ECIGABI C’OKUYIGA 41
Ebi Rhwakajira ly’Omwanafunzi Wirhu w’Ebibliya Ahikira Obubatizo—Cigabi Cirhanzi
“Muli maruba ga Kristu rhwasiribaga rhwênene.”—2 KR. 3:3.
LWIMBO 78 ‘Kufundisha Neno la Mungu’
EBI RHWAYIGA *
Ka hali obundi bushagaluke bulushire okubona omwanafunzi rhwayigirizagya Ebibliya ahikira aha ayerekana obuzigire bwage n’okubatizibwa? (Olole ecifungo ca 1)
1. Gurhi olwandiko lwa 2 Abakorinti 3:1-3, lurhurhabire rhuhugûkwe oku luli lukengwa lunene okuyiga Ebibliya haguma n’omuntu kuhika ahikire aha abatizibwa? (Olole enfoto eri oku cijalada.)
GURHI ociyumva erhi obona omwanafunzi w’Ebibliya w’omu cigamba cinyu ahikira aha abatizibwa? Kobinali onashagaluke bwenene! (Mt. 28:19) N’erhi akaba we wayigirizagya oyo mwanafunzi Ebibliya, erhi ahikira aha abatizibwa onayumve nk’omurhima gwabasha n’obushagaluke! (1 Ts. 2:19, 20) Omwanafunzi muhyahya obatizibwe aba nka “maruba g’okucimanyisa,” arhali kuli olya bayigaga haguma naye Ebibliya yene cikone n’oku cigamba coshi.—Osome 2 Abakorinti 3:1-3.
2. (a) Idoso lihi rhushinganine rhucidose na bulya gurhi? (b) Indi ye rhwakaderha oku akola ali mwanafunzi w’Ebibliya? (Olole amahugûlo g’idako.)
2 Kuli kwa bushagaluke bwenene okubona oku mw’eyi myaka ini egezire, rhwalongozize hofi ngasi mwezi mafunzo 10 000 000 g’Ebibliya. * Na kandi mw’eyo myaka hofi bantu 280 000 bahikîre aha babatizibwa ngasi mwaka n’okuba Bahamirizi ba Yehova na banafunzi ba Yezu. Gurhi rhwakarhabala eyo miliyoni y’abantu eri yayiga Ebibliya ehikire aha yabatizibwa? Mw’aka kasanzi Yehova acilembire abantu n’okubaha obulyo bw’okuyiga Ebibliya, rhushinganine rhujire okwirhu koshi rhubarhabale bahikire aha babatizibwa. Amango gayofihire!—1 Kr. 7:29a; 1 Pt. 4:7.
3. Bici rhwaganirira mw’eci cigabi okubiyerekire okulongoza ifunzo ly’Ebibliya?
3 Okubona obulagirire bw’ogo mukolo, Embaraza Eri Yalongoza yadosîze tawi nguma-nguma gurhi rhwakajira lyo rhuhikira aha rhwarhabala abanafuzi birhu b’Ebibliya bajire amajambere g’ekiroho n’okuhikira aha babatizibwa. Mw’eci cigabi n’ecikulikire rhwabona gurhi rhwakayiga obulenga bwa bapainiya, bamisionere n’abangalizi bw’omuzunguko. * (Mig. 11:14; 15:22) Rhwahugûkwa ebi abalimu n’abanafunzi b’Ebibliya bakajira lyo ifunzo lyabo lijira amajambere minja. Mw’eci cigabi rhwaganirira bintu birhanu byakarhabala omwanafunzi w’Ebibliya ajire amajambere anahikire aha abatizibwa.
MUKAYIGA NGASI MUGOBE
Wanamudosa erhi hali aha mwakakatamala lyo mukaganîraho (Olole ecifungo ca 4-6)
4. Bici rhushinganine rhuhugûkwe okubiyerekire omwanafunzi oli wayigira Ebibliya oku mulango gwage?
4 Bene wirhu banji na bali birhu banji banalongoze amafunzo g’Ebibliya n’abantu buzira kuyegerezibwa omu nyumpa zabo. Eyo eri njira y’okushumya omuntu abe n’irala ly’okuyiga Ebibliya, cikone enganîro zinakahwa duba-duba na kandi kuba kuzibu okuyiga n’oyo muntu ngasi mugobe. Lyo barhabala oyo muntu abe n’irala ly’okuyiga Ebibliya, banamuhûne enimero yage y’etelefone lyo bakamurhumira emesaje erimw’olwandiko lw’Ebibliya embere z’olusiku bayishimubona. Abantu banakolese eyo njira myezi erhali minyi. Cikone, k’eyo njira yanarhabala oyo mwanafunzi ahikire obubatizo erhi akaba arhali ajira * kasanzi kanji omu kuyiga Akanwa ka Nnamahanga? Nkaba birhakahashikana oyo mwanafunzi ajire majambere.
