1. Bici byakarhurhuliriza erhi rhwakaciyumva oku ntaye wakarhurhabala erhi amango rhuzidohirwe n’amazibu g’akalamo? (Ennanga 118:5-7)

KW’OKOLA ociyumvirhe oku oli wene n’oku nta muntu ogwerhe wakakurhabala omu kanga walimwo? Bantu banji baciyumvirhe ntyo, ciru n’abakozi bishwekerezi ba Yehova baciyumvirhe ntyo. (1 Bam. 19:14) Erhi akaba oko kwakuhikire, okengere eci ciragane ca Yehova cidesire ntya: “Ntakakuleka, ntakanakulikirira.” Ntyo rhwanaderha n’oburhwali ntya: “[Yehova, NWT] ye murhabazi wani; ntaco nankayoboha.” (Hb. 13:5, 6) Paolo ayandikiraga Abakristu b’e Yudea ezo nderho omu mwaka gwa 61 muli Kano Kasanzi Kirhu (K.K.K.). Zirhukengezize entanya z’omwandisi w’Ennanga ziri omu Ennanga 118:5-7.​—Osome.

2. Bici rhwaganirira mw’eci cigabi, na bulya gurhi?

² Akw’omwandisi w’Ennanga, Paolo al’ihugûsirwe oku Yehova ye Murhabazi wage. Kwa lwiganyo, myaka ibirhi embere ayandikire Abahabraniya ago maruba, Paolo ajira omubalamo mudarhi omu nyanja yalimw’omulaba munji. (Ebj. 27:4, 15, 20) Mw’ako kasanzi koshi ali mw’ogo mubalamo na mw’eyo myaka ibirhi yageraga embere abalame, Yehova agendekera aba Murhabazi wa Paolo omu njira nyinji. Rhwaganirira njira isharhu muli ezo njira. Yehova amurhabala kugerera Yezu na bamalahika, abakulu b’ecihugo, n’ababo bemêzi. Okuganirira ebyahikire Paolo omu kalamo kage, kwanarhurhabala rhuzibuhye obulangalire bwirhu omu ciragane ca Nnamahanga c’okumanya oku Anarhurhabala amango goshi rhwakanamuhamagala.

3. Byanahashikana entumwa Paolo yacidosize gurhi, na bulya gurhi?

³ Entumwa Paolo yal’ilagirire oku burhabale. Omu mwaka gwa 56 muli Kano Kasanzi Kirhu (K.K.K.), olubaga lwamurhuluba,  lwamukululira embuga y’ehekalu y’e Yeruzalemu lwanalonza okumuniga. Olusiku lwakulikiraga erhi Paolo ahêkwa omu Sanhedrini, yeshi al’iyunjwire bihulu by’orhurhi abashombanyi bage bamubambulaga. (Ebj. 21:30-32; 22:30; 23:6-10) Nkaba mw’ako kasanzi, Paolo akabire ali acidosa ntya: ‘Kuhika mangaci nagendekera nalembera aga mazibu goshi?’

4. Gurhi Yehova arhabire Paolo kugerera Yezu?

⁴ Burhabale buhi Paolo ahâbirwe? Obudufu bwakulikiraga olo lusiku ashwekagwa, “Nnawirhu,” Yezu amubonekera, amubwira erhi: “Komera! Kulyala wampamirizagya e Yeruzalemu, kwo okwanine okujimpamiriza e Roma.” (Ebj. 23:11) Kobinali eco ciragane c’aha Paolo omurhima! Yezu avuga Paolo omunkwa oku buhamirizi ahânaga e Yeruzalemu. Anamulaganya oku ahika buzira kadundo e Roma acibihâna y’obundi buhamirizi. Enyuma z’okuhâbwa eco ciragane, Paolo aciyumva nka kula omwana aciyumva nk’ali omu maboko g’ishe.

