1-2. Bici byabire erhi banafunzi babirhi ba Yezu baba bali omu njira y’okuja e Emausi?

 ZIRI nsiku 16, Mwezi gwa Nisani mwaka gwa 33 Kano Kasanzi Kirhu, (K.K.K.). Abanafunzi ba Yezu bagogomirwe n’oburhe banayobohire bwenene. Babirhi muli bo barhenga e Yeruzalemu banayerekire e Emausi, lugo luli oku bilometre hofi 11 kurhenga e Yeruzalemu. Abo balume bavunisire omurhima bwenene bulya Yezu, muntu bakag’ikulikira aciyusig’inigwa. Ebi bal’ilangalire oku Masiya akajijire bibonekine nka birhahikirire. Cikone, akantu k’okusomeza kabahikira.

² Omulume barhamanyiri abayegera analambagira haguma nabo. Abanafunzi bamuganirira ebyahikire Yezu bibavunyire omurhima. Buzinda oyo mulume arhondera okubaganirira emyanzi barhakayibagire omu kalamo kabo koshi. “Arhonderera kuli Musa n’Abalêbi boshi,” abahugûlira bulya gurhi Masiya al’ishinganine alibuke n’okufâ. Erhi abo balume basharhu bahika e Emausi, oyo mulume ayerekana oku ye Yezu wafûzirwe! Orhanye omwishingo abanafunzi babire nago omu kumanya oku Masiya al’ikola azine!​—Lk. 24:13-35.

3-4. (a) Gurhi Yezu arhabiremwo abanafunzi bage, na malehe gahi oko kwadwirhe? (b) Bici rhwayiga mw’eci cigabi? (Ebijiro byʼEntumwa 1:3)

³ Yezu abonekire abanafunzi bage kanji-kanji omu nsiku 40 nzinda ajiraga hanw’igulu. (Osome Ebijiro by’Entumwa 1:3.) Yezu aha omurhima abo banafunzi bage bal’igogomirwe n’oburhe  banal’iyobohire, na ntyo, baba n’omwishingo n’oburhwali bw’okuhubiri n’okuyigiriza omwanzi mwinja gw’Obwami. a

⁴ Rhwanayunguka omu kuyiga lugenda ebi Yezu ajijire mw’ako kasanzi. Mw’eci cigabi, rhwabona gurhi Yezu akolesizemwo akasanzi kage (1) ly’aha abanafunzi bage omurhima, (2) ly’abarhabala bahugûkwe bwinja Amandiko, na (3) ly’abakomereza lugenda emikolo bakajijire omu mango gayisha. Omu ngasi kanga, rhwabona gurhi rhwakayigamwo olwiganyo lwa Yezu.

OKAHA ABANDI OMURHIMA

5. Bulya gurhi abanafunzi ba Yezu bal’ilagirire oku kuhâbwa omurhima?

⁵ Abanafunzi ba Yezu bal’ilagirire oku kuhâbwa omurhima. Bulya gurhi? Baguma na baguma muli bo balesire enyumpa zabo, emilala yabo, n’emikolo yabo lyo bashimba Yezu akasanzi koshi. (Mt. 19:27) Abandi bakag’ijirirwa kubi bulya babire banafunzi bage. (Yn. 9:22) Baciyimire ebyo byoshi bulya bal’iyemire oku Yezu ye Masiya walaganyizibagwa. (Mt. 16:16) Cikone, erhi Yezu anigwa bavunika omurhima bulya barhanyize oku ebi bal’ilangalire birhacihikirire.

6. Bici Yezu ajijire enyuma z’okufûka kwage?

⁶ Buzira karhinda, Yezu abwine oku oburhe abanafunzi bage bali burhayerekanaga oku bal’igwerhe obuzamba bw’ekiroho, cikone abwine oku bal’ishinganine baciyumve ntyo enyanya z’okufâ kwage. Co cirhumire omu lusiku lo n’olo afûkaga, arhondera okuha abo bîra bage omurhima. Kwa lwiganyo, Yezu abonekire Mariya Magdalena erhi aba ali alakira aha bwa nshinda yage. (Yn. 20:11, 16) Kandi abonekire abanafunzi babirhi baganirirwe oku murhondero gw’eci cigabi. Kandi abonekire entumwa Petro. (Lk. 24:34) Bici rhwakaciyigiriza kugerera olwiganyo lwa Yezu? Rhuganirire ebyabire erhi abonekera abantu oburhangiriza.

7. Nk’oku biganirirwe omu Yowane 20:11-16, bici Yezu abwine Mariya ali ajira sezi-sezi omu nsiku 16 Mwezi gwa Nisani, na bici oko kwashumize Yezu okujira? (Olole n’enfoto.)

