1. Bici rhukengera ho n’aho erhi rhwakarhanya okubiyerekire omuntu w’olukogo?

ERHI rhurhanya okubiyerekire omuntu w’olukogo, rhunabone omu bwenge bwirhu omuntu mwinja, wa kushagaluka, wa bwonjo na muhânyi. Nkaba rhwanakengera ho n’aho omwanzi gw’Omusamariya Yezu aganiriraga. Oyo mulume w’omu lind’ishanja ‘afa lukogo’ Omuyahudi wagwaga omu maboko g’ebishumusi. Oyo Musamariya ‘amufa bwonjo’ anarhôla emipango y’obuzigire y’oku oyo Muyahudi abukwamo. (Lk. 10:29-37) Olo lwiganyo lusegize oborhere bwinja bwa Nnâmahanga wirhu: olukogo. Obo borhere ciba cigabi c’obuzigire bwa Nnâmahanga, ngasi mango anabuyerekane kugerera oku arhukolera.

2. Omu yindi njira nci olukogo luyerekanwamo?

² Haba eyindi njira olukogo luyerekanwamo yakayisha omu bukengere. Kuli kurhacihâ obuhane amango hali ecirhumire c’okujira ntyo. Kobinali muli eyo njira, Yehova arhuyeresire olukogo. Nk’oku mwandisi muguma w’olulanga adesire, “arharhujirira kungana ebyaha birhu.” (Enna. 103:10) Cikone hali agandi mango Yehova ahana buzibu-zibu omuntu wajijire ecaha cizibu.

3. Madoso gahi rhwaganirira?

³ Mw’eci cigabi, rhwaganirira madoso asharhu: Bulya gurhi Yehova ayerekana olukogo? Ka hali olushangi luba egarhi kw’olukogo n’obuhane buhânwa buzibu-zibu? Na bici byakarhurhabala rhuyerekane olukogo? Rhulole gurhi Akanwa ka Nnâmahanga kashuzize kw’ago madoso.

4. Bulya gurhi Yehova ayerekana olukogo?

⁴ Yehova asima okuyerekana olukogo. Entumwa Paolo yalongozibagwa n’iroho lya Nnâmahanga erhi eyandika oku Nyamuzinda aba wa “lukogo” lunji. Muli olo lwandiko, Paolo aganiriraga olukogo Nnâmahanga ayerekine omu kuha abakozi bage bashige amavurha barhal’ibimana obulangalire bw’okugendilama empingu.  (Ef. 2:4-7) Cikone olukogo lwa Yehova luli lunji kurhaluka aho. Omuzihi w’olulanga Daudi, ayandika ntya: “Nyamubaho [Yehova, NWT] aba mwinja kuli boshi, nn’olukogo lwage luyerekera emikolo yage.” (Enna. 145:9) Bulya Yehova aba azigire abantu, anababere olukogo ngasi mango erhi akabona oku hali ecirumire c’okujira ntyo.

5. Gurhi Yezu aciyigirizizemwo binji lugenda olukogo lwa Yehova?

⁵ Kulusha abandi bantu boshi, Yezu aba amanyire kungaci Yehova asima okuyerekana olukogo. Yehova n’Omugala bajijire myaka minji balamire haguma empingu kasanzi ka myaka minji bwenene embere Yezu arhacija hanw’igulu. (Mig. 8:30, 31) Omu njira nyinji Yezu acibwinire kunganaci Ishe ayereka bene bantu barhali bimana olukogo. (Enna. 78:37-42) Omu nyigirizo zage, Yezu akagisegeza kanji-kanji obo borhere bwinja bw’Ishe.

