ECIGABI C’OKUYIGA CA 40
LWIMBO 30 Larha, Mungu Wani na Mwîra Wani
Yehova “Anabuke Abagogomîrwe omu Murhima”
“Anabuke abagogomîrwe omu murhima, anabuke ebibande [ebihulu] byabo.”—ENNA. 147:3.
EBI ECI CIGABI CISEGIZE
Yehova anashibirire bwenene abali balibuzibwa n’ebihulu by’ekandalala. Eci cigabi cayerekana oku arhurhulirizamwo amango rhuli rhwaciyumva rhubabire n’oku arhurhabalamwo lyo rhurhuliriza abandi.
1. Gurhi Yehova aciyumva lugenda abakozi bage?
BICI Yehova abona erhi alaba oku bakozi bage hanw’igulu? Anabone amango rhushagalusire n’amango rhubabire. (Enna. 37:18) Anashagaluke bwenene erhi abona rhuli rhwamukolera n’obuhashe bwirhu boshi ciru akaba rhuli rhwalibuzibwa ekandalala! Kulusha oko, aba mubidu okurhurhabala n’okurhurhuliriza.
2. Bici Yehova ajirira abavunisire omurhima, na gurhi rhwakajira ly’arhushibirira?
2 Olwandiko lw’Ennanga 147:3 ludesire oku, Yehova “anabuke ebibande” by’abavunisire omurhima. Mw’olo lwandiko, Yehova aganirirwe nk’oli washibirira omu njira y’obuzigire abantu bagwerhe ebihulu by’ekandalala. Bici rhugwasirwe rhujire lyo Yehova arhushibirira? Rhuganirire olwiganyo. Doktere ogwerhe obulenga anajira binji ly’arhabala omuntu wayagalisire afume. Cikone, ly’oyo muntu afuma, agwasirwe akulikire bwinja-bwinja amahano g’oyo doktere. Mw’eci cigabi, rhwabona ebi Yehova abwizire omu Kanwa kage abali balibuzibwa n’ebihulu by’ekandalala na gurhi bakakolesamwo amahano gage g’obuzigire.
YEHOVA ARHUYEMEZIZE N’OBWALAGALE OKU RHUBA BA NGULO NDARHI KULI YE
3. Bulya gurhi bantu baguma na baguma baciyumva nka bali ba busha-busha?
3 Rhulamire omw’igulu lirhalimwo buzigire, n’eby’okugayisa, bantu banji bajijirwe bakaciyumva nka baba ba busha-busha. Mwali wirhu muguma ohamagalwa Helen a adesire ntya: “Nakuliraga omu mulala gurhalimwo buzigire. Larha ali muminya na ngasi lusiku akag’irhubwira oku rhuli ba busha-busha.” Aka Helen, nkaba wajirirwe kubi, wagayaguzibwa erhi kujirwa ociyumve nk’orhashinganini okuzigirwa. Akaba ntyo, wanabona nka kuli kuzibu okuyemera oku hali muntu mulebe wakakushibirira okunali.
4. Kushimbana n’Ennanga 34:18, NWT, bici Yehova arhuyemezize n’obwalagale?
4 Ciru akaba abandi bakujirire kubi, wanayemera n’obwalagale oku Yehova aba akuzigire n’oku anakubone oku oli wa ngulo ndarhi. Aba “hofi n’emirhima egayire.” (Osome Ennanga 34:18, NWT.) Erhi wakaciyumva ‘ovunisire omurhima,’ okengere oku Yehova abwine ebintu binja omu murhima gwawe anakukulula emunda ali. (Yn. 6:44) Ensiku zoshi, aba mubidu okukurhabala bulya oba wa ngulo ndarhi kuli ye.
