1. Muhigo guhi mwinja bwenene ngasi muguma akarhôla?

KANJI-KANJI, emihigo ababusi barhôla enakahûma oku bana babo. Erhi ababusi bakarhôla emihigo y’obuhwinja enakalerhera abana babo amazibu. Cikoki erhi bakarhôla emihigo n’obwenge, abana babo banaba n’obushagaluke n’akalamo k’obololoke. Cikone omwana naye anarhôla emihigo minja. Omuhigo mwinja bwenene ngasi muguma akarhôla kuli kukolera Larha wirhu w’omu mpingu, Yehova.​—Enna. 73:28.

2. Mihigo mici minja Yezu n’ababusi bage barhôzire?

² Yozefu na Mariya barhâbire abana babo bakolere Yehova. Emihigo bakagirhôla yakag’iyerekana bici byo biri bya bulagirire omu kalamo kabo. (Lk. 2:40, 41, 52) Yezu naye arhôzîre emihigo minja yamurhabalâga okujira ebi Yehova al’ilonzize ajire. (Mt. 4:1-10) Yezu akula n’oborhere bwinja, obwishwekerezi n’obushiru​—ngasi mubusi yeshi anasima abe n’omwana wa ntyo.

3. Madoso gahi rhwashuzako mw’eci cigabi?

³ Mw’eci cigabi rhwashuza kw’aga madoso: Mihigo ehi yaliyerekire Yezu Yehova arhôzire? Gurhi ababusi Bakristu bakayiga olwiganyo lwa Yozefu na Mariya lw’okurhôla emihigo? Na kandi bici Abakristu baciri misole bakayiga kugerera oku Yezu akag’irhôla emihigo?

4. Muhigo guhi gwa bulagirire Yehova arhôzire okubiyerekire Omugala?

⁴ Yehova acishoga ababusi binja baburha Yezu. (Mt. 1:18-23; Lk. 1:26-38) Enderho za Mariya z’obwirhohye ziri omu Bibliya ziyerekine kunganaci al’izigire Yehova n’Oluderho lwage. (Lk. 1:46-55) N’oku Yozefu arhumikirâga ho n’aho ebi malahika amubwiraga,  kuyerekine kunganaci al’iyobohire Nnamahanga ananal’ilonzize amushagaluse.​—Mt. 1:24.

5-6. Kalamo kaci Yehova ayemerire Yezu alame?

⁵ Yehova arhacishogâga ababusi bagale oku bwo baburha Yezu. Enterekêro Yozefu na Mariya bahânaga erhi Yezu aburhwa eyerekine oku bali bakenyi. (Lk. 2:24) Nkaba Yozefu agwerhe italiye lisungunu akagijiriramwo omukolo gwage gw’okubinja empahu aha burhambi bw’aha mwage omu lugo lw’e Nazareti. Barhagwerhe nsaranga nyinji erhi bintu binji, cikone ogo mukolo gwage gwo gwakagilisa bana babo nda bagwerhe.​—Mt. 13:55, 56.

⁶ Yehova ayâsize Yezu mirhego miguma na miguma, cikone arhamulangaga oku mazibu goshi akabuganine nago omu kalamo kage. (Mt. 2:13-15) Kwa lwiganyo, Yezu agwerhe amazibu gw’okurhayemerwa nka Masiya n’abantu bw’omulala gwage. Orhanye kunganaci Yezu akaciyumvirhe kubi okubona abantu bw’omu mulala gwage bwo bali balahira oku arhali ye Masiya. (Mk. 3:21; Yn. 7:5) Kandi nkaba Yozefu afîre erhi na Yezu aciri musole gwa mushuko, orhanye gurhi aciyumvirhe. Erhi Yozefu afâ, bulya Yezu ye wali mwana murhanzi al’ishinganine agendekeze omukolo ishe akagijira ly’ashibirira omulala gwabo. (Mk. 6:3) Erhi aba mukulu aciyigiriza gurhi akashibirira omulala gwage. Alishinganine ajire omukolo ly’ahikiriza amalagirire gw’omubiri gw’omulala gwabo. Co cirhumire naye erhi byakahisire bijingo akagiyumva arhamire n’emikolo y’omulegerege.

7. (a) Madoso gahi abajire omu buhya balonzize okuba n’omwana bakacidosa? (b) Gurhi Emigani 2:1-6, yakarhabala ababusi bakomereze abana babo?