6. Gurhi Yezu ajijire ly’arhurhabala rhuhugûkwe kunganaci Ishe aba wa lukogo?

⁶ Nk’oku biyerekinwe omu cigabi cageraga, Yezu akolesize olwiganyo lw’okurhuliriza lw’omwana mulalahi ly’arhurhabala rhuhugûkwe kunganaci Yehova asima okuyerekana olukogo. Oyo mwana arhenga ahamwabo “ashandaza ebirugu byage omu bulalahi.” (Lk. 15:13) Buzinda, aciyunjuza olo lugenzi lubi alikola agwerhe, acirhohya anagaluka emwabo. Gurhi ishe ajijire? Birhahûnaga mpu hagere kasanzi kanji ly’ogo musole gumanya ebi bagujirira. Yezu adesire ntya: “Erhi aba aciri kuli, ishe amulangira, ayumva obwonjo bwamugwarha; anaciyisha ali bulibirha, amuyababira, amuhobera.” Oyo mushamuka arhabonesagya oyo mugala nshonyi. Lubero n’oko, amuyereka olukogo anamubabalira, buzinda acibimuyegereza omu mulala. Oyo mwana mulalahi agosize bwenene, cikone enyanya z’okuciyunjuza kwage kw’okunali, ishe amubabalira. Omubusi w’olukogo oganirirwe mw’olo lwiganyo ashushanyizibwe na Yehova. Mw’eyo njira ehûmire oku murhima, Yezu ayerekana okw’Ishe aba alonzize okubabalira abanyabyaha baciyunjuzize n’omurhima goshi.​—Lk. 15:17-24.

7. Lushangi luhi luhali egarhi k’obwenge bwa Yehova n’oku ayerekana olukogo?

⁷ Yehova anayerekane olukogo enyanya z’obwenge bwage burhankagerwa. Obwenge bwa Yehova burhaba borhere bw’okumanya binji kone. Ebibliya erhubwizire oku “obwenge bw’enyanya” buba “buyunjwire lukogo n’émburho nyinja.” (Yk. 3:17, NWT) Aka omubusi w’obuzigire, Yehova aba amanyire oku olukogo lwage lwanalerhera abana erhi bakozi bage bunguke bunji. (Enna. 103:13; Iz. 49:15) Olukogo lwa Nnâmahanga lunakabaha obulangalire bw’amango gayisha ciru akaba barhaba  bimana. K’okuderha oku obwenge bwa Yehova burhankagerwa bunakamushumya arhuyereke olukogo amango abwine ecirhumire c’okujira ntyo. Ciru ankaba ntyo, Yehova ayishi mangaci birhakacihûna okuyerekana olukogo. Kugerera obwenge, arhalekerera amabi gagendekere enyanya z’okubona aba wa lukogo.

8. Cijiro cihi ciba ca bulagirire okujira mango maguma na maguma, na bulya gurhi?

⁸ Rhurhanye kwa lwiganyo erhi omukozi wa Nnâmahanga akacishoga okuba n’olugenzi lw’okukajira ebyaha ngasi mango. Gurhi rhwakajira muli ako kanga? Kugerera obulongozi bw’iroho litagatifu lya Nnâmahanga, Paolo ayandika erhi: “Mumanye mwankakômera” omuntu wa ntyo. (1 Kr. 5:11) Banyankola maligo barhaciyunjuzizi, banakatengwa n’ecigamba. Okujira ntyo kuba kwa bulagirire bwenene bulya kunalange bene wirhu na bali birhu bishwekerezi na kandi kunayerekane enjira ntagatifu za Yehova. Cikone, bantu haguma na baguma, banakarhanya mpu okutenga omuntu kurhayerekana olukogo lwa Nnâmahanga. Ka kobinali? Olekage rhuganirire ogo mwanzi.

9-10. Nk’oku biyerekinwe omu lwandiko lw’Abahabraniya 12:5, 6, bulya gurhi rhwakaderha oku okutenga omuntu ciba cerekane c’olukogo? Ohâne olwiganyo.

⁹ Erhi rhuyumva batangaza oku ntimanano z’Ecikristu oku muntu mulebe rhumanyire rhunamuzigîre “arhaciri muguma w’omu Bahamirizi ba Yehova,” rhunaciyumve kubi bwenene. Nkaba hali amango ciru rhuhikira aha rhwacidosa erhi kobinali byanalihunyîre okutenga oyo muzigirwa wirhu. Ka kobinali okutenga omuntu ciba cerekane c’olukogo? Neci kobinali. Okulahira okuhana omuntu oshinganine obuhane burhaba bwenge, lurhaba lukogo, burhanaba buzigire. (Mig. 13:24) K’okutenga omunyabyaha orhaciyunjuzizi kwanamurhabala ashanje olugenzi lwage? Neci kwanamurhabala. Banji ba bala barhogire omu caha cizibu, bahikire aha bahugûkwa oku omuhigo muzibu-zibu abagula barhôlaga enyanya zabo gwabarhabire bahugûkwe oku kubi bakagijira, n’oko kwarhuma bashanja olugenzi lwabo, kwanabarhabire bacibigalukira Yehova.​—Osome Abahabraniya 12:5, 6.

