1. Bici Yehova arhuhire omurhima oku rhukajira?

YEHOVA anakabona oku obuzigire bwishwekerezi buba bwa bulagirire bwenene. (Hoz. 6:6) Anahe abakozi bage omurhima oku nabo bakabona obuzigire bwishwekerezi oku buli bwa bulagirire bwenene. Kugerera omulebi Mikeyo, Nnâmahanga wirhu arhubwizire oku ‘rhuzigire obuzigire bwishwekerezi.’ (Mik. 6:8, NWT, amahugûlo g’idako) Kobinali, embere rhubuzigire, rhushinganine rhumanye obuzigire bwishwekerezi byo bici.

2. Obuzigire bwishwekerezi buganirire bici na bici?

² Obuzigire bwishwekerezi byo bici? Oluderho “buzigire bwishwekerezi” luli hofi kali 230 omu Biblia​—Tafsiri ya Ulimwengu Mupya. Olo luderho byo bici? Nk’oku biyerekinwe omu “Maana ya Maneno ya Biblia” gali mw’eyo Bibliya, olo luderho luganirire “obuzigire bushumye n’okucihâna, obwishwekerezi, n’okucishwekerera bwenene. Kanji-kanji lunakolesibwe omu kuganirira obuzigire Nnâmahanga ajira kuli bene bantu, cikone kandi bunayerekanwe egarhi ka bene bantu.” Yehova ye lwiganyo lukulu lw’okuyerekana obuzigire bwishwekerezi. Mw’eci cigabi rhwaganirira gurhi Yehova ayerekana obuzigire bwishwekerezi kuli bene bantu. Omu cigabi cikulikire, rhwayish’iganirira rhwe nka bakozi ba Nnâmahanga gurhi rhwakayigamwo Yehova omu kuyerekana obuzigire bwishwekerezi rhwene na nnene.

3. Gurhi Yehova acifulwîre yenene emunda Musa ali?

³ Hisanzi hisungunu enyuma z’aba Israheli okubunguka e Misri, Yehova acifulûla yenene emunda Musa ali lugenda izino lyage n’amorhere Gage. Aderha ntya: “Yehova, Yehova, Nnâmahanga w’olukogo n’obwonjo, arhakunîra duba anaba wa buzigire bunji bwishwekerezi n’okuli, anakayerekana obuzigire bwishwekerezi oku bihumbi by’abantu, anababalire igosa n’obubi n’ecaha.” (Lub. 34:6, 7, NWT)  Kugerera ezo nderho z’okuhûma oku murhima lugenda amorhere gage, Yehova afululîra Musa ebi obuzigire Bwage bwishwekerezi buganirire. Bicigi ebyo?

4-5. (a) Gurhi Yehova acifulwîre yenene? (b) Madoso gahi rhwaganirira?

⁴ Yehova arhacifulwîri kone nk’ojira obuzigire bwishwekerezi cikone nk’oba wa “buzigire bunji bwishwekerezi.” Ezo nderho ziri omu Bibliya kandi kali ndarhu. (Mib. 14:18; Neh. 9:17; Enna. 86:15; 103:8; Yow. 2:13; Yon. 4:2, NWT) Ngasi hoshi ezo nderho ziri omu Bibliya ziganirire Yehova yenene, ci arhali bene bantu. Ka kurhashagalwiri okubona Yehova yenene asegize oborhere bwage bw’obuzigire bwishwekerezi? Buzira karhinda, obuzigire bwishwekerezi buba bwa bulagirire bwenene kuli ye. * Co carhumaga Mwami Daudi aderha ntya: “Yagirwa Yehova, obuzigire bwawe bwishwekerezi buhisire kuhika empingu . . . Obuzigire bwawe bwishwekerezi buli bwa ngulo ndarhi bwenene, Yagirwa Nnâmahanga! Omu byûbi byawe, bene bantu bayakira.” (Enna. 36:5, 7, NWT) Aka Daudi, ka nirhu rhunashagalukire bwenene obuzigire bwishwekerezi bwa Nnâmahanga?

