1-2. Lubero luhi lwali egarhi ka Ahabu na Manasé, na madoso gahi rhwashuzako?

RHUGANIRIRE kwa bulîri bami babirhi bal’ilamire omu mango ga mîra. Muguma akag’irhegeka obwami bwa mashanja ikumi g’aba Israheli, n’owundi akagirhegeka obwami bwa mashanja abirhi ga Yuda. Ciru akaba bal’ilamire omu rhusanzi rhuli lubero, cikone bagwerhe bintu binji bashushineko. Bombi bagomera Yehova banarhuma abantu bajira ecaha. Bombi bakagiharamya ensanamu, bananali banizi. Cikone, hali olubero egarhi k’abo balume babirhi. Muguma agendekire mw’olo lugenzi lubi kuhika okufâ kwage, cikone owundi aciyunjunza anababalirwa ebyo bijiro byage bibi. Abo bami bo bali bandi?

² Muguma akagihamagalwa Ahabu, mwami w’e Israheli, n’owundi akagihamagalwa Manasé, mwami w’e Yuda. Olubero lwali egarhi k’abo balume babirhi lwanarhuyigiriza bintu binji okubiyerekire omwanzi gw’obulagirire: okuciyunjuza. (Ebj. 17:30; Rm. 3:23) Okuciyunjuza kw’okuderha gurhi, na gurhi kuyerekanwamwo? Kuli kwa bulagirire rhuhugûkwe amashuzo g’ago madoso bulya rhuba rhulonzize Yehova arhubabalire amango rhwamajira ecaha. Lyo rhubona amashuzo g’ago madoso, rhwaganirira akalamo k’abo bami babirhi na kandi rhwabona ebi rhwakaciyigiriza kugerera enyiganyo zabo. Buzinda rhwaganirira ebi Yezu ayigirizize lugenda okuciyunjuza.

3. Ahabu ali mwami wa gurhi?

³ Ahabu ye wali mwami wa kali nda wa galya mashanja ikumi g’aba Israheli. Arhôla Yezebeli, mwali wa mwami w’e Sidoni; ishanja ly’Abasidoni lyali ligale lyanal’ilamire e nord z’e Israheli. Nkaba obo buhya bwalesire obugale omu cihugo c’e  Israheli. Cikone kandi, bwashereza obwîra bw’ishanja ly’aba Israheli haguma na Yehova. Yezebeli akagiharamya Baali, ashumya Ahabu oku ayemere er’idîni ly’obunywesi lije omu cihugo c’e Israheli, er’idîni lyalihiziremo okujirira obugonyi omu hekalu n’okuhâna abana nterekêro. Nta mulebi wa Yehova wagwerhe omurhula amango Yezebeli ali mwamikazi. Anigisize banji ba muli bo. (1 Bam. 18:13) Ahabu naye “agayisa Nyakasane [Yehova, NWT] kulusha balya boshi bamushokoleraga.” (1 Bam. 16:30) Yehova akagibona ebijiro byoshi bya Ahabu na Yezebeli. Akagib’ibona analihugûsirwe ebyo byoshi bakagijira. Ciru akaba ntyo, enyanya z’olukogo lwage, Yehova arhuma omulebi Eliya oku ajihanûla olubaga Lwage oku lukubûle olugenzi lwabo embere arhac’ibashereza. Cikone Ahabu na Yezebeli barhalonzagya okuyumva.

4. Buhane buhi badesire Ahabu akahabirwe, na gurhi ajijire?

⁴ Buzinda, okulembera kwa Yehova kwahika ebuzinda. Arhuma Eliya oku ajibwira Ahabu na Yezebeli oku akola abahana. Ngasi muntu w’omu mulala gwabo yeshi ali asherezibwa. Erhi Ahabu ayumva enderho za Eliya, aciyumva kubi bwenene! Eby’okusomeza, oyo mulume w’obucibone ‘acirhohya.’​—1 Bam. 21:19-29.

5-6. Bici biyerekine n’obwalagale oku kobinali Ahabu arhaciyunjuzagya?

⁵ Ciru akaba Ahabu acirhohyagya mw’ako kasanzi, olugenzi lwage lwayish’iyerekana n’obwalagale oku arhalic’iyunjuzize eby’okunali. Arhakulaga enterekêro ya Baali omu bwami bwage. Arhanagendekezagya enterekêro ya Yehova. Haligi ezindi njira Ahabu ayerekinemwo oku kobinali arhaciyunjuzagya.