¹⁰ Rhuganirire lwiganyo luguma. Lungere abone oku cibuzi ciguma c’omu bibuzi byage cilwazire. Amanyire oku ly’acibuka eyo ndwala bihûnyire aciyegule n’ebindi bibuzi erhi n’obuso. N’obu ayishi oku ebibuzi biba byakulama omu buso, nka birhalamiri omu buso byanalwala omuzungwe bulya biba bikomire okulama haguma. K’okuyegula eco cibuzi kuyerekine oku ali muminya erhi mukali? Nanga ciru n’ehitya. Amanyire oku erhi akalekera eco cibuzi cilwazire haguma n’ebindi bibuzi, eyo ndwala yanayahukira obuso boshi. Omu kuyegula eco cibuzi cilwazire, analange obuso boshi.​—Oshushanye na Bene-Levi 13:3, 4.

11. (a) Omu njira nci omuntu otenzirwe akashushanyizibwa n’ecibuzi cilwazire? (b) Bici omutengwa akajira, na burhabale buhi akahâbwa?

¹¹ Erhi Omukristu akatengwa, rhwanarhanya oku kw’akola ali nk’eco cibuzi cilwazire. Alwazire omu hali y’ekiroho. (Yk. 5:14) Obulwala bw’ekiroho ko bunaba nka bulwala buguma buguma bw’omubiri, bwanayahukira duba-duba. Co cirhumire, omu kanga kaguma na kaguma biba bihûnyire okuyegula omuntu olwazire kiroho n’ecigamba. Obo buhane ciba cerekane c’obuzigire Yehova ajira oku bandi baciri bishwekerezi bw’omu buso Bwage, n’obo buhane bwanahûma oku murhima g’oyo munyabyaha n’oko kurhume aciyunjuza. Ciru ankaba oyo muntu ali mutengwa, anakaja oku ntimanano, ly’agendekera ahâbwa amahano n’okucibizibuhya obuyemere bwage. Na kandi agwerhe oluhûma lw’okuhâbwa ebitabu ly’akabikolesa yene na kandi analola eprograme za JW Télédiffusion. Na bulya abagula bali balola kunganaci ali ajira amajambere, mango  maguma maguma banakamuha amahano n’obulongozi bwakamurhabala acibiba n’amagala minja g’ekiroho na ntyo anacib’iyemerwa nka muguma w’omu Bahamirizi ba Yehova. *

12. Kantu kahi k’obuzigire na ka lukogo abagula bakajirira omunyabyaha orhaciyunjuzizi?

¹² Kuli kwa bulagirire rhukengere oku abanyabyaha barhaciyunjuzizi bo batengwa. Abagula bayishi oku bashinganine barhanye buzibu-zibu embere bahige okutenga muntu mulebe. Bayishi oku Yehova anahâne obuhane “nk’oku bishinganine.” (Yer. 30:11) Babà bazigire bene wabo, barhanalonza babajirire akantu koshi-koshi kakabalerhera amazibu g’ekiroho. Cikone mango maguma na maguma, akantu k’obuzigire na ka lukogo kakajirwa kwanaba kutenga omunyabyaha orhaciyunjuzizi arhacibe muguma w’ecigamba mango malebe.

13. Bulya gurhi byal’ihûnyire Mukristu muguma w’e Korinti atengwe?

¹³ Rhulole gurhi entumwa Paolo yajirîre munyabyaha muguma orhaciyunjuzagya wali omu cigamba ciguma c’omu myaka igana mirhanzi. Mukristu muguma w’e Korinti akagijira obugonyi na muk’ishe. Oko kwali kubi bwenene! Okubiyerekire eco cijiro, Yehova ali abwizire aba Israheli ntya: “Erhi omuntu ankayanka muk’ishe, erhi amayambika ishe obusha; bombi banafê.” (Lev. 20:11) Kobinali, Paolo arhankarhegesire oku banige oyo mulume. Cikone abwira Abakorinti oku bamutenge. Olo lugenzi lw’okujira eby’enshonyi lw’oyo mulume lwahûma bwenene oku bandi bali omu cigamba, baguma baguma bahikira aha barhacibona nk’eco ciri caha cizibu!​—1 Kr. 5:1, 2, 13.