5. Nyiganyo zihi Yezu adesire ziri omu Luka 14:27-33, rhwakakolesa lyo rhurhabala omwanafunzi w’Ebibliya?
5 Yezu ahanyîre olwiganyo luhugwîre ebi omuntu akajire lyo aba mwanafunzi wage. Aganîrira olwiganyo lw’omuntu walonza okuyubaka omutungo (munara) n’olw’omwami walonza mpu aj’ilwisa owabo. Yezu aderha oku oyo walonza okuyubaka ashinganine “arhang’ibwarhala aganje bici gwafa” ly’abona erhi agwerhe ezayishiguyunjuza. Na kandi aderha oku oyo mwami ashinganine “arhang’ibwarhala egerereze” abone erhi omurhwe (basoda) gwage gwanahash’ilwisa oyo wabo mwami. (Osome Luka 14:27-33.) Kwo n’oko Yezu al’imanyire oku ly’omuntu aba mwanafunzi wage ashinganine arhang’idamala arhanye bwinja alole erhi ayishihash’iba mwanafunzi wage. Co cirhumire, rhushinganine rhuhe abanafunzi birhu b’Ebibliya omurhima bakayiga Ebibliya ngasi mugobe. Gurhi rhwakabarhabalamwo?
6. Bici rhushinganine rhujire lyo rhurhabala omwanafunzi ajire amajambere?
6 Oku wakajira ly’ogendekeza ifunzo liri lyajirirwa oku mulango gw’omwanafunzi. Nkaba mwanakaganirira lwandiko luguma erhi abirhi ngasi kumulambagirira. Han’obona oku oyo mwanafunzi akola ashagalukire enshambalo, wanamudosa erhi hali aha mwakakatamala lyo mukaganîraho. Ishuzo ahâna lyayerekana erhi ashagalukire okuyiga Ebibliya erhi nanga. Ly’omurhabala ajire amajambere wanamudosa erhi arhakasima mukayiga kabirhi omu mugobe. Cikone hali ebindi oshinganine ojire kulusha okuyiga naye liguma erhi kabirhi omu mugobe.
AKARHEGANYA NGASI CIGABI C’OKUYIGA
Okarheganya bwinja ngasi cigabi mwayish’iyiga, arhabale n’omwanafunzi wawe naye ahugûkwe gurhi akakarheganya (Olole ecifungo ca 7-9)
7. Gurhi omwalimu akacirheganya bwinja oku ngasi cigabi c’okugendiyiga haguma n’omwanafunzi wage w’Ebibliya?
7 Nka mwalimu, oshinganine okarheganya bwinja ngasi cigabi mwayish’iyiga. Wanarhonderera oku mwanzi mwayish’iyiga na kandi olole gurhi amandiko ga muli gagulunzire okuboko. Ohugûkwe bwinja ebintu by’obulagirire. Orhanye oku cirhwe c’omwanzi mwayiga, ebirhwe bisungunu, amadoso gw’okuyiga, amandiko galiko oluderho “osome,” enfoto, n’evideo yakakurhabala okuhugûla ogo mwanzi. Buzinda orhanye oku mwanafunzi wawe, olole gurhi wakayishimuhugûlira ogo mwanzi omu njira akahash’ihugûkwamo na kandi erhya yakamurhabala akolese ebi ayigaga.—Neh. 8:8; Mig. 15:28a.
8. Bici ebi entumwa Paolo yakagijira biri omu Abakolosi 1:9, 10, byakarhuyigiriza okubiyerekire okusalira lugenda omwanafunzi?
8 Embere orhondere warheganya ebi mwayish’iyiga n’omwanafunzi wawe, wanarhangibwira Yehova kugerera isala okubiyerekire oyo mwanafunzi n’amalagirire gage. Ohûne Yehova akurhabale oyigirize oyo mwanafunzi Ebibliya omu njira yakamuhuma oku murhima. (Osome Abakolosi 1:9, 10.) Orhangicidosa wene bintu bihi biri mw’ogo mwanzi omwanafunzi arhashihugûkwe duba-duba erhi kubiyemera ho n’aho. Ohugûkwe oku omuhigo gwawe kuli kumurhabala ahikire obubatizo.
