1. Mwishingo guhi na lukengwa luhi rhugwerhe?

RHUGWERHE mwishingo munji na lukengwa lunji okubona rhuli Bahamirizi ba Yehova! Rhunahamagalwe okw’izino lya Nnamahanga, rhunanayerekane oku rhuli Bahamirizi bage erhi rhujira omukolo gw’amahubiri n’okujira abanafunzi. Rhunashagaluke bwenene erhi rhurhabala muntu mulebe ‘olonzize okuyishiba n’obuzine bw’ensiku n’amango’ abe mwemezi. (Ebj. 13:48, NWT) Nirhu rhunaciyumve nk’okula Yezu aciyumvagya, “aba n’omwishingo munene kugerera iroho litagatifu” erhi abanafunzi bage bamuganirira ebintu binja bacibwinire omu mahubiri.​—Lk. 10:1, 17, 21, NWT.

2. Gurhi rhwakayerekana oku rhuba rhurhôzire omukolo gwirhu gw’amahubiri kwa buzibu-zibu?

² Rhunarhôle kwa buzibu-zibu omukolo gwirhu gw’amahubiri. Entumwa Paolo yahanula Timoteyo ntya: “Ocimanye wêne, omanye n’enyigirizo zawe.” Paolo ayushûla erhi: “Okajira ntyo, waciciza wêne, onacize abakuyumvirhiza.” (1 Tm. 4:16) K’okuderha oku omukolo gwirhu gw’amahubiri gunacungule obuzine. Rhunacimanye rhwenene bulya rhuba bacikala bw’Obwami bwa Nnâmahanga. Rhunaba rhulonzize ensiku zoshi rhukajira ebintu byalerhera Yehova irenge bilinganine n’omwanzi mwinja rhuja rhwayaliza. (Fl. 1:27) Rhunayerekane oku ‘rhumanyire enyigirizo zirhu’ erhi rhucirheganya bwinja embere rhuje omu mahubiri n’erhi rhuhûna Yehova oburhabale embere rhujihubiri abandi omwanzi mwinja.

3. Ka bantu banji banayankirire bwinja omwanzi mwinja g’Obwami? Ohâne olwiganyo.

³ Ciru hali n’amango bantu banji b’omu eneo yirhu babula buyumvirhiza omwanzi mwinja gw’Obwami n’obu rhwajijire okwirhu koshi lyo rhubayigiriza. Rhulole ebi Mwene wirhu Georg Lindal acibwinire, yene wakag’ihubiri omu cihugo c’e Islande kurhondera omu mwaka gwa 1929 kuhika 1947. Akahâna amagana g’ebitabu, cikone nta muntu ciru n’omuguma wayemire okuli. Ayandisire ntya: “Baguma baguma bakaba nk’abasimisibwe n’okuli, cikone banji mulibo barhalisimisibwe.” Ciru n’enyuma z’okurhuma  yo ba misionere barhengaga oku Gileyadi, nabo bajira myaka mwenda yoshi bali bahubiri eyo munda buzira kubona omuntu w’eyo wacihâna emwa Yehova n’okubatizibwa. *

4. Gurhi rhuciyumva erhi abantu balahira okuyumvirhiza omwanzi mwinja?

⁴ Rhunaciyumve kubi erhi abantu babula buyumvirhiza omwanzi rhuli bayigiriza. Ciru rhwanahikira aha rhwaciyumva aka Paolo, ayumva “burhe bunji n’amababale garhahusa” bulya Abayahudi barhayemeragya oku Yezu ye Masiya. (Rm. 9:1-3) Gurhi byakaba erhi wakabona oku wajijire okwawe koshi washenga Yehova enyanya z’oyo mwanafunzi, cikone arhali ajira amajambere n’oku bihûnyire okuleka okuyiga naye? Erhi gurhi wakajira erhi akaba orhasigirhabala muntu mulebe ahikire obubatizo? Ka wanacitumuza n’okurhanya oku nkaba Yehova arhagisha omukolo gwawe gw’amahubiri? Mw’eci cigabi rhwashuza kw’aga madoso abirhi: (1) Bici biyerekana oku omuntu anahikirizize omukolo gw’amahubiri bwinja? (2) Bici rhushinganine rhulangalire okubiyerekire omukolo gwirhu gw’amahubiri?

