1. Nk’oku biyerekinwe omu lwandiko lwa Mateyo 7:13, 14, omu njira nci rhwakaderha oku rhuli omu mubalamo?

RHWESHI rhuli omu mubalamo. Omuhigo gwirhu guli gwakuhika omw’igulu lihyahya lyayish’erhegekwa na Yehova Nnamahanga w’obuzigire. Ngasi lusiku rhunajire okwirhu koshi lyo rhukulikira eyo njira ehêsire ebwa buzine. Cikoki nk’oku Yezu aderhâga, eyo njira eba nfunda hali n’amango kuba kuzibu okulambagiramwo. (Osome Mateyo 7:13, 14.) Rhurhaba bimana, na ntyo kunabe kulembu okuleka eyo njira.​—Gl. 6:1.

2. Bici rhwaganirira mw’eci cigabi? (Olole n’ecisanduku cidesire: “ Obwirhohye Bunarhurhabale Rhuhindule Engeso Zirhu.”)

² Erhi rhwakalonza rhubêre omu njira nfunda ehêsire ebwa buzine, rhukwanine rhube babidu okuhindula entanya zirhu, engeso zirhu n’ebijiro birhu. Entumwa Paolo yayandikira Abakristu bal’ilamire e Korinti oku bagendekere “okuhindula engeso” zabo. (2 Kr. 13:11, NWT) El’ihano lirhuyerekire nirhu ene. Mw’eci cigabi, rhwaganirira gurhi Ebibliya yakarhurhabala rhuhindule engeso zirhu na gurhi abîra bakuzire kiroho bakarhurhabala lyo rhubêra omu njira ehêsire ebwa buzine. Kandi eci cigabi caganirira mangaci byakaba bizibu okushimba obulongozi ikubuliro lya Yehova lirhuhire. Rhwabona gurhi obwirhohye bwakarhurhabala rhuhindule engeso zirhu buzira kuhêza omwishingo gwirhu gw’okukolera Yehova.

3. Gurhi Akanwa ka Nnamahanga kakarhurhabala?

³ Rhunaje omu mazibu erhi rhwakaciha akasanzi kw’okulabiriza entanya zirhu n’okurhuciyumva. Omurhima guba murhebanyi na ntyo oko kwanarhuma kurhabe kulembu okuhugûkwa omu bici gulonzize okurhuheka. (Yer. 17:9) Kuba kulembu okucirheba “n’entanya z’obunywesi.” (Yk. 1:22, NWT) Co cirhumire, rhukwanine rhukolese Akanwa ka Nnamahanga lyo rhucilaba. Akanwa ka Nnamahanga kanayerekana gurhi rhuyosire omu  “ntimanya n’enkengêro” z’omurhima gwirhu. (Hb. 4:12, 13) Muli eyo njira, Akanwa ka Nnamahanga kokanakola nka kula amashini g’e Radio bapima mw’abalwala gakola, bulya ganabone ebiri omu kandalala kw’omuntu. Cikoki, rhushinganine rhube birhohye lyo rhuyunguka n’amahano gali omu Bibliya kandi erhi agarhenga emwa bene wirhu Nnamahanga acishozire oku barhulongoze.

4. Bici biyerekine oku Mwami Saulu ayishihikira aha aba muntu wa bucibone?

⁴ Olwiganyo lwa Saulu luyerekine ebyakarhuhikira erhi rhwakabula kuba birhohye. Saulu ahikira aha acibona okurhalusire olugero buzira kuhugûkwa oku ashinganine akubûle entanya zage. (Enna. 36:1, 2; Hab. 2:4) Obo bucibone bwabonekine bwinja erhi Yehova amubwira ebi ashinganine ajire enyuma z’okuhima aba Amaleki. Muli ako kanga, Saulu arharhumikiraga Yehova. N’erhi omulebi Samweli ajimuganiza kw’ako kanga, Saulu arhayemeraga amagosa gage. Cikone, arhangira ahalira ebijiro byage n’okuyerekana oku ebi anajijire birhali bibî bwenene byakarhuma ahanwa na ntyo aja ahêsa abandi ago magosa. (1 Sam. 15:13-24) Embere z’aho, Saulu arhang’ijira ebintu bishushine n’ebyo. (1 Sam. 13:10-14) Akantu kw’okugayisa kuli kubona oku Saulu aleka omurhima gwage gwayunjula obucibone. Arhayemeraga akubûle entanya zage, oko kwarhuma Yehova agaya bwenene na buzinda amukaga.

