1. Nshokano nguma na nguma zihi Yezu arhuhîre?

 NTA mwene-muntu asag’iba muhânyi aka Yezu. Amango ali hanw’igulu, buzira kusezibwa, akolesize obuhashe bwage omu njira y’ecisomerine ly’arhabala abandi. (Lk. 9:12-17) Ahânyire engalo nnene bwenene kulusha zoshi omu kuyemera afê erhi rhwe rhurhuma. (Yn. 15:13) Kurhenga amango afûkaga, agendekire aba muhânyi. Nk’oku analaganyagya, ahûnyire Yehova arhuhe iroho lyage litagatifu lyo lirhuyigiriza n’okurhurhuliriza. (Yn. 14:16, 17; 16:13) Na kugerera entimanano zirhu z’ecigamba, Yezu agendekire arhuha ebi rhulagirireko lyo rhujira abanafunzi omw’igulu lyoshi.​—Mt. 28:18-20.

2. Bandi bali egarhi k’“enshokano” omu balume ziganirirwe omu Abefezi 4:7, 8?

² Hali eyindi nshokano Yezu arhuhîre. Entumwa Paolo yayandisire oku enyuma za Yezu okuja empingu, “agabira abantu enshokano [erhi ngalo].” (Osome Abefezi 4:7, 8.) Paolo ahugwîre oku Yezu ahânyire ezo ngalo lyo zirhabala ecigamba omu njira ziri lubero. (Ef. 1:22, 23; 4:11-13) Ene, ezo ‘nshokano’ omu balume zihiziremwo abarhabazi b’abagula, abagula b’ecigamba, n’abangalizi b’omuzunguko. a Kobinali, abo balume barhaba bimana, co cirhumire banajire amagosa. (Yk. 3:2) Cikone, Nnawirhu Yezu Kristu anabakolese ly’arhurhabala; baba ngalo kuli rhwe.

3. Ohâne olwiganyo luyerekine gurhi rhweshi rhwakalungamwo okuboko omukolo gw’“enshokano” omu balume.

³ Yezu ahîre ezo ‘nshokano’ omu balume omukolo gw’okuzibuhya ecigamba. (Ef. 4:12) Cikone, rhweshi rhwanabarhabala lyo bahikiriza ogo mukolo gw’obulagirire. Rhwanashushanya omukolo gwabo n’okuyubaka Enyumpa z’Obwami. Bantu baguma na baguma  banayubake. Abandi banabarhabale omu kubalerhera ebiryo, ebikolanwa, n’ebindi bintu. Ko n’oko, rhweshi rhwanalunga okuboko abarhabazi b’abagula, abagula b’ecigamba, n’abangalizi b’omuzunguko kugerera enderho zirhu n’ebijiro birhu. Lekagi rhuganirire oku rhwakayungukamwo n’omukolo muzibu bajira n’oku rhwakayeresamwo ezo ‘nshokano’ omu balume na Yezu warhuhaga zo oku rhubavuzire omukwa.

ABARHABAZI B’ABAGULA BANAHIKIRIZE EMIKOLO Y’“OKURHABÂLA ABALI OMU BULAGIRIRE”

4. Mikolo miguma na miguma ehi y’“okurhabâla abali omu bulagirire” abarhabazi b’abagula bakag’ihikiriza omu myaka igana mirhanzi?

⁴ Omu myaka igana mirhanzi, bene wirhu baguma na baguma bal’ihizirweho nka barhabazi b’abagula. (1 Tm. 3:8) Bibonekine oku bo bakag’ihikiriza emikolo y’“okurhabâla abali omu bulagirire” Paolo aganiriraga. (1 Kr. 12:28) Bibonekine n’obwalagale oku abarhabazi b’abagula bakag’ihikiriza mikolo minji na ya bulagirire ly’abagula bahasha okusegeza obwenge oku mukolo gw’okuyigiriza n’okulanga ebibuzi. Kwa lwiganyo, nkaba abarhabazi b’abagula bakag’irhabala okujira amakopi g’Amandiko erhi okugula ebikolanwa by’obulagirire ly’ago makopi gajirwa.