⁵ Lyo rhuhugûkwa bwenene obuzigire bwishwekerezi byo bici, rhwaganirira aga madoso abirhi: Bandi Yehova ayereka obuzigire bwishwekerezi? Na gurhi rhwakayunguka n’emikolo y’obuzigire bwishwekerezi ya Yehova?

6. Bandi Yehova ayereka obuzigire bwishwekerezi?

⁶ Bandi Yehova ayereka obuzigire bwishwekerezi? Ebibliya eyerekine oku rhwanazigira bintu binji, kwa lwiganyo “okuhinga,” “amamvu n’amavurha,” “okuhanûlwa,” “obumanye,” “obwenge,” n’ebindi n’ebindi. (2 Nga. 26:10; Mig. 12:1, Mashi Bible; 21:17; 29:3, NWT) Cikone, nta mango obuzigire bwishwekerezi buyerekanwa oku bintu; oku bantu kone buyerekanwa. Cikoki Yehova arhayerekana obuzigire bwage bwishwekerezi kuli ngasi muntu. Anakabuyerekana kuli bala bajira obwîra bwa hofi-hofi haguma naye. Nnâmahanga wirhu aba mwishwekerezi oku bîra bage. Agwerhe omuhigo mwinja kubayerekera, arhakanaleka okubazigira ciru n’ehitya.

7. Gurhi Yehova ayeresiremwo bene bantu boshi obuzigire?

⁷ Yehova ayeresire bene bantu boshi obuzigire. Yezu abwira mulume muguma wakag’ihamagalwa Nikodemu ntya: “Nnâmahanga azigire igulu, kuhika ahâna Omugala cusha, mpu ngasi yeshi wamuyemera alek’ihera, ci abone obuzine bw’ensiku n’amango.”​—Yn. 3:1, 16; Mt. 5:44, 45.

8-9. (a) Bulya gurhi Yehova ayereka abakozi bage obuzigire bwage bwishwekerezi? (b) Bici rhukolaga rhwaganirira?

⁸ Nk’oku rhwabwine embere, Yehova anayerekane obuzigire bwage bwishwekerezi kuli bala  bayemera okujira obwîra bwa hofi-hofi haguma naye, k’okuderha abakozi bage. Oko kubonekine kugerera ebi Mwami Daudi n’omulebi Daniyeli baderhaga. Kwa lwiganyo, Daudi aderha ntya: “Ogendekere wayerekana obuzigire bwawe bwishwekerezi kuli bala bakuyishi.” “Obuzigire bwishwekerezi bwa Yehova buba bw’emyaka n’emyaka yoshi kuli bala bamuyoboha.” Na Daniyeli aderha ntya: “Yagirwa Yehova Nnâmahanga w’okuli, [o]yerekana obuzigire bwishwekerezi kuli bala bamuzigira n’okukenga amarhegeko gage.” (Enna. 36:10; 103:17; Dan. 9:4, NWT) Nk’oku biyerekinwe mw’ezo nderho zalongozibagwa n’iroho lya Nnâmahanga, Yehova anayerekane obuzigire bwishwekerezi oku bakozi bage bulya bamumanyire, bamuyobohire, bamuzigire, banakenzire amarhegeko gage. Yehova anayerekane obuzigire bwage bwishwekerezi oku bantu bamuharamya omu njira y’okuli bone.

⁹ Embere rhurhondere okukolera Yehova, rhunayeresibwe obuzigire Nnâmahanga ayereka abantu boshi. (Enna. 104:14) Cikone kandi rhuli bakozi bage, rhunayunguke n’obuzigire bwage bwishwekerezi. Co cirhumire Yehova abwizire abakozi bage n’obwalagale ntya: “Obuzigire bwani [bwishwekerezi, NWT] nta mango bwankakulikirira.” (Iz. 54:10) Na kandi, nk’oku Daudi yene acibwinire, “Yehova akolera omwishwekerezi wage omu njira yago-yago.” (Enna. 4:3, NWT) Gurhi rhwakajira lugenda oko Yehova arhushibirira omu njira yago-yago? Omuzihi w’ennanga aderha ntya: “Oli murhimanya, ashimbe ebi byoshi, arhimanye anakengère bwinja emikolo [y’obwishwekerezi, NWT] ya Nnâmahanga.” (Enna. 107:43) Omu kurhanya kw’ago mahano galongozibagwa n’iroho litagatifu, rhukolaga rhwaganirira omu njira isharhu zihi abakozi ba Yehova bayunguka n’ebijiro by’obuzigire bwage bwishwekerezi.

