Bene wirhu b’oku Beteli bakozire bwenene omu kasanzi kalushire mwaka muguma lyo bayubaka estasyo y’eradio yakag’ihamagalwa WBBR e Staten Island, omu vile y’e New York. Enyuma z’okuhumba eciriba, bayubaka enyumpa nnene y’abakozi n’eyindi nyumpa y’okubikiramwo ebyombo. Erhi ogo mukolo guhwa, bene wirhu barhondera okushubuza ebyombo bal’ilagirireko lyo “bayaliza emyanzi oku radio.” Cikone byal’ihûnyire bahime mazibu malebe.

Bene wirhu babona oku kwali kuzibu okugwika eantene nnene y’eyo stasyo. Eyo antene ya metre 91 yal’ishinganine etugikwe egarhi ka mitungo ibirhi y’emirhi yal’igwerhe ngasi muguma obuli bwa metre 61. Oburhangiriza birhahashikanaga okujira ntyo. Omu kulangalira oburhabale bwa Yehova, buzinda bene wirhu bahasha okujira ntyo. Calvin Prosser, wakolaga kw’ogo mukolo, adesire ntya: “Rhucihashage okujira ntyo oburhangiriza rhwakacikunzire rhwakanadesire erhi, ‘Loli ebi rhwajijire!’” Bene wirhu baha Yehova irenge enyanya z’ebi bahashaga okujira, cikone bacigwerhe agandi mazibu.

Enjira y’okuyaliza emyanzi kugerera eradio yaciri mpyahya, kurhanali kulembu okugula ebyombo byal’ihûnyirwe. Cikone, bene wirhu bapata e emetere yali yamakolesibwa muntu mulebe ali amayubaka omu eneo. Ahali h’okugula emikro, bakolesa emikro y’etelefone. Budufu buguma omu Mwezi gwa 2, bene wirhu bahiga okupima ebyo byombo byoshi. Bal’ilagirire oku programe y’okuyaliza, muli ntyo bene wirhu bayimba enyimbo z’Obwami. Mwene Wirhu Ernest Lowe akengire erhi anasomirwe oku erhi bene wirhu baba bali bayimba, bahamagalwa  oku telefone n’Omuzuzi Rutherford, b wayumvagya oku radio yage oku bali bayimba e Brooklyn, hofi bilometre 25 kulî n’aho.

Mwene Wirhu Rutherford aderha ntya: “Muleke okujira olo lubi ludarhi. Muli mwayumvikana nka cigusho ca rhunyabu!” Bulya bene wirhu baciyumvirhe kubi hityu, bazimya ho n’aho eyo emetere, cikone bal’iyemire n’obwalagale oku bali tayari okuyaliza emyanzi oburhangiriza kugerera eradio.

Omu nsiku 24/2/1924, erhi bayaliza eprograme ntangiriza eyemirwe na leta, Mwene Wirhu Rutherford aha Yehova eyo stasyo y’eradio “oku bunguke bw’Obwami bwa Masiya.” Aderha oku omuhigo gw’eyo stasyo kwali “kurhabala abantu boshi bahugûkwe Ebibliya n’akasanzi k’obulagirire rhulamiremwo.”

Omu kugeza eyo programe ntangiriza, ikubuliro lyahikiriza akantu kinja bwenene. Eyo stasyo y’eradio WBBR yakolesibwe myaka 33 omu kuyaliza eprograme z’eradio z’ikubuliro.

Omu Mwezi gwa 7, 1924, Abanafunzi b’Ebibliya barhimanana oku ntimanano nkulu yajiragwa omu Columbus, Ohio. Abanafunzi b’Ebibliya bayisha kurhenga omw’igulu lyoshi, banayumvirhiza ehotuba omu lulimi lw’Eciharabu, Ecingereza, Ecifaransa, Ecialema, Ecigiriki, Ecihongrwa, Ecitaliyano, Ecilitwanie, Ecipoloné, Ecirusi, endimi z’Eciskandinave, n’Eciyikrenie. Ebigabi by’eyo ntimanano byayalizibwa oku radio, n’emipango yarhôlwa lyo bikayandikwa ngasi lusiku omu journal yakag’ihamagalwa Ohio State Journal.

Lwa Kani nsiku 24 Mwezi gwa 7, bantu balushire 5 000 bali kw’eyo ntimanano baja omu mahubiri omu vile eyo ntimanano yajiragwamwo. Bahâna bitabu hofi 30 000 banarhondeza ebihumbi by’amafunzo g’Ebibliya. Egazeti Ilabiro ly’Akalalizi yahamagire olo lusiku “cigabi c’omwishingo bwenene c’eyo ntimanano.”