5. Mikolo ehi miguma na miguma y’okurhabala abali omu bulagirire abarhabazi b’abagula bahikiriza ene?

⁵ Orhanye oku mikolo miguma na miguma y’obulagirire abarhabazi b’abagula bajira omu cigamba cinyu. (1 Pt. 4:10) Nkaba banahâbwa omukolo gw’okushibirira enshoho y’ecigamba erhi amaeneo, okuhûna ebicapo n’okubigabira abahubiri, okukolesa ebikolanwa by’e audio-video, okuyegereza abantu, erhi okurhabala oku mukolo gw’okushibirira Enyumpa y’Obwami. Ly’ecigamba cikola bwinja, eyo mikolo yoshi eri ya bulagirire. (1 Kr. 14:40) Kandi, barhabazi b’abagula baguma na baguma banageze ebigabi oku Ntimanano Omukolo n’Akalamo bananageze ehotuba z’abantu boshi. Kandi omurhabazi w’abagula anahâbwa omukolo gw’okurhabala omwimangizi w’ecikundi c’amahubiri. Mango maguma na maguma, omugula anahûna omurhabazi w’abagula amuluse omu mukolo gw’okulambagirira ebizubi lyo babiha omurhima.

6. Birhumire biguma na biguma bihi birhuma rhwashagalukira omukolo gw’abarhabazi birhu b’abagula bakola bwenene?

⁶ Gurhi omukolo gw’abarhabazi b’abagula gulerheramwo ecigamba obunguke? Mwali wirhu muguma w’omu cihugo c’e Bolivie ohamagalwa Beberly, b adesire ntya: “Abarhabazi birhu b’abagula banarhume nashagalukira entimanano bwenene. Enyanya z’omukolo gwabo, nanayimba, nanahâna amashuzo, nanayumvirhiza ehotuba, n’okuyiga kugerera amavideo n’enfoto. Banashibirire obulanzi bwirhu n’okushibirira abacilunzire oku ntimanano kugerera e vidéoconférence. Enyuma z’entimanano, banarhabale oku mukolo gw’okucesa Enyumpa y’Obwami, banashibirire enshoho y’ecigamba, bananajire okwabo koshi lyo rhupata ebicapo rhulagirireko. Mvuzire omunkwa enyanya z’omukolo bajira!” Mwali wirhu muguma ohamagalwa Leslie, olama e Colombie iba aba mugula, adesire ntya: “Kugerera oburhabale bw’abarhabazi b’abagula, ibanie anahasha okuhikiriza emikolo eri lubero. Buzira burhabale bwabo, ibanie akazidohirwe n’emikolo, co cirhumire mbavuzire omunkwa bwenene enyanya z’obushiru bwabo n’okuba babidu okurhabala.” Rhweshi rhunavuge omunkwa bwenene kw’ebi abarhabazi b’abagula bajira.​—1 Tm. 3:13.

7. Gurhi rhwakayerekanamwo oku rhuvuzire omunkwa enyanya z’abarhabazi b’abagula? (Olole n’enfoto.)

⁷ Ciru akaba rhwanaciyumva rhuvuzire omunkwa enyanya z’abarhabazi b’abagula, Ebibliya erhuyinginzire ntya: “Murhahusagya okukavuga omunkwa.” (Kl. 3:15) Mugula muguma w’omu Finlande ohamagalwa Kristofer, anayerekane oku avuzire omunkwa omu kujira ntya: “Nantume akarte erhi emesaje nyandisiremwo lwandiko  lulebe n’okuyerekana njira ndebe y’obwalagale omurhabazi w’abagula ampiremwo omurhima erhi bulya gurhi nshagalukire omukolo gwage.” Pascal na Jael, balama omu Nouvelle Calédonie, banashenge omu njira z’obwalagale enyanya z’abarhabazi b’abagula. Pascal adesire ntya: “Omu mango gacizindig’igera, rhwashenzire bwenene enyanya z’abarhabazi b’abagula, rhwavuga Yehova omunkwa enyanya zabo, rhwamuhûna abe haguma nabo anabarhabale.” Yehova anayumvirhize amasala ga ntyo, n’ecigamba coshi cinayunguke.​—2 Kr. 1:11.