⁷ Akaba wajire omu buhya erhi waherusire onalonzize oyishiba n’omwana wanacidosa ntya: ‘Ka mba muntu mwirhohye, ozigira Yehova n’Oluderho lwage? Ka Yehova anacishoga niè oku mbe mubusi w’oyu mwana muhyahya?’ (Enna. 127:3, 4) Akaba okol’ojira abana, wanacidosa ntya: ‘Ka nanyereke omwana wani obulagirire bw’okujira mukolo muzibu?’ (Muh. 3:12, 13) ‘Ka nanjire okwani koshi lyo nyasa omwana wani emirhego y’omubiri n’ey’olugenzi eri yagera mw’er’igulu lya Shetani?’ (Mig. 22:3) Kuli kuzibu okuyasa omwana wawe amazibu goshi akabuganana nago. Cikone wanamurheganya oku mazibu gakamuhikira omu kalamo. Bunyi-bunyi n’omu njira y’obuzigire omuyigirize gurhi Akanwa ka Nnamahanga kakamuha amahano gakamurhabala omu kalamo. (Osome Emigani 2:1-6.) Kwa lwiganyo, akaba  hali omuntu w’omu mulala gwinyu walesire okukolera Yehova, wanakolesa olo lwiganyo ly’orhabala omwana wawe kugerera Akanwa ka Nnamahanga, ahugûkwe bulya gurhi kuli kwa bulagirire okubêra mwishwekerezi kuli Nnamahanga. (Enna. 31:23) Kandi kwa lwiganyo erhi akaba hali omuntu w’omu mulala gwawe wafîre, wanakolesa Akanwa ka Nnamahanga ly’orhuliriza omwana wawe.​—2 Kr. 1:3, 4; 2 Tm. 3:16.

8. Nk’oku biyerekinwe omu Olushika 6:6, 7, bici Yozefu na Mariya bâjijire?

⁸ Ababusi ba Yezu ba hanw’igulu bakulikîre amahano goshi Yehova aba ahire ababusi, na ntyo bamurhabala akula omukuba n’enshokano embere za Nyamuzinda. (Osome Olushika 6:6, 7.) Yozefu na Mariya bal’izigire Yehova bwenene, n’omuhigo gwabo kwali kurhabala abana babo nabo babe n’obuzigire bwa ntyo kuli Yehova.

9. Mihigo mici y’obulagirire Yozefu na Mariya barhôzire?

⁹ Yozefu na Mariya bahîga okuba n’eprograme nyinja y’ekiroho omu mulala gwabo. Buzira karhinda, bakagija oku ntimanano za ngasi mugobe zakagijirirwa omu sinagogi yali e Nazareti na kandi bakag’ija oku Pasaka yakagijirirwa e Yeruzalemu ngasi mwaka. (Lk. 2:41; 4:16) Akasanzi bakag’iba bali omu njira baja e Yeruzalemu, bakagiganîrira Yezu n’abalumuna okubiyerekire abakozi ba Yehova b’omu mango ga mîra, na kandi byanahashikana mw’eyo njira bakagilambagirira hantu haguma na haguma haganirirwe omu Bibliya. Bulya bal’ikola bagwerhe bana banji, kurhakabire kulembu okukabahêka boshi bajiharamya Yehova. Cikone okukaheka abana babo boshi oku ntimanano kwarhuma bagishwa bwenene! Okubona bakag’ihira enterekêro ya Yehova oku nafasi ntanzi omu kalamo kabo oko kwarhuma omulala gwabo goshi gwaba n’obwîra busêzire haguma naye.

10. Bici ababusi Bakristu bakwanine baciyigirize kugerera olwiganyo lwa Yozefu na Mariya?

¹⁰ Bici ababusi Bakristu bakwanine baciyigirize kugerera olwiganyo lwa Yozefu na Mariya? Akantu kw’obulagirire kuli kurhabala abana bawe babone kugerera ebijiro n’enderho zawe oku oba ozigire Yehova bwenene. Ohugûkwe oku akantu kw’obulagirire wakabaha kuli kubarhabala bazigire Yehova. N’akantu kaguma kw’obulagirire wakabayigiriza kuli kubarhabala  babe n’enkomêdu y’okuyiga Ebibliya, okusalira n’okukaja omu ntimanano n’okuja omu mahubiri. (1 Tm. 6:6) Kobinali mushinganine muhikirigize abana binyu amalagirire gabo gw’omubiri. (1 Tm. 5:8) Cikone mukengere oku obwîra busêzire abana binyu bakajira haguma na Yehova bwo bwabarhabala bayishicunguka amango er’igulu lyasherezibwa, cikone arhali obuhirhi bw’omubiri mwakabaha. *​—Eze. 7:19; 1 Tm. 4:8.