⁶ Buzinda, erhi Ahabu alâlika Mwami Yozafati w’e Yuda oku acilunge haguma naye bajilwisa ecihugo c’e Siriya, Yozafati amubwira oku barhangidosa omulebi wa Yehova ihano embere baje eyo. Ahabu alahira ezo ntanya omu kuderha ntya: “Haciri omuntu rhwankahash’idôsa ebya Nyakasane; cikwonene ntahimwa kumushomba bulya arhalèba bintu binja kuli nie, ci ngasi mango bibi byonene.” Ciru ankaba ntyo, bajidosa omulebi Mikayehu ihano. Kobinali, oyo mulebi wa Nnâmahanga aleba emyanzi mibi kuyerekera Ahabu! Cikone ahali Ahabu aciyunjuze analonze gurhi Yehova akamubabaliramwo, Ahabu akweba oyo mulebi omu mpamikwa. (1 Bam. 22:7-9, 23, 27) Ciru ankaba oyo mwami ahashirihira omulebi wa Yehova omu mpamikwa, arhakahashir’ihanza obo bulebi okuhikirira. Ahabu anigwa okw’ivita lyakulikiraga.​—1 Bam. 22:34-38.

7. Gurhi Yehova ayerekine oku akagibona Ahabu enyuma z’okufâ kwage?

⁷ Enyuma z’okufâ kwa Ahabu, Yehova ayerekana n’obwalagale gurhi akagimubona. Erhi omwami mwinja Yozafati acunguka er’ivita baliko, Yehova arhuma omulebi wage Yehu oku ajikalihira Yozafati oku bulya gurhi acilunganga haguma na Ahabu. Omulebi wa Yehova aderha ntya: ‘K’ogwasirwe okurhabâla omubi, ka osima abashomba Nyamubâho?’ (2 Nga. 19:1, 2) Rhurhanyagye ntya: Erhi akaba obuciyunjuze bwa Ahabu bwali bw’okunali, omulebi wa Yehova arhakadesire oku Ahabu ali muntu mubi wal’ishombire Yehova. Kobinali, ciru akaba Ahabu ayerekine ehiri nka hyabuciyunjuze, arhaciyunjuzagya yeshi-yeshi erhi okunali.

8. Bici rhwakaciyigiriza lugenda okuciyunjunza kugerera olwiganyo lwa Ahabu?

⁸ Bici olwiganyo lwa Ahabu lwakarhuyigiriza? Ahabu acirhohya erhi ayumva omwanzi Eliya aderhaga lugenda omulala gwage. N’oko ajiraga kwali kwinja. Cikone ebyajiraga buzinda, byo byayerekine oku okuciyunjuza kwage kurhalirhenzire oku murhima. K’okuderha oku okuciyunjuza kuhiziremo bintu binji ahanyuma n’okuderha kone oku rhuciyumvirhe kubi. Rhuganirirage olundi lwiganyo lwarhurhabala rhuhugûkwe ebi okuciyunjuza kw’okunali kuhiziremo.

9. Manasé ali mwami wa gurhi?

⁹ Erhi hagera hofi myaka magana abirhi, Manasé aba mwami w’e Yuda. Nkaba ali mubi nkununu kulusha Ahabu! Rhusomire ntya: “Ajira mabi manji omu masu ga Nyamubâho, galya ga okumukuniza.” (2 Nga. 33:1-9) Manasé ayubaka amahero g’okurherekerera ba nnâmahanga b’ecipagani, atûla n’ensanamu y’okubinjwa y’omutungo mutagatifu, byanahashikana erhi yali yakuharamya ecijiro c’obuhya, ayigwika omu hekalu ntakatifu ya Yehova! Ajira eby’amaji, obukurungu n’obulaguzi. Na kandi “abulaga omuko [munji bwenene] gw’abantu beru kweru.” Ciru n’obo bubi bwage nkununu bwalihiziremo ‘okugeza abana bage omu muliro,’ lyo babarherekera ba nnâmahanga bw’obunywesi.​—2 Bam. 21:6, 7, 10, 11, 16.