5. Gurhi Yehova arhabire Paolo kugerera malahika? (Olole enfoto eri oku cijalada.)

⁵ Gandi mazibu gahi Paolo alwisize? Hofi myaka ibirhi enyuma z’okuhikirwa n’amazibu e Yeruzalemu, Paolo ali omu bwarho buyerekire e Italie, omulaba gwaja omu nyanja, abali omo boshi barhanya oku bakola bazika. Paolo yehe arhayobohaga. Bulya gurhi? Abwîra abali mw’obo bwarho ntya: “Neci, ene budufu, malahika wa Nyamuzinda nshiga nnankolera ambonekire, ambwira erhi: ‘Orhayobohaga Paolo, kukwanine ohike embere za Sezari, kandi Nyamuzinda akuhîre obuzine bw’abala muli mweshi omu bwarho.’” Yehova akolesa malahika acib’ikengeza Paolo eco ciragane amuhâga embere kugerera Yezu. Na buzinda Paolo ahika e Roma.​—Ebj. 27:20-25; 28:16.

6. Bici Yezu arhulaganyize byakarhuha emisi, na bulya gurhi?

⁶ Burhabale buhi rhuhâbwa? Yezu agendekire arhurhabala nk’oku arhabalaga Paolo. Kwa alwiganyo, Yezu alaganyize abanafunzi bage boshi ntya: “Ndi haguma ninyu ensiku zoshi, kuhika aha kuyurha [erhi kuhwa, NWT] kw’igulu.” (Mt. 28:20) Ezo nderho za Yezu zo zirhuha emisi y’okulembera. Bulya gurhi? Bulya ene nirhu hali akanga rhujamwo rhubone oku kurhali kulembu okulembera. Kwa lwiganyo, erhi omuzigirwa wirhu akafâ, rhunaciyumve kubi bwenene, arhali mpu nsiku nsungunu zone cikone rhunaciyumve kubi myaka minji. Abandi bali balwisa amazibu gw’obushosi. Ciru n’abandi hali ensiku baciyumva bavunisire omurhima. Cikone ciru akaba ntyo, rhunayumve rhugwerhe emisi bulya rhumanyire oku Yezu adesire oku aba haguma na nirhu “ensiku zoshi,” ciru n’amango rhuli omu mazibu.​—Mt. 11:28-30.

7. Nk’oku olwandiko lwa Amafulûlo 14:6 luyerekine, gurhi Yehova ali arhurhabalamwo ene?

 ⁷ Akanwa ka Nnamahanga karhuyemezize n’obwalagale oku Yehova anarhurhabale kugerera bamalahika bage. (Hb. 1:7, 14) Kwa lwiganyo, bamalahika banarhurhabale n’okurhulongoza amango rhuli rhwayaliza “omwanzi mwinja g’Obwami” oku bantu ba “ngasi bûko, na ngasi lulimi, na ngasi ishanja.”​—Mt. 24:13, 14, NWT; osome Amafulûlo 14:6.

8. Gurhi Yehova arhabalagamwo Paolo kugerera komanda w’abasoda?

⁸ Burhabale buhi Paolo ahâbirwe? Omu mwaka gwa 56 muli Kano Kasanzi Kirhu (K.K.K.), Yezu abwira Paolo oku ahika e Roma. Cikoki, Bayahudi baguma baguma bahîga okumurhuluba mpu banamunige. Erhi komanda w’abasoda b’e Roma Klaudiyo Liziya ayumva oku ogo gw’omuhigo bagwerhe, arhabala Paolo. Duba-duba, buzira kulegerera arhuma abasoda banji​—baj’ilanga Paolo—​balambagira bilometre 105 kurhenga e Yeruzalemu kuhika e Sezariya. E Sezariya Guverneri Felisi arhegeka mpu “bamulangire omu lurhamba lwa Herodi.” Na ntyo Paolo afuma abashombanyi bage.​—Ebj. 23:12-35.