5. Bici olwiganyo lwa Saulu lwakarhuyigiriza?

⁵ Lyo rhukula enyigirizo omu lwiganyo lwa Saulu, kuli kwinja rhucidose aga madoso: ‘Amango ndi nasoma Akanwa ka Namahanga, ka nanonze okuhalira entanya zani? Ka nambone oku ebi najijire ciru birhali bibî bwenene? Ka nampêse owundi ago magosa gani?’ Erhi akaba ishuzo lirhu ali neci okw’idoso liguma lya mw’ago madoso, kwanaba kwa bulagirire rhuhindule entanya zirhu n’engeso zirhu. Nka rhurhajijiri ntyo, omurhima gwirhu gwanaja mw’obucibone na ntyo oko kwanarhuma Yehova arhucîka.​—Yk. 4:6.

6. Oganirire olubero lwâli ekarhi ka Mwami Saulu na Mwami Daudi.

⁶ Rhulolage olubero lwali ekarhi k’Omwami Saulu n’Omwami Daudi warholaga enafasi yage. Mwami Daudi ali muntu wakagag’izigira “amarhegeko ga Nyamuzinda.” (Enna. 1:1-3) Daudi al’ihugûsirwe oku Nnamahanga anayokole abantu birhohye cikone ab’obucibone anabayase obusu bwage. (2 Sam. 22:28) Na ntyo Daudi aleka Akanwa ka Nnamahanga kahindule entanya zage. Ayandika ntya: “Ayagirwe Yehova okampâ ihano. Ciru n’obudufu entanya zani z’ekandalala zinankubûle.”​—Enna. 16:7, NWT.

7. Bici obwirhohye bwakarhushumya rhujire?

⁷ Erhi akaba rhuli birhohye, rhwanaleka Akanwa ka Nnamahanga kakubûle entanya zirhu ciru embere zirhuheke omu bintu bibî. Akanwa ka Namahanga kanaba nk’izu liri lyarhubwira erhi: “Eyi yo njira, muyishimbe.” Kanarhurhonda erhi rhwakaba rhwahabusire ebwa kuboko kulyo erhi ebwa kumosho. (Iz. 30:21) Okuyumva Yehova kwanarhulerhera obunguke omu njira nyinji. (Iz. 48:17) Kwa lwiganyo, rhurhakakayumva enshonyi bulya owundi muntu ye warhuhanwire. Oko kwanarhurhabala rhuyegere Yehova bulya rhuhugûsirwe oku anakarhujirira nka Larha w’obuzigire.​—Hb. 12:7.

8. Nk’oku biyerekinwe omu lwandiko lwa Yakobo 1:22-25, gurhi rhwakakolesa Akanwa ka Nnamahanga nka ciyo?

⁸ Akanwa ka Nnamahanga kanaba nka ciyo cirhu. (Osome Yakobo 1:22-25.) Banji muli rhwe bacilolera omu ciyo ngasi sezi embere barhenge aha mwababwe. Muli eyo njira rhwanamanya gurhi rhwakacikubûla embere abandi barhubwire ebi rhuliko. Ko n’oko, erhi rhusoma Ebibliya Kanwa ka Nnamahanga ngasi lusiku, rhunabone omu njira ehi rhwakahindula entanya n’engeso zirhu. Bene wirhu banji banabone oku kuli kwa bulagirire okusoma olwandiko lw’olusiku ngasi sezi embere barhenge ahaka. Oko kunabarhabale okukubûla entanya zabo. Omulegerege goshi banabe erhi bali balola gurhi bakakolesa amahano g’Akanwa ka Nnamahanga. Kandi, rhukwanine  rhucihirireho e programe y’okusoma Akanwa ka Nnamahanga ngasi lusiku n’okukarhanyako. Oko kwanabonekana nka kuli kulembu okujira, cikone rhukwanine rhuhugûkwe oku okujira ntyo kuli kwa bulagirire bwenene lyo rhubêra omu njira nfunda ehêsire ebwa buzine.

