ECIGABI C’OKUYIGA CA 43
LWIMBO 90 Rhukahânana Omurhima
Oku Wakahimamwo Akarhinda
“Mulole bwinja ngasi kantu.”—1 TS. 5:21.
EBI ECI CIGABI CISEGIZE
Oku rhwakahimamwo akarhinda kakarhuma rhurhagendekera rhwakolera Yehova.
1-2. (a) Bintu biguma na biguma bihi byakarhuma abantu ba Yehova baba n’akarhinda? (b) Bici rhwaganirira mw’eci cigabi?
ABANTU boshi babe bakulu erhi barho, hali amango baba n’akarhinda. a Kwa lwiganyo, orhanye omuhubiri ociri musole oli wacidosa erhi kobinali Yehova anamushibirire. Enyanya z’oko, nkaba anarhindira okubatizibwa. Erhi orhanye lugenda mwene wirhu warhôzire omuhigo gw’okuhira omukolo gwa Yehova oku nafasi ntanzi omu kalamo kage amango aciri musole, ahali h’okulonza nsaranga nyinji mw’er’igulu. Buno bulya akola akuzire arhanagwerhi nsaranga nyinji z’okuhikiriza amalagirire g’omulala gwage, anarhondera acidosa erhi kobinali arhôzire omuhigo mwinja amango aciri musole. Orhanyagye lugenda mwali wirhu okola mugikulu orhacigwerhi misi minji. Nkaba anaciyumva avunisire omurhima bulya arhacigwerhi obuhashe bw’okujira ebi akag’ijira embere. Ka hali amango okola ocidosize amadoso nka: ‘Ka kobinali Yehova anambone? K’ebi naciyimire lyo nkolera Yehova byafîre busha? Ka nciri wa bulagirire kuli Yehova?’
2 Erhi akaba rhurhalonzizi amashuzo oku madoso gali nk’ago, oko kwanarhuma rhwaheza obuyemere bwirhu muli Yehova, na ciru nkaba kwanarhuma rhwaleka okumuharamya. Mw’eci cigabi, rhwaganirira gurhi okusegeza obwenge bwirhu oku makanuni g’Ebibliya kwakarhurhabalamwo erhi akaba rhugwerhe akarhinda lugenda (1) erhi Yehova anarhushibirire, (2) erhi emihigo rhwarhôlaga omu mango gageraga yali minja, na (3) erhi rhuciri ba bulagirire kuli Yehova.
OKU RHWAKAHIMAMWO AKARHINDA KIRHU
3. Njira nguma ehi rhwakahimamwo akarhinda kirhu?
3 Njira nguma rhwakahimamwo akarhinda kirhu kuli kulonza amashuzo g’amadoso girhu omu Kanwa ka Mungu. Erhi rhwakajira ntyo, rhwanazibuha, rhwanakula omu hali y’ekiroho, n’okuba n’obuhashe bw’‘okusêra buzibu omu buyemere.’—1 Kr. 16:13.
4. Gurhi ‘rhulolamwo bwinja ngasi kantu’? (1 Abatesalonika 5:21)
4 Osome 1 Abatesalonika 5:21. Obwine oku Ebibliya erhuhûnyire ‘rhulole bwinja ngasi kantu.’ Gurhi rhwakajiramwo ntyo? Rhwanalolereza erhi ebi rhuba rhuyemire biri by’okuli omu kubishushanya n’ebi Ebibliya edesire. Kwa lwiganyo, orhanyeko gulya musole guli gwacidosa erhi kobinali Mungu anagushibirire. K’ashinganine arhanye oku bulya ali acidosa ntyo kuli kuderha oku Yehova arhamushibirira? Nanga, ashinganine ‘alole bwinja ngasi kantu’ omu kulonza entanya za Yehova lugenda oko.
5. Gurhi rhwakabonamwo amashuzo ga Yehova oku madoso girhu?
5 Amango rhuli rhwasoma Akanwa ka Mungu, “rhunayumve” Yehova ali arhuganiza. Cikone lyo rhumanya entanya zage lugenda idoso lilebe, biba bihûnyire rhujire obushiru. Rhushinganine rhulonze n’okuyiga Amandiko gakarhurhabala rhubone ishuzo okw’idoso lirhu. Rhwanajira obusagasi lugenda ogo mwanzi omu kukolesa ebikolanwa by’okujirira obusagasi ikubuliro lya Yehova lirhuha. (Mig. 2:3-6) Rhwanashenga Yehova arhulongoze omu busagasi bwirhu n’okurhurhabala rhubone entanya zage okw’idoso lirhu. Enyuma z’aho, rhwanalonza amakanuni g’Ebibliya n’emyanzi y’obulagirire epatine n’akanga kirhu. Kandi rhwanayunguka omu kuyiga emyanzi y’omu Bibliya eganirire abantu balwisize akanga kashushine n’akirhu.