5. Bulya gurhi mango maguma na maguma omukolo gwirhu kuli Yehova gurhalerha amalehe nk’oku rhwal’ilangalire?

⁵ Lugenda omuntu ojira obulonza bwa Nnâmahanga, Ebibliya edesire ntya: “Ngasi hyoshi ajira kubêra himubêra.” (Enna. 1:3) Cikone oko kurhali kuderha oku ngasi byoshi rhujirira Yehova byanaba nk’oku rhwanal’ilonzize. Akalamo ka mwene-omuntu kaba ‘kayunjwire mirhânyo’ enyanya z’okurhaba kwirhu bimana erhi kurhaba bimana kw’abandi. (Ayu. 14:1) Na kandi, abantu barhuhagalika banahikire aha bahanza omu kasanzi kalebe enjira rhuhikirizamw’omukolo gwirhu. (1 Kr. 16:9; 1 Ts. 2:18) Gurhigi Yehova abonamwo oku rhwahikirizize bwinja ogo mukolo erhi rhurhagukirizize bwinja? Rhuganirire makanuni maguma na maguma g’Ebibliya garhurhabala rhushuze kw’er’idoso.

6. Gurhi Yehova abonamwo oku rhwahikirizize bwinja omukolo rhumujirira?

⁶ Yehova anakalaba obushiru bwirhu n’okulembera kwirhu. Yehova anakabona oku rhwahikirizize bwinja omukolo gwirhu erhi rhugujira n’obushiru n’obuzigire, ciru abandi bakarhuyumvirhiza erhi nanga. Paolo ayandika ntya: “Nyamuzinda arhali mubula burhondekezi [bushinganyanya] mpu ayibagira ebijiro binyu n’obuzigire mwàyerekîne oku izino lyage bulya mwàkolire abatagatifu munacidwirhe mwakujira.” (Hb. 6:10) Yehova aba akengire obushiru bwirhu n’obuzigire bwirhu, ciru akaba obo bushiru burhayanyiri amalehe minja. Na ntyo wanacibonera wenene ezi nderho Paolo abwiraga Abakorinti oku ziri z’okuli, aderha ntya: “Omukolo gwinyu muli Nyakasane gurhankafâ busha,” ciru gwakaleheka nk’oku wal’ilangalire erhi gubule kuleheka.​—1 Kr. 15:58.

7. Bici rhwakaciyigiriza kugerera oku Paolo aganirire omukolo gwage gw’amahubiri?

⁷ Paolo ali misiyonere wago-wago wakag’irhondeza ebigamba bihyahya omu vile nyinji. Cikone erhi aciyumva oku ashinganine ahalire ebiyerekine oku ali mukozi wa Kristu, arhasegezagya  omubalè gw’abantu ali amarhabala babe bemezi. Lubero n’oko, omu kulonza okuhagalika enderho z’abakagilonza baciyerekane kuli ye, Paolo ayandika ntya: “Nakozire bwenene.” (2 Kr. 11:23, Mashi Bible) Aka Paolo, okakengera oku obushiru bwirhu n’okulembera kwirhu byo Yehova abona bya bulagirire bwenene.

8. Bici rhushinganine rhukakengera okubiyerekire omukolo gwirhu gw’amahubiri?

⁸ Omukolo gwirhu gw’amahubiri gunashagaluse Yehova. Yezu arhumaga banafunzi 70 omu mukolo gw’okuhubiri omwanzi mwinja gw’Obwami, oku buzinda bw’omukolo gwabo g’okuhubiri, “bashubûka banashagalusire.” Bici byarhumaga bashagaluka? Baderha ntya: “Ciru n’abashetani badwirhe barhuyumva Izino lyawe lirhuma!” Cikone, Yezu akubûla entanya zabo erhi ababwira ntya: “Murhashagalukaga oku kuba abashetani badwirhe bammuyumva, ci mushagaluke oku kuba amazino ginyu gali mayandike omu mpingu.” (Lk. 10:17-20) Yezu al’imanyire oku arhali ntyo kw’omukolo gwabo gw’amahubiri gwakayosire ensiku zoshi. Kobinali, rhurhamanyiri bantu banga ba muli balya bayumvirhizagya abanafunzi ba Yezu aha murhondero bahikire aha babà bemezi. Abanafunzi ba Yezu bal’ishinganine bahugûkwe oku obushagaluke bwabo burharhenziri mw’ebi bahikirizize, cikone akantu k’obulagirire kakabahire obushagaluke kwal’ikumanya oku Yehova ashagalukire obushirhu bwabo.