9. Mangaci omwira wawe akakuhanûla?

⁹ Ka hali amango okola ohikire aha walambagira omu njira elonzize okukuhêka kuli na Yehova? (Enna. 73:2, 3) Erhi omwîra wawe okuzire kiroho acihâna oku ajikuhanûla, ka wamuyumvirhizize n’okukolesa amahano akuhâga? Erhi akaba wayumvirhe ago mahano gw’omwîra wawe wanaba erhi wajijire bwinja na ntyo wanamuvuga omunkwa okubona akuhanwîre.​—Mig. 1:5.

10. Gurhi wakajira erhi omwîra wawe akayish’ikuhanûla?

¹⁰ Akanwa ka Nnamahanga karhukengezize ntya: “Ebihulu omwîra akakuhirako biba bya bushinganyanya.” (Mig. 27:6, NWT) Omu njira nci ezo nderho ziri z’okuli? Rhuganirire olu lwiganyo: Obe oli wayikira ibarabara ligeramwo mituga minji oli waganira oku telefone n’obwenge bwawe buli kw’ebyo oliwaganîra. Buzinda mwîra wawe muguma ayishe duba-duba akurhulube okuboko, nkaba ciru oyumve nk’okuboko kwavunisire, obone orhaciri omw’ibarabara. Oko anajiraga kwanakulerhera amalumwa, cikone kwakuyasize olufû. Ka ciru akaba oko anakubululaga kwakulerhera amalumwa nsiku nyinji, ka kwanarhuma wamushomba? Orhakamushomba ciru n’ehitya! Lubero n’oko, wanashagaluka okubona oyo mwîra wawe anakurhabire wafulumuka aho. Ko n’oko oku murhondero erhi omwîra wawe akakurhonda oku ebi oli waderha kandi erhi ebijiro byawe birhalinganini n’amakanuni ga Nnamahanga gw’olugenzi lwinja, oko kwanahikira aha kwakugayisa. Cikone orhakashomba owakuhaga ihano orhakanamubikira akarhinda, bulya okujira ntyo kwanayerekana nk’orhagwerhi bwenge. (Muh. 7:9) Ahali hw’okujira ntyo, wanamuvuga omunkwa bulya anayerekine oburhwali omukuyish’ikuha erh’ihano.

11. Bici byakarhuma omuntu alahira ihano ly’omwîra wage?

¹¹ Bici byakarhuma omuntu alahira ihano linja ly’owundi? Bucibone. Abantu bw’obucibone basima “babanunugurhe okurhwiri.” Banafuke “amarhwiri gabo mpu balek’iyumva okuli.” (2 Tm. 4:3, 4, NWT) Banakasegeza entanya zabo zone n’okubona oku bali ba bulagirire bwenene kulusha abandi. Co carhumaga entumwa Paolo yayandika ntya: “Erhi muguma akagerêreza oku hali okw’ali n’obo arhali kwo, erhi kurheba acirhebire.” (Gl. 6:3, Mashi Bible) Mwami Salomoni ayerekine bwinja oku ezo nderho ziri z’okuli. Ayandika ntya: “Omurhûmba mukenyi na murhimanya ye mukulu aha mwami mushosi na muhwinja orhayishidôsa ihano.”​—Muh. 4:13.

