwe okuyiga olwiganyo lwa Yezu. (1 Pt. 2:21) Omu nsiku ziri embere z’amango rhwajira Okukengera olufû lwa Yezu, rhunasegeze obwenge bwirhu oku myanzi eganirirwe omu Bibliya okubiyerekire emigobe mizinda y’akalamo ka Yezu hanw’igulu, olufû lwage, n’okufûka kwage. Ehotuba ejirwa ebijingo by’olusiku lw’Okukengera olufû lwa Yezu, enarhukengeze obuzigire Yezu arhujirako. (Ef. 5:2; 1 Yn. 3:16) Erhi rhusoma n’okurhanya okubiyerekire olwiganyo lwa Yezu lw’okucihâna enyanya z’abandi, rhunaciyumve rhusezibwe ‘rhube n’olugendo luli nk’olugendo âli agwerhe.’​—1 Yn. 2:6.

19. Gurhi rhwakabêramwo omu buzigire bwa Nnâmahanga?

¹⁹ Rhunanahige okugendekera rhwabêra omu buzigire bwa Nnâmahanga. (Yd. 20, 21) Rhwanabêra omu buzigire bwa Nnâmahanga omu kujira okwirhu koshi lyo rhumurhumikira, lyo rhucêsa izino lyage, n’okushagalula omurhima gwage. (Mig. 27:11; Mt. 6:9; 1 Yn. 5:3) Okuja aha Kukengera olufû lwa Yezu kunarhushumye rhulame omu njira eri nk’ebwizire Yehova ntya: ‘Ndonzize mbêre omu buzigire bwawe ensiku n’amango!’

20. Birhumire binja bihi rhugwerhe by’okuja aha Kukengera olufû lwa Yezu?

²⁰ Rhube rhugwerhe obulangalire bw’okuyishilama empingu erhi bw’okuyishilama omu paradizo hanw’igulu, rhugwerhe ebirhumire binja by’okuja aha Kukengera olufû lwa Yezu. Erhi rhurhimanana haguma ngasi mwaka olo lusiku, rhunabe erhi rhuli rhwakengera olufû lwa muntu mulebe rhuba rhuzigire bwenene, k’okuderha Yezu Kristu. Na kulusha byoshi, rhunakengere ecijiro c’obuzigire bunji bwenene, k’okuderha obuzigire Yehova arhuyeresire omu kuhâna Omwana wage ngombôlo. Ogu mwaka, Okukengera olufû lwa Yezu kwajirwa Lwa Karhanu, nsiku 15/4/2022. Rhuba rhuzigire Yehova n’Omugala, co cirhumire amango g’Okukengera olufû lwa Yezu, nta kantu koshi-koshi kashinganine kabe ka bulagirire kulusha okuja aha Kukengera olufû lwa Yezu.