5. Bici rhwakaciyigiriza kugerera oku Yezu akag’ijirira abantu bakag’igayaguzibwa n’abandi?
5 Rhwanayiga lugenda oku Yehova aciyumva omu kuganirira olwiganyo lwa Yezu. Amango g’omukolo gwage hanw’igulu, Yezu abwine abantu bakag’igayaguzibwa n’abandi anabajirira omu njira y’obwonjo. (Mt. 9:9-12) Erhi mukazi muguma wal’ilangalire oku afuma endwala yage ndarhi ahuma oku mushangi gwa Yezu, amurhuliriza anamukunga enyanya z’obuyemere bwage. (Mk. 5:25-34) Yezu anayerekane n’obwimana amorhere g’Ishe. (Yn. 14:9) Co cirhumire, wanayemera n’obwalagale oku Yehova anakubone oku oli wa ngulo ndarhi, ananabone amorhere gawe minja gahiziremwo obuyemere bwawe n’obuzigire bwawe kuli ye.
6. Bici wakajira erhi akaba onaciyumve nk’oli wa busha-busha?
6 Bici wakajira erhi ngasi mango wakakaciyumva nk’oli wa busha-busha? Osome amandiko g’Ebibliya gakuyemezize n’obwalagale oku oba wa ngulo ndarhi kuli Yehova onagarhanyeko bwenene. b (Enna. 94:19) Akaba wayabirwe okuhikira muhigo mulebe erhi wavunika omurhima bulya orhakahash’ijira binji ak’abandi, orhacitwiraga olubanja omu njira y’obukali. Yehova arharhuhûna rhujire ebirhalusire obuhashe bwirhu. (Enna. 103:13, 14) Akaba wajirirwe kubi omu njira ndebe omu mango gageraga, orhacitumuzagya enyanya z’ebi owakujiriraga kubi ajijire. Arhali we wacishogaga okujirirwa ntyo! Okengere oku Yehova ayish’itwira olubanja abajirira abandi amabi, ci arhali abagajirirwe. (1 Pt. 3:12) Sandra, wajiriragwa kubi amango aciri murho, adesire ntya: “Ngasi mango nanshenge Yehova antabale ncibone omu njira eshinganine nk’oku ambona.”
7. Omu mukolo gwa Yehova, gurhi rhwakakolesamwo bwinja ebyarhuhikire omu kalamo?
7 Orhabaga n’akarhinda ciru n’ehitya oku Yehova anakukolesa ly’orhabala abandi. Akuhîre olukengwa lw’okukola haguma naye omu mukolo gw’amahubiri. (1 Kr. 3:9) Ebyakuhikire omu kalamo nkaba byakurhabire okayumviza abandi obwonjo n’okuhugûkwa gurhi bakaba bali baciyumva. Wanajira binji ly’obarhabala. Helen, rhwaganiriraga embere, ahâbirwe oburhabale n’ene akola ajira obuhashe bw’okurhabala abandi. Adesire ntya: “Nakag’iciyumva ndi wa busha-busha, cikone Yehova anjijire nkaciyumva nzigirwe ananankolese lyo ntabala abandi.” Helen ashagalukire okujira omukolo gw’obupainiya bw’akasanzi koshi.
YEHOVA ALONZIZE RHUYEMERE N’OBWALAGALE OKU ARHUBABALIRE
8. Bici olwandiko lwa Izaya 1:18, Mashi Bible, lurhuyemezize n’obwalagale?
8 Bakozi ba Yehova baguma na baguma, banaciyumve bagogomirwe n’entanya z’okucitumuza enyanya z’ebi bajijire omu mango gageraga, babe babijijire embere erhi enyuma z’okubatizibwa kwabo. Cikone kuli kwinja rhukengere oku Yehova ahânyire engombôlo bulya aba arhuzigire bwenene. Kobinali, alonzize rhuyemere eyo ngalo yage. Yehova arhuyemezize n’obwalagale oku arhubabalira loshi-loshi enyuma z’‘okuyumvanya’ c naye. (Osome Izaya 1:18, Mashi Bible.) Rhuvuzire omunkwa bwenene okubona Larha wirhu w’obuzigire Yehova anayibagire ebyaha rhwajiraga omu mango gageraga! Kandi, arhayibagira ciru n’ehitya aminja rhwajijire.—Enna. 103:9, 12; Hb. 6:10.