14. Gurhi Paolo ayererekine olukogo kuli olya mulume muguma w’e Korinti watengagwa, na bulya gurhi ajiraga ntyo? (2 Abakorinti 2:5-8, 11)

¹⁴ Kasanzi kasungu enyuma z’aho, Paolo ayumva oku oyo mulume anajijire empindûlo nyinji. Oyo munyabyaha ali amaciyunjunza okunali! Ciru akaba ali amabonesa ecigamba enshonyi, cikone Paolo abwira abagula oku arhalonzizi “abe mukali bwenene.” Ababwira ntya: “Mumubabalirage erhikwo munamuhire omurhima omu nda.” Olole ecarhumaga Paolo ababwira ntyo, aderha erhi: “[Ly’]oyo muhanya alek’irhogera omu burhe bulushire olugero.” Paolo ayumviza obwonjo oyo mulume waciyunjuzagya. Paolo arhal’ilonzize oyo mulume agogomerwe yeshi-yeshi erhi kulibuzibwa bwenene n’ebyo ajiraga bulya oko kwakarhumire alahira okucihûna obubabale.​—Osome 2 Abakorinti 2:5-8, 11.

15. Gurhi abagula bakahâna obuhane kwa buzibu-zibu n’okuyerekana olukogo muli ago mango go n’ago?

 ¹⁵ Omu kuyiga olwiganyo lwa Yehova, abagula basima okuyerekana olukogo. Banahane kwa buzibu-zibu amango bihûnyire okujira ntyo cikone kandi banayerekane olukogo nka bihashikine n’erhi hakaba hali ecirhumire c’okujira ntyo. Erhi abagula bakabula buhana omuntu orhaciyunjuzizi lurhakaba lukogo bayerekine, cikone kwanaba kulekerera ebintu bibi. Cikoki, k’abagula bone bashinganine bakayerekana olukogo?

16. Nk’oku biyerekinwe omu Emigani 21:13, gurhi Yehova ajirira bala barhayereka abandi olukogo?

¹⁶ Abakristu boshi banalonze okuyiga olwiganyo lwa Yehova lw’okuyerekana olukogo. Bulya gurhi? Ecirhumire ciguma kuli kubona oku Yehova arhakayumvirhiza bala barhayereka abandi olukugo. (Osome Emigani 21:13, Mashi Bible.) Ntaye muli rhwe wakasima Yehova alahire okuyumvirhiza amasala gage, co cirhuma rhuyaka loshi-loshi okuba n’omurhima muzibu gw’okurhayereka abandi olukogo. Co cirhuma rhurhafuka amarhwiri erhi kuba nk’abarhal’ibabona gurhi owirhu Mukristu ali alibuka, rhushinganine rhube babidu okuyumvirhiza “emirenge y’omugaraganda.” Ko n’oko, rhunakengere er’ihano ly’Ebibliya lidesire ntya: “Ola orhakômera kuyereka abandi olukogo atwirwa olubanja lwage buzira lukogo.” (Yk. 2:13, NWT) Erhi n’obwirhohye rhwakakengera kunganaci rhuba rhuIagirire oku lukogo, rhwanaba babidu okukayereka abandi olukogo. Cikone bwenene rhulonza okuyerekana olukogo erhi omunyabyaha ociyunjuzize agaluka omu cigamba.

17. Gurhi Mwami Daudi ayerekine olukogo n’omurhima goshi?

¹⁷ Enyiganyo ziri omu Bibliya zanarhurhabala rhukayerekana olukogo n’okuyaka okuba n’omurhima muzibu. Kwa lwiganyo, rhuganirire lugenda Mwami Daudi. Kanji-kanji akagiyerekana olukogo n’omurhima goshi. Ciru ankaba Sauli akagilonza amunige, Daudi agendekera ayereka oyo Mwami mushîge amavurha wa Nnâmahanga olukogo, arhalonzagya okucihola erhi kumujirira kubi.​—1 Sam. 24:9-12, 18, 19.

18-19. Kanga kahi kabirhi Daudi abulaga kuyerekanamwo olukogo?

