1. Bulya gurhi bantu banji ene barhamanyiri ebi balimo?

HALI madîni manji ene gali gaciderha oku gali ga Cikristu n’oku banaharamye Nnâmahanga omu njira emusimisa. Eco co cirhumire bantu banji ene barhamanyiri ebi balimo! Banadose ntya: “K’idini liguma lyone ly’okuli lihaba, erhi goshi gasimisa Nnâmahanga?” K’omu bwenge bwirhu rhuba rhuyemire buzibu-zibu oku enyigirizo zirhu zo ziba z’okuli n’oku enjira Abahamirizi ba Yehova bamuharamyamo yone emusimisa? Ka kobinali byanahashikana okuyemera ntyo n’obwalagale? Rhuganirire ebirhuyemezize ntyo.

2. Nk’oku biyerekinwe omu 1 Abatesalonika 1:5, bici byarhumaga Paolo ayemera n’obwalagale oku abwine okuli?

² Entumwa Paolo yal’iyemire n’obwalagale oku abwine okuli. (Osome 1 Abatesalonika 1:5.) Ebyo aliyemire birhal’iyimangire oku akagiciyumva kone. Paolo akag’iciyigiriza Akanwa ka Nnâmahanga n’obushiru. Aliyemire oku “Amandiko goshi galongozibagwa n’iroho lya Nnâmahanga.” (2 Tm. 3:16, NWT) Bici ebi akagiciyigiriza byafulwîre? Omu Mandiko, Paolo abona ecirhumire cirhankalahirwa ciyerekine oku Yezu ye wali Masiya walaganyizibagwa, eco cirhumire abakulu b’idîni ly’Abayahudi balahira okuciyemera. Abo balyalya bakagicikunga oku bali barhumwa ba Nnâmahanga, cikone bakagimuhakana omu bijiro byabo. (Tt. 1:16) Lubero n’abo balyalya, Paolo arhacishogaga mandiko gahi g’Ebibliya akalahira n’aga akayemera. Ali mubidu okukolesa n’okuyigiriza “amahano goshi ga Nnâmahanga.”​—Ebj. 20:27, NWT.

3. Lyo rhuyemere n’obwalagale oku rhwabwine okuli, ka rhushinganine rhurhang’ibona amashuzo oku madoso girhu goshi? (Olole ecisanduku “ Emikolo ya Yehova n’Entanya Zage, ‘Yanaba Minji Bwenene Kuli Nie Okuyiganirira.’”)

³ Bantu baguma baguma banarhanye oku idîni ly’okuli lishinganine  libe n’obuhashe bw’okushuza oku madoso goshi gahaba, ciru n’oku madoso garhashuzibwi omu Bibliya. K’oko kuyumvikine? Rhuganirire olwiganyo Paolo ahânaga. Aha ababo bemezi omurhima oku ‘balabirize ebintu byoshi,’ cikone ayemera n’obwalagale oku hali ebintu naye arhalihugûsirwe. (1 Ts. 5:21, NWT) Ayandika ntya: “Ebi rhuyishi bibâ bya bihimbi,” ayushula erhi, “rhucidwirhe rhwabonera omu cilolero.” (1 Kr. 13:9, 12) Paolo arhal’ihugûsirwe ebintu byoshi, na nirhu ene rhurhaba rhuhugûsirwe ebintu byoshi. Cikone Paolo alimanyire enyigirizo z’okuli z’omusingi gw’obulonza bwa Yehova. Ebi alimanyire lugenda omuhigo gwa Yehova byamuyemeza n’obwalagale oku abwine okuli!

4. Gurhi rhwakazibuhyamwo okuyemera kwirhu oku rhwabwine okuli, na bici rhwaganirira lugenda Abakristu b’okuli?

⁴ Enjira nguma yakarhurhabala lyo rhugendekera rhwayemera n’obwalagale oku rhwabwine okuli, kuli kushushanya olwiganyo lw’enterekêro Yezu arhondezagya n’oku Abahamirizi ba Yehova baharamyamwo Nnâmahanga ene. Mw’eci cigabi, rhwabona oku Abakristu bw’okuli (1) banayake okuharamya ensanamu, (2) banakakenga izino lya Yehova, (3) babà bazigire okuli, na kandi (4) babà bazigirine bwenene.

5. Bici rhuciyigirizize kugerera Yezu lugenda enjira nyinja y’okuharamya Nnâmahanga, na gurhi rhwakakolesa oko ayigirizagya?