⁷ Osome Yowane 20:11-16. Sezi-sezi omu nsiku 16, Mwezi gwa Nisani, bakazi balebe  bishwekerezi baja ebwa nshinda aha Yezu al’ibishirwe. (Lk. 24:1, 10) Lekagi rhuganirire ebi Mariya Magdalena, mukazi muguma muli bo acibwinire. Erhi Mariya ahika aha nshinda, arhimana erhalimwo cici. Alibirha aj’ibwira Petro na Yowane anabakulikira erhi bakanyiriza baja ebwa nshinda. Enyuma z’okucibonera oku omu nshinda murhali cici, abo balume bagaluka e kâ. Cikone Mariya arhagalukaga. Abêra aha nshinda ali alaka. Arhamanyaga oku Yezu akag’imubona. Akag’ilolereza emirenge y’oyo mukazi w’obuyemere analonza okumurhuliriza. Muli ntyo, abonekera Mariya anajira kantu kalebe kasungunu kamuhâga omurhima bwenene. Aganiza Mariya anamuha omukolo gw’obulagirire, ko kuderha okumanyisa bene wabo omwanzi mwinja lugenda obufûke bwage.​—Yn. 20:17, 18.

8. Gurhi rhwakayigamwo olwiganyo lwa Yezu?

⁸ Gurhi rhwakayigamwo olwiganyo lwa Yezu? Rhwanajira binji lyo rhushumya bene wirhu na bali birhu bagendekere bakolera Yehova, erhi aka Yezu rhwakaba rhumanyire amababale gabo n’okubaganiza omu njira y’obwonjo. Rhuganirire ebyahikiraga mwali wirhu ohamagalwa Jocelyn, mulumuna wage afâga omu aksida ndarhi bwenene. Adesire ntya: “Najijire myezi minji ndi naciyumva mbabîre ngasi kasanzi.” Cikone, mwene wirhu muguma na mukage bamulalika aha mwabo, bamuyumvirhiza omu njira y’obwonjo, banamuyemeza n’obwalagale oku ali wa ngulo ndarhi bwenene omu masu ga Mungu. Jocelyn adesire ntya: “Naciyumva nka Yehova abakolesize lyo bankulula kurhenga omu nyanja y’omwizizi erimw’omulaba n’okumpeba omu bato y’okuyokola obuzine. Bantabire lyo ncib’iba n’irala ly’okugendekera nakolera Yehova.” Nirhu rhwanaha abandi omurhima omu kubayumvirhiza bwinja amango bali barhuganirira ebibali emurhima, n’omu kubaganiza omu njira y’obwonjo erhi rhunalonzize okubazibuhya lyo bagendekera bakolera Yehova.​—Rm. 12:15.

ORHABALE ABANDI LYO BAHUGÛKWA AMANDIKO

9. Mazibu gahi abanafunzi ba Yezu bagwerhe, na gurhi Yezu abarhabiremwo?

⁹ Abanafunzi ba Yezu bayemire Akanwa ka Mungu banacihangana okukakolesa omu kalamo kabo. (Yn. 17:6) Ciru akaba ntyo, barhahugûkagwa gurhi Yezu akafîremwo nka nyankola-maligo oku murhi gw’amalibuko. Yezu ahugûkwa oku bagwerhe akarhinda, arhali bulya bagwerhe omurhima mubi, cikone bulya barhal’ihugûsirwe Amandiko. (Lk. 9:44, 45; Yn. 20:9) Muli ntyo, abarhabala okuhugûkwa ebi bakag’isoma omu Mandiko. Rhuganirirage gurhi ajijiremwo ntyo erhi abonekera balya banafunzi bage babirhi omw’ibarabara ly’okuja e Emausi.

10. Gurhi Yezu ayemezizemwo abanafunzi bage oku kobinali ye Masiya? (Luka 24:18-27)

¹⁰ Osome Luka 24:18-27. Obwine oku Yezu arhabwiraga abo balume ho n’aho ali ndi. Lubero n’oko, abadosa amadoso. Bulya gurhi? Nkaba al’ilonzize baderhe ebyali omu bukengere bwabo n’omu murhima gwabo. Banajira ntyo. Bamubwira oku bal’ilangalire oku Yezu ye wakabire Mwami w’Israheli anabarhegeke ahali h’Abaroma. Enyuma z’okuderha n’obwalagale oku bakag’iciyumva, Yezu akolesa Amandiko ly’abarhabala bahugûkwe ebyabaga. b Buzinda mw’ebyo bijingo, Yezu ageza akasanzi haguma n’abandi banafunzi ly’abarhabala bahugûkwe amalebi g’Ebibliya gahikiriraga lugenda ye. (Lk. 24:33-48) Bici rhwakaciyigiriza kugerera ogo mwanzi?