9. Gurhi omwalimu w’Ebibliya akarhabala omwanafuzi wage akarheganya ebi bayishiyiga? Ohugûle.
9 Rhunalangalire oku ebi rhuli rhwayiga n’omwanafunzi w’Ebibliya byamurhabala ashagalukire ebi Yehova na Yezu bamujirire n’oko kwarhuma aba n’irala ly’okuciyigiriza bintu binji. (Mt. 5:3, 6) Omwanafunzi anayunguka n’ebi ali ayiga erhi akakaciha akasanzi kw’okubirhanyako. Co cirhumire rhushinganine rhumurhabale ahugûkwe bulya gurhi kuli kwa bulagirire okusoma n’okurheganya embere ecigabi rhwayishiyiga n’okurhanya gurhi akakolesa ebi ali ayiga omu kalamo kage. Gurhi wakamurhabala akarheganya ebi mwayishiyiga? Orheganye cigabi ciguma haguma naye ly’abona gurhi akajira. * Omuhugûlire gurhi akakabonamwo ishuzo lya ho n’aho oku ngasi idoso na nk’amalibona analigeza kw’omustari lyayish’ilikengera. Omubwire ahâne ishuzo omu binwa byage buzira kulisoma. Erhi akakajira ntyo, oko kwanakurhabala omanye erhi ali ahugûkwa ebi muli mwayiga. Cikone, hali akandi kantu wakarhabalako omwanafunzi wawe ajire.
OMUYEREKE GURHI AKAKAGANÎRA NA YEHOVA NGASI MANGO
Orhabale omwanafunzi wawe akaganiza Yehova ngasi lusiku kugerera isala (Olole ecifungo ca 10-11)
10. Bulya gurhi kuli kwa bulagirire omwanafunzi akasoma Ebibliya ngasi lusiku, na bici ashinganine okujira ly’ayunguka n’ebyo ali asoma?
10 Enyuma z’okuyiga ngasi mugobe haguma n’omwalimu wage, omwanafunzi ashinganine ahugûkwe oku hali ebindi ashinganine akajira yene ngasi lusiku. Ashinganine akaganiza Yehova. Gurhi akakajiramwo ntyo? Omu kukayumvirhiza Yehova n’okumuganiza. Anayumvirhiza Nnamahanga omu kusoma Ebibliya ngasi lusiku. (Yoz. 1:8; Enna. 1:1-3) Omurhabale ahugûkwe gurhi akakasoma Ebibliya omu kushimba eprograme edesire “Programu ya Usomaji wa Biblia” eri oku jw.org. * Ly’ayunguka n’obusomi bwage bw’Ebibliya, omurhabale akahugûkwa bici ebi ali asoma bimuyigirizize kuli Yehova na gurhi akabikolesa omu kalamo kage ka ngasi lusiku.—Ebj. 17:11; Yk. 1:25.
11. Gurhi omwanafunzi akayiga oku naye akasalira na bulya gurhi kuli kwa bulagirire akashenga Yehova ngasi mango?
11 Orhabale omwanafunzi wawe akaganiza Yehova ngasi lusiku kugerera isala. Okajira isala lirhenzire oku omurhima embere murhondere ifunzo n’enyuma z’okuyiyusa na mw’ago masala abirhi okahiremo amalagirire gw’omwanafunzi. Amango ali ayumva gurhi oli wasalira, oko kwanamurhabala ayige gurhi akakajira isala lirhenzire oku murhima omu kuli yerekeza Yehova kugerera okw’izino lya Yezu. (Mt. 6:9; Yn. 15:16) Orhanye kunganaci okusoma Ebibliya ngasi lusiku (kuyumvirhiza Yehova) n’okusalira (kuganiza Yehova) kwakarhabala omwanafunzi w’Ebibliya ayegere Nnamahanga! (Yk. 4:8) Okuba n’oborhere bwa ntyo kwanarhabala omwanafunzi ahikire okucihâna emwa Yehova n’okubatizibwa.