10. Gurhi okumanya oku obuzigire bwishwekerezi bwa Nnâmahanga buli bw’ensiku n’amango kurhurhabiremwo? (Ennanga 31:7)

¹⁰ Obuzigire bwishwekerezi bwa Nnâmahanga buli bw’ensiku n’amango. Eci cigabi c’obulagirire c’obuzigire bwishwekerezi ciganirirwe kali 26 omu Ennanga 136. Omu mulongo gwa burhanzi, rhusomiremo ntya: “Muvuge Yehova omunkwa, bulyala aba mwinja; obuzigire bwage bwishwekerezi buli bw’ensiku n’amango.” (Enna. 136:1, NWT) Omu mulongo gwa 2 kuhika 26, ekorasi  edesire ntya: “Bulya obuzigire bwage bwishwekerezi buli bw’ensiku n’amango.” Omu kusoma olo lulanga, rhwanasomerwa bwenene n’enjira nyinji Yehova ayerekamwo abakozi bage obuzigire bwishwekerezi buzira kuleka. Ekorasi edesire: “Bulya obuzigire bwage bwishwekerezi buli bw’ensiku n’amango,” erhuyemezize n’obwalagale oku obuzigire Nnâmahanga ayeresa abakozi bage burhankahwa. Oko kurhuhire omurhima bwenene okumanya oku Yehova arhakaleka okuzigira abakozi bage! Lubero n’oko, aba acishwekerire kuli bala bamukolera arhakanabalekerera, ci bwenene omu kasanzi k’amazibu. Gurhi rhuyungukamwo n’oko: Okumanya oku Yehova arhakarhulekerera ciru n’ehitya kunarhuhe omwishingo n’emisi rhulagirireko lyo rhulwisa amazibu rhulimo na ntyo rhugendekere rhwalambagira omu njira ehêsire ebwa buzine.​—Osome Ennanga 31:7.

11. Nk’oku biyerekinwe omu Ennanga 86:5, bici bishumya Yehova okubabalira?

¹¹ Obuzigire bwishwekerezi bwa Nnâmahanga bunamushumye okubabalira. Erhi Yehova abona omunyabyaha ociyunjuzize aleke n’ebyaha byage, obuzigire bwage bwishwekerezi bunamushumye okubabalira. Daudi aderha lugenda Yehova ntya: “Arharhujirira kungana ebyaha birhu, arhanarhulyuza kungana obubi bwirhu.” (Enna. 103:8-11) Kugerera ebi Daudi yenene acibwinire, ahugûsirwe oku amalumwa omuntu aba nago amango ezamiri eri yamutumuza ganaba manji bwenene. Cikone kandi ayiga oku Yehova aba “mubidu w’okubabalira.” Bici bishumya Yehova abe wa kubabalira? Ishuzo liri omu Ennanga 86:5, NWT. (Osome.) Kobinali, nk’oku Daudi aderhaga omw’isala, Yehova aba wa kubabalira bulya aba wa buzigire bunji bwishwekerezi kuli bala boshi bamushenga.

12-13. Bici byakarhurhabala erhi akaba rhuli rhwaciyumva kubi n’okucitumuza lugenda amagosa rhwajiraga mîra?