12. Bici olwiganyo lw’entumwa Petro luli omu lwandiko lwa Abagalasiya 2:11-14 lwakarhuyigiriza?

¹² Olole olwiganyo lwinja Petro arhulekire erhi ahanûlwa embere z’abantu boshi n’entumwa Paolo. (Osome Abagalasiya 2:11-14.) Petro arhabikirâga Paolo akarhinda okubiyerekire ihano amuhâga, arhasegezagya obwenge oku njira Paolo amuhâga er’ihano n’aha amuherâga lyo. Bulya gurhi? Bulya al’igwerhe obwenge. Ayemera ihano lya Paolo buzira kubika akarhinda. Lubero n’oko, enyuma z’aho ahamagala Paolo, “mwene wirhu muzigirwa.”​—2 Pt. 3:15.

13. Bintu bici rhukwanine rhurhang’irhanyako amango rhwalonza okuhâna ihano?

¹³ Erhi wakabona oku mwîra wawe alagirire okw’ihano, bintu bihi oshinganine orhang’irhanyako? Embere ojihanûla omwîra wawe, wanarhang’icidosa ntya: ‘Kandi “mushinganyanya okurhalusire olugero”?’ (Muh. 7:16) Omuntu mushinganyanya okulushire olugero arhaba wa bonjo anakatwira abandi olubanja arhali nk’oku amakanuni ga Yehova gadesire ci nk’oku yene anabwine. Erhi akaba enyuma z’okulola n’okuhugûkwa oku kuli kwa bulagirire okuganiza omwîra wawe kw’ako kanga, ohugûkwe amazibu gali gahi na madoso gahi wakakolesa  gakamurhabala yene abone amagosa gage. Olole bwinja erhi ebi oli waderha byoshi birhenzire omu Mandiko, omu kukengera oku arhali we omwîra wawe agokize, cikone agokize Yehova. (Rm. 14:10) Olangalire obwenge buhubuka omu Kanwa ka Nnamahanga, n’omu kasanzi kw’okuhanûla omuntu, oyige oborhere bwa Yezu bw’obonjo. (Mig. 3:5; Mt. 12:20) Bulya gurhi? Bulya Yehova anarhujirire nk’oku rhujirira abandi.​—Yk. 2:13.

14. BicI ikubuliro lya Yehova lirhuha?

¹⁴ Yehova ali arhulongoza kugerera ecigabi c’ikubuliro lyage ca hanw’igulu. Ciri carhuha evideo, ebitabu n’entimanano zirhurhabala okukolesa amahano gali omu Kanwa ka Nnamahanga. Ebyo byoshi biba biyimangire oku Mandiko. Erhi Embaraza Eri Yalongoza erhôla omuhigo gw’oku omukolo gw’amahubiri gwakahikirizibwa, enalangalire iroho litigatifu lya Yehova. Ciru ankaba ntyo, Embaraza Eri Yalongoza enagendekere yalabiriza ngasi mango emihigo yarhôzire okubiyerekire oku ogo mukolo guli gwajirwa lyo babona erhi empindûlo zikwanine okujirwa. Bulya gurhi? Bulya “ebiri byagera omw’igulu binahinduke agandi mango,” na ntyo ikubuliro lya Nnamahanga likwanine licipatanise n’akasanzi.​—1 Kr. 7:31, NWT.