OMURHABALE AJIRE OBWÎRA BWA HOFI-HOFI HAGUMA NA YEHOVA
12. Gurhi omwalimu w’Ebibliya akajira lyo arhabala omwanafunzi ajire obwîra bwa hofi-hofi haguma na Yehova?
12 Ebi omwanafunzi ali ayiga birhashinganini bikaja omu irhwe mone, cikone bishinganine bikahuma oku murhima. Bulya gurhi oko kuli kwa bulagirire? Omurhima gwirhu, kw’okuderha irala lirhu, oku rhuciyumva n’entanya zirhu byo bishumya ebijiro birhu. Yezu ali mwigiriza wakag’irhabala abantu bahire ebi akag’ibayigiriza omw’irhwe. Cikone abantu bakag’imushimba bulya emirhima yabo yakag’iyâka erhi bakayumvirhe enyigirizo zage. (Lk. 24:15, 27, 32) Omwanafunzi wawe w’Ebibliya akwanine abone Yehova nka Muntu ohaba, ly’ajira obwîra bwa hofi-hofi haguma naye na ntyo anajira okwage koshi lyakamubona nk’Ishe, Nnamahanga wage na Mwîra wage. (Enna. 25:4, 5) Omu kasanzi k’ifunzo, orhabale omwanafunzi ahugûkwe amorhere ga Yehova. (Lub. 34:5, 6; 1 Pt. 5:6, 7) Okasegeza amorhere ga Yehova erhi Obumuntu bwage omu ngasi cigabi muli mwayiga. Orhabale omwanafunzi ashagalukire amorhere ga Yehova, nk’obuzigire, obuhânyi n’obonjo. Yezu adesire oku “irhegeko likulu omu marhegeko” goshi kuli “kuzigira Yehova Nyamuzinda wawe.” (Mt. 22:37, 38, NWT) Orhabale omwanafunzi wawe azigire Yehova n’omurhima goshi.
13. Ohâne olwiganyo luyerekine gurhi wakarhabala omwanafunzi w’Ebibliya ayige bintu binji okubiyerekire oborhere bwa Yehova.
13 Omu nganîro zawe haguma n’omwanafunzi okamuyereka kunganaci oba ozigire Yehova. Oko kwanarhabala omwanafunzi ahugûkwe oku ashinganine acijirire obwîra bwa hofi-hofi haguma na Yehova. (Enna. 73:28) Kwa lwiganyo, ka hali olwandiko erhi mustari guli omu citabu muli mwayiga guhumire oku murhima gwawe gufulwîre oborhere bwa Yehova, nk’obuzigire, obwenge, obushinganyanya n’obuhashe? Oluganîrire omwanafunzi wawe, onamuyereke oku ako kali kantu kaguma karhuma wazigira Larha wirhu w’omu mpingu. Cikone hali akandi kantu omwanafunzi akajira ly’ahikira aha abatizibwa.
OMUHE OMURHIMA AKAJA OKU NTIMANANO Z’ECIGAMBA
Okaha abanafunzi bawe omurhima barhangire okuyisha oku ntimanano duba-duba nka bihashikine! (Olole ecifungo ca 14-15)
14. Bici olwandiko lwa Abahabraniya 10:24, 25 lurhubwizire, byakarhabala omwanafunzi w’Ebibliya ajire amajambere?
14 Rhuba rhulonzize abanafunzi birhu boshi bahikire aha babatizibwa. Okuguma wakabarhabalamwo, kuli kubaha omurhima bakaja oku ntimanano z’ecigamba. Abigiriza bw’obulenga badesire oku kuba kulembu oku banafunzi bajira enkomêdu y’okuja oku ntimanano y’ecigamba okujira amajambere g’ekiroho. (Enna. 111:1) Hali abalimu b’Ebibliya babwîra abanafunzi babo oku hali bintu binji bayiga omu ntimanano bilushire ebi bayigira aha ka. Osome Abahabraniya 10:24, 25 haguma n’omwanafunzi, buzinda omuhugûlire obunguke akaba nabo erhi akaja oku ntimanano. Mulole haguma evideo edesire Kwa Kawaida Tunafanya Nini Kwenye Jumba la Ufalme? * Orhabale omwanafunzi ahugûkwe obulagirire bw’okukaja oku ntimanano zirhu za ngasi mugobe.