Akandi kantu k’obulagirire kw’eyo ntimanano kabire Lwa Karhanu nsiku 25 Mwezi gwa 7, erhi Mwene Wirhu Rutherford asoma n’oburhwali omwanzi gwayerekanaga n’obwalagale obunywesi bw’ebirongozi by’amadîni. Aderha oku ebirongozi by’epolitike, ebirongozi by’amadîni, n’abarhunzi bakulu “bali barhuma abantu barhayiga okuli lugenda Obwami bwa Mungu bwayish’ikolesibwa naye ly’agisha  bene bantu.” Kandi ogo mwanzi gwayerekana oku abo balume “bacilunzire n’Ecigusho c’Amashanja, banayerekana oku eco cigusho eri ‘njira y’epolitike Obwami bwa Mungu buli bwakolamwo hanw’igulu.’” Abanafunzi b’Ebibliya bakalagirire oku burhwali bunji lyo bayaligiza abantu ogo mwanzi.

Omu kuyerekana amalehe g’eyo ntimanano nkulu, egazeti Ilabiro ly’Akalalizi yadesire ntya: “Ogo murhwe musungunu gwa Nnawirhu gwarhimananaga oku ntimanano nkulu y’omu Columbus gwarhenzire kw’eyo ntimanano gunahâbirwe emisi bwenene omu buyemere . . . , nta buhashe erhi itumu omushombanyi akabakwebire lyakabahimire.” Leo Claus, wali kw’eyo ntimanano, akengire ntya: “Enyuma z’eyo ntimanano, rhwaciyumvirhe rhushagalukire bwenene okuyaligiza abantu b’omu eneo yirhu ogo mwanzi.”

Omu Mwezi gwa 10, Abanafunzi b’Ebibliya barhondera okugabira abantu emiliyoni y’ekopi z’etrakte erik’omwanzi Mwene Wirhu Rutherford asomaga lugenda ebirongozi by’amadîni. Omu vile nsungunu y’e Cleveland, omu Oklahoma, Mwene Wirhu Frank Johnson ali amajira miniti 20 ayusize okugabira abantu ezo trakte erhi abandi bahubiri barhimanana naye. Arhakabezire aha bakamubwine duba-duba bulya abalume ba mw’eyo vile bal’igayisibwe bwenene n’amahubiri gage bajaga bamulonza. Mwene Wirhu Johnson ahiga okucifulika omu kanisa kali hofi. Erhi arhimana nta muntu olimwo, ahira ekopi z’eyo trakte omu Bibliya ya pastere n’oku ngasi cirhi. Arhenga mw’ako kanisa duba-duba nk’oku anajagamwo. Erhi abona acigwerhe akandi kasanzi, aja omu gandi makanisa abirhi, anajira nk’oku ajiraga omu karhanzi.

Frank agaluka duba-duba ahantu al’igwasirwe arhimanane n’abandi bahubiri. Acifulika enyuma z’estasyo y’e esanse anaja ahenguza abalume bal’imukulikire. Abo balume bagera n’omutuga aha burhambi bw’aho, cikone barhamubonaga. Erhi abo balume banagenda ntya, abandi bahubiri bakag’ihubiri aha burhambi bw’aho, boshi bahika baheba Frank omu mutuga banagenda.

Mwene wirhu muguma egarhi kabo akengire ntya: “Erhi rhuba rhuli rhwarhenga mw’eyo vile, rhwagezire aha burhambi bw’ago makanisa asharhu. Hali hofi bantu 50 bal’iyimanzire embere za ngasi kanisa. Bantu baguma na baguma bakag’isoma eyo trakte, n’abandi bal’iyihizire enyanya lyo pastere ayibona. Kobinali, rhwagenzire omu kasanzi kashinganine! Kandi rhwavuga Yehova Nnâmahanga wirhu omunkwa bulya arhulanzire anarhurhabala okumanya ebi rhwakajijire lyo rhuyâka abo bashombanyi b’Obwami.”

Omu bindi bihugo, Abanafunzi b’Ebibliya bashimbire olo lwiganyo lw’okuhubiri buzira boba. Omu eneo y’emwenè y’e France, Józef Krett ahubiri abantu b’e Pologne bahamiraga e France bakag’ikola eby’amabuye g’engulo ndarhi. Al’ipanzirwe okugeza ehotuba yal’igwerhe ecirhwe cidesire, “Obufûke bw’Abafîre Buli Hofi.” Erhi emilali ehânwa mw’eyo vile, padiri muguma wamwo arhonda abantu b’omu kanisa kage barhajag’iyumvirhiza eyo hotuba. Oburhonde bwage bwalerha amalehe gali lubero. Bantu balushire 5 000 baj’iyumvirhiza eyo hotuba, kuhiramwo n’oyo padiri! Mwene Wirhu Krett ahûna oyo padiri ahalire obwemere bwage, cikone alahira. Mwene Wirhu Krett ahâna ebicapo byoshi al’igwerhe bulya abwine oku abo bantu ahaga obuhamirizi bal’igwerhe enyorha y’okumanya Akanwa ka Mungu.​—Amosi 8:11.