10. Gurhi Yehova ahîremwo Manasé obuhane, na gurhi Manasé ajijire?

¹⁰ Aka Ahabu, Manasé naye alahira oburhonde Yehova akagimuha kugerera abalebi bage. Buzinda, “Nyamubâho anaciyisha abarhumîre abarhambo n’engabo y’abalwi ba mwami w’e Siriya, bagwarha Manasé n’ebyuma by’amino-mino n’erhi babà bamamushweka na ba caburhinda babirhi b’ecuma c’omulinga bamuhêka e Babiloni.” Bibonekine oku, erhi Manase ali omu mpamikwa omu cindi cihugo, arhanya bwenene. “Acirhohereza embere za Nyamubâho Nyamuzinda wa b’ishe.” Ciru na kandi ajira binji kulusha oko. “Arhondera okushenga Nyamubâho [olukogo].” Na ntyo, Manasé agendekera “amushenga.” Oyo mulume mugalugalu ahikira aha ajira empindûlo. Arhonderha abona Yehova nka “Nyamuzinda wage,” anakamushenga burhahusa.​—2 Nga. 33:10-13.

11. Nk’oku biyerekinwe omu lwandiko lwa 2 Enganîro 33:15, 16, gurhi Manasé ayerekinemwo oku aciyunjuzize okunali?

¹¹ Erhi hagera kasanzi, Yehova ashuza oku masala ga Manasé. Abona empindûlo omu murhima g’oyo mulume nk’oku amasala gage ganaliyerekine. Yehova ahumwa oku murhima n’amasala g’emirenge ga Manasé na ntyo acibimuyimika omu bwami bwage. Manasé ajira okwage koshi ly’ayerekana kunganaci aciyunjuzize. Ajira akantu Ahabu arhajiraga ciru n’ehitya. Ashanja olugenzi lwage. Ajira okwage koshi ly’akula enterekêro y’obunywesi omu cihugo, anagendekeza enterekêro y’okuli. (Osome 2 Enganîro 33:15, 16.) Kobinali okujira ntyo kwalihunyîre oburhwali n’obuyemere, bulya hagezire myaka minji Manasé ali ashumya abantu b’omu mulala gwage, abantu balengerire, na bacikala boshi oku bajire ebintu bibi. Cikone, oku buzinda bw’emyaka yage, Manasé alonza okuyukiriza bintu biguma biguma bibi ali amarhondeza omu cihugo. Bibonekine oku ayishishumya omwinjikulu Yosiya ajire aminja, bulya enyuma z’aho Yosiya ayishiba mwami mwinja.​—2 Bam. 22:1, 2.

12. Bici rhwakaciyigiriza lugenda okuciyunjunza kugerera olwiganyo lwa Manasé?

¹² Bici olwiganyo lwa Manasé lwakarhuyigiriza? Acirhohya anajira binji kulusha. Ashenga Nnâmahanga, amuhûna obwonjo. Akubûla n’olugenzi lwage. Akola bwenene ly’ayusa obubi  boshi ali amarhondeza, arhondera okuharamya Yehova, anarhabala abandi nabo bajire ntyo. Olwiganyo lwa Manasé luhânyire obulangalire ciru na kuli bala bajijire ebyaha bizibu bwenene. Rhwamabona akantu karhuyemezize n’obwalagale oku Yehova Nnâmahanga aba ‘mwinja [na] mubidu w’okubabalira.’ (Enna. 86:5, Mashi Bible) Byanahashikana okubabalira bala baciyunjuza.

13. Ohâne olwiganyo luyerekine isomo ly’obulagirire okubiyerekire okuciyunjuza.

¹³ Manasé ajijire binji ahanyuma n’okuciyumva kubi enyanya z’ebyaha byage. Oko kurhuyigirizize isomo ly’obulagirire okubiyerekire okuciyunjuza. Rhurhanye kw’olu lwiganyo: Oje omu bulanjeri ohûne egato. Cikone ahali oli waguza akuhe egato, ayishe akudwirhire iji. Ka wanahêka iji ahali h’egato? Nanga orhankaliyemera. Ka kwanaba kwa bulagirire oli wasaka akuhugûlire oku iji ko kantu k’obulagirire kaba omu gato? Kandi nanga! Ko n’oko, Yehova ahûnyire owajijire ecaha cizibu oku aciyunjuze. Erhi oyo wajiraga eco caha akaciyumva kubi enyanya z’ecaha cage, kuli kwinja. Okuciyumva ntyo kali kantu kaguma k’omu kuciyunjuza, ci arhali ko kuciyunjuza koshi. Gurhi kundi akajira? Rhwayiga binji kugerera olwiganyo lw’okuhuma oku murhima Yezu ahânaga.