¹² Erhi rhujira ecaha kuba kwinja okuciyumva kubi lugenda ebi rhwajiraga, n’oko kuciyumva kubi kunashinganine. Oko kwanarhushumya rhuciyunjuze n’okurhôla emihigo yakarhurhabala lyo rhurhacijaga mw’ago magosa. Cikone, hali na bakozi baguma na baguma ba Nnâmahanga bakacitumuza bwenene lugenda amagosa bajiraga mîra. Oko kucitumuza kunarhume barhanya oku Yehova arhakabababalira ciru bakaciyunjuza kunganaci. Okuciyigiriza lugenda oku Yehova ayereka abakozi bage obuzigire bwishwekerezi  kwanakurhabala erhi akaba nawe oli walwisa entanya z’okucitumuza.

¹³ Gurhi rhuyungukamwo n’oko: Ciru akaba rhurhaba bimana, rhwanashagalukira okukolera Yehova n’ezamiri zicîre. Oko kunahashikane bulya “omuko gw’Omugala Yezu gwanarhucêsa, gushuke ebyaha birhu byoshi.” (1 Yn. 1:7) Amango ovunisire omurhima lugenda buzamba bulebe, okengere oku Yehova aba mubidu, kobinali, ajira irala ly’okubabalira omunyabyaha ociyunjuzize. Olole olushangi Daudi ahizireho egarhi k’obuzigire bwishwekerezi n’okubabalira. Ayandika ntya: “Nka kulya amalunga gali enyanya ly’igulu [kwo n’obuzigire bwage bwishwekerezi buli bunji kuli bala bamuyoboha, NWT]. Nka kula ebushoshokero eri kulî n’ebuzikiro, kwo Nnâmahanga ahirika kulî ebyaha birhu.” (Enna. 103:11, 12) Yehova aba mubidu “okubabalira omu njira nnene.”​—Iz. 55:7, NWT.

14. Gurhi Daudi aganirire enjira obuzigire bwa Yehova burhulangamwo?

¹⁴ Obuzigire bwishwekerezi bwa Nnâmahanaga bunahâne obulanzi bw’ekiroho. Daudi ashenga Yehova ntya: “Weba lwakiro lwani onanange ntagwarhagwa n’amalibuko, wanzunguluka n’enyimbo z’obucire. . . . Ocikubagira Yehova obuzigire bwage bwishwekerezi buba bumuzungulusire.” (Enna. 32:7, 10, NWT) Nka kula enkuta zakag’izunguluka evile za mîra lyo zilanga bacikala bazo, ntyo ko n’emikolo y’obuzigire bwishwekerezi ya Yehova erhuzunguluka ly’erhulanga oku mazibu gakahira obwishwekerezi bwirhu omu marhangulo. Na kandi, obuzigire bwishwekerezi bwa Yehova bunamushumye arhubulule emunda ali.​—Yer. 31:3.

15. Lushangi luhi luhali egarhi k’obuzigire bwishwekerezi bwa Yehova n’olwakiro n’ibuye ly’okucifulikaho?

¹⁵ Daudi akolesize olundi luderho luganirire obulanzi abakozi ba Nnâmahanga bashagalukira. Ayandika ntya: “Nnâmahanga yeba lwakiro lwani, Nnâmahanga onyereka obuzigire bwishwekerezi.” Daudi acibiderha lugenda Yehova ntya: “Yeba buzigire bwishwekerezi bwani na lwakiro lwani, w’ibuye ncifulikaho lirimo omurhula na muciza wani, mpenzi yani n’Ola ncifulikamo.” (Enna. 59:17; 144:2, NWT) Gurhi Daudi ayerekine olushangi luhali egarhi k’obuzigire bwishwekerezi bwa Yehova n’olwakiro n’ibuye ly’okucifulikaho? Ciru rhwakaba rhulamire ngahi, erhi rhwakanaba rhuli bakozi bage, Yehova anarhuha obulanzi boshi rhulagirireko lyo rhugendekera rhwalanga obwîra bwirhu bw’engulo ndarhi rhujira haguma naye. Oko kuyerekinwe n’obwalagale omu Ennanga 91. Omwandisi w’olo lulanga adesire ntya: “Obwire Nyamwagirwa [Yehova, NWT], erhi: “We lwakiro lwani, we n’ibuye ncifulikaho.” (Enna. 91:1-3, 9, 14) Musa akolesize oluderho lw’olwiganyo lushushine n’olo lugenda olwakiro. (Enna. 90:1, NWT; amahugûlo g’idako) Hisanzi hisungunu embere Musa afê, aderha ezindi nderho z’okuhâna omurhima. Ayandika ntya: ‘Ayorha aba lwakiro, Nyamuzinda omu nsiku za mîra, anacikazikushumbiriza amaboko gage g’ensiku n’amango.’ (Lush. 33:27) Bici omusemwa gudesire oku “anacikazikushumbiriza amaboko gage g’ensiku n’amango” gurhubwizire lugenda Yehova?