11-12. (a) Isomo lihi rhwakaciyigiriza kugerera oku Yezu ayigirizagyamwo enyigirizo z’Ebibliya? (Olole n’enfoto.) (b) Gurhi mwene wirhu wakag’iyigiriza Nortey Ebibliya amurhabiremwo?

¹¹ Gurhi rhwakayigamwo olwiganyo lwa Yezu?  Burhangiriza, amango oli wayigiriza abanafunzi b’Ebibliya, odose amadoso garhakarhuma baciyumva kubi gakabarhabala baderhe ebiri omu bukengere bwabo n’omu murhima gwabo. (Mig. 20:5) Enyuma z’okuhugûkwa oku bali baciyumva, obayerese gurhi bakapatamwo Amandiko gakabarhabala omu kanga balimwo. Orhalonzagya okubabwira ebi bagwasirwe bajire. Ahali h’okujira ntyo, obarhabale barhanye oku Mandiko n’okuhugûkwa gurhi bakakolesamwo amakanuni g’Ebibliya omu kalamo kabo. Rhuganirire olwiganyo lwa mwene wirhu muguma w’e Ghana ohamagalwa Nortey.

¹² Erhi Nortey agwerhe myaka 16, arhondera okuyiga Ebibliya. Cikone enyuma za kasanzi kasungunu, omulala gwage gwamuhagalika. Bici byamurhabire ly’agendekera okuyiga Ebibliya? Mwalimu wage w’Ebibliya ali erhi akolesize olwandiko lwa Mateyo cigabi ca 10 ly’amuhugûlira oku Abakristu b’okuli bashinganine balibuzibwe. Nortey adesire ntya: “Muli ntyo, erhi okulibuzibwa kurhondera, nal’iyemire n’obwalagale oku napasire okuli.” Kandi mwalimu wage amurhabire okurhanya oku lwandiko lwa Mateyo 10:16 ly’akaba masu na wa bukenge amango ali aganirira ebiyerekire eby’idîni haguma n’abantu b’omulala gwage. Enyuma z’okubatizibwa kwage, Nortey al’ilonzize abe painiya, cikone ishe al’ilonzize aje oku université. Oyo mwene wirhu arhabwiraga Nortey ebi ajira. Ahali h’okujira ntyo, amudosa amadoso gamurhabalaga arhanye oku makanuni g’Amandiko n’okurhôla omuhigo mwinja. Malehe gahi oko kwadwirhe? Nortey ahiga okuja omu mukolo gw’akasanzi koshi. Ishe amufukuza aha kâ. Gurhi Nortey aciyumvirhe lugenda ebyo byamuhikiraga? Adesire ntya: “Nyemire n’obwalagale oku narhôzire omuhigo mwinja.” Erhi rhuha abandi omurhima barhanye oku Mandiko, rhunabarhabale bazibuhye obuyemere bwabo n’okugendekera bakolera Yehova.​—Ef. 3:16-19.

ORHABALE BENE WIRHU LYO BAHIKIRA OKUBA ‘NSHOKANO’ OMU BALUME

13. Gurhi Yezu ajijire ly’omukolo gw’Ishe gugendekera gwahikirizibwa? (Abefezi 4:8)

¹³ Amango Yezu ali hanw’igulu, ahikirizize n’obwimana omukolo Ishe amuhâga ajire. (Yn. 17:4) Cikone Yezu arhagwerhe entanya za ntya: ‘Erhi akaba olonzize akantu kajirwe bwinja, wene ogwasirwe okajire.’ Omu myaka isharhu n’enusu y’omukolo gwage, akomerezize abandi okujira ogo mukolo. Embere Yezu agaluke empingu, ahîre abanafunzi bage omukolo  gw’okushibirira ebibuzi bya Yehova by’engulo ndarhi n’okulongoza omukolo gw’okuhubiri n’okuyigiriza. Nkaba baguma na baguma muli bo bagwerhe myaka 20 na kulusha. (Osome Abefezi 4:8.) Gurhi Yezu akolesizemwo ensiku 40 nzinda ajiraga hanw’igulu ly’akomereza abo balume bal’icihânyire, bishwekerezi, na ba bushiru lyo bahikira okuba ‘nshokano’ omu balume?

14. Omu nsiku 40 nzinda Yezu ajiraga hanw’igulu, gurhi arhabiremwo abanafunzi bage lyo bakula omu hali y’ekiroho? (Olole n’enfoto.)