9. Nk’oku olwandiko lw’Abagalasiya 6:7-9 luyerekine, gurhi byakayishiba erhi rhwakagendekera rhwalembera omu mukolo gwirhu gw’amahubiri?

⁹ Erhi rhwakakalembera omu mukolo gwirhu gw’amahubiri, rhwanayish’ihâbwa obuzine bw’ensiku n’amango. Okubona rhuhinga n’okurhwera emburho z’okuli kw’Obwami n’omurhima goshi, kandi “rhunarhwere omw’iroho” omu kuleka iroho litagatifu lya Nnâmahanga likole n’obulonza omu kalamo kirhu. Erhi rhwakabula “burhama” erhi “kuleka,” Yehova arhubwizire n’obwalagale oku rhwanasarule obuzine bw’ensiku n’amango, rhube rhwarhabire muntu mulebe acihâne emwa Nnâmahanga erhi nanga.​—Osome Abagalasiya 6:7-9, NWT.

10. Bici birhuma abantu bayemera erhi balahire omwanzi rhuli rhwahubiri?

¹⁰ Oku omurhima g’omuntu guyosire kwo kurhuma ayemera erhi alahire omwanzi rhuli rhwamuyigiriza. Yezu ahugwîre ntyo n’obwalagale kugerera olwiganyo ahânaga lw’omuhinzi warhweraga emburho zage omu budaka buli lubero, na muli ezo mburho zoshi, enguma yali ntwere omu budaka bwinja yone yalehesire. (Lk. 8:5-8) Yezu adesire oku obo budaka buli lubero bushushanyize bala bantu bayumvirhiza “oluderho lwa Nyamuzinda” omu njira eri lubero. (Lk. 8:11-15) Ak’omuhinzi, nirhu rhurhakahash’imanya kunganaci omukolo gwirhu gwaleheka bulya okuleheka kwago kunakashimbana nk’oku emirhima y’abali barhuyumvirhiza eyosire. Omukolo gwirhu kuli kugendekera rhwarhwera emburho nyinja y’omwanzi mwinja g’Obwami. Nk’oku entumwa Paolo yaderhaga, “ngasi muntu ayishihembwa nk’oku anakozire,” ci arhali kugerera amalehe g’omukolo gwage.​—1 Kr. 3:8.

11. Bulya gurhi Nuhu ahikirizize bwinja omukolo gwage gw’okuba “muhubiri w’obushinganyanya”? (Olole enfoto eri oku cijalada cʼeyi gazeti.)

¹¹ Abahamirizi ba Yehova ba mango ga mîra nabo barhimanine n’abantu barhakag’ibayumvirhiza, kwa lwiganyo Nuhu ajijire myaka minji ali “muhubiri w’obushinganyanya.” (2 Pt. 2:5, NWT) Buzira karhinda, al’ilangalire oku abandi bakamuyumvirhizize cikone nta cimanyiso Yehova amuhîre cal’iyerekine oku bakamuyumvirhizize. Lubero n’oko, erhi abwira Nuhu oku ayubake esafina, Nnâmahanga aderha ntya: “Waja omu nkuge [safina] we na bagala bawe, na mukawe na baka bagala bawe mweshi nabo.” (Murh. 6:18) Erhi Nuhu ayumva obuliri n’obunene bw’esafina Nnâmahanga omubwiraga  oku ayubake, nkaba ahugûkwa oku bantu basungunu bone bakamuyumvirhizize. (Murh. 6:15) Nk’oku rhunamanyire, nta muntu ciru n’omuguma wayumvirhizize emyanzi Nuhu ajaga ahamiriza. (Murh. 7:7) K’omu ntyo Yehova abona Nuhu nk’oyabirwe n’omukolo? Nanga ciru n’ehitya! Nnâmahanga abona oku Nuhu ahashir’ihubiri bulya ajijire n’obwishwekerezi byoshi Yehova amubwiraga oku ajire.​—Murh. 6:22.

