Ec’oluso cali cigabi c’okugereramwo c’okuja omu Hatagatifu h’ehekalu. Kushimbana n’empindulo z’e Biblia​—Tafsiri ya Ulimwengu Mupya zacapisibagwa embere z’omwaka gwa 2023, “ec’oluso c’embere cal’igwerhe obuli bwa makano 20 ga ngafula, buyumanine n’obuli bw’enyumpa, n’oburherema bwayo bwali bwa 120.” (2 Nga. 3:4, NWT) Ezindi mpindulo z’Ebibliya nazo zidesire oku oburherema bw’ecoluso bwali bwa “makano 120 ga ngafula,” kwanaba kuderha oku gwali munara gwa metre 53!

Cikone, e Biblia​—Tafsiri ya Ulimwengu Mupya yacapisibagwa omu mwaka gwa 2023 edesire ntya lugenda ec’oluso c’ehekalu ya Solomoni: “Oburherema bwaco bwali bwa makano 20 ga ngafula,” erhi buli bwa metre hofi 9. a Rhuganirire birhumire bisungunu byashumyagya okujira eyo mpindulo.

Oburherema bw’ecoluso burhaganirirwi omu 1 Abami 6:3. Mw’ogo mulongo, omwandisi Yeremiya aganirire obuli n’obugali bw’eco c’oluso, arhaganiriri oburherema bwaco. Buzinda omu cigabi cikulikire, aganirire kwa buliri ebindi bigabi by’obulagirire by’ehekalu, bihiziremwo Enyanja y’ecuma, emituga ikumi, n’emitungo ibirhi y’amarhale yal’iyimanzire embuga z’ec’oluso. (1 Bam. 7:15-37) Akaba eco c’oluso kobinali cal’igwerhe obuli bwa metre zilushire 50 canali cirî kulusha ebindi bigabi by’ehekalu, bulya gurhi Yeremiya arhaganiriraga oburherema bwaco? Ciru magana malebe g’emyaka enyuma z’aho, abandisi Bayahudi bayandisire oku ec’oluso cirhali cirî kulusha ebindi bigabi by’ehekalu ya Solomoni.

Abasomi banacidose erhi ebibambazi by’ehekalu byakahashire okutugika ec’oluso cigwerhe makano 120 ga ngafula. Emyubako milirî bwenene y’amabuye n’amaburiki y’omu mango ga mîra, nk’emihango y’ehekalu y’omu Misri, yakag’iba egalihire idako n’okunyihira enyanya. Cikone ehekalu ya Solomoni yali lubero. Abasomi badesire oku obugali bw’ebibambazi byayo burhal’ilushire makano 6 ga ngafula, erhi metre 2,7. Co cirhumire Theodor Busink, historien muguma omu by’obubasi, ashwinjire ntya: “Kushimbana n’obunene bw’ecibambazi [c’omuhango gw’ehekalu], ec’oluso cirhakabire [n’obuli] bwa makano 120 ga ngafula.”

Byanahashikana oku abandisi b’amakopi bayandisire kubi olwandiko lwa 2 Enganîro 3:4. Ciru akaba mandishi maguma na maguma ga mîra gadesire “120” mw’ogo mulongo, agandi mandishi g’okulangalirwa, nk’e Codex Alexandrinus y’omu kagana ka karhanu n’e Codex Ambrosianus y’omu kagana ka ndarhu, gadesire “makano 20 ga ngafula.” Nkaba bulya gurhi omwandisi ajijire igosa ly’okuyandika “120”? Enderho zihindulwa “igana” na “makano ga ngafula” omu Cihabraniya ziba zishushine. Co cirhumire, nkaba omwandisi ayandisire oluderho luhindulwa “igana” ahali ha “makano ga ngafula.”

Kobinali, ciru akaba rhunacihangane okuhugûkwa eyo myanzi n’okuyerekana buzira magosa gurhi ehekalu ya Solomoni yal’iyosire, rhunasegeze obwenge bwenene kw’ebi eyo hekalu yal’ishushanyize, ko kuderha ehekalu nnene y’ekiroho. Rhuvuzire omunkwa bwenene okubona Yehova alalisire abakozi bage boshi bamuharamye mw’eyo hekalu!​—Hb. 9:11-14; Maf. 3:12; 7:9-17.