¹⁴ Yezu ahîre abanafunzi bage amahano g’obwalagale, cikone ga buzigire. Kwa lwiganyo, abwine oku baguma na baguma muli bo bakag’ilonza okuba n’akarhinda, n’oko kwarhuma abahanula. (Lk. 24:25-27; Yn. 20:27) Kandi ababwizire basegeze bwenene obwenge oku mukolo gw’okushibirira ebibuzi bya Yehova ahali h’okubusegeza oku mikolo yabo y’omubiri. (Yn. 21:15) Abakengeza oku barhakag’ihangayika bwenene enyanya z’olukengwa abandi bakaba bagwerhe omu mukolo gwa Yehova. (Yn. 21:20-22) Anakubûla ntanya ndebe mbi bagwerhe lugenda Obwami anabarhabala basegeze obwenge oku kuhubiri omwanzi mwinja. (Ebj. 1:6-8) Bici abagula bakaciyigiriza kugerera olwiganyo lwa Yezu?

15-16. (a) Njira zihi abagula bakayigamwo olwiganyo lwa Yezu? Ohugûle. (b) Gurhi Patrick ayungusiremwo n’ihano ahâbagwa?

¹⁵ Gurhi abagula bakayigamwo olwiganyo lwa Yezu? Bagwasirwe bakomereze bene wirhu, ciru n’abaciri misole, lyo bajira mikolo minji omu cigamba. c Abagula barhalongeza obwimana oku bantu bali bakomereza. Bashinganine bahe abo bene wirhu baciri misole amahano omu njira y’obuzigire lyo baba n’obulenga omu mukolo n’okubona bulya gurhi kuli kwa bulagirire okuba birhohye, bishwekerezi, na babidu okukolera abandi.​—1 Tm. 3:1; 2 Tm. 2:2; 1 Pt. 5:5.

¹⁶ Rhuganirire gurhi mwene wirhu muguma ohamagalwa Patrick ayungusire n’ihano ahâbagwa. Erhi ali musole bwenene, akag’iganira omu njira y’obukali n’okujirira abandi omu njira erhashinganini, kuhiramwo na bali birhu.  Mugula muguma abona oku Patrick al’ishinganine ajire empindulo anamuha ihano ly’obwalagale, cikone ajira ntyo omu njira y’olukogo. Patrick adesire ntya: “Nshagalusire okubona ajijire ntyo. Nakag’ivunika omurhima erhi nakabwine abandi bene wirhu bali bahâbwa emikolo nakalonzize mpâbwe. Cikone ihano ly’oyo mugula lyantabala mbone obulagirire bw’okusegeza obwenge oku kukolera bene wirhu na bali birhu omu njira y’obwirhohye, ahali h’okubusegeza oku kuhâbwa mukolo mulebe omu cigamba.” Enyanya z’oko, Patrick aba mugula erhi anagwerhe myaka 23.​—Mig. 27:9.

17. Gurhi Yezu ayerekinemwo oku al’ilangalire abanafunzi bage?

¹⁷ Yezu ahîre abanafunzi bage omukolo, arhali gwa kuhubiri kone ci n’okuyigiriza. Nkaba abanafunzi baciyumvirhe nka barhagwerhi obuhashe bw’okujira ogo mukolo. Cikone, Yezu al’imanyire buzira karhinda oku bakagujijire, anababwira ntyo. Ly’ayerekana oku al’ibalangalire loshi-loshi, aderha ntya: “Nk’oku Larha antumaga, nani mmurhumire.”​—Yn. 20:21.

18. Gurhi abagula bakayigamwo olwiganyo lwa Yezu?

¹⁸ Gurhi abagula bakayigamwo olwiganyo lwa Yezu? Abagula b’obulenga banakomereze abandi omu kubaleka bajire mikolo milebe. (Fl. 2:19-22) Kwa lwiganyo, abagula banahûna abaciri misole barhabale oku mukolo gw’okucesa n’okushibirira Enyumpa y’Obwami. Enyuma z’okuhâna mukolo mulebe, banayerekana oku balangalire abaguhâbagwa omu kubakomereza n’okulangalira oku bagujira bwinja. Mugula muguma ociri muhyahya ohamagalwa Matthew adesire oku anashagalukire bwenene abagula b’obulenga bamukomereza bwinja-bwinja okujira mukolo mulebe n’okulangalira oku aguyukiriza. Adesire ntya: “Nayungusire erhi bakabona amagosa nakag’ijira oku ciri cigabi c’okukomerezibwa kwani n’okuntabala lyo njira bwinja agandi mango.” d

19. Bici rhushinganine rhuhige okujira?

¹⁹ Yezu akolesize ensiku 40 nzinda ajiraga hanw’igulu omu kuha abandi omurhima, omu kubayigiriza, n’okubakomereza. Lekagi rhuhige okushimba bwinjinja olwiganyo lwage. (1 Pt. 2:21) Arhurhabala lyo rhujira ntyo. Kobinali, alaganyize ntya: “Ndi haguma na ninyu ensiku zoshi kuhika oku buzinda bw’igulu.”​—Mt. 28:20, Mashi Bible.