⁵ Obuzigire Yezu agwerhe kuli Nnâmahanga, bwamushumize aharamye Yehova yenene erhi ali omu mpingu n’erhi ali hanw’igulu. (Lk. 4:8) Ayigirizize abanafunzi bage oku nabo bakaharamya Yehova yenene. Oli Yezu oli abanafunzi bage bishwekerezi, nta muguma mulibo wakolesize ensushano ly’aharamya Nnâmahanga. Bulya Nnâmahanga liba iroho, nta kantu koshi-koshi mwene muntu akajira kakashushanya  irenge ajira! (Iz. 46:5) Cikone gurhigi rhwakaderha lugenda okujira enshushano ya bala bahamagalwa mpu batagatifu n’okukabasengera? Omu irhegeko lya kabirhi ly’omu Marhegeko Ikumi Yehova ahânaga, adesire ntya: “Orhahîraga akajira enshushano, erhi olwiganyo lw’ebiremwa [bilebe] bibâ enyanya emalunga, n’oli olw’ebiremwa bya hano igulu, n’oli eby’omu mîshi ekuzimu kw’igulu . . . Orhahîra akabaharamya.” (Lub. 20:4, 5) Ezo nderho ziyumvikine kuli bala balonzize okusimisa Nnâmahanga.

6. Lwiganyo luhi lw’okuharamya Nnâmahanga Abahamirizi ba Yehova bakulikira ene?

⁶ Abasoma eby’e histoire, bayerekine n’obwalagale oku Abakristu bw’omu myaka igana mirhanzi bakagiharamya Nnâmahanga muguma yenene. Kwa lwiganyo, citabu ciguma cihamagalwa History of the Christian Church cidesire oku Abakristu b’omu myaka igana mirhanzi “balishombire” entanya z’okuderha oku banahira enshushano ahantu bakagiharamiza. Ene nalyo, Abahamirizi ba Yehova banakulikire olo lwiganyo lw’Abakristu b’omu myaka igana mirhanzi. Rhurhashenga “abatagatifu” erhi bamalahika; ciru rhurhanashenga Yezu. Na kandi rhurhalamusa idrapo erhi kujira ecimanyiso c’okuharhamya cihugo cilebe. Ciru byakaba gurhi, rhuba rhuhizire okurhumikira ezi nderho za Yezu: “Wakaz’iharâmya Nyakasane [Yehova, NWT] Nyamuzinda wawe.”​—Mt. 4:10.

7. Lubero luhi lubonekana n’obwalagale egarhi k’Abahamirizi ba Yehova n’agandi madîni?

⁷ Ene, bantu banji banayumvirhize enyigirizo z’abakulu banji b’amabîni. Banasimirize bwenene abo balimu ciru obone bamahikira aha babaharamya. Abantu banayinjihirize amakanisa gabo, babagulire ebitabu, bahâne n’entûlo mpu lyo balunga abakulu b’amadîni okuboko. Bantu baguma na baguma banayemereze ngasi kantu kadesirwe n’abo bakulu b’amadîni. Rhurhamanyiri erhi banashagalukira Yezu ntyo erhi yenene akababonekera. Lubero n’ago madîni, abaharamya Nnâmahanga omu njira y’okuli barhajira abakulu b’idîni. Ciru akaba rhunakenge abarhulongoza, rhunayemere nyigirizo za Yezu zidesire ntya: “Muli baguma mweshi.” (Mt. 23:8-10) Rhurhaharamya muntu yeshi-yeshi, ciru akaba mukulu w’idîni erhi wa politike. Rhurhanalunga ebyabo okuboko. Lubero n’oko, rhurhacihira omu by’epolitike rhurhanaba cigabi c’er’igulu. Muli ezo njira rhuba lubero n’ebindi bikundi by’abantu baciderha mpu bali Bakristu.​—Yn. 18:36.

8. Gurhi rhumanyiremwo oku Yehova aba alonzize izino lyage likuzibwe linamanyikane omw’igulu lyoshi?

⁸ Mango maguma Yezu ashenga ntya: “Larha, kuza izino lyawe.” Yehova yenene ashuza er’isala n’izu linene lyarhengaga empingu, erhi alaganya oku akuza izino lyage. (Yn. 12:28) Yezu akuzize izino ly’Ishe kugerera omukolo gwage gw’amahubiri. (Yn. 17:26) Co cirhumire biyumvikine okubona Abakristu b’okuli banakashagalukira okukolesa izino lya Nnâmahanga n’okulimanyisa abandi bantu.

9. Gurhi Abakristu b’omu myaka igana mirhanzi bayerekinemwo oku bakenzire izino lya Nnâmahanga?

⁹ Omu myaka igana mirhanzi K.K.K., kasanzi kasungu enyuma z’okurhondeza ecigamba c’Ecikristu, Yehova, ‘acishoga omu bapagani [bantu b’amashanja, NWT] omurhwe gw’okukombêra Izino lyage.’ (Ebj. 15:14) Abo Bakristu b’omu myaka igana mirhanzi bal’ishagalukire okukolesa izino lya Nnâmahanga n’okulimanyisa abandi bantu. Bakolesize izino lya Nnâmahanga omu omukolo gw’amahubiri n’erhi bayandika Ebibliya. * Bayerekine n’obwalagale oku luli lubaga luhamagirwe okw’izino lya Nnâmahanga.​—Ebj. 2:14, 21.