¹⁸ Ciru akaba ntyo, arhali ngasi mango Daudi akagiyerekana olukogo. Kwa lwiganyo, erhi Nabali ashuza Daudi omu njira erhali y’obukenge analahira oku arhamuha ebiryo n’abalume bali boshi, Daudi ayumva oburhe bwenene anahiga okugend’iyirha Nabali n’abantu b’omu nyumpa yage boshi. Kugerera oku cijiro ca duba-duba Abigayili muka Nabali ajiraga, Daudi acîkwa okubulaga omuko gw’abo bantu.​—1 Sam. 25:9-22, 32-35.

¹⁹ Agandi mango, omulebi Natani aganirira Daudi okubiyerekire mulume muguma mugale wazimbaga ehibuzi higuma hy’omuntu wali mukenyi bwenene. Erhi Daudi ayumva ntyo akunirira oyo mulume bwenene, aderha ntya: “Kobinali nk’oku Yehova analamire, omuntu wajiraga ntyo ashinganine afê!” (2 Sam. 12:1-6, NWT) Daudi alimanyire Irhegeko lya Musa. Ecishambo cazimbire cibuzi ciguma calishinganine cilyûle bibuzi bini. (Lub. 22:1) Cikone, gurhi orhanyize lugenda okuderha oku oyo mulume ashinganine afê? Oko kwali kutwa olubanja n’obukali bwenene. Bibonekine oku Natani akolesagya  olo lwiganyo ly’arhabala Daudi ahugûkwe ebintu bibi amakajira! Na Yehova ayereka Daudi olukogo, lukogo Daudi naye alishinganine ayereke cirya cishambo cazimbaga ecibuzi ciganirirwe omu lwiganyo Natani akolesagya!​—2 Sam. 12:7-13.

20. Bici rhwakaciyigiriza kugerera olwiganyo lwa Daudi?

²⁰ Okengere oku erhi Daudi ayumva oburhe bwenene, ahiga oku Nabali n’abantu b’omu mwage bashinganine bafê. N’enyuma z’aho, Daudi aba mubidu okuderha oku olya mulume mugale w’omu lwiganyo Natani akolesagya ashinganine afê. Muli aka kanga ka kabirhi rhwanacidosa bulya gurhi Daudi wali muntu mwinja akahikire aha atwira abandi olubanja kubi ntyo. Olole akanga alimo. Muli ako kasanzi ezamiri ya Daudi yakagimutumuza. Okutwira abandi olubanja n’obukali ciba cerekane c’obulwala bw’ekiroho. Yezu ahanula abanafunzi bage ntya: “Murhakazag’itwa oluli omu mwa bene, irhondo bankatwa oluli omu mwinyu. Oku mwanatwe oluli omu mwa bene, kwo mwatwirwe oluli omu mwinyu.” (Mt. 7:1, 2) Co cirhumire rhuyake okuba bakali bwenene, rhucihangane okuba ba “lukogo” lunji, aka Nnâmahanga wirhu.

21-22. Omu njira zihi nguma na nguma rhwakakayerekanamw’olukogo?

²¹ Olukogo luba luhiziremo bintu binji kulusha okuyumviza abandi obwonjo kone. Muli oko, olukogo lwahugwîrwe nka “bonjo buli bwakola.” Co cirhumire, rhweshi rhushinganine rhukalabiriza gurhi rhwakarhabala abantu bw’omu mulala gwirhu, ab’omu cigamba n’abalungu birhu. Kobinali haba njira nyinji z’okuyerekana olukogo. Ka hali muntu mulebe omanyire olagirire oku kurhulirizibwa? Ka rhwanajira kantu kalebe lyo rhuhâna oburhabale, nkaba omu kumuha ebiryo, erhi kumujirira kantu kalebe rhurhanyize akaba alagiririreko? Ka hali Omukristu wagalusire omu cigamba olagirire oku bîra bakamurhuliriza n’okumuzibuhya? Ka rhwanaganirira abandi omwanzi mwinja gw’oburhulirize? Eyo eri njira nguma nyinja bwenene y’okuyerekana olukogo kuli ngasi boshi rhurhimanine nabo.​—Ayu. 29:12, 13; Rm. 10:14, 15; Yk. 1:27.

²² Erhi rhwakaba babidu okubona amalagirire g’abandi gali nk’ago, rhwanabona oku rhugwerhe njira nyinji rhwakayerekanamw’olukogo. Erhi rhuyereka abandi olukogo, rhunashagaluse Larha wirhu w’omu mpingu, Nnâmahanga oba wa “lukogo” lunji!