9. Ahali h’okusegeza obwenge oku byaha rhwajiraga omu mango gageraga, bici rhushinganine rhujire?
9 Erhi akaba oli wacitumuza enyanya z’ebi wajiraga omu mango gageraga, ojire okwawe koshi ly’osegeza obwenge kw’ebi oli wajira ene na kw’ebi wakajira omu mango gayisha, ahali h’okubusegeza kw’ebi wajiraga omu mango gageraga. Orhanye oku lwiganyo lw’entumwa Paolo. Aciyunjuzize okubona embere alibuzize Abakristu, cikone al’imanyire oku Yehova amubabalire. (1 Tm. 1:12-15) K’agendekire arhanya oku byaha ajiraga omu mango gageraga? Kobinali alahire okusegeza obwenge kw’ebyo byaha ajiraga embere, nk’oku arhanagendekeraga abusegeza kw’ebi ahikirizagya omu idîni ly’Eciyahudi. (Fl. 3:4-8, 13-15) Lubero n’oko, Paolo ahikirizize n’obushiru omukolo gwage gw’amahubiri n’okusegeza obwenge oku mango gali embere. Aka Paolo, orhakashanja ebyagezire. Cikone wanalerhera Yehova obukuze omu kanga olimwo ene, n’okusegeza obwenge oku mango minja bwenene gayisha akulaganyize.
10. Gurhi rhwakajira erhi akaba ebi rhwajiraga omu mango gageraga byagayisize abandi?
10 Nkaba wanaciyumva obabire bulya bintu bilebe wajiraga omu mango gageraga byagayisize abandi. Bici byakakurhabala? Ojire oku wakanahasha ly’okubûla ebintu, oko kuhiziremwo okuhûna obwonjo kurhenga oku murhima. (2 Kr. 7:11) Ohûne Yehova arhabale aba wagayisize kugerera ebijiro byawe. Anakurhabala n’okurhabala aba wagayisize lyo mulembera n’okucib’iba n’omurhûla omu bukengere.
11. Bici rhwakaciyigiriza kugerera olwiganyo lw’omulebi Yona? (Olole n’enfoto.)
11 Ociyigirize kugerera amagosa wajiraga omu mango gageraga onabe mubidu okuleka Yehova akukolese omu ngasi njira acishozire. Okengere olwiganyo lw’omulebi Yona. Ahali h’okuja e Ninawi nk’oku Mungu amurhegekaga, Yona alibirhira olundi lunda. Yehova ahana Yona, na Yona aciyigiriza kugerera er’igosa lyage. (Yon. 1:1-4, 15-17; 2:7-10) Yehova arhalekaga okukolesa Yona. Mungu amuha obundi bulyo bw’okuja e Ninawi na lero Yona arhumikira duba-duba. Arhalekaga entanya z’okucitumuza enyanya z’ebi ajiraga omu mango gageraga zirhume arhayemera ogo mukolo Yehova amuhâga.—Yon. 3:1-3.
Enyuma z’omulebi Yona okufulumuka amazibu madarhi omu nda y’ensamaki nnenene, Yehova acib’imubwira aje e Ninawi n’okuyaliza omwanzi gwage (Olole ecifungo ca 11)
YEHOVA ANARHURHULIRIZE KUGERERA IROHO LITAGATIFU
12. Gurhi Yehova arhuhamwo omurhûla erhi rhwakahikirwa na kantu kalebe kadarhi erhi ka kuyobohya bwenene? (Abafilipi 4:6, 7)
12 Yehova anarhurhulirize kugerera iroho lyage litagatifu, erhi kantu kalebe kadarhi na ka kuyobohya bwenene kakarhuhikira. Rhuganirire ebyahikiraga Ron na mukage Carol. Mugala wabo walikola ogwerhe myaka 39 aciniga. Badesire ntya: “Rhwali rhwamahikirwa n’agandi marhangulo embere z’aho, cikone elyo lyo lyali irhangulo lidarhi bwenene. Nsiku nyinji rhurhakag’ija iro budufu, na muli oko rhwakasalira Yehova. Na kobinali rhwakayumva omurhûla guganirirwe omu Abafilipi 4:6, 7.” (Osome.) Erhi wakaba oli walwisa amazibu g’okuvuna omurhima, wanayigulira Yehova omurhima gwawe kugerera isala kanji-kanji na kasanzi kaliri nk’oku onalonzize. (Enna. 86:3; 88:1) Ohûne Yehova iroho lyage litagatifu kanji-kanji. Arhakabula buyumvirhiza ensengero zawe.—Lk. 11:9-13.