16. Omu njira ibirhi zihi Yehova arhugishamwo? (Ennanga 136:23)

¹⁶ Bulya Yehova aba Lwakiro lwirhu, rhunaciyumve rhuli omu murhula. Cikone, hali amango rhuyumva rhuvunisire omurhima bwenene n’okuyumva ezo ntanya za ntyo zirhahwiri duba-duba. Bici Yehova arhujirira muli ako kasanzi? (Osome Ennanga 136:23.) Anarhuhireko amaboko gage, arhuyimanze bunyi-bunyi n’okurhurhabala rhucibiyimanga na gombi. (Enna. 28:9; 94:18) Gurhi rhuyungukamwo n’oko: Okumanya oku rhushinganine rhukalangalira oburhabale bwa Nnâmahanga kunarhurhabale rhukakengera oku anarhugishe muli ezi njira ibirhi. Burhangiriza, anarhurhabale rhuciyumve rhuli omu murhula rhunali omu lwakiro lw’okunali ciru ankaba rhulamire ngahi. Bwa kabirhi, Larha wirhu w’omu mpingu aba arhushibirire bwenene.

17. Bici rhwakayemera n’obwalagale enyanya z’obuzigire bwishwekerezi bwa Nnâmahanga? (Ennanga 33:18-22)

¹⁷ Nk’oku rhwanabwine, amango rhuli omu marhangulo, rhwanayemera n’obwalagale oku Yehova akola enyanya zirhu omu kurhuha oburhabale rhulagirireko lyo rhugendekera rhwalanga obwishwekerezi bwirhu. (2 Kr. 4:7-9) Omulebi Yeremiya aderha ntya: “Kuli kuba enyanya z’obuzigire bwishwekerezi bwa Yehova co carhumire rhurhahwa, bulya nta lusiku olukogo lwage lwanahike ebuzinda.” (End. 3:22, NWT) Rhwanalangalira oku Yehova agendekera arhuyereka obuzigire bwishwekerezi bulya Ebibliya erhubwizire oku “isu lya Yehova linalange abamuyoboha, bala balinda obuzigire bwage bwishwekerezi.”​—Osome Ennanga 33:18-22, NWT.

18-19. (a) Bici rhulonzize okukengera? (b) Bici rhwaganirira omu cigabi cikulikire?

¹⁸ Bici rhulonzize okukengera? Embere rhurhondere okukolera Yehova, arhuyeresire obuzigire ayereka bene bantu boshi. Cikone kandi rhuli bakozi bage rhunayunguke n’obuzigire bwage bwishwekerezi. Kugerera obo buzigire, Yehova anarhuyubarhire n’amaboko gage gw’obulanzi. Agendekera arhubika hofi-hofi naye na kandi ahikiriza omuhigo gwage kurhuyerekera. Alonzize rhube bîra bage! (Enna. 46:1, 2, 7) Ciru rhwakaba rhuli rhwalwisa marhangulo gahi, Yehova arhuha emisi rhulagirireko lyo rhugendekera rhwaba bishwekerezi.

¹⁹ Rhwabwine gurhi Yehova ayereka abakozi bage obuzigire bwishwekerezi. Okubundi, naye analinguze gurhi rhwakayerekana rhwene na nene obuzigire bwishwekerezi. Gurhi rhwakajiramwo ntyo? Ecigabi cikulikire caganirira ogo mwanzi gw’obulagirire.