Omu Afrique, Mwene Wirhu Claude Brown alerha omwanzi mwinja omu cihugo c’e Gold Coast, cikola cihamagalwa Ghana. Ehotuba zage n’ebicapo ahânaga byarhabala okulumiza okuli duba-duba mw’eco cihugo. John Blankson, wakag’isoma eby’efarmasi, ayumvirhiza hotuba nguma omu hotuba  za Mwene Wirhu Brown. Buzira kulegama, ahugûkwa oku anapatire okuli. John akengire ntya: “Okuli kwarhuma naciyumva nshagalusire bwenene, nanakakuganirira abandi buzira boba oku masomo girhu g’efarmasi.”

Lusiku luguma, John alambagirira omu kanisa kaguma k’Abaanglika ly’adosa padiri amadoso lugenda Obusharhu bulya John ali amahugûkwa bwinja oku enyigirizo z’Obusharhu ziba nyigirizo zirhapatini n’Amandiko. Oyo padiri amufukuza anamukankamira omu kuderha ntya: “Orhali Mukristu; oli muntu wa Shetani. Huluka!”

Erhi John ahika aha kâ ayandikira oyo padiri, amuhûna barhimanane embere z’abantu banji lyo baganirira Obusharhu. Oyo padiri ashuza omu kuhamagala John oku biro by’omwalimu mukulu w’amasomo g’efarmasi n’oyo mwalimu amudosa erhi kobinali anayandikire oyo padiri.

John ashuza erhi, “Neci, najijire ntyo waliha.”

Oyo mwalimu ahûna John ayandikire oyo padiri amaruba g’okumuhûna obwonjo. John ayandika ntya:

“Waliha, mwalimu wani ampûnaga nyandike amaruba g’okukuhûna obwonjo nanyemire okujira ntyo akaba wayemera oku onayigirize enyigirizo z’obunywesi.”

Oyo mwalimu agaya bwenene, anadosa ntya: “Blankson, ka byo wanal’ilonzize okuyandika ebi?”

“Neci Waliha. Ebyo byone nakanayandika.”

“Wafukuzibwa oku masomo. Gurhi wakaderha kubi padiri w’akanisa ka leta onalangalire oku wagendekera wakola omukolo gwa leta?”

“Cikone Mwalimu, . . . erhi orhuyigiriza akaba hali ebi rhurhahugûsirwi, ka rhurhakudosa amadoso?”

“Neci, munandose.”

“Mwalimu, ntyo ko nani nanajijire. Oyo mulume akag’irhuyigiriza Ebibliya nani namudosa idoso. Akaba arhakahasha okushuza er’idoso, cakarhuma namuyandikira amaruba g’okumuhûna obwonjo?”

Blankson arhafukuzibagwa oku masomo. Arhanayandikaga amaruba g’okuhûna obwonjo.

Omu kuganirira kwa bofofi omukolo gwajiragwa mw’ogo mwaka, Ilabiro ly’Akalalizi lyadesire ntya: “Kobinali, rhwanaderha aka Daudi waderhaga ntya: ‘We mpa emisi ndwa mwo.’ (Ennanga 18:39, Mashi Bible) Ogu mwaka guli muguma gw’omu bintu byarhuhîre omurhima bwenene bulya rhwacibwinire okuboko kwa Nnawirhu . . . Abacihânyire emwage kobinali . . . bahânyire obuhamirizi n’omwishingo.”

Oku buzinda bw’ogo mwaka, bene wirhu barhôla emipango lyo bahubiri bwenene kugerera eradio. Barhondera okuyubaka eyindi stasyo y’eradio hofi n’e Chicago. Eyo stasyo mpyahya y’eradio yakag’ihamagalwa LUDERHO. Omu kukolesa e emetere ya watt 5 000, estasyo y’eradio LUDERHO yakag’iyaliza omwanzi gw’Obwami oku magana g’ebilometre, ciru kuhika omu eneo y’emwenè y’e Canada.

Omwaka gwa 1925 gwali hofi gulerhe obumoleke bw’ekiroho bw’okushagalusa, omu kurhabala Abanafunzi b’Ebibliya bahugûkwe bwinja ecitabu c’Amafulûlo cigabi ca 12. Enyanya z’ago mahugûlo mahyahya, baguma na baguma bakasarhazibwe. Cikone, abandi banji bashagalusire bwenene okuhugûkwa bwinja ebyajirikanaga omu mpingu na gurhi byahumire oku bantu ba Mungu hanw’igulu.