13. Gurhi iroho litagatifu lyakarhurhabalamwo lyo rhugendekera rhwaharamya Yehova n’obwishwekerezi? (Abefezi 3:16, Mashi Bible)
13 K’irhangulo lidarhi bwenene lyakuhikire onali waciyumva nk’orhacigwerhi misi? Iroho litagatifu lyanakuha emisi ly’ogendekera waharamya Yehova n’obwishwekerezi. (Osome Abefezi 3:16, Mashi Bible.) Rhuganirire ebyahikiraga mwali wirhu muguma ohamagalwa Flora. Ye n’iba, bali bamisiyonere erhi iba ajira obuhushi, banazaza obuhya bwabo. Adesire ntya: “Nakaciyumva mbabire bwenene enyanya z’obulenzi bwage, ntakanahashire okurhanya oku kandi kantu koshi-koshi. Nakashenga Yehova iroho lyage litagatifu lyo mpasha okulembera. Yehova ampa ebi nal’ilagirireko lyo nfuma n’okulwisa akantu nakag’ibona oku murhondero nka ntakahashire okulembera.” Flora aciyumvirhe oku Mungu amurhabire ly’amulangalira bwenene n’oku amugwasa omu mazibu gage goshi. Ayushwire ntya: “Enderho ziri omu lwandiko lw’Ennanga 119:32 ziyerekine bwinja gurhi Yehova antabiremwo, zidesire ntya: ‘Nkola nakombêra enjira y’amarhegeko gawe, obûla washagalusize omurhima gwani.’”
14. Gurhi rhwakajira lyo rhuleka iroho lya Mungu likole kuli rhwe?
14 Enyuma z’okushenga Yehova iroho lyage litagatifu, gurhi wakajiramwo kushimbana n’amasala gawe? Okajira emikolo yakarhuma iroho litagatifu lyakola kuli we. Eyo mikolo ehiziremwo okuja oku ntimanano n’okujira omukolo gw’amahubiri. Oyunjuze entanya za Yehova omu bukengere bwawe omu kusoma Akanwa kage ngasi lusiku. (Fl. 4:8, 9) Amango oli wasoma, okabona abantu baganirirwe omu Bibliya balwisize amazibu, n’okurhanya bwenene lugenda oku Yehova abarhabiremwo lyo bagalembera. Sandra, rhwaganiriraga embere, ahikirwe n’amazibu madarhi gakulikirine. Adesire ntya: “Omwanzi gwa Yozefu gunampume oku murhima kobinali. Arhalekaga amazibu gamuhikiraga n’okujirirwa omu njira erhali ya bushinganyanya bizambanye obwîra bwage haguma na Yehova.”—Murh. 39:21-23.
YEHOVA ANARHURHULIRIZE KUGERERA ABIRHU BEMEZI
15. Bandi bakarhuha oburhulirize, na gurhi bakarhurhabalamwo? (Olole n’enfoto.)
15 Amango rhuli rhwalibûka, abirhu bemezi banaba ‘burhulirize bwirhu.’ (Kl. 4:11) Kobinali bene wirhu na bali birhu, eba njira Yehova ayerekanamwo obuzigire bwage kuli rhwe. Abirhu bemezi banarhurhuliriza omu kurhuyumvirhiza n’obwonjo erhi omu kuba aha burhambi bwirhu. Banarhuha omurhima kugerera olwandiko lw’Ebibliya erhi omu kusalira haguma na nirhu. d (Rm. 15:4) Hali amango mwene wirhu erhi mwali wirhu akarhukengeza entanya za Yehova, n’oko kwanarhurhabala lyo rhugendekera rhwalembera. Kandi abirhu Bakristu banarhuha oburhabale rhulagirireko, kwa lwiganyo nk’okurhuha ebiryo amango rhubabire.