11. (a) Gurhi ihano liri omu 1 Timoteyo 6:17-19, lyakarhabala babusi barhôle omuhigo mwinja amango bali balera abana? (b) Mihigo ehi ababusi bakarhôla okubiyerekire emilala yabo na migisho ehi oko kubalerhera? (Olole ecisanduku “ Mihigo Ehi Mwakacihiriraho?”)

¹¹ Kushagalwire bwenene okubona babusi banji banarhôle emihigo minja y’ekiroho okubiyerekire emilala yabo! Banakajira enterekêro y’omulala ngasi mango, na kandi banaje oku ntimanano z’ecigamba ngasi mango n’okuja omu mukolo gw’amahubiri. Milala miguma enacihâne okugend’ihubiri omu eneo barhalug’ihubiri. N’abandi banalambagirire oku Beteli kandi erhi kulunga okuboko obubasi buli bwajirwa omw’ikubuliro. Lyo eyo milala ehikira aho binahûne erheganye ensaranga zakabarhabala na ntyo enahikire aha yalembera mazibu maguma maguma. Cikone Yehova anabagishe bwenene omu kujira ntyo. (Osome 1 Timoteyo 6:17-19.) Abana balelerwa omu milala ya ntyo banagendekere okujira ebyo bintu erhi bakula na ntyo barhaciyunjuza bulya gurhi barhôlaga ogo muhigo omu kalamo kabo! *​—Mig. 10:22.

12. Bici Yezu akahashir’ijira erhi akula?

¹² Ishe wa Yezu w’omu mpingu ensiku zoshi anakarhôla emihigo minja. Ababusi ba Yezu bahanw’igulu nabo bakag’irhôla emihigo n’obwenge. Co cirhumire erhi Yezu akula alikwanine naye yene arhôle emihigo. (Gl. 6:5) Akirhu, Yezu naye agwerhe oluhûma lw’okucishoga. Akacihizîre okulonza obunguke bwage yene, cikone ahali hw’okujira ntyo acishôga okugendekera kwajira obulonza bwa Yehova. (Yn. 8:29) Gurhi olwiganyo lwage lwakarhabala emisole ya mwakano kasanzi kirhu?

13. Muhigo guhi gwa bulagirire Yezu arhôzire amango aciri mwana w’omushuko?

¹³ Erhi Yezu ali mwana w’omushuko, acishôga okurhumikira ababusi bage. Arhakagilahira okulongozibwa n’ababusi bage mpu bulya ye w’âli gwerhe bumanye bunji. Cikone agendekera ‘okubayumva.’ (Lk. 2:51) Yezu arhôla omukolo gw’okuba nfula kwa buzibu-zibu. Ajira obushiru bwenene lyo ayiga omukolo ishe mulezi akag’ijira ly’ahikira aha arhabala omulala gwabo.

14. Bici birhuyesire oku Yezu agwerhe enkomêdu nyinja y’okusoma Akanwa ka Nnamahanga?

 ¹⁴ Ababusi ba Yezu bakag’imuganirira gurhi aburhagwa kugerera ecisomerine na gurhi abaganda ba Nnamahanga bali bamaderha bintu binji lugenda ye. (Lk. 2:8-19, 25-38) Yezu arharhimukagwa n’ebyo ababusi bage bakag’imubwira, na ntyo ajira obushiru bw’okuyiga yene Amandiko. Bici birhuyesire oku Yezu agwerhe enkomêdu nyinja y’okusoma Akanwa ka Nnamahanga? Bulya amango ali mwana wa mushûko, abalimu b’e Yeruzalemu “basomerwa n’obumanye n’amashuzo gage.” (Lk. 2:46, 47) Oku myaka 12 Yezu alikola amanyire bwinja-bwinja okw’Ishe ye Yehova.​—Lk. 2:42, 43, 49.

