Naburhagwa omu mwaka gwa 1983. Erhi mburhwa ntaliko bulema boshi-boshi, cikone erhi nyeneza myaka ikumi narhondera nayumva amalumwa manji omu mubiri goshi. Myaka ibirhi enyuma z’aho, sezi erhi nzuka nayumva ntakacihashicihinya. Najira okwani koshi mpu mpinye amagulu cikone nayabirwa. Kurhangira ago amango, ntacilambagiraga. Obo bulwala bwarhuma ntacikulaga. Kuhika ene nciba mofi nka mwana murho.

Myezi misungunu enyuma z’okulwala n’okurhahashirhenga omu nyumpa, Abahamirizi ba Yehova bandambagirira. Erhi ebigolo byakayishire aha mwirhu, nakag’icifulika lyo barhambonaga, cikone olo lusiku ntagendig’icifulika nabêraho nyumve ebi abo bakazi banganiza. Erhi baganirira omwanzi guyerekire e Paradizo, nakengera oku amango nagwerhe myaka irhanu nayumvirhe ogo mwanzi gwaderhwa. Mw’ago mango, hali misioneri muguma wakag’ihamagalwa Jethro, al’ilamire e Suriname, anakag’ilambagirira olugo lwirhu liguma omu mwezi akag’iyiga Ebibliya haguma na larha. Jethro akag’inkolera bwinja, nal’imuzigire bwenene. Kandi, shakulwe na mugaka bakagi mpêka oku ntimanano nguma nguma z’Abahamirizi ba Yehova zakag’ijirwa omu lugo lwirhu. Co carhumaga erhi Florence, mukazi muguma wa mwabalya bakazi babirhi bal’indambagirire, andosa mpu ka nonzize mpugûkwe bintu binji lugenda ogo mwanzi, nayemere duba-duba.

Florence acirigaluka agandi mango haguma n’iba, Justus, bombi barhondera banyigiriza Ebibliya. Erhi babona oku ntamanyiri okusoma, barhondera banyigiriza okubasoma. Enyuma za kasanzi kalebe, namanya oku basoma. Lusiku luguma oyo mulume na mukage bambwira oku bakola bajikolera e Suriname. Eby’okugayisa kuli kubona oku e Orealla nta muntu wakagendekezize ifunzo ly’Ebibliya haguma na nani. Cikone akantu kw’okushagalula kuli kubona oku Yehova ambisîre omu nkengero zage.

Kasanzi kasungunu enyuma z’aho, painiya muguma wakag’ihamagalwa Floyd ayisha e Orealla, anshanga aha ka erhi ali omu mahubiri ga nyumpa oku yindi. Erhi ambwira okubiyerekire okuyiga Ebibliya, namwemwerhwa. Andosa ntya: “Bulya gurhi omwemwesirwe?” Namubwira oku nayizire ebroshua Mungu Anataka Tufanye Nini? na buzinda narhondera okuyiga ecitabu Ujuzi Uongozao Kwenye Uzima wa Milele. * Namuhugûlira ebyarhumire ntagendekeza ifunzo. Floyd anyigiriza ebigabi ntalisagiyiga by’eco citabu, cikone naye bayish’imurhuma handi-handi. Kandi nacibula owakanyigiriza Ebibliya.

 Omu mwaka gwa 2004, barhuma ba painiya ba pekee babirhi e Orealla, hali Granville na Joshua. Bajira amahubiri ga nyumpa oku yindi, buzinda bambugana aha ka. Erhi bandosa erhi ndozinze okuyiga Ebibliya, namwemwerhwa. Nababwira oku rhuyige haguma ecitabu Ujuzi Uongozao Kwenye Uzima wa Milele kurhenga oku murhondero kuhika e buzinda. Nababwira ntyo lyo ndola erhi nabo banyigiriza ebintu nk’oku abalimu bani b’embere bananyigirizagya. Granville ambwira oku entimanano ziri zajirwa omu lugo lwirhu. Ciru akaba nal’ikola ngwerhe myaka ikumi buzira kurhenga aha mwirhu, nalonza nani nje kw’ezo ntimanano. Buzinda Granville ayish’intola lyo rhuja kw’ezo ntimanano, angwasa omu citi cirikw’amapine, aja ansukuma bunyi-bunyi kuhika aha Nyumpa y’Entimanano.