ABAGULA B’ECIGAMBA ‘BALI BAKOLA [BWENENE] MULI MWE’

8. Bulya gurhi Paolo ayandikaga oku omu myaka igana mirhanzi abagula ‘bakag’ikola [bwenene]’? (1 Abatesalonika 5:12, 13, Mashi Bible)

⁸ Omu myaka igana mirhanzi, abagula bakag’ikola bwenene enyanya z’ecigamba. (Osome 1 Abatesalonika 5:12, 13, Mashi Bible; 1 Tm. 5:17) ‘Bakag’iyimangira’ ecigamba, omu kulongoza entimanano n’okurhôla emihigo nka mbaraza y’abagula. ‘Bakag’iyigiriza [bakag’irhonda, NWT]’ bene wabo na bali babo, omu kubaha amahano g’obwalagale cikone ga buzigire lyo balanga ecigamba. (1 Ts. 2:11, 12; 2 Tm. 4:2) Kobinali, kandi abo balume bakag’ikola bwenene lyo bahikiriza amalagirire g’emilala yabo na lyo bagendekera basêra omu hali y’ekiroho.​—1 Tm. 3:2, 4; Tt. 1:6-9.

9. Mikolo ehi miguma na miguma abagula bajira ene?

⁹ Ene, abagula baba balume bajira mikolo minji. Baba baeneza-injili. (2 Tm. 4:5) Banayerekane olwiganyo lwinja omu kuhubiri n’obushiru, banapange omukolo gw’amahubiri omu eneo y’ecigamba, n’okurhukomereza okuhubiri n’okuyigiriza bwinja. Kandi banakole nka batwi b’emanja b’olukogo barhajira kabôlo. Erhi Omukristu akajira ecaha cizibu, abagula banacihangane okumurhabala ly’acib’iba n’obwîra bwinja haguma na Yehova. Mw’ago mango go n’ago, banabe masu ly’ecigamba cigendekera cabêra cicîre. (1 Kr. 5:12, 13; Gl. 6:1) Burhangiriza, abagula baba bamanyikine oku baba balungere. (1 Pt. 5:1-3) Banacirheganye bwinja lyo bageza ehotuba ziyimangire oku Mandiko, banacihangane lyo bamanya ngasi muntu omu cigamba, n’okujira omukolo gw’okulambagirira ebibuzi lyo babiha omurhima. Ahanyuma n’eyindi mikolo bajira, kandi bagula baguma na baguma banarhabale oku mukolo gw’okuyubaka n’okushibirira Enyumpa z’Obwami, okupanga entimanano nkulu, banakole haguma n’Ekomite Zijira Olushangi Haguma n’Ehopitali n’omu Bikundi by’Okulambagirira Abalwala. Abagula banakole bwenene erhi rhwe rhurhuma!

10. Birhumire biguma na biguma bihi birhushumya rhuzigire abagula birhu bakola bwenene?

¹⁰ Yehova alebire oku balungere bakarhushibirire bwinja n’oku ‘rhurhakaciba na côba nisi erhi bihamba.’ (Yer. 23:4) Mwali wirhu muguma w’omu Finlande ohamagalwa Johanna acibwinire oku ezo nderho ziri z’okuli erhi nnina alwala endwala ndarhi. Adesire ntya: “Ciru akaba nakag’ibona oku kuli kuzibu kuli nie okubwira abandi oku nakag’iciyumva, mugula muguma ntal’imanyire bwinja anyumvirhiza n’obulembedu, asalira haguma na nani, ananyemeza n’obwalagale oku Yehova anzigire. Ntakengiri bwinja ebi adesire, cikone nkengire oku naciyumvirhe ndi omu bulanzi. Nyemire n’obwalagale oku Yehova amurhumire ly’antabala oku kasanzi kashinganine.” Gurhi abagula b’omu cigamba cinyu bakurhabiremwo?