Abîra b’okulangalirwa bakuzire kiroho, banarhurhabala n’okurhurhuliriza bwenene (Olole ecifungo ca 15)
16. Bici byakahûna rhujire ly’abandi barhurhabala?
16 Ly’abandi barhurhabala, hali amango rhuba rhushinganine rhubahûne bo. Bene wirhu na bali birhu baba barhuzigire banaba balonzize okurhurhabala. (Mig. 17:17) Cikone banaba barhamanyiri oku rhuli rhwaciyumva erhi ebi rhulagirireko. (Mig. 14:10) Erhi akaba oli waciyumva kubi ekandalala, obe mubidu okubwira abîra bakuzire kiroho oku oli waciyumva. Obamanyise ebyakakurhabala. Wanacishoga okuganiza mugula muguma erhi babirhi ociyumva oli mubidu okuyegera ly’obabwira oku oli waciyumva. Bali birhu baguma na baguma babwine oku banarhulirizibwe omu kuganiza owundi mwali wirhu okuzire kiroho.
17. Mazibu malebe gahi gakarhuma rhwabula buhâbwa omurhima n’abandi, na gurhi rhwakagahimamwo?
17 Oyake okuciyegula n’abandi. Hali amango wakaciyumva nk’orhalonzizi okugeza akasanzi haguma n’abandi bulya ogayire bwenene. Hali amango bene winyu na bali binyu bakayabirwa buhugûkwa oku oli waciyumva erhi bayabirwe okucishoga enderho nyinja bakubwira. (Yk. 3:2) Orhalekaga amazibu ga ntyo garhume wayaka bene winyu na bali binyu, Yehova anabakolesa lyo bakuha omurhima. Mugula muguma ohamagalwa Gavin, olwazire endwala y’okuvunika omurhima, adesire ntya: “Kanji-kanji ntalonza okuganira erhi okugeza akasanzi haguma n’abîra bani.” Cikone, Gavin anacihangane okuba haguma na bene wabo ananaciyumve bwinja erhi ajira ntyo. Mwali wirhu muguma ohamagalwa Amy adesire ntya: “Enyanya z’ebyampikiraga mîra, kuba kuzibu kuli nie okulangalira abantu. Cikone ndi naciyigiriza okuzigira n’okulangalira bene wirhu na bali birhu nk’oku Yehova ajira. Manyire oku oko kunashagaluse Yehova na nani kunanshagaluse.”
EBIRAGANE BYA YEHOVA LUGENDA AMANGO GAYISHA BYANARHURHULIRIZA
18. Bici rhwakalindirira omu mango gayisha, na bici rhwakajira ene?
18 Rhwanalindirira n’obulangalire amango gayisha, rhumanyire oku hano hofi-hofi Yehova afumya amalumwa girhu goshi g’omubiri n’ag’ekandalala. (Maf. 21:3, 4) Ago mango, ebintu by’okulumisa omurhima byarhuhikire “byoshi byahera omu bukengêre.” (Iz. 65:17, Mashi Bible) Nk’oku rhwabwine, Yehova ‘anabuke ebibande birhu’ ciru n’ene. Ocihangane ly’oyunguka bwenene n’ebi Yehova ajira omu njira y’obuzigire ly’arhurhabala n’okurhurhuliriza. Orhahiraga okaba n’akarhinda oku ‘kushibirira ayorha akushibirira.’—1 Pt. 5:7.
LWIMBO 7 Yehova Ye Misi Yani
a Amazino gashanjirwe.
b Olole ecisanduku cidesire, “ Yehova Anabone oku Oli wa Ngulo Ndarhi.”
c Lyo ‘rhuyumvanya’ na Yehova, rhushinganine rhuyerekane oku rhuciyunjuzize omu kumuhûna arhubabalire ebyaha birhu n’omu kushanja olugenzi lwirhu. Erhi rhwakajira ecaha cizibu, kandi rhushinganine rhuhûne abagula b’omu cigamba oburhabale.—Yk. 5:14, 15.
d Kwa lwinganyo, olole amandiko gali idako ly’ecirhwe cidesire, “Mahangaiko” na “Kitulizo” omu citabu Maandiko ya Kutusaidia mu Maisha ya Kikristo.