Erhi hagera ensiku, Granville ampa omurhima oku nciyandise oku Shule ya Huduma ya Kiteokrasi. Ambwîra ntya: “Oli cirema, cikone wanahash’iderha, lusiku luguma wanacijire ehotuba y’abantu boshi. Oko kwanacibe.” Ezo nderho zage zampa omurhima.

Narhondera okuhubiri haguma na Granville. Cikoki amazibu kwali kubona oku njira nyinji z’omu lugo zalimw’amabuye na ntyo okugera mw’ezo njira n’eciti ciri kw’amapine kwali kuzibu bwenene. Nabwira Granville oku angwase omu buruweti aje ansukuma. Oko kwahashikana bwinja-bwinja. Omu Mwezi gwa 4, 2005, nabatizibwa. Enyuma za nsiku nsungunu, bene wirhu bankomereza lyo nka kola oku bitabu n’oku bulenga bw’ebyuma by’omu Nyumpa y’Entimanano.

Eby’okugayisa kuli kobona oku larha ayishifâ omu mwaka gwa 2007 omu kuzama n’e bato. Erhi afâ omulala gwirhu gwasigalana malumwa manji. Granville asalira haguma nirhu n’okurhusomera amandiko gw’okurhuha omurhima gali omu Bibliya. Myaka ibirhi enyuma z’aho, obundi buhanya bwarhuhikira: Granville naye azama n’e bato n’okufâ.

Ecigamba cirhu cirhalimwo bantu banji cabêra buzira mugula na murhabazi w’abagula muguma yene, caja omu ciriyo cinji bwenene. Olufû lwa Granville lwandekera ecihulu oku murhima bulya âli mwîra wani bwenene. Akag’intabala oku malagirire gani g’ekiroho n’agw’omubiri. Oku ntimanano yajiragwa enyuma z’olufû lwage, nie naligwerhe ecigabi c’okusoma ebifungo by’egazeti y’Ilabiro ly’Akalalizi ly’okuyiga. Nasomire bifungo bibirhi birhanzi, ebindi byakulikiraga, narhondera nalaka n’emirenge yalahira okuhwa. Erhi bihikira aho, narhenga oku jukwaa.

Nacibirhondera naciyumva bwinja erhi bene wirhu bw’omu cindi-cindi cigamba bayisha e Orealla lyo barhurhabala. Kandi ebiro by’etawi byacibirhuma emwirhu owundi painiya wa pekee wakag’ihamagalwa Kojo. Nashagaluka bwenene erhi nyama na mulumuna wani barhondera bayiga Ebibliya na buzinda babatizibwa. Omu Mwezi gwa 3, 2015, nayemererwa okuba murhabazi w’abagula. Enyuma za nsiku nsungunu, bampa ehotuba y’abantu boshi. Olo lusiku namwemwerhwa n’okurhoza emirenge y’omunkwa erhi nkengera oku Granville ambwiraga erhi acizine: “Lusiku luguma wanacijire ehotuba y’abantu boshi. Oko kwanacibe.”

Kugerera JW Télédiffusion, nahikira aha nahugûkwa oku kumbe hali bene wirhu na bali birhu balamire akalamo kali nk’akani. Cikoki ciru akaba bali birema, banahikirize bintu binji banagendekire baba n’obushagaluke. Nabona oku nani nanahikiriza bintu binji. Irala lyani ly’okuha Yehova emisi misungunu ngwerhe, lyanshumya ntondere omukolo gw’obupainiya bw’akasanzi koshi. Omwanzi nabwirâgwa omu Mwezi gwa 9, 2019 gwanshagalusa bwenene! Ogo mwezi bambwira oku nkola mugula w’omu cigamba cirhu cibamwo hofi bahubiri 40.

Mvuzire omunkwa bene wirhu na bali birhu bayish’igikanyigiriza n’okunkomereza omu mukolo gwa Yehova. N’akantu kw’obulagirire bwenene kuli kubona Yehova ambisîre omu nkengero zage..