11. Gurhi rhwakayerekanamwo oku rhushagalukire abagula birhu? (Olole n’enfoto.)

¹¹ Yehova alonzize rhuyerekane oku rhushagalukire abagula birhu kurhenga oku murhima erhi ‘mukolo gwabo gurhumire.’ (1 Ts. 5:12, 13) Henrietta, olama naye omu Finlande, adesire ntya: “Abagula banarhabale abandi n’obulonza, cikone oko kurhali kuderha oku bajira kasanzi kanji na misi minji kulusha abandi erhi oku barhajira mazibu omu kalamo kabo. Hali amango mbabwira kone ntya: ‘K’omanyire? Oba mugula mwinja kobinali. Nnangalire oku oba omanyire ntyo.’”  Mwali wirhu muguma w’omu Türkiye c ohamagalwa Sera adesire ntya: “Abagula baba balagirire oku kuhâbwa omurhima lyo bagendekera bajira omukolo gwabo. Co cirhumire rhwanabayandikira amaruba, rhwanabalalika lyo rhushangira ebiryo haguma, erhi kuhubiri haguma nabo.” Ka hali mugula mulebe oshagalukira bwenene obushiru bwage? Olonze enjira wakamuyeresamwo ntyo.​—1 Kr. 16:18.

ABANGALIZI B’OMUZUNGUKO BARHUZIBUHYA

12. Mupango guhi gwazibuhize ebigamba omu myaka igana mirhanzi? (1 Abatesalonika 2:7, 8)

¹² Kristu Yezu ahîre ecigamba “enshokano” omu balume zirhabala omu yindi njira. Idako ly’obulongozi bwage, abagula b’e Yeruzalemu barhuma Paolo, Barnaba, n’abandi nka bangalizi b’omuzunguko. (Ebj. 11:22) Bulya gurhi? Lyo bazibuhya ebigamba, oko ko kwanarhumaga abarhabazi b’abagula n’abagula bahirwaho. (Ebj. 15:40, 41) Abo balume baciyimire binji lyo bajira ogo mukolo na ciru bahizire akalamo kabo omu mazibu lyo bayigiriza n’okuha abandi omurhima.​—Osome 1 Abatesalonika 2:7, 8.

13. Mikolo ehi miguma na miguma abangalizi b’omuzunguko bajira?

¹³ Abangalizi b’omuzunguko banabalame ensiku zoshi. Baguma na baguma banabalame amagana g’ebilometre kurhenga omu cigamba ciguma kuhika omu cindi. Ngasi mugobe, mwangalizi w’omuzunguko anageze hotuba ndebe, analambagirire ebibuzi ly’abiha omurhima, n’okulongoza entimanano haguma na bapainiya, entimanano haguma n’abagula, n’entimanano z’amahubiri. Anarheganye ehotuba n’okujira emipango lugenda entimanano z’omuzunguko n’ez’e eneo. Anayigirize oku masomo ga bapainiya, anapange entimanano yago-yago haguma na bapainiya b’omu muzunguko, n’okuhikiriza  eyindi mikolo y’obulagirire ahâbwa n’ebiro by’etawi, mango maguma na maguma eyo mikolo eba ehûnyire okujirwa duba-duba.

14. Birhumire biguma na biguma bihi rhugwerhe birhushumya rhushagalukire abangalizi birhu b’omuzunguko bakola bwenene?

¹⁴ Gurhi ebigamba biyungukamwo n’emikolo y’obulagirire y’abangalizi b’omuzunguko? Omu kuganirira omukolo gw’abangalizi b’omuzunguko gw’okulambagirira ebigamba, mwene wirhu muguma w’omu cihugo c’e Türkiye adesire ntya: “Ngasi mango erhi rhulambagirirwa na mwangalizi w’omuzunguko, nanshumibwe okugeza kasanzi kanji omu kurhabala bene wirhu na bali birhu. Narhimanine na bangalizi banji b’omuzunguko; cikone nta muguma muli bo okola obonekine nk’arhakayegerwa erhi kunjira nciyumve nk’agwerhe binji bwenene bya kujira.” Johanna, rhwaganiriraga embere, ahubiri haguma na mwangalizi w’omuzunguko, cikone barharhimanaga omuntu ciru n’omuguma aha kâ. Adesire ntya: “Ciru akaba ntyo, ntakayibagira olo lusiku ciru n’ehitya. Bakulu bani bombi baciyusig’ihamira kuli nanakag’ibadula bwenene. Mwangalizi w’omuzunguko ampa omurhima anantabala mbone oku, ene byanahashikana rhurhabe n’obulyo bw’okulama haguma n’abantu b’omulala gwirhu n’abîra birhu, cikone omw’igulu lihyahya, rhwayish’iba n’obulyo bw’okugeza akasanzi haguma nabo ensiku n’amango.” Ko n’oko, banji muli rhwe bahikire okuzigira abangalizi b’omuzunguko n’enjira babarhabiremwo.​—Ebj. 20:37–21:1.