12. Gurhi omulebi Yeremiya abiremwo n’omwishingo ciru akaba abantu barhakag’imuyumvirhiza banakag’imuhagalika?

¹² Omulebi Yeremiya naye ajijire myaka minji ali ahubiri ciru akaba abantu barhakagiyumvirhiza n’okumuhagalika. Ahikira aha avunika omurhima erhi ‘kushekerwa n’okujacirwa’ kwa buca buyira kw’abantu bakagimuhagalika kurhuma, ciru arhanya oku akola aleka ogo mukolo. (Yer. 20:8, 9, Mashi Bible) Cikone Yeremiya arharhamaga! Bici byamurhabire ahime ezo ntanya zirhashinganini anagendekere aba n’omwishingo omu mukolo gwage gw’amahubiri? Akasegeza omu bwenge bwage bintu bibirhi bya bulagirire. Burhangiriza, omwanzi gwa Nnâmahanga Yeremiya akagihubiri, gwalihiziremo “obulangalire bw’ensiku zayisha.” (Yer. 29:11, Mashi Bible) Bwakabirhi, Yehova ahesa Yeremiya izino lyage. (Yer. 15:16) Na nirhu rhunakagend’ibwira abantu omwanzi guhanyîre obulangalire mw’er’igulu lirimo omwizimya na kandi rhunahamagalwe okw’izino lya Yehova rhwe nka Bahamirizi bage. Erhi rhwakakasegeza obwenge bwirhu kw’ebi bintu bibirhi by’obulagirire, rhwanaba n’omwishingo omu mukolo gwirhu gw’amahubiri ciru abantu bakarhuyumvirhiza erhi nanga.

13. Bici rhuciyigirizize kugerera olwiganyo Yezu ahânaga luganirirwe omu lwandiko lwa Marko 4:26-29?

¹³ Okukula kiroho kunakayisha bunyi-bunyi. Yezu ayigirizize ntyo kugerera olwiganyo ahânaga lw’omuhinzi wajaga îro erhi ayus’irhwera emburho zage. (Osome Marko 4:26-29.) Amalehe g’omukolo gw’obushiru g’oyo muhinzi gayishire bunyi-bunyi ganali manji buzira kujira kantu koshi-koshi lyo gakula duba-duba. Na nawe orhakabona amalehe g’omukolo gwawe gw’okujira abanafunzi ho n’aho bulya mango maguma maguma binahûne omwanafunzi ajire abajambere bunyi-bunyi n’okuhikira bintu bilebe. Nka kula omuhinzi arhakaseza emburho zage mpu zikule duba-duba nk’oku alonzize, na nirhu rhurhakaseza abanafunzi birhu b’Ebibliya mpu bajire amajambere g’ekiroho nk’oku rhulonzize. Co cirhumire orhavunikaga omurhima erhi kurhama erhi byakahûna kasanzi kanji embere bajire amajambere kulusha oku wal’ilangalire. Ak’omuhinzi olembera, omukolo gwirhu gw’okujira abanafunzi nago guba guhûnyire okulembera.​—Yk. 5:7, 8.

14. Lwiganyo luhi luyerekine oku amalehe gw’omukolo gwirhu gw’amahubiri ganayisha bunyi-bunyi?

¹⁴ Omu maeneo maguma maguma, hali amango amalehe g’omukolo gwirhu gabonekenamo enyuma za myaka minji. Rhuganirire ebi Gladys na Ruby Allen bacibwinire, bali ba nda nguma, buzinda omu mwaka gwa 1959 babarhuma nka ba painiya b’akasanzi koshi omu vile nguma y’omu provense y’e Québec omu cihugo c’e Canada. * Enyanya z’okuyoboha oku abantu baderha n’okubona akanisa Katoliki kali nka ko karhegesire eyo munda, abantu barhakagiyumvirhiza omwanzo mwinja g’Obwami. Gladys akengire ntya: “Rhwayusize myaka ibirhi rhuli rhwajira nsa munani ngasi lusiku omu mahubiri ga nyumpa oku yindi buzira kubona omuntu wakarhuyumvirhiza! Abantu bakagija aha luso lw’enyumpa yabo n’okulola rhwe bandi na buzinda banayigala. Cikone rhurharhamaga.” Erhi hagera nsiku, abantu bashanja obo borhere bwabo na buzinda eyo eneo yarhondera okuleheka. Kuhika buno mw’eyo vile muli bigamba bisharhu.​—Iz. 60:22.