14. Omu lwiganyo Yezu ahânaga, gurhi omwana mulalahi ayerekinemwo ecimanyiso cirhanzi c’okuciyunjuza?

¹⁴ Yezu aganirire omwanzi gw’oburhulirize guyerekire omwana mulalahi, ogo mwanzi guli omu Luka 15:11-32. Musole muguma gwagomera ishe, gwarhenga ahamwabo, alikula (agenda) “aja omu cihugo c’ihanga.” Eyo munda, alama akalamo k’olugenzi lubi n’eby’enshonyi. Erhi amazibu gamuhikira, arhanya bwenene. Ahugûkwa kunganaci al’ilamire akalamo kinja erhi aciri aha mw’ishe. Nk’oku Yezu aderhaga, oyo musole “acijamwo [agalukirwa n’obwenge, NWT].” Ahiga oku akola agaluka emwabo ly’ajihûna ishe obwonjo. Akasanzi ogo musole gwahugûkagwa oku gwajijire kubi bwenene kali ka bulagirire. K’oko kone alishinganine ajire? Nanga. Alishinganine ahindule olugenzi lwage!

15. Gurhi omwana mulalahi oganirirwe omu lwiganyo Yezu ahânaga ayerekinemwo oku aciyunjuzize okunali?

¹⁵ Ebi omwana mulalahi ajijire byayerekine oku aciyunjuzize kurhenga oku murhima. Acibigaluka emwabo. Buzinda erhi akola ayegera ishe, aderha ntya: “Larha, nakubîhîre nabîhîra na Nnâmahanga, ntacikwanini okuderhwa mugala wawe.” (Lk. 15:21, Mashi Bible) Okuciyunjuza kurhenzire oku murhima k’ogo musole, kwayerekine n’obwalagale oku al’ilonzize acibiba n’obwîra haguma na Yehova. Na kandi ahugûkwa oku ebijiro byage byalumisize ishe omurhima bwenene. Anali mubidu okujira okwage koshi ly’acibiyemerwa n’ishe, ciru aderha oku ishe arhondere amujirira nka muguma w’omu bambali erhi baja bage! (Lk. 15:19) Olo lwiganyo gurhali mwanzi gwakurhuha omurhima kone. Amakanuni luyigirizize ganarhabala abagula b’ecigamba amango bali bajira okwabo koshi lyo bamanya erhi kobinali omwemezi wajiraga ecaha cizibu anaciyunjuzize.

16. Bulya gurhi kwakaba kuzibu abagula okumanya erhi muntu mulebe wajiraga ecaha cizibu kobinali aciyunjuzize?

 ¹⁶ Kurhaba kulembu abagula bamanye erhi owajiraga ecaha cizibu kobinali aciyunjuzize. Bulya gurhi? Bulya abagula barhakasoma ebiri omu murhima g’omuntu, co cirhumire bashinganine basegeze ebintu biri byabonekana biyerekine n’obwalagale oku oyo mwene wabo anashanjire entanya zage okubiyerekire ecaha cizibu ajiraga. Hali agandi mango omuntu akajira ecaha cizibu bwenene kuhika abagula baganira naye babule kuyemera n’obwalagale oku oyo muntu kobinali aciyunjuzize.

17. (a) Lwiganyo luhi luyerekine oku okuciyumva kubi kone kurhakayerekana oku omuntu kobinali aciyunjuzize? (b) Nk’oku biyerekinwe omu lwandiko lwa 2 Abakorinti 7:11, bici omuntu ociyunjuzize kobinali ashinganine ajire?

¹⁷ Rhuganirire lwiganyo luguma. Mwene wirhu mulebe ajire myaka minji ali ajira obugonyi. Ahali alonze oburhabale, afulike mukage, abîra bage n’abagula olo lugenzi lwage lugalugalu. Buzinda, abagula babwirwe lugenda olo lugenzi lwage. Hano abagula bamuyeresa ebiyerekine n’obwalagale oku ajijire eco caha, ayemere oku ajijire ntyo na kandi abe nk’ociyumvirhe kubi lugenda ebyo. K’okujira ntyo kone kuyerekine oku aciyunjuzize? Abagula bali bashibirira ako kanga bashinganine babone kuli kulusha okubona oku oyo mwene wirhu aciyumvirhe kubi. Eco caha karhali kantu ajijire omu kasanzi kasungunu kone, cikone ajijire myaka minji ali acijira. Arhali yene wajagihungama ecaha cage n’obulonza, cikone abagula babwirwa lugenda eco caha. Co cirhumire abagula bashinganine babone ebintu by’okunali biyerekine oku oyo mwene wirhu ajijire empindûlo omu ntanya, omu lugendo n’oku ali aciyumva. (Osome 2 Abakorinti 7:11.) Byanahûna kasanzi kanji ly’oyo muntu ajira empindûlo zishinganine. Muli ntyo, anarhenzibwa omu cigamba c’Ecikristu kasanzi kalebe.​—1 Kr. 5:11-13; 6:9, 10.