9. Gurhi Guverneri Festo arhabire Paolo?

⁹ Myaka ibirhi yagera enyuma z’aho, erhi Paolo anaciri omu mpamikwa e Sezariya. Ako kasanzi erhi Festo ye kola oli guverneri. Abayahudi basengera Festo oku abarhumire Paolo ayishe asambire e Yeruzalemu, cikoki Festo alahira. Nkaba guverneri abona oku Abayahudi “bali bamulingire omu njira mpu bamuyirhe” hano bamurhuma eyo munda.​—Ebj. 24:27–25:5.

10. Gurhi Guverneri Festo ashuzize Paolo erhi amuhûna oku asimire ajisambira emwa Sezari?

¹⁰ Buzinda, amasambo gw’olubanja lwa Paolo gajijirirwa e Sezariya. Festo, alonza “okusimisa Abayahudi,” adosa Paolo ntya: “K’olonzize orheremere e Yeruzalemu, olu lubanja luj’itwirwayo embere zani?” Paolo al’imanyire oku byanahashikana ajinigirwa e Yeruzalemu, na kandi al’imanyire gurhi akajira ly’ahika e Roma acize obuzine bwage na ntyo agendekeze omukolo gwage. Aderha ntya: “Ndi omu lukiko lwa Sezari!” Obwo erhi aba amaja ihano boshi n’abahanuzi bage, Festo ashuza, erhi: “Obûla ohûnyire okutwirwa omu lukiko lwa Sezari, omu lukiko lwa Sezari wanajaga.” Omuhigo mwinja gwa Festo gwarhabala Paolo afulumuke abashombanyi bage. Kasanzi kasungunu kone, Paolo aciduma e Roma, kuli na Abayahudi balonzagya okumuniga.​—Ebj. 25:6-12.

11. Byanahashikana Paulo akagirhanya oku nderho zihi z’okuhâna omurhima ziri omu bulebi bwa Izaya?

¹¹ Erhi Paolo aba ali acirheganya oku mubalamo gwage gw’okuja e Italie, nkaba akag’irhanya oku nderho ziri omu bulebi bwa Izaya okubiyerekire abashombanyi ba Yehova. Obwo bulebi budesire ntya: “Muhige emihigo, yafânanda: muderhe akanwa: karhagwarhe, bulya Nyamuzinda ali haguma nirhu.” (Iz. 8:10) Paolo al’imanyire oku Nnamahanga amurhabala n’oko kwamuzibuhya alembere amazibu gakamuhukire.

12. Gurhi Juliyo akolire Paolo na gurhi Paolo ayish’irihugûkwa okubiyerekire oyo mukulu?

¹² Omu mwaka gwa 58 muli Kano Kasanzi Kirhu (K.K.K.), Paolo arhangire omubalamo gwage gw’okuja e Italie. Bulya ali mushwekwa, ahirhwa omu maboko ga Juliyo mukulu w’abasoda b’e Roma. Kurhangira ago mango, Juliyo ali agwerhe obuhashe bw’okujirira Paolo bwinja kandi erhi kumujirira kubi. Gurhi Juliyo akolesize obuhashe bwage? Olusiku lwa kulikiraga erhi bahika oku mashinji ga burhanzi, “Juliyo ajirira  Paolo bwinja, amuyemerera okuja emwa abîra bage.” Buzinda, Juliyo acungula akalamo ka Paolo. Gurhi ajijiremwo ntyo? Abasoda bahiga mpu bayirhe abashwekwa boshi bali omu bwarho, cikoki Juliyo abahanza. Bulya gurhi? Âli “alonzize okuciza Paolo.” Byanahashikana Paolo ahugûsirwe oku Yehova ye wakagi kolesa oyo mukulu w’abasoda ly’amurhabala n’okumulanga.​—Ebj. 27:1-3, 42-44.