15. Bici olwandiko lwa 1 Abakorinti 3:6, 7 lurhuyigirizize okubiyerekire omukolo gw’okujira abanafunzi?

 ¹⁵ Omukolo gw’okujira abanafunzi guba guhûnyire bushiru bwa bantu banji. Byadesirwe oku biba bihûnyire ecigamba coshi cikole omu kurhabala omwanafunzi ahikire obubatizo. (Osome 1 Abakorinti 3:6, 7.) Omuhubiri analekera omuntu osimisibwe etrakte erhi gazeti. Oyo mwene wirhu walekaga eyo trakte erhi gazeti anabona oku akasanzi kage karhamuyemerere acib’igalukira oyo muntu osimisibwe, na ntyo anabwira owundi muhubiri agalukire oyo muntu. Oyo muhubiri anaba n’obulyo bw’okurhondeza ifunzo ly’Ebibliya. Oyo mwene wirhu analalika bene wirhu na bali birhu banji kw’er’ifunzo, na ngasi muguma anaha oyo mwanafunzi omurhima omu njira eri lubero n’ey’owundi. Ngasi mwene wirhu erhi mwali wirhu oyo mwanafunzi arhimanine naye, anarhabala okubulagira amishi kw’eyo emburho y’okuli. Muli eyo njira, nk’oku Yezu anaderhaga, owarhweraga n’omusaruzi banacishinga boshi omu kusarula emburho z’ekiroho.​—Yn. 4:35-38.

16. Bulya gurhi wakaba n’omwishingo omu mukolo gw’amahubiri ciru akaba orhacijira binji muligo enyanya z’obuzamba bw’omubiri erhi kubula emisi?

¹⁶ Gurhi rhwakaderha erhi akaba orhacijira binji omu mukolo gw’okuhubiri n’okuyigiriza enyanya z’obuzamba bw’omubiri erhi kubula emisi? Wanacibiba n’omwishingo omu mukolo gwawe gw’okusarula. Rhuganirire ebyahikiraga Mwami Daudi erhi ye n’abalume bali boshi bacungula emilala yabo n’ebintu byabo babirhêsa omu maboko g’ababisha b’aba Amaleki. Balume magana abirhi bal’irhamire bwenene barhacihashaga okulwa, na ntyo basigala enyuma lyo balanga ebirugu. Enyuma z’okuhima er’ivita, Daudi aderha oku bahâbwe erhi bagabe ebyo bintu barhêsagya kuguma. (1 Sam. 30:21-25) Ko n’oko lugenda omukolo gwirhu gw’okujira abanafunzi omw’igulu lyoshi. Ngasi bantu bajira okwabo koshi lyo bajira omukolo gw’amahubiri, banashagalukire okucungulwa kwa ngasi mwanafunzi muhyahya, na kandi banamurhabale arhondere alambagira omu njira ehêsire ebwa buzine.

17. Bici rhwakavugako Yehova omunkwa?

¹⁷ Rhuvuzire Yehova omunkwa okubiyerekire oku abona omukolo rhumujirira. Ayishi oku rhurhakahash’iseza omukolo gwirhu gw’obushiru oku guleheke. Ciru akaba ntyo, anabone obushiru bwirhu n’ebinja birhushumya okuhubiri, ananarhuhembe. Na kandi arhuyigirizize gurhi rhwakabamwo n’omwishingo omu cigabi rhukola omu mukolo munene gw’okusarula. (Yn. 14:12) Rhwanayemera n’obwalagale oku Nnâmahanga agendekera arhuyemera erhi rhwakaba rhurharhamiri!