15. Mpindûlo zihi bahubiri baguma-baguma bahunyîrwe okujira?

¹⁵ Buzira karhinda, rhunakulikire buzira kusezibwa obulongozi rhuhâbwa oku biyerekire gurhi ikubuliro likola n’obuyerekire olugenzi. Cikone, gurhi rhujira erhi ikubuliro lya Nnamahanga lyakalerha empindûlo zihumire oku bindi bintu biyerekire akalamo kirhu? Kwa lwiganyo, omu myaka egezire, okuyubaka n’okukubûla Enyumpa z’Entimanano kwahunyire nsaranga nyinji. Okwo kwarhuma Embaraza Eri Yalongoza yaderha oku bihunyire bigamba binji bikakolesa Nyumpa nguma y’Entimanano. Erhi bihikira aho byahûna bigamba biguma na biguma bihirwe haguma n’Enyumpa z’Entimanano nguma na nguma zaguzibwa. Ezo nfaranga baguzagya kw’ezo Nyumpa z’Entimanano zarhumwa omu bihugo byali omu bulagirire bunji bw’Enyumpa z’Entimanano. Erhi akaba olamire omu bihugo Enyumpa z’Entimanano ziri zaguzibwa n’ebigamba biri byahebwa haguma, byanahashikana obe n’amazibu gw’okukomera ezo mpindûlo. Lyo bahubiri baguma na baguma baja oku ntimanano, binahûne bajire olugendo lwa nsa nyinji. Abandi bayubakaga kw’ezo Nyumpa z’Entimanano, banarhondera bacidosa bulya gurhi baziguzize. Abo bene wirhu bakolaga bwenene kw’ogo mukolo gw’okuyubaka erhi kukubula Enyumpa y’Entimanano banarhangira barhanya nkaba oku emisi yabo n’akasanzi kabo  kafîre busha. Cikone eby’okushagalula kuli kubona oku abo bene wirhu bagendekire balunga okuboko ezo mpindûlo, banashinganine okuvugwa omunkwa.

16. Gurhi okukolesa ihano liri omu lwandiko lwa Abakolosi 3:23, 24 kwakarhurhabala rhugendekere rhwaba n’omwishingo?

¹⁶ Rhwanagendekera rhwaba n’omwishingo erhi rhwakahugûkwa oku Yehova ye rhuli rhwakolera n’oku yeri walongoza ikubuliro lyage. (Osome Abakolosi 3:23, 24.) Mwami Daudi arhulekîre olwiganyo lwinja erhi ahâna oburhabale oku bubasi bw’ehekalu. Aderha ntya: “Niono ndi ntaye, n’olubaga lwani lurhali luci, oku bwirhu rhwenene rhurhankahasha okukurhûla zino ntûlo. Byoshi emwawe rhwàbishobolaga, na ntaco rhwakahashikurhûla cirharhenziri emwawe.” (1 Nga. 29:14) Erhi rhuhâna oburhabale rhunakaba rhuli rhwaha Yehova ebyarhengaga omu maboko gage yenene. Ciru akaba ntyo, rhuhugûkwe bwinja oku Yehova anashagaluke bwenene erhi abona rhuli rhwahâna akasanzi kirhu, emisi yirhu, n’ebirugu birhu lyo rhulunga okuboko omukolo alonzize gujirwe.​—2 Kr. 9:7.

17. Bulya gurhi orhakwanini ovunike omurhima erhi wakabona oku oshinganine okubûle olushando lwawe?

¹⁷ Lyo rhubêra omu njira nfunda ehêsire ebwa buzine, rhushinganine rhukulikire enshando za Yezu. (1 Pt. 2:21) Orhavunikaga omurhima erhi byakahûna oku okubûle olushando lwawe lyo lulabarha nk’olwa Yezu. Nkaba eco ciri cimanyiso cinja c’okuyerekana oku olonzize okulongozibwa na Yehova. Rhukengere oku Yehova arharhuhunyiri oku rhube bimana lyo rhuhikira aha rhwayiga olwiganyo lwa Yezu bwinja-bwinja.

18. Bici rhwakajira lyo rhuhikiriza omuhigo gwirhu?

¹⁸ Rhweshi rhukwanine rhusegeze obwenge bwirhu oku kasanzi kayisha n’okuba babidu okukubûla entanya zirhu, engeso zirhu, n’ebijiro birhu. (Mig. 4:25; Lk. 9:62) Rhucihangane okuba birhohye “rhugendekere okuba n’omwishingo, n’okuhindula engeso” zirhu. (2 Kr. 13:11, NWT) Erhi rhwakajira ntyo, “Nnamahanga w’obuzigire n’omurhula aba haguma [nirhu].” Na ntyo rhwahika emunda rhuyerekire na ciru rhwanashagalukira omubalamo gwirhu.