6. Gurhi entimanano zirhurhabalamwo lyo rhuhima akarhinda kirhu?
6 Kandi “rhunayumve” Yehova ali arhuganiza amango rhuli oku ntimanano zirhu. Erhi rhwakakaja oku ntimanano zirhu ngasi mango, rhwanayumva kantu kalebe omu hotuba erhi omw’ishuzo lya mumvirhiza mulebe rhwakaba kobinali rhulagirireko lyo rhuhima akarhinda kirhu. (Mig. 27:17) Lekagi rhuganirire oku rhwakahimamwo akarhinda rhwakaba rhugwerhe lugenda kanga kalebe.
ERHI WAKABA OLI WACIDOSA ERHI KOBINALI YEHOVA ANAKUSHIBIRIRE
7. Idoso lihi bantu baguma na baguma bakacidosa?
7 Ka hali amango okola ocidosize erhi, ‘Ka kobinali Yehova anambone?’ Erhi wakaba oli waciyumva nk’oli wa busha-busha, wanarhanya oku birhakahashikana kuli we okuba mwîra w’Omulemi w’igulu lyoshi. Nkaba Mwami Daudi naye agwerhe entanya za ntyo. Asomirwe okubona oku ciru Yehova anashibirire bene bantu. Aderha ntya: “Nyamuzinda, omuntu ciri cici obu okâmukengêra! Mwene muntu ciri cici obu okâmushîbirira.” (Enna. 144:3, Mashi Bible) Ngahi rhwakakûla ishuzo ly’er’idoso?
8. Kushimbana na 1 Samweli 16:6, 7, 10-12, bici Yehova abona omu bantu?
8 Ebibliya erhuyigirizize oku Yehova anabone abantu babonekana nka barhali ba bulagirire oku bandi. Kwa lwiganyo, Yehova arhumire Samweli aha mwa Yese ly’ashiga amavurha muguma w’omu bagala wakayishir’iba mwami w’ishanja ly’Abaisraheli. Yese ahamagala bagala nda omu munani agwerhe lyo barhimanana na Samweli, cikone arhahamagalaga Daudi wali murho muli bo. b Ciru akaba ntyo, Daudi ye Yehova acishozire. (Osome 1 Samweli 16:6, 7, 10-12.) Yehova abwine Daudi ali ndi kobinali ekandalala, ko kuderha murhabana wakag’ibona ebintu by’ekiroho oku biri bya bulagirire bwenene.
9. Bulya gurhi wanayemera n’obwalagale oku Yehova anakushibirire? (Olole n’enfoto.)
9 Orhanye lugenda gurhi Yehova ali erhi ayerekinemwo oku anakubone. Anakuhe amahano gapatine n’akanga kawe. (Enna. 32:8) Gurhi akajiramwo ntyo erhi akaba arhakumanyiri bwinja? (Enna. 139:1) Erhi wakakolesa amahano ga Yehova n’okubona gurhi gakurhabiremwo, wanayemera n’obwalagale oku Yehova anakushibirire. (1 Nga. 28:9; Ebj. 17:26, 27) Yehova anabone obushiru bwawe. Anabone amorhere gawe minja ananashumibwe okukuyegera. (Yer. 17:10) Alonzize nawe oyemere okuba mwîra wage.—1 Yn. 4:19.
‘Erhi wankalonza [Yehova], anacîyereka we.’—1 Nga. 28:9, Mashi Bible (Olole ecifungo ca 9) c
ERHI AKABA OLI WACIDOSA ERHI EMIHIGO WARHÔZIRE OMU MANGO GAGERAGA YALI MINJA
10. Erhi rhurhanya oku mihigo rhwarhôzire omu mango gageraga, madoso gahi rhwakacidosa?
10 Enyuma za myaka minji, baguma na baguma banarhanya oku mango gageraga n’okucidosa erhi kobinali barhôzire emihigo minja. Nkaba bahizire okuleka akazi k’omushahara mwinja erhi omukolo gwakabadwirhire nsaranga nyinji lyo bakolera Yehova bwenene. Cikone nkabaga hakola hali myaka minji, banarhanya oku bantu baguma na baguma barhôzire emihigo eri lubero n’eyabo, na buno abo bantu babonekine nka bagwerhe nsaranga nyinji n’akalamo kinja. Enyanya z’oko banacidosa ntya: ‘K’ebi naciyimire byoshi enyanya za Yehova byafîre busha? Erhi ka byarhumire nabulirwa na bintu bilebe?’