10. Bici biyerekine n’obwalagale oku Abahamirizi ba Yehova lwo lubaga luhamagalwa okw’izino lya Yehova?

 ¹⁰ K’Abahamirizi ba Yehova lwo lubaga luhamagalwa okw’izino lya Yehova? Rhulole ebintu biyemezize ntyo n’obwalagale. Ene, bakulu banji b’amadîni bajijire okwabo koshi lyo bafulika ebintu biyerekine oku Nnâmahanga ajira izino. Balikuzire omu mpindûlo z’Ebibliya bahindulaga omu zindi ndimi, banahanzize okukolesa er’izino omu makanisa gabo. * Ka hali owakalahira oku arhali Abahamirizi ba Yehova bone baha izino lya Yehova obukenge n’irenge liba lishinganine? Kulusha ebindi bigusho byoshi by’amadîni, rhunamanyise abantu boshi izino lya Nnâmahanga! Co cirhumire rhunajire okwirhu koshi lyo rhushinganana okuhamagalwa okw’izino ly’Abahamirizi ba Yehova! (Iz. 43:10-12) Rhwacapisize kopi zilushire miliyoni 240 z’empindûlo y’Ebibliya ehamagalwa Biblia​—Tafsiri ya Ulimwengu Mupya, eba ekolesize izino lya Yehova ngasi hoshi libalikuzirwe omu zindi mpindûlo z’Ebibliya. Na kandi rhuli rhwacapisa ebitabu biyimangire oku Bibliya bimanyisa abandi izino lya Yehova omu ndimi 1 000 na kulusha!

11. Gurhi Abakristu b’omu myaka igana mirhanzi bayerekinemwo oku bazigire okuli?

¹¹ Yezu alizigire okuli, k’okuderha okuli okubiyerekire Nnâmahanga n’emihigo Yage. Yezu akagilama nk’oku okuli kunayerekine, anarhabire abandi nabo bamanya okuli. (Yn. 18:37) Abanafunzi b’okuli ba Yezu  nabo babà bazigire okuli bwenene. (Yn. 4:23, 24) Co carhumaga entumwa Petro yahamagala Obukristu oku yo “njira y’okuli.” (2 Pt. 2:2) Enyanya z’obuzigire bagwerhe oku okuli, Abakristu b’omu myaka igana mirhanzi balahira entanya z’idîni, enkomêdu mbi, bakalahira n’entanya za bene bantu zakagiba ziri lubero n’okuli. (Kl. 2:8) Ko n’oko ene, Abakristu b’okuli banacihangane okugendekera “bashimba okuli” omu kujira okwabo koshi ly’akalamo kabo n’obuyemere bwabo buyimangira oku Kanwa ka Yehova.​—3 Yn. 3, 4.

12. Gurhi biba erhi bene wirhu bali barhulongoza bahugûkwa oku rhushinganine rhujire empindûlo lugenda oku rhwal’ihugûsirwe kantu kalebe, na bulya gurhi bajira ntyo?

¹² Abakozi ba Nnâmahanga b’ene, barhaderha oku bohe bamanyire ngasi kantu koshi kaba omu Bibliya. Hali amango bajira amagosa okubiyerekire enyigirizo zabo n’oku ikubuliro lyabo lilongozibwa. Rhurhakasomerwa n’oko. Bulya Amandiko gayerekine n’obwalagale oku obumanye bw’okunali bunayushûke lusiku oku lundi. (Kl. 1:9, 10) Yehova anafulûle okuli bunyi-bunyi, rhunashinganine rhulindirire kuhika obulangashane bw’okuli bube kalengerere. (Mig. 4:18) Erhi bene wirhu bali barhulongoza bahugûkwa oku rhushinganine rhujire empindûlo lugenda oku rhwal’ihugûsirwe kantu kalebe, barharhindira okukubula ako kantu. Ciru akaba madîni manji gacihamagala ga Cikristu ganakajira empindûlo lyo gashagalusa abemezi bago erhi lyo bajira obwîra n’igulu, empindûlo zijirwa omw’ikubuliro lya Yehova zinakarhurhabala rhuyegere Nnâmahanga n’okushimba olwiganyo lw’okuharamya Nnâmahanga Yezu arhondezagya. (Yk. 4:4) Empindûlo rhujira zirhashimba okw’igulu lidwirhe, rhurhanazijira mpu lyo rhusimisa abantu, cikone rhunajire empindûlo kushimbana n’oku rhwahugûsirwe bwinja Amandiko. Rhuba rhuzigire okuli!​—1 Ts. 2:3, 4.