15. Gurhi rhwakajira lyo rhuha omwanafunzi omurhima akayisha oku ntimanano ngasi mugobe?
15 Gurhi wakajira erhi akaba omwanafunzi arhasag’ija oku ntimanano ciru n’olusiku luguma erhi arhayirukiri kuja ngasi mango? Omuganîrire ebi wayizire oku ntimanano y’omugobe gugezire. Oko kwanamushumya ayishe kulusha okumulalika aku ayishe oku ntimanano. Omuhe Ilabiro ly’Akalilizi erhi Buku la Mukutano (Ciswahiri c’e Congo) muli mwayiga omu ntimanano y’ecigamba. Omuyerese ebigabi byaganirirwa omu ntimanano y’emigobe ekulikire onamudose cigabi cihi ayumvirhe cimushagalwire. Ebi omwanafunzi wawe abona n’okuyumva olusiku lurhanzi ayisha oku ntimanano zirhu byalusha ebintu byoshi akola ayumvirhe omu zindi ntimanano z’amadîni. (1 Kr. 14:24, 25) Abuganana n’abandi bantu akayiga enyiganyo zabo na kandi balya bakamurhabala ahikire obubatizo.
16. Bici bihunyirwe okujira lyo rhurhabala omwanafunzi w’Ebibliya ahikire obubatizo, na bici rhwaganirira omu cigabi cikulikire?
16 Gurhi rhwakalongoza amafunzo g’Ebibliya gahikira obubatizo? Rhwanarhabala omwanafunzi arhôle omuhigo gw’okuyiga Ebibliya kwa buzibu-zibu, na kandi rhumuhe omurhima abe n’akasanzi kw’okuyiga ngasi mugobe n’okurheganya ngasi cigabi ayish’iyiga. Na kandi rhwanamurhabala akaganîra na Yehova ngasi mango ly’ajira obwîra bwa hofi-hofi haguma Naye. Rhwanarhabala omwanafunzi akaja oku ntimanano z’ecigamba ngasi mango. (Olole ecisanduku cidesire “ Ebi Abanafunzi Bakajira lyo Bahikira Obubatizo.”) Cikone, nk’oku ecigabi cikulikire cayishiyerekana, hali bindi bintu birhanu omwalimu w’Ebibliya akajira ly’arhabala abanafunzi bahikire obubatizo.
LWIMBO 76 Unahisije?
^ kip. 5 Okuyigiriza omuntu, kuli kumurhabala “aciyumve, arhanye, erhi kujira ebintu omu njira mpyahya.” Olwandiko lw’omwaka gwa 2020 lwa Mateyo 28:19, lurhukengezize obulagirire bw’okuyigiriza abantu Ebibliya n’okubarhabala bahikire aha babà banafunzi ba Yezu Kristu babatize. Eci cigabi n’ecikulikire byarhurhabala rhubone bulya gurhi rhushinganine rhukubule entanya zirhu okubiyerekire ogo mukolo gw’obulagirire.
^ kip. 2 AMAHUGÛLO GA NDERHO NGUMA NA NGUMA: Erhi wakakajira enganîro z’Ebibliya ngasi mango haguma n’omuntu omu njira rhukolesa lyo rhuyiga Ebibliya haguma n’abantu, omu ntyo wanaderha oku oli walongoza ifunzo. Wanahâna eripoti y’ifunzo ly’Ebibliya erhi akaba wajijire enganîro n’oyo muntu bwa kabirhi enyuma z’okubonana oburhangiriza na kandi oyemire n’obwalagale oku eyo funzo yagendekera.
^ kip. 3 Mw’eci cigabi muli ebintu rhwaganiriraga omu bigabi byaliyerekire “Kuongoza Mafunzo ya Biblia Yenye Maendeleo” byali omu Huduma Yetu ya Ufalme y’Omwezi gwa 7, 2004 kuhika Mwezi gwa 5, 2005.
^ kip. 4 Ogu mwanzi guganirire omulume erhi omukazi oli wayiga Ebibliya.
^ kip. 9 Omuyereke evideo y’eminiti ini edesire Tuonyeshe Wanafunzi Wetu Namna ya Kutayarisha. Oku jw.org, oje aha bayandisire MAKTABA > VIDEO > MIKUTANO NA KAZI YETU YA MAHUBIRI > TUKOMALISHE UFUNDI WETU.
^ kip. 10 Oku jw.org, oje aha bayandisire MAKTABA > VITABU NA BROSHUA.
^ kip. 14 Oku jw.org oje aha bayandisire MAFUNDISHO YA BIBLIA > VYOMBO VYA KUSAIDIA KUJIFUNZA BIBLIA > UJIFUNZE KWENYE MIKUTANO YETU YA WATU WOTE.