13. Gurhi Yehova akakolesa abakulu?

¹³ Burhabale buci rhuhâbwa? Erhi akaba kanga kalebe kalinganine n’obulonza bwa Yehova, anakolesa iroho lyage litagatifu ly’ashumya abakulu bajire obulonza bwage. Nk’oku Mwami Salomoni ayandikaga: “Omurhima gwa mwami kwo guli omu nfune za Nyakasane nka mugezi gwa mishi. Emunda alonzize yo anaguhengulira.” (Mig. 21:1) Bici ogo mugani gurhuyigirizize? Bene bantu banahengula omugezi nk’oku banalonzize. Ko n’oko Yehova naye anakolesa iroho lyage litagatifu ly’ahengula entanya z’abakulu zikole nk’oku analonzize ly’ahikiriza obulonza bwage. Erhi oko kwa kahika, abakulu banayumve bashumirwe okurhôla omuhigo gwakalerhera olubaga lwa Nnamahanga obunguke.​—Oshushanye n’olwandiko lwa Ezra 7:21, 25, 26.

14. Nk’oku biyerekinwe omu Ebijiro by’Entumwa 12:5, ndi rhwakagwasa omu masala girhu?

¹⁴ Bici rhwakajira? Rhwanashenga lugenda “abami n’abarhegesi boshi” amango abo bantu barhôla emihigo enyanya z’akalamo kirhu n’omukolo gwirhu lyo barhôla emihigo minja kurhuyerekera. (1 Tm. 2:1, 2, Neh. 1:11) Nk’oku Abakristu bw’omu myaka igana mirhanzi bajiraga, nirhu rhukwanine rhushenge Nnamahanga bwenene lugenda bene wirhu na bali birhu bali omu mpamikwa. (Osome Ebijiro by’Entumwa 12:5; Hb. 13:3) Kandi rhwanagwasa omu masala girhu abalanzi b’empamikwa bali balanga bene wirhu na bali birhu. Rhwanayinginga Yehova amu masala girhu ashumye entanya z’abo bantu lyo barhajiraga bene wirhu na bali birhu kubi, ci bajire nka kulya Juliyo ajiriraga Paolo, kw’okuderha “bakole nka bantu binja.”​—Ebj. 27:3, NWT, amahugûlo gʼidako.

15-16. Gurhi Yehova arhabiremwo Paolo kugerera Aristarko na Luka?

¹⁵ Burhabale buci Paolo ahabîrwe? Paolo ahabirwe oburhabale burhahusa bwa Yehova kugerera ababo bemêzi erhi aba ali omu mubalamo gwage gw’okuja e Roma. Rhuganirire nyiganyo nguma-nguma.

 ¹⁶ Babo bemêzi babirhi bishwekerezi, Aristarko na Luka bahîga okulusa Paolo mw’ogo mubalamo kuhika e Roma. * Buzira kusezibwa, bayemera okuhira akalamo kabo omu mazibu erhi Paolo ye rhumire, ciru akaba bibonekine oku nta muguma muli bo wabwizirwe na Yezu oku barhabe gurhi kuhika bahike e Roma. Oku buzinda, erhi bakola bali omu mubalamo gwabo muzibu lyo boshi bayish’irihugûkwa oku ntako baba. Co carhumire, erhi Aristarko na Luka baba bamaja omu bwarho e Sezariya, Paolo asalira, mw’elyo isala, avuga Yehova omunkwa oku burhabale bw’abo babo bemezi babirhi bayerekanâga oburhwali.​—Ebj. 27:1, 2, 20-25.

17. Gurhi Yehova arhabiremwo Paolo kugerera bene wabo bemezi?

¹⁷ Omu kasanzi koshi kw’omubalamo, Paolo arhabirwe oburhabale burhahusa n’ababo bemezi. Kwa lwiganyo, erhi bahika oku poro yâli omu vile y’e Sidoni, Juliyo ayemerera Paolo “okuja emwa abira bage mpu bamurhabale.” Na buzinda, erhi bahika omu vile ehamagalwa Putiyoli, ‘bashimana yo bene wabo bemezi banabahûna mpu babere nabo nsiku nda.’ Amango abo Bakristu babayegerezagya bakagishibirira amalagirire ga Paolo n’ag’abîra bage. Buzira karhinda Paulo ashagaluka bwenene na ntyo abaganirira ebintu by’okuhâna omurhima byâmuhikire. (Oshushanye n’olwandiko lwa Ebijiro by’Entumwa 15:2, 3.) Erhi bayus’ihumûka, Paolo na balya babo babirhi bagendekeza omubalamo gwabo.​—Ebj. 27:3; 28:13, 14.