13. Borhere buhi bwa bulagirire bwayerekinwe n’Abakristu b’okuli, na gurhi bubonekana egarhi k’Abahamirizi ba Yehova ene?

¹³ Obuzigire bo bwali borhere bwa bulagirire bwenene bwakag’iyerekana ecigamba c’Ecikristu c’omu myaka igana mirhanzi. Yezu aderha ntya: “Ecimanyiso abantu boshi babonerekwo oku muli baganda bani, bwo buzigire mwazigirane.” (Yn. 13:34, 35) Ene, Abahamirizi ba Yehova bw’omw’igulu lyoshi bacibwinire ecinyabuguma n’obuzigire bajiranako. Kulusha ebindi bigamba b’idîni byoshi, ecinyabuguma cirhu cirhabamo kabôlo k’ishanja, k’irangi ly’omubiri erhi ka bûko. Rhunacibonere rhwene n’obwalagale oku rhuba rhuzigirine, amango g’entimanano zirhu z’ecigamba n’entimanano zirhu nkulu. Ebyo rhucibonera oku ntimanano zirhu binaseze ebirhuyemeza n’obwalagale oku enterekêro yirhu eba eyemirwe na Yehova.

14. Nk’oku biyerekinwe omu Abakolosi 3:12-14, njira ehi y’obulagirire rhwakayerekanamwo oku rhuzigirine bwenene?

¹⁴ Amandiko garhubwizire oku ‘rhuzigirane rhwêne na nnene.’ (1 Pt. 4:8) Njira nguma rhwakayerekanamwo oku rhuba rhuzigirine kuli kubabalira abandi n’okulembera okurhaba bimana kwabo. Na kandi rhunalonze obulyo bw’okuba bahânyi n’okuyegereza abantu boshi omu cigamba ciru na balya barhugokize. (Osome Abakolosi 3:12-14.) Obuzigire bwa ntyo co ciba cimanyiso cikulu c’Abakristu b’okuli.

15. Omu zindi njira zihi rhushimbamwo olwiganyo lw’okuharamya Abakristu b’omu myaka igana mirhanzi barhulekeraga?

¹⁵ Hali ezindi njira rhushimbamwo olwiganyo lw’okuharamya Abakristu b’omu myaka igana mirhanzi barhulekeraga. Kwa lwiganyo, ikubuliro lirhu liba lipanzirwe nk’oku abo Bakristu balipanzirwe. Rhujira abangalizi b’omuzunguko,  abagula n’abarhabazi b’abagula. (Fl. 1:1; Tt. 1:5) Entanya zirhu okubiyerekire obuhya n’ecijiro c’obuhya, obukenge rhujira oku butagatifu bw’omuko, n’irala rhujira okubiyerekire okulanga ecigamba kuli abanyabyaha barhalonzizi okuciyunjuza, byoshi biba biyimangire oku lwiganyo rhwalekeragwa n’Abakristu b’omu myaka igana mirhanzi.​—Ebj. 15:28, 29; 1 Kr. 5:11-13; 6:9, 10; Hb. 13:4.

16. Bici rhuciyigirizize kugerera enderho ziri omu lwandiko lwa Abefezi 4:4-6?

¹⁶ Yezu adesire oku bantu banji bakayalizize oku bali banafunzi bage, cikone arhali boshi bakabire b’okuli. (Mt. 7:21-23) Kandi Amandiko gal’ilebire oku omu nsiku nzinda, bantu banji “embuga bayish’ikayorha nk’abakombêra ebya Nyamuzinda.” (2 Tm. 3:1, 5) Cikone, Ebibliya erhubwizire n’obwalagale oku “buyemere buguma” bone Nnâmahanga aba ayemire.​—Osome Abefezi 4:4-6, NWT.

17. Abanafunzi ba Yezu bajira obuyemere bw’okuli ene, bo bandi?

¹⁷ Bandi bajira obuyemere bw’okuli ene? Rhwaganirire n’obwalagale ebintu birhuyeresirebo. Rhwabwine olwiganyo lw’okuharamya Yezu arhulekire lwo n’Abakristu b’omu myaka igana mirhanzi balikulikire. Ishuzo liguma lyone rhugwerhe okubiyerekire abantu bagwerhe obuyemere bw’okuli: bali Bahamirizi ba Yehova. Luli lukengwa lunene rhugwerhe lw’okuba baguma bw’omu lubaga lwa Yehova n’okumanya okuli okubiyerekire Yehova n’emihigo yage! Rhweshi rhuhige okugendekera rhwacishwekerera oku okuli rhunabe n’ebirhuyemezize bisezire.