11. Bici byarhindibuzize omwandisi w’Olulanga lwa 73?
11 Erhi akaba okola ocidosize amadoso gali nk’ago, orhanye oku omwandisi w’Olulanga lwa 73 aciyumvirhe. Abwine abantu barhakag’ikolera Yehova, bal’igwerhe amagala minja, bagale, banakag’ibonekana nka nta mazibu bagwerhe. (Enna. 73:3-5, 12) Erhi abalolereza n’okubona nka bal’iyololosire omu kalamo, aciyumva nk’obushiru bwage bw’okukolera Yehova bwafîre busha. Enyanya z’ezo ntanya z’okuvuna omurhima, adesire oku “ngasi mango erhi na kurhindibuka.” (Enna. 73:13, 14, Mashi Bible) Gurhi alwisizemwo ezo ntanya z’okurhindibuza?
12. Kushimbana n’Ennanga 73:16-18, Mashi Bible, gurhi omwandisi w’olo lulanga ahimiremwo akarhinda agwerhe?
12 Osome Ennanga 73:16-18, Mashi Bible. Oyo mwandisi w’ennanga aja omu nafasi ntagatifu nkulu ya Yehova. Omo, aba n’obuhashe bw’okurhanya bwinja. Ahugûkwa oku ciru akalamo ka bantu baguma na baguma kakabonekana nka karhagwerhi mazibu, barhagwerhi bulangalire lugenda amango gayisha. Erhi ahugûkwa ntyo, aba n’omurhûla omu bukengere omu kumanya oku okushimbulira ebintu by’ekiroho go gwali muhigo mwinja bwenene. Enyanya z’oko, ahiga okugendekera akolera Yehova.—Enna. 73:23-28.
13. Gurhi wakabamwo n’omurhûla omu bukengere erhi akaba ogwerhe akarhinda lugenda emihigo warhôlaga omu mango gageraga? (Olole n’enfoto.)
13 Kugerera oburhabale bw’Akanwa ka Mungu, nawe wanaba n’omurhûla guli nk’ogo omu bukengere. Omu njira nci? Orhanye kunganaci ebi ogwerhe biri bya ngulo ndarhi bwenene, bihiziremwo omuhako ocibikire empingu, onabishushanye n’ebyayish’ihikira abantu ebi er’igulu lihâna lone luhembo lwabo. Banalangalire loshi-loshi ebi bahikiriza omu kalamo bulya barhagwerhi bulangalire boshi-boshi lugenda amango gayisha. Cikone wehe, Yehova akulaganyize emigisho elushire bwenene oku wakahash’irhanya. (Enna. 145:16) Kandi orhanye k’oku: Ka kobinali rhwanamanya gurhi akalamo kirhu kakabire rhucirhôlage emihigo eri lubero? Rhumanyire n’obwalagale ntya: Abantu barhôla emihigo eyimangire oku buzigire bwabo kuli Mungu n’obuzigire bwabo oku mulungu, barhakabula ciru n’ehitya ebintu binja.
Osegeze obwenge oku migisho Yehova alaganyize (Olole ecifungo ca 13) d
ERHI AKABA OLI WACIDOSA ERHI KOBINALI OBA WA BULAGIRIRE KULI YEHOVA
14. Kanga kahi bakozi ba Yehova baguma na baguma balimwo, n’idoso lihi bakacidosa?
14 Bakozi ba Yehova baguma na baguma barhagwerhi obuhashe bw’okujira ebi balonzize bulya bakola bashosi erhi bagikulu, balwazire, erhi bagwerhe buzamba bulebe. Oko kwanarhuma baciyumva nka barhali ba bulagirire omu masu ga Yehova. Banacidosa ntya: ‘Ka nciri wa bulagirire kuli Yehova?’
15. Bici omwandisi w’Olulanga lwa 71 al’iyemire n’obwalagale?
15 Omwandisi w’Olulanga lwa 71 naye akag’iciyumva ntyo. Asalira ntya: “Orhandekêreraga amango ntacigwerhi magala.” (Enna. 71:9, 18) Ciru akaba ntyo, oyo mwandisi w’ennanga agendekire ayemera n’obwalagale oku erhi akakolire Yehova Nnâmahanga wage n’obwishwekerezi, akamulongozize n’okumurhabala. Nk’oku oyo mwandisi w’ennanga ayizire, Yehova anashagalukire abajira okwabo koshi lyo bamukolera ciru akaba barhagwerhi obuhashe bw’okujira binji.—Enna. 37:23-25.