15. (a) Kushimbana na 3 Yowane 5-8, Mashi Bible, gurhi rhwakayerekanamwo oku rhushagalukire abangalizi birhu b’omuzunguko? (Olole n’enfoto.) (b) Bulya gurhi rhushinganine rhuyerekane oku rhushagalukire baka bene wirhu bakola n’obushiru omu cigamba, na gurhi rhwakajiramwo ntyo? (Olole ecisanduku cidesire “ Okakengera Bakabo.”)

¹⁵ Entumwa Yowane yahîre Gayo omurhima ayegereze bene wirhu bakag’ilambagirira ebigamba lyo babizibuhya, amubwira ‘abarhabale bagendereze olugenzi lwabo, kulya kunasîmîsize Nnâmahanga.’ (Osome 3 Yowane 5-8, Mashi Bible.)  Njira nguma rhwakajiramwo ntyo kuli kuyegereza mwangalizi w’omuzunguko lyo rhushangira ebiryo haguma naye. Eyindi njira kuli kulunga okuboko emipango y’amahubiri omu mugobe alambagirire ecigamba cirhu. Leslie, rhwaganiriraga embere, naye anayerekane oku avuzire omunkwa omu zindi njira. Adesire ntya: “Nanshenge Yehova ashibirire amalagirire gabo. Kandi nie n’ibanie rhwabayandikire amaruba lyo rhubabwira kunganaci okulambagirira kwabo ecigamba cirhu kwarhurhabire.” Okengere oku abangalizi b’omuzunguko baba bantu akirhu. Hali amango balwisa amazibu g’endwala, amahangayiko, ciru n’okuvunika omurhima. Nkaba enderho zawe nyinja erhi okumuha ngalo ndebe lyanaba ly’ishuzo okw’isala lya mwangalizi winyu w’omuzunguko ly’okuhûna oburhabale!​—Mig. 12:25.

RHULAGIRIRE OKU ‘NSHOKANO’ OMU BALUME

16. Kushimbana n’Emigani 3:27, madoso gahi bene wirhu bakacidosa?

¹⁶ Omw’igulu lyoshi, rhulagirireko bene wirhu banji lyo bakola nka ‘nshokano’ omu balume. Akaba oli mwene wirhu mubatize, k’‘ogwerhe obuhashe bw’okujira’ ntyo? (Osome Emigani 3:27.) Ka wanalonza okuhikiriza ebihûnyirwe ly’oba murhabazi w’abagula? Akaba okola oli murhabazi w’abagula, ka wanacihangana ly’ohikira okukolera bene winyu na bali binyu nka mugula? d Ka wanahasha okujira empindulo omu kalamo kawe ly’oyunjuza efomu y’okuja oku Masomo g’Abaeneza-Injili b’Obwami? Ago masomo gakukomereza n’okukurhabala lyo Yezu akukolesa ciru bwenene. Erhi wakaciyumva nk’orhagwerhi obuhashe bw’okujira ntyo, ohûne Yehova akurhabale. Omuhûne oburhabale bw’iroho lyage litagatifu ly’ohikiriza bwinja ngasi mukolo ohâbirwe.​—Lk. 11:13; Ebj. 20:28.

17. Bici “enshokano” omu balume ziyerekine lugenda Omwami wirhu, Kristu Yezu?

¹⁷ Okubona Yezu ahizireho bene wirhu nka ‘nshokano’ omu balume kuyerekine oku ali arhulongoza muli zino nsiku nzinda. (Mt. 28:20) K’orhavuziri omunkwa okubona rhugwerhe Omwami w’obuzigire, muhânyi, omanyire amalagirire girhu onahiraho bene wirhu lyo bagahikiriza? Co cirhumire, okalonza obulyo bw’okuyerekana oku oshagalukire abo balume bakola bwenene. Orhanahiraga ciru n’eliguma okayibagira okuvuga Yehova omunkwa, bulya ye nshôko ya “ngasi ngalo nyinja na ngasi nshokano nkana.”​—Yk. 1:17.