18. Gurhi omuntu watenzirwe akayerekanamwo oku kobinali aciyunjuzize, na bici oko kwakalerha?

¹⁸ Ly’omuntu watenzirwe n’ecigamba ayerekana oku kobinali aciyunjuzize, ashinganine akaja oku ntimanano z’ecigamba ngasi mango n’okushimba amahano abagula bamuhîre g’okucibiba n’enkomêdu nyinja y’okusalira n’okuciyigiriza Ebibliya ngasi mango. Na kandi ashinganine abe mubidu okukayaka ngasi kanga koshi kakarhuma acib’irhogera mw’eco caha. Erhi akajira okwage koshi ly’acibiba mwîra wa Yehova, anayemera n’obwalagale oku Yehova amubabalira lwoshi n’oku abagula bacib’imugalula omu cigamba. Kobinali, erhi abagula bashibirira akanga k’omuntu wajijire acaha cizibu, banalabirize akanga k’oyo muntu buzira kukashushanya n’akandi kanga, na kandi banayake okumutwira olubanja omu burhe erhi omu bukali.

19. Bici okuciyunjuza kw’okunali kuba kuhiziremo? (Ezekiyeli 33:14-16)

¹⁹ Nk’oku rhwayizire, okuciyunjuza kw’okunali  kuhiziremo bintu binji ahanyuma n’okuderha kone oku rhuciyumvirhe kubi enyanya z’ecaha rhwajijire. Oko kuhiziremo okujira empindûlo omu murhima n’omu ntanya n’okurhondera okujira ebintu binja. Kandi kuhiziremo okuyaka olugenzi lubi n’okucib’irhondera okurhumikira amarhegeko ga Yehova. (Osome Ezekiyeli 33:14-16.) Akantu karhangiriza omuntu wajijire ecaha ashinganine ajire kuli kucibigalula obwîra bwage haguma na Yehova.

20-21. Gurhi rhwakarhabalamwo omuntu wajijire ecaha cizibu?

²⁰ Yezu ahugûla kwa bofofi obulagirire bw’omukolo gwage gw’amahubiri, aderha ntya: “Nayishire lyo mpamagala abanyabyaha baciyunjuze.” (Lk. 5:32, NWT) Nirhu rhukwanine rhube n’irala lya ntyo. Orhanye erhi rhwakamanya oku mwîra wirhu mulebe anajijire ecaha cizibu. Gurhi rhwakajira?

²¹ Kwanaba kugokeza rhugokize omwîra wirhu erhi rhwakafulika ecaha cage. Ciru rhurhakahasha okufulika eco caha bulya Yehova anakabon’ebintu byoshi. (Mig. 5:21, 22; 28:13) Wanarhabala oyo mwîra wawe omu kumukengeza oku abagula balonzize okumurhabala. Erhi omwîra wawe akalahira okubwira abagula, wanagendibabwira wene kuli ako kanga, ly’oyerekana oku olonzize okumurhabala. Okugendibwira abagula bamurhabale kuli kwa bulagirire, bulya erhi wakabula bujira ntyo anaheza obwîra bwage haguma na Yehova!

22. Bici rhwaganirira omu cigabi cikulikire?

²² Gurhigi byakaba erhi omuntu wajiraga ecaha cizibu cikola ciba cimunywengerire anakola agwerhe nsiku nyinji ali acijira, na buzinda abagula bahige oku ashinganine atengwe n’ecigamba? K’oko kuli kuyerekana oku barhamuyeresiri olukogo? Omu cigabi cikulikire, rhwaganirira kwa bulîri gurhi olukogo lwa Yehova lubonekana omu kuhana abajijire ebyaha n’oku rhwakayigamwo olwiganyo lwage.