16. Omu njira zihi bene wirhu na bali birhu bakola bashosi erhi bagikulu baba ba bulagirire kuli Yehova? (Ennanga 92:12-15, Mashi Bible)
16 Mwe mukola bashosi erhi bagikulu, mukabona akanga kinyu nk’oku Yehova akabona. Anamurhabala lyo muyololoka omu hali y’ekiroho ciru akaba mwanaba muli mwalwisa amazibu g’omubiri. (Osome Ennanga 92:12-15, Mashi Bible.) Ahali h’okusegeza obwenge kw’ebi orhacigwerhi obuhashe bw’okujira, obusegeze kw’ebi wakahash’ijira. Kwa lwiganyo, wanazibuhya abandi kugerera olwiganyo lwawe lw’obwishwekerezi n’omu kubashibirira. Wanabaganirira lugenda gurhi Yehova akurhabiremwo omu kasanzi ka myaka minji n’okubaganirira obulangalire busezire ogwerhe oku ahikiriza ebiragane byage. Kandi orhayibagiraga oku amasala ojira enyanya z’abandi gajira buhashe bunji. (1 Pt. 3:12) Ciru rhwakaba rhuli omu kanga kahi, rhweshi rhugwerhe kantu kalebe rhwakaha Yehova n’abandi.
17. Bulya gurhi rhushinganine rhuyake okucigerera oku bandi?
17 Erhi wakaciyumva ovunisire omurhima bulya orhacigwerhi buhashe bw’okujira binji omu mukolo gwa Yehova, oyemere n’obwalagale oku anashagalukire ngasi byoshi wakahasha okujira. Nkaba wanalonza okugerera ebi ojira kw’ebi abandi bajira. Cikone orhajiraga ntyo! Bulya gurhi? Bulya Yehova arhajira ntyo. (Gl. 6:4) Kwa lwiganyo, Mariya ahîre Yezu engalo y’amavurha g’ibeyi bwenene g’ehisununu hinja. (Yn. 12:3-5) Lubero n’oko, omukana mukenyi ahânyire omucango oku hekalu gwa bicere bibirhi by’engulo nsungunu bwenene. (Lk. 21:1-4) Cikone, Yezu arhashushanyagya ebi abo bakazi bombi bahânaga. Lubero n’oko, abwine oku bombi bayerekine obuyemere. Ishe Yehova, anashagalukire kobinali ngasi kantu ojira omu kushumibwa n’obwishwekerezi bwawe n’obuzigire bwawe kuli ye, ciru akaba oli wakabona nka kali kasungunu.
18. Bici byarhurhabala lyo rhuhima akarhinda kirhu? (Olole n’ecisanduku cidesire, “ Akanwa ka Yehova Kanakurhabala ly’Ohima Akarhinda Kawe.”)
18 Rhweshi hali amango rhuba n’akarhinda. Cikone nk’oku rhwabwine, Ebibliya, Kanwa ka Nnâmahanga k’okuli, yanarhurhabala okuhima ako karhinda. Co cirhumire, ojire okwawe koshi ly’opata amashuzo oku madoso gawe. Omu kujira ntyo, waciyumva ogwerhe oburhwali ahali h’okuvunika omurhima. Yehova aba akumanyire kobinali. Anashagalukire emihigo yoshi warhôzire ly’omuhira oku nafasi ntanzi omu kalamo kawe ananayish’ihikiriza eciragane cage c’okukuhemba. Oyemere n’obwalagale oku Yehova anabone abakozi bage bishwekerezi boshi oku bashinganine okuzigirwa n’okushibirirwa naye.
LWIMBO 111 Ebirhuma Rhwaba n’Omwishingo
a AMAHUGÛLO GA LUDERHO LUGUMA: Mw’eci cigabi, rhuli rhwaganirira akarhinda karhuma rhurhayemera n’obwalagale oku kobinali rhuba ba bulagirire kuli Yehova erhi oku emihigo rhwarhôlaga omu mango gageraga yali minja. Ako arhali ko karhinda Ebibliya eganirire kakayerekana oku omuntu arhagwerhi buyemere muli Yehova n’omu biragane byage.
b Ciru akaba Ebibliya erhayerekini emyaka Daudi agwerhe erhi Yehova acishoga ye, byanahashikana oku gwaciri musole gwa mushuko.—Olole Ilabiro ly’Akalalizi ly’omu lusiku 1/9/2011, buk. 29, cif. 2 (omu Ciswahiri).