18. Bici byashumagya Paolo okuvuga Nnamahanga omunkwa n’okushubiba n’oburhwali?

¹⁸ Erhi Paolo aba ali omu njira eyerekire e Roma, akengera amaruba ayandikiraga cigamba ciguma c’âli mw’eyo vile myaka isharhu embere z’aho. Mw’ago maruba ali desire ntya: “Kurhenga myaka minji erhi kucifinja ncifinja okuja emwinyu.” (Rm. 15:23) Cikoki, arhal’irhanyize oku ahika eyo munda ali mushwekwa. Erhi abona bene wirhu barhengaga e Roma bali bamulingirira oku ibarabara mpu lyo balimulamusa, oko kwamuha omurhima  bwenene! Ebibliya edesire oku “erhi Paolo ababona, avuga Nyamuzinda omunkwa, ashub’iyumva oburhwali.” (Ebj. 28:15) Kw’ohugûsirwe bulya gurhi Paolo avugâga Nnamahanga omunkwa erhi abugana bene wirhu bali aho? Bulya Paolo ashub’ihugûkwa kunganaci Yehova amurhabire kugerera ababo bemezi.

19. Nk’oku biyerekinwe omu lwandiko lwa 1 Petro 4:10, gurhi Yehova akarhukolesa lyo rhuha abandi oburhabale balagirirekwo?

¹⁹ Gurhi rhwakajira? K’omanyire bene wirhu na bali birhu bw’omu cigamba cinyu bali omu mazibu erhi bulwala burhumire, erhi kandi nkaba bali bagera omu kanga kazibu erhi nkaba omuntu bazigiraga afîre? Erhi rhwakabona oku hali muntu mulebe oli omu bulagirire, rhwanashenga Yehova arhurhabale rhuderhe erhi rhujirire oyo muntu kantu kaguma kinja. Enderho zirhu n’ebijiro birhu byanaha bene wirhu na bali birhu omurhima. (Osome 1 Petro 4:10.) * Erhi rhwakajira ntyo, abo bene wirhu rhwanarhabalaga banacib’iba n’obulangalire omu ciragane ca Yehova cidesire erhi: “Ntakakuleka, ntakanakulikirira.” Kw’orhabwini oku oko kwanakulerhera omwishingo?

20. Bici byakarhuma rhwaderha n’obwalagale erhi: “Yehova ye murhabazi wani”?

²⁰ Nk’oku byahikiraga Paolo n’ababo bemezi, nirhu omu mubalamo gw’obuzîne, rhuli rhwagera omu mulaba munji. Cikone ciru akaba ntyo, rhumanyire oku rhwanaba n’oburhwali bulya Yehova ali ahaguma nirhu. Ali arhurhabala kugerera Yezu na bamahika. Kandi, erhi akaba bilinganine n’obulonza bwage, Yehova anarhurhabala kugerera abakulu b’ecihugo. Na kandi nk’oku banji muli rhwe bacibonîre, Yehova anakolesa iroho lyage litagatifu ly’ashumya emirhima y’abakozi bage bajiha bene wirhu na bali birhu Bakristu oburhabale. Co cirhumire, aka Paolo, rhugwerhe ecirhumire cinja c’okulangalira Yehova n’okuderha ntya n’obwalagale: “[Yehova, NWT] ye murhabazi wani; ntaco nankayoboha. Kurhi abantu bankanjira?”​—Hb. 13:6.