15. Gurhi Yezu ayerekînemwo oku al’ihizire okujira obulonza bwa Yehova?

¹⁵ Erhi Yezu ahugûkwa ebi Yehova alonzize ajire, acishôga okujira obulonza bwage. (Yn. 6:38) Al’imanyire oku bantu banji bayishimugayaguza na ntyo oko kwakamuvunyire omurhima okujira obulonza bw’Ishe. Cikone acishoga okugendekera arhumikira Yehova. Erhi Yezu abatizibwa omu mwaka gwa 29 muli Kano Kasanzi Kirhu (K.K.K.), akantu kw’obulagirire arhanyizeko kwali kujira obulonza bwa Yehova. (Hb. 10:5-7) Ciru n’amango Yezu ali oku murhi gwa malumwa, agendekera ajira obulonza bw’Ishe.​—Yn. 19:30.

16. Isomo lihi omwana akaciyigiriza kugerera olwiganyo lwa Yezu?

¹⁶ Orhumikire ababusi bawe. Aka Yozefu na Mariya, ababusi bawe nabo barhali bimana. Cikone ciru akaba ntyo, Yehova ahîre ababusi bawe omukolo gw’okukukomereza, okukulanga n’okukulongoza. Erhi wakakayumva amahano gabo n’okubakenga “ebintu byanakuyorhera bwinja.”​—Ef. 6:1-4, NWT.

17. Nk’oku biyerekinwe omu Yozwe 24:15, muhigo guhi omusole gwakarhôla gone?

¹⁷ Ocishoge oyu wakazikolera. Wene wanayerekana n’obwalagale oku ohugûsirwe Yehova yendi, omuhigo gwage na bici alonzize ojire omu kalamo kawe. (Rm. 12:2) Na ntyo wanaba n’obuhashe bw’okurhôla omuhigo gw’obulagirire omu kalamo kawe, kw’okuderha okukolera Yehova. (Osome Yozwe 24:15; Muh. 12:1) Erhi wakaba n’eprograme y’okusoma n’okuyiga Ebibliya ngasi mango, obuzigire bwawe kuli Yehova bwanayushuka n’obuyemere bwawe bwanasêra.

18. Muhigo guhi omusole gushinganine gurhôle na bunguke buci oko kwakagulerhera?

¹⁸ Ohige okuhira obulonza bwa Yehova oku nafasi ntanzi omu kalamo kawe. Igulu lya Shetani  linakayigiriza oku erhi wakakolesa obuhashe bwawe omu kucilongeza obunguke, mpu oko kwanakulerhera obushagaluke. Cikone rhumanyire oku abantu boshi bahiga okulongereza ebirugu bw’en’igulu banahikire aha bacifunda “malumwa manji omu murhima.” (1 Tm. 6:9, 10) Lubero n’oko, okukolera Yehova n’okuhiga okuhira obulonza bwage oku nafasi ntanzi omu kalamo kawe, kwanarhuma “waba n’obwenge” n’omwishingo omu kalamo.​—Yoz. 1:8, NWT.

19. Bici ababusi bashinganine bakakengera?

¹⁹ Mwe babusi mucihangane bwenene lyo murhabala omulala gwinyu gukolere Yehova. Mumulangalire, na ntyo amuhashisa okarhôla emihigo n’obwenge. (Mig. 3:5, 6) Mukakengera oku ebijiro binyu n’enderho zinyu byo byakashumya omwana winyu akolere Yehova. Co cirhumire mushinganine mukarhôla emihigo yakarhabala omwana winyu ayemererwe na Yehova.

20. Migisho ehi emisole yakaba nayo erhi yakacishoga okukolera Yehova?

²⁰ Mwe misole muhugûkwe oku ababusi binyu banamurhabala murhôle emihigo minja omu kalamo kinyu. Cikone mwene mushinganine murhôle emihigo minja yakashagalula Nnamahanga. Co cirhumire muyige olwiganyo lwa Yezu mucishoge okukolera Sho winyu w’omu mpingu. Erhi mwakajira ntyo, mwanaba na bintu binji by’okujira omu mukolo gwa Yehova na kandi mwanaba n’omwishingo mw’aka kasanzi. (1 Tm. 4:16) N’omu kasanzi kayisha mwanayish’iba n’akalamo